Hoixgara 18 - Winnebego Bible Portions 1907

¹ Washa de‐e hageja Paulus Athen‐eja nigeowakerena egi Korinth‐eja gina.

² Egi Judraisha eja hiena Akuilla rashra higairena, Pontus eja jhuinena hojishana Italia‐eja howajina, hijawina Priskilla higairera hakarakishu (Klaudius Judra harnaj Rome‐eja nigeowakere wa’shige esge) egi Paulus wirahina.

³ Wore hikisge hiperes‐hisha herege esge, egi wakishu jhina, egi warena. Wore warninera waiperi‐jhi u‐hirena.

⁴ Egi Sabath hambokahi wohokhu‐hojhieja wawokit’ena, egi Judra egi Hellenistra waraxurugnaina.

⁵ Egi jaja Silas egi Timotheus Makedonia‐eja howahiregi, Paulus hijowahas‐hirena naxiragra wauna Judra wawogiraikjege Jesus Kristus E herejera.

⁶ Egi jaja hakirairegi egi raxjashguninegi, wonashina karaisinsh‐shana egi wawagena: Wa‐i washiniwira nassu washiniwieja nagikjanena, hinsgehajena, epa hirarujeja hereja wawatekjanena.

⁷ Egi rena egi hisha Justus higairera hojhieja hokewena, Mau gikaraj‐hisha, e wohokhu‐hojhira hiwusunshji jhina.

⁸ Egi Krispus wohokhu‐hojhi hirukanara herena Hirukanara harnaxguna hojhira harnaj wakarakishu. Egi Korinth wankshigra roha naxguankshana harnaxgunakshana, egi ni‐wawaxuhirena.

⁹ Egi Hirukanara Paulus haheregi hokit’ena, washa hajahi higiu. Inke nakawarnine, eshi hit’at’are, egi inke rashjanine.

¹⁰ Harnikishu hauanjena egi inkisha hinikioarnaga washanigishganikjanena. Jhinag degi wankshigra roha harnina.

¹¹ Egi mai‐shanaga egi wi‐akeweha eja una, horoghireja Mau hoit’era wagigusshana.

¹² Egi jaja Gallion Axaia‐eja hirukanara heregi, Judra harnaj warnaira horeishankira hiranaga nashinena Paulus hakira, egi waehi waminageja harniahirena,

¹³ Wairena: (Wang) de‐e wankshigra waraxurugjena Mau gikarajra houna hijahijena, woehieja roxiagra shesge.

¹⁴ Egi jaja Paulus hit’et’e kjenisgegaja, Gallion Judra wawagena: Judra raniwira washanisha higishanagi egi washa wowongra hisha heregi harnanigixguwinana.

¹⁵ Eshi washa hokigusanka egi rashra egi woehi hashiniwira, ne‐hokuruxujwire, inke washa deshesge haeharnikjanena.

¹⁶ Egi waehi waminageja wawahassana.

¹⁷ Egi Hellenistra harnaj Sosthenes wohokhu‐hojhi hirukanara rus‐hirena egi waehi waminag joweja hojinena, egi Gallion washa de‐e inke hisha washa hiranina.

¹⁸ Egi Paulus de‐e hageja s’ii hija una egi wakhinubra wawikaragina, egi wajowe Siria‐eja howarena, egi Priskilla egi Akuilla wakishu, Kenxrea‐eja najura rujgissana, washaisha manajge esge.

¹⁹ Egi Ephesus‐eja hina egi eja wat’unarena, eshi exji wohokhuhojhieja hokewena egi Judra wawokitena.

²⁰ Egi hiraijaira s’iinig wakishu hiwusha nangi‐inena egi inke wagiunina.

²¹ Eshi wawikaragina wena: Jasgegi worujxete here hikorohoagre Jerusalem‐eja haunkjanena, eshi shige hirani‐kirikjanihawina, Maura hingiregi. Egi wajowe Ephesus‐eja kerena.

²² Egi jaja Kesarea‐eja unigi egi rarnaga wohokhuhojhira wikaragina Antiox‐eja howarena.

²³ Egi hageja jarnahangi eja uanaga nigeowarena egi Galatia egi Phrigia mara harnaj hirakiware howarena wironagra harnaj himashja wahikjege.

²⁴ Egi Jud‐hisha Apollos higairera Ephesus‐eja jina, Aleksandria‐eja jhiuinera, wang wait’e waraphisha, egi wowagax hiperesra rokanana.

²⁵ Wang de‐e Hirukanara nagu harnira gigus‐hirena egi naxiragra wahuhujege hit’at’arnaga egi Hirukanara washa warnira wihokhura rokanajena, John ni‐wawaxu harnira eshana hiperesjena.

²⁶ Egi wohokhu‐hojhieja inke nuwangini hit’at’ajirena, egi jaja Akuilla egi Priskilla naxguinegi, harni hagirena, egi Maura nagu harnira hiraijera phixji gigushirena.

²⁷ Egi jaja Axaia‐eja howarekje hiregi, wakhinubra wawagax uinena wironagra wagitairena rus‐hirekjege e, jaja hijahigi, she‐e gijirexji‐hirena jarnaga najojana hawau harnaxgunakhi.

²⁸ Egi Judra warnasgabshana egi wowagaxra hiu harusharanixji wogiragshana Jesus Kristus herera.