Hoixgara 2 - Winnebego Bible Portions 1907

¹ Egi jaja Pentekost hambra jigi, harnaj warnaira horeishankira hiunankshana nigekira.

² Egi higuana woxe wangregi howajina maintajehira rokana sagrexji hajira hikisgena, egi jhi hominagananka harnaj hoixjina.

³ Egi eja janti‐wagigirena resi jakishanke pej‐nisge, egi harnaj hishashana harnashinena.

⁴ Egi harnaj Naxirag Wakanjangra hoixjinena, egi hit’e hijahi hit’e hajiarairena, jagu hit’airekjera Naxiragra e hit’et’e wagigina.

⁵ Egi Jerusalem hajhira Judra Mau wogixetera, maxikhuhanegi wankshig hokirajnagre hajirena.

⁶ Jaja de‐e woxe hiregi, worohaxjianka hija stoirena egi wowewiharej hirena, wankshignanka naxguinena hit’at’arnanka hit’e harninera hishashana wagarnanke esge.

⁷ Egi harnaj waxixirena egi khorairena, wakigairena: horuxujre jasge hit’at’arnagre inke harnaj Galilea hajhi hiranishe?

⁸ Egi jasgegaja hit’e hiwarniwira arnank hiwarnaxguwishe?

⁹ Parthianra egi Medra egi Elamitra egi Mesopotamia hajhira egi Judea egi Kappadokia, Pontus egi Asia.

¹⁰ Phrigia egi Pamphilia, Egipteja egi Libiaeja nige Kirene hiwusunsh, egi Rome hijahi herera, Judra egi Proselitra.

¹¹ Kretra egi Arabianra, hit’e hiwarniwira hit’arnank hiwarnaxguwingaja Maura wore rokana harnira waungaja.

¹² Egi harnaj khorairena egi jagu hirairekjenisgena, wakigairena: Jagu‐u de‐e wauineshe?

¹³ Hijanera iwawigixja wairena: Nishuj jegra hoixjinankshana.

¹⁴ Egi Peter nashina, hishankirashanara wakarakishu, hit’at’ajirena egi wawagena: Wang Judea‐regi herera egi jarnaga Jerusalem hajhira de‐e hiperes‐ninawina egi hoit’e harnira harnaigixguwine:

¹⁵ Inke de‐e jarnig‐ninakshana, jarnignank hirarawi, hashjarajawina hambregi howagix hitanihajena.

¹⁶ Eshi de‐e erena, Joel prophetra horagnihera:

¹⁷ “Egi herekjanena, hamb hirowagananka Maura wena: Naxirag harnira rora harnaj wapaxunkjanena, egi hinig‐warawiga egi hinug‐warawiga prophet‐hirekjanena, egi hojinji‐washiniwira washa jairekjanena egi wangnunig washiniwira hante hihanterekjanena.

¹⁸ Egi wang ware warnira egi hinug ware warnira hambananka‐eja Naxirag harnira wapaxunkjanena, egi prophet‐hirekjanena.

¹⁹ Egi wangregi wowakanjank janti hakjanena egi mahihageja woijantira jantinkjanena, wa‐i egi pej egi xira hiwapurukjanena.

²⁰ Hambwira hokawas‐jinaikjanena, egi hahewira wa‐ijinaikjanena, kheni Hirukanara hamb‐xete egi rukanakanab harnira jini.

²¹ Egi herekjanena higu peshe Hirukanara gikarajgi niaimbkjanena.”

²² Israel wangra hoit’e de‐e warnaxguwine: Jesus Nasaretheja herera, wang de‐e Maura wogisoghina horograwiregi woshga rokana una, egi wowakanjank, egi woijanti una Maura E ungigina, nishge hiraperes‐harajawina,

²³ E Maura rushjarehina wogus‐shjainja egi washa joweja hoiperes‐harnieja, shuruswina, egi nab wowong hiu naramiheja haraisarajwina egi d’erawina.

²⁴ E Maura kikawa‐agigina, hot’era hoteg harnira girushgena, inke hot’eja harukos phinige esge.

²⁵ E, Dawid hit’et’era wagena: “Hirukanara hoishib hajharna hishja‐joweharegi, sanighoishoro hareginakshana, inke hinujiraranikjege.

²⁶ Esge najge harnira wogishawarna, egi resi harnira wogishawarna, hisgexji ro harnira hishge hoxgasigi karakjaimbkjanena.

²⁷ Naxirag harnira inke hot’eja rat’usharanikjanege esge, nishge inke Wakanjank hashinira d’eg hajairanikjanena.

²⁸ Ne‐hiperes‐hinagaja wankshighoi nagura, hishja hashinira hirak’uanaga wogishawara rokana hinarna.”

²⁹ Wangra egi hikhinubwira, winuwankuni hit’et’e hingigiwire Patriarx Dawidga hironikit’ekjawina, e d’egaja egi xairena, egi wanaxi‐hoshu earnira higiakaja hambegipa.

³⁰ Esge prophet‐isha heregaja, egi hiperessana Maura mangirajshana wihogigirena, ro earnieja sura axebjanega hisha hung‐waminag harnieja minaigkjanera erena.

³¹ E jornineja de‐e hajarna, Kristus hakiha wankshigin harnira horagshana, naxirag earnira inke hot’eja t’unairanina, egi shige ro earnira inke d’eg hajairanina.

³² Maura Jesus de‐e kikawa‐agigina, washa de‐e wihohira harnaj neninewina.

³³ Egi shegunegi hankshi‐hirena Maura nab‐hoishoro harnira wauna, egi Hianjra mangirajra russana, Naxirag Wakanjangra, E de‐e waxuna, shegunegi e hajawina egi hinaxguwina.

³⁴ Egi Dawid inke wangregi howaranina, eshi exji wena: Hirukanara, Hirukana harnira wagena: Nab‐hoishoro harninegi minagre,

³⁵ Hornish’ig hirera si‐warnashi warningi ungi epa.

³⁶ Esge Israel jhira harnaj wogisogji hipereswire Maura Jesus de‐e Hirukana egi Kristus una, E naramiheja haraisarajwina.

³⁷ Washa de‐e naxguinegi, najge warnineja howa‐hiarairena, egi Peter egi Apostel hijanera wawagairena: Wangra egi hikhinubwira jasge hakjanihawishe?

³⁸ Egi Peter wawagena: Najgera‐karategwire egi harnaj ni‐awaxuine‐khiwine Jesus Kristus rash harnira hiu, washa woishanara warnigit’unairekjanihawina, egi Naxirag Wakanjangra hornik’uinekjanihawina.

³⁹ Egi manaj de‐e neashiniwina, egi ninkjang washiniwira egi jarnaga hiroharinagre, egi jarnaga Hirukana Mau harniwira gigogi.

⁴⁰ Egi hoit’e hijahina roha wogiragshana egi wahokhuna, wena: Injab‐khikerewire gi’giaswire wankshighoi hokixajanke de‐e.

⁴¹ Egi jarnaga hoit’e harnira gigiphinegi rus‐hirena niwawaxuinena. Egi hamb‐eja naxiragra hogihixete dani hijornashina.

⁴² Egi hoishib Apostel wogus harnineja unakshana egi wakishu uine, egi waisgab rujhaire, egi gikarajire.

⁴³ Egi naxiragra harnaj naxirairena. Egi Apostelra wowakanjangra egi woijantira roha uinena.

⁴⁴ Egi jarnaga harnaxguinegi harnaj stoirena, egi washara harnaj hakishjeg warninena.

⁴⁵ Egi mara egi (jhira) egi washinjane warninera wawikuruwinena, egi harnaj khiruje wakhinena, jarnaga washa hirujisankhi.

⁴⁶ Egi hoishib wohokhu‐hojhixeteja unankshana wanaira hishankira hiu, egi waisgab rujhera jhira howewouinena, egi warujra wakuruj‐hirena wogishawa egi wanai‐wogisogji hiu,

⁴⁷ Maura rajank, egi wankshigra harnaj najwojaine. Egi Hirukanara hambga wohokhu‐hojhieja hisge hijornashingigijena, jarnaga niaimbjera.