Hoixgara 20 - Winnebego Bible Portions 1907

¹ Egi woi‐ingesgera rushjanaga hageja Paulus wironagra wagigorna egi wanat’umbshana egi wakirujena Makedonia‐eja howarena.

² Egi jaja ma de‐e howaregi, egi wawigexji‐anaga Hellenos mainja hina.

³ Egi eja daniha hiwusharna. Egi jaja Judra hirapexjinegi Siria‐eja wajowe howare hikorohogi, Makedonia‐eja hakja howarekje hirena.

⁴ Egi Asia‐eja hakishu harairena Sopater Berea‐eja hereisha egi Aristarxus egi Sekundus Thessalonia‐eja hererena, egi Gaius Derbe‐eja hereisha, egi Timotheus, egi Tixikus egi Trophimus Asia‐eja hererena.

⁵ De‐e jowera howarairanaga Troas‐eja hinperekjanihawina.

⁶ Egi Philippi‐eja wajowe hakarawina waisgabduj winawohi rokani hamb hageja egi hambra sajahangaja wirakiriwina Troas‐eja, eja hambra shagowiha hipushawina.

⁷ Egi hamb jornineja wironagra stoireshununa waisgab rujhe, Paulus wahokhuna, hainigi wakiruje‐kjanarnaga, egi hit’et’era hahekissag hipa ena.

⁸ Egi jhiwang‐hakhohira hiratashakerehira roha hijakshana hajinja hostoirega eja.

⁹ Egi hirohambisha eja wang‐hojiji‐isha Eutixus higairena eja minaganakshana, nanakshana. Egi Paulus wahokhuna s’ii e‐gi, naxjinakshana, egi jhiwang hidanieja shibra‐hurna, egi d’e rus‐hirena.

¹⁰ Egi Paulus harnukanagshana egi hahimpshana egi nat’umbanaga wena: Inke wopuruna hiwinine, niambankshana.

¹¹ Egi jaja shige hogitigi egi waisgab rujhe‐anaga egi ruj‐shana, sixji wawokit’ena hambgu hipa, shesge wakirujhena.

¹² Egi wang‐hojinjira niamb harniakiriregi egi inke jowexjinig rukheg hirawinina.

¹³ Egi joweja wajowe tawina egi Assos‐eja wajowe wawatawina, egi Paulus hijominaikjane hiarawina, shesge wawigege, mowe unkjanena (Assos‐eja hipa).

¹⁴ Egi jaja Assos‐eja hinkihiwira, hijominag hagigiwina, egi Mitilena‐eja hahiwina.

¹⁵ Egi eja wajowe hakarawira egi haininegi Xios‐eja hahiwina egi haininegi Samos‐eja hahiwina egi Trogillium‐eja hipushawina egi haininegi Miletus‐eja hahiwina.

¹⁶ Paulus Ephesusra haixagje hirena Asia‐eja inke hagi hiwusharninage esge hikuhe wauanke Jerusalem‐eja Pentekost hambeja gi‐nainkjanege.

¹⁷ Egi Miletus eja howahi Ephesus‐eja woragre‐wagigina egi wohokhu‐hojhieja xetera wagigorehina.

¹⁸ Egi jaja hajiregi, wawagena: Hirapereswina Asia‐eja hambjorni hajira epa houna jasgeha harnikishu hauwira hoishib.

¹⁹ Hirukanara wagitena warnai warnajojaisge hiu, egi hishjarni hakikshukshu egi wiunjara roha e hiraijinakshana Judra hiraipenankshana.

²⁰ Egi jagu hiniphinkjanihawira hinkisha hatukosnina, eshi ningipahawina egi harusharani washa ningiguswina egi jhira hirakiware wau,

²¹ Wa’howakhuna Judra egi shige Hellenistra Maura eja hapahi najgera karateg hirekjege egi Hirukana harniwira Jesus Kristus harnaxgu hirekjege.

²² Egi horuxujwire, shegunegi naxiragra rusgij Jerusalem‐eja wawakerekjanena, washa jagu eja wawekjanegi inke hiaperesnina.

²³ De‐eshana, Naxirag Wakanjangra jhinag hajinja herega hungiragjena, wena: Rusgijra egi hawera hinpejegi.

²⁴ Eshi washa de‐e inkisha naxirewinijena, inke shige wankshighoi harnira wakaragixetenina, hornag harnira wogishawa hiu waishibikjege, egi wore e Hirukanara Jesus eja hotusra woragphi Maura najwoja harnira hotaikjege.

²⁵ Egi horuxujwire shegunegi, hiaperessana harnaj inke hinupahana hishjaharnira hashjarnikjanihawina, jarnaga Maura hungma harnira hihornikhuwira.

²⁶ Esge hamb de‐e hornigitagwina inke wankshignagre hisha wa‐i harnira hishurnikjanena.

²⁷ Maura woshga harnira harnaj hornigitagwina inke washanisha hatukosnina.

²⁸ Esge hirakikara uwianje, egi hornihera harnaj wirakarawiaje, e Naxirag Wakanjangra wirakara niuwira, Maura wohokhu‐hojhi harnira waruj hokuwine e wa‐i harnira wawiruwina.

²⁹ Egi de‐e hiaperessana hakaranaga hageja shungiang wajexira horograwiregi howaji‐ahuirekjanena, inke hornihera hotawahiranikjanena.

³⁰ Egi shige nexji wangra nanashinkjanihawina, washa hokixajanke hish’ekjanihawina, wironagra warutiranaga, wironag‐hirekjanena.

³¹ Esge hirakarawire, egi wewiwine ma daniha inkaga hatushjanina wakarashira harnaj, hahega egi hambga hishjarni hiu.

³² Egi hikhinubwira, Maura eja hornitushjarehawina egi najoja hoit’e harnieja, E dire‐hi ninuxurughajena egi hoishjara hornik’unkjanihawina horogeja jarnagakhi e wakanjang‐wahira wogarna.

³³ Inke wankshignagre hisha shurasga egi shurasi egi wonashi roagigunina.

³⁴ Ne hirapereswina, nab de‐e wirehiauna jarnaga washara hiaunkjera egi wakishu hauanjane hiuinekjera.

³⁵ Washara harnaj hiperesniwina, warera jasge hare uwianaga kikurushagra washa wagijirawire egi Hirukanara Jesus hoit’e harnira wewiwine jagu era: Washa wogara e hiraijera wogishawa nankshana rusjega e inke shesgexjinijena.

³⁶ Egi jaja deshesge e‐gi, huporo himinagshana egi gikaraj harnaj wakishu una.

³⁷ Egi harnaj mashja xag‐hirena egi Paulus jashera nat’umbhirarnaga egi iokiwank‐hirena.

³⁸ Hoit’era jarnaga e‐ga de‐e hawau, hiraijera najgerateg hirena inke hinupahana hishja harnira hajairanikjanega. Egi waj‐eja hakishu hahirena.