Hoixgara 21 - Winnebego Bible Portions 1907

¹ Egi herena wakitujewianaga hageja egi patire‐hawira, rojaxji Koos‐eja hagiwina, egi haininegi Rhodes‐eja hagiwina egi eja hakarawira Patara‐eja hagiwina.

² Egi eja waj hisha hiaewina Phenikiara howakere hikorohorna, hijomianagwina egi hakarawina.

³ Egi jaja Kiprusra hajhawira egi Siria‐eja wawakarawina Kiprusra hoirajge hawireginank wawaikarawina egi Tirus‐eja unina, eja wajra ankijuna.

⁴ Egi eja wironagra hiaewira, hambra shagowiha eja hipushawina. E Paulus wagairena Naxirag hiu, inke Jerusalem‐eja howaranikje.

⁵ Egi jaja hambnanka wawaishibwira, wakitujawina egi khuwina. Egi khuwira hinkishu hahurawina hijawi wahirera egi ninkjang warninera wakarakishu jhinag jangeja hipa hajirena. Egi nijejeja huporo‐himianagwina egi hagikarajwina.

⁶ Egi jaja hiakikaragi dushjawira waj‐eja homianagwina, egi jhira hakja howakarairena.

⁷ Egi jaja Tirus‐eja hikiwarera wakaraishibwira Ptolomais‐eja hakiriwina, egi wakhinubwira waiakaragiwina egi hambisha wakishu hipushawina.

⁸ Egi haininegi Paulus egi jarnaga wakishunanka wakishu hakarawina egi Kesarea‐eja hagiwina, egi Philip Ewangelist hisha herera hojhieja wakawawina, e wishagowina hisha herena egi hakishu hipushawina.

⁹ Egi wang she‐e hinug wajegra jopiwi hinughina, e prophet‐nankshana.

¹⁰ Egi hamb roha eja hipushawina, Judea‐eja prophet hisha howajina Agabus higairera.

¹¹ Egi jaja hiraijiwira, Paulus hipirag harnira russana, egi nab egi si warnira wakurusgijshana egi wena: Naxirag Wakanjangra deshesge ena: Shesgekjanena Jerusalem‐eja Judnanka wangjane hipirag de‐e harnira hirusgij‐hirekjaneshe, egi hirarujeja herera nab warnineja horushjane‐hirekjanena.

¹² Egi jaja washa de‐e naxguwina, ne‐winewianaga egi jarnaga eja hereaka inke Jerusalem‐eja howaranikje hagitawina.

¹³ Egi Paulus horniharna: Jagu sh’uwingaja raxaxwishe egi najge wojhi hinawi? Hauna‐ianjena inke rusgij hierashana eshi shige jekjanena Jerusalem‐eja Hirukanara Jesus rash harnira hawau.

¹⁴ Egi jaja inke taxurugwinira tashjawina wairena: Hirukanara woshga harnira e unkjanegaja.

¹⁵ Egi hambnanka hageja wak’ira waheak’uwina egi Jerusalem‐eja wawatawina.

¹⁶ Egi shige wironagra hota hinkishu harairawina Kesarea‐eja here, egi Mnason higairera Kiprus‐eja hereisha, wironag shag hisha herena, eja hinihahirawina, e hakishu hajhikjawige.

¹⁷ Egi jaja Jerusalem‐eja hahiwira wakhinubwira wogishawa hinus‐hirawina.

¹⁸ Egi haininegi Paulus Jakobga‐eja hinkishu hiwina, egi xetera harnaj hijarnankshana.

¹⁹ Egi jaja wawikaragi rushjara, harnaj hirowajgus wawogiragshana Maura jagu hirarujeja herera wagiuna, wore harnira hiu.

²⁰ Egi jaja naxguinegi, Hirukanara rajankhirena, egi wagairena: Hikhinubwira hashjarna, hogihixete jarnaga Judra harnaxguangra egi harnaj woehira phi‐hina’ixjinankshana.

²¹ Hungirag‐hirawina horninag hirena Judra harnaj washa waragigusgi, jarnaga hirarujeja herera horoghireja unankhi, Mosesga t’unairekje wawiragegi wa’sheshe, ninkjangnig warninera inke wamajhe hiranikje, inke shige woshgara e hiraruxe uinanikje.

²² Jasgekjaneshe? Worohana stoiregi phinana, naxguinekjena rakirira.

²³ Esge jagu hinigawire une, wangra jop harniwira, e washa manajnankshana.

²⁴ She‐e warusge wakishu phinkik’une egi woirowera hirowe‐wagigiaje najura wagirujgis‐hirekjena egi harnaj hiperes‐hirekjena washa jagu hinigaire wawogirag‐hiregi, inke shesgarnira, eshi nexji nishge hixgara phi‐rarajera egi woehira phi‐rarajera.

²⁵ Egi hirarujeja herera hiwawagawina, jarnaga harnaxgura, wawagax hiwagiuwina egi hiwauwina, inke shesge washa uinanikje, she‐eshana washa mau‐kik’u nabhigiruxajhire hinakewe khinekje, egi wa‐i, egi wanoijge doxiorushga russag egi hikikshaksha hinakewe khinekjege.

²⁶ Egi Paulus wangnanka warussana egi haininegi phinkik’u wakishu una egi wohokhu‐hojhixeteja hokewena egi horagshana hamb hophinkik’ura harnaj erehinihekjanegi jarnagananka nabhiruxajra harnaj hishashana nabhiruxaj‐hiregi epa.

²⁷ Egi jaja hamb hishagowira jowe harnaj herenagaja, Judra Asia‐eja howajiregi jaja Paulus wohokhu‐hojhixeteja hajairegi wankshigra harnaj warapuru‐hirena egi harukos‐hirena.

²⁸ Uwainena: Israel wankshigra hingijirawire, wang de‐e herena, e higu wankshig hajinja herera wagigusjena wankshig de‐e wakhirajena egi woehira egi jhi de‐e. Egi hiraijera wauna Hellenistra hishge wohokhu‐hojhixeteregi harni‐wokewena, egi jhi wakanjank de‐e shishig‐hirena.

²⁹ Egi jorni jhinag‐degi Trophimus hakishu unjau hajairena Ephesus wankshig hisha herena. E Paulus wohokhu‐hojhixeteregi harni‐hokeweguni hirairena.

³⁰ Egi jhinaganaka harnaj hixgana egi wankshigra nang‐hajire stoirena, egi Paulus rus‐hirena egi wohokhu‐hojhixete jangeja horutirena, egi higuana jhirobra wawornassairena.

³¹ Egi jaja d’ehi hikorohoiregaja, manape hornihera hung xete harninera woragra hirahina, Jerusalemra harnaj woi‐ingesgakhi.

³² E higuana manape russana egi manape hungra egi hija hornuwang‐hirena egi jaja manape hung xetera hajairegi egi manapera, Paulus hojira girushjainena.

³³ Egi manape hung xetera hiwusunsh higi egi Paulus russana egi mas‐hokiwaxuxugra nupiwi hirusgij wa’shina, egi peshe heregi hiwaxshana, egi jagu ungi.

³⁴ Egi worohanka horogeja hota uwainena washashana airena. Egi jaja inke washa wogisog hiperesnigi woxeake hawau, manape hojhixeteja harni hoikewe wa’shina.

³⁵ Egi jaja hirotieja higi, manapera ruainena, wankshignanka rokana wagiuinege esge.

³⁶ Wankshig worohanka wironagnankshana, uwainena: Nige hot’unawire.

³⁷ Egi Paulus manape hojhixeteja harni hoikawairekjanegi manape hung xetera wagena: Hornikit’ekjera? E wena: Hellenos hit’e shuruxurugshe?

³⁸ Jasge inke Egipt wankshig raninishe, e hojishana woi‐ingesgehira egi wankshig‐d’ehira hogihixete‐jop mojainainja warni hahirera?

³⁹ Eshi Paulus wena: Ne Judrisha winena Tarsus‐eja hereisha Silikia jhinageja, jhinag xeteisha eja winena, egi ningitarna, wankshignagre wokit’e hingigire.

⁴⁰ Egi jaja ungigigi Paulus hirotieja nashina egi nabra hik’uanaga wankshignanka wawigigussana. Egi jaja xapgunixjihiregi wawokit’ena, Hebraia hit’e wena: