Hoixgara 19 - Winnebego Bible Portions 1907

¹ Egi herena, Apollos Korinth‐eja hahiunjau, Paulus iromahainja manaka e wawogiwena Ephesus‐eja kirina egi wironagra hisge hiena.

² Wawagena: Jasge Naxirag Wakanjangra shuruswishe harnanaxguwinegi? Egi wagairena: Inkaga washa naxguwinina Naxirag Wakanjang hisha nige jigi.

³ Egi wawagena: (Rash) jaguisha hawau ni‐harniwaxunawishe? Egi wairena: John ni‐wawaxu harnira hiu.

⁴ Egi Paulus wena: Hisgexji Johnga ni‐wawaxuna najge‐karategra ni‐wawaxu harninera hiu, wankshigra wawagena: Hisha hiroinag jikjanegi harnaxguinekje, Kristus Jesus herejena.

⁵ Jaja de‐e naxguinegi Hirukanara Jesus rash harnira hiu ni‐wawaxu hirena.

⁶ Egi jaja Paulus nab harnira nassu hihageja wat’umbgi Naxirag Wakanjangra wawirajina, egi hit’e jeg hit’e hajiarairena, egi prophet‐hajiarairena.

⁷ Wangra harnajra kerepanaishanaga‐nup‐hashana wauna.

⁸ Egi wohokhu‐hojhieja hokewena egi wi daniha inke nuwangini hit’et’ena Maura hung ma harnira wawirokit’ena egi waraxurugnaina.

⁹ Egi jaja hota wanuxshag hiregi egi inke harnaxgu hiranina, eshi woroha joweja nagu she‐e washinohira higairena, wat’unakerena egi wironagra injab washurna, egi hisha Tirannus higairera wawagaxhajojhi harnieja hambokahi wirokit’arnankshana.

¹⁰ Egi de‐e ma‐nupaha inkaga harushjainanina, egi jarnaga Asia‐eja jhiakhi harnaj Hirukanara Jesus hoit’e naxguinekjege Judra egi Hellenistra.

¹¹ Egi Maura washa wowakanjang rokanaisha Paulus nab harnieja ungigirena.

¹² Deshesgehina, hishja‐hiwasha egi nabhiwasha ro harnira hikawashagi warus‐hiranaga egi howashaija wakanaghirega, howashara rushjainena egi naxirag shishigra hihinabhirena.

¹³ Egi Judra hikiwarekera hisge wang‐doshewe waunankshana, hiunjairena naxirag shishig harninankhi wawagairena Hirukanara Jesus rash harnira hiu wairena: Unishiwina Jesus hiauwi E Paulus wihokhunjera.

¹⁴ Egi Jud‐hisha Skewa higairera nabhoruxaj hirukana hungra herera, shagowi hinighira de‐e e wauinena.

¹⁵ Egi naxirag shishigra horniharna egi wena: Jesus hiaperes‐shana egi Paulus hiaperes‐shana, eshi peshe ninewishe?

¹⁶ Egi wang naxirag shishig hojhijega wat’ambhurna egi wawarnana egi washinohira wagiuna, deshesgehirena nanoka egi kunugrara jhieja gias‐hirena.

¹⁷ Egi de‐e Judra egi Hellenistra jarnaga Ephesus‐eja jhiakhi harnaj hiperes‐hirena. Egi harnaj naxire jijerena egi Hirukanara Jesus rash harnira rajankjinena.

¹⁸ Egi harnaxgunankhi roha jina egi hokaraghirena egi woshga warninera wakawahairena.

¹⁹ Egi roha hishge jina e wang‐doshewe wiunankhi wawagax warninera warnihajirena, egi taxu‐wahirena wankshignanka jowehireja. Egi hoikisgera wigikarabhirena egi shurasgara hogihixete‐kerepana‐saja hikisge hierena.

²⁰ Deshesge Maura hoit’e harnira hotirera rokanana egi wawarnana.

²¹ Egi washa de‐e rushjanaga hageja, Paulus naxirag harnira hikiwarenaina Makedonia egi Axaia‐eja hianaga, hagnigi Jerusalem‐eja howarekje. Wena, eja hahianaga hagnigi jasgegi Rome hishge wajakjanena.

²² Egi nupiwi wagirajegi Makedonia‐eja howare‐wagigina Timotheus egi Erastus. Eshi exji Asia‐eja jakojank hiwusharna.

²³ Egi higu eegi warapurura inke xununi nashinena woshga de‐e hawau.

²⁴ Wang hisha Demetrius higairera, shurasga hikishereisha herena, e shurasga jhi Diana giunjena, egi jarnaga wore de‐e unankhi inke watagnig ruxurug wahinijena.

²⁵ E sto‐wahina egi wang ware wore wawikisge ura, egi wena: wangwira hiraperes‐wigaja wore de‐e e hitaje hinkhianjera.

²⁶ Egi washjaharajena egi warnanaxgu‐harajena inke Ephesus‐regishana herenina eshi Asia mara jowe harnajna Paulus de‐e waraxurugshana egi wankshigra roha wakshahina, wena, inke mau hiranishe jarnaga nab hiuinegi.

²⁷ Esge wore harniwira inke eshana wonakewesganina inke washinkisge hiranikjera, eshi shige mau hinugra Diana higairera wohokhu‐hojhixete harnira howashere hirekjanena egi hoxete harnira maisinshjanena, e Asia ma harnaj egi managre harnaj gikarajnagra.

²⁸ Egi jaja washa de‐e aire naxguinegi mashja wogiteg hirena egi uwainena, wairena: Ephesian wankshigra Diana harninera xetejena.

²⁹ Egi jhinaganaka harnaj woi‐ingesgera hoixjina egi Gaius egi Aristarxus warukos‐hirena wang Makedonia‐eja here Paulus hikiware wakishura, wanaira hishankira hiu, sagrexji hostokhieja harniwo‐kawairena.

³⁰ Egi Paulus wankshig‐hounanka eja hokewe‐naingaja wironagnanka inke giuinanina.

³¹ Egi wang xete Asia‐eja herera hota, e hijakorowahira, wogirag ji wagigirena gitairena, inke hostokhieja hokawarnikjege.

³² Egi hota uwa washa airena egi hota washinjahi airena egi hostoaka wowewiharej‐hirena. Egi horohana jagu hawau stoiregi inke hiperes‐hiranina.

³³ Egi woroha horogeja Aleksander harnihinab‐hirena, Judra joweja howaire‐hirena. Egi Aleksander nabra hikuanaga wigugussana egi wankshignanka wakarashig hikorohorna.

³⁴ Eshi jaja hiperes‐hiregi Jud‐hisha herera, harnaj hora hishankira hiu howagix nupaha uwainena: Ephesian wankshigra Diana harninera xetejena.

³⁵ Egi jaja jhinag hirukanara wankshignanka gissewewahigi wena: Ephesus wang raniwira, wankshig jaguisha inke hiperes‐nijeshe Ephesus jhinagra Diana mau‐hinugxetera hirakaranagre egi hisgerara e Jupiter‐eja shibre howajina.

³⁶ Washa de‐e hirapereswina inke hakira hit’e ruxurug phinina, esge xapguni phiraniwina egi inke wewini inke washa uwinine.

³⁷ Wang de‐e washini‐rajiwina, e inke wohokhu‐hojhieja wamanu hiraniguni egi inke mau‐hinug hashiniwira raxjashguni hiranina.

³⁸ Esge Demetrius egi wang warera wakishu‐unjane wankshigra hisha washa de‐e wirakiragi, woehieja hiphina, egi hirukanara eja nankshana washara e phinigiu hirawinana.

³⁹ Eshi washa hiraijera roraguwingi, waehira hostoeja haehiranana.

⁴⁰ Wonakewesge hiwa‐uanjawina washa wangige hirekjanihawina hamb de‐e woi‐ingesge hihiwire, egi inke washanisha wirakira hinuxurug‐nikjanihawina puruna de‐e.

⁴¹ Egi jaja deshesge e‐gi hostoaka kerewagigina.