Hoixgara 16 - Winnebego Bible Portions 1907

¹ Egi Derbe egi Listra‐eja hina egi horuxujre wironaghisha eja unjena, Timotheus rashra higairena, Judhinughisha hinigra herena egi harnaxguna, eshi hianjra Hellenist hisha herena.

² E wakhinubra Listra egi Ikonium‐eja‐nagra phi hornaxgunakshana.

³ E Paulus hakishu regi giphinana, egi russana egi majhena, ma‐eja Jud jhinagra hawau harnaj higinanke hianjra Hellenist hisha herera.

⁴ Egi jhinagra wowarairegi wogusra wawogarnankshana uinekjege, e Apostelra egi xetera Jerusalem‐eja nagra U‐washirena.

⁵ Egi deshesge hiranaga wohokhu‐hojhira harnaxgura mashjawahirena, egi hambga roha hijornashinakshana.

⁶ Egi jaja Phrigia egi Galatia mara harnaj houinegi Naxirag Wakanjangra Asia‐eja hoit‐era wihokhura roxina,

⁷ Egi jaja Misia‐eja hapahiranaga, Bithinia e howarenainekje, eshi Jesus Naxirag harnira inke wagiunina.

⁸ Egi Misiara haixairena Troas‐eja hahirena.

⁹ Egi Paulus haheregi washanja hirena, wang hisha Makedonia‐eja hereisha nashinjena egi gikarajshana, wena: Makedonia‐regi howahure egi hingijirawire.

¹⁰ Egi washanjara hajarnaga hageja, higuana Makedonia‐eja howare‐naixjiwina. Hirukanara hiperes‐wangahi wangagigo waungaja hirairena woragphira hiwihokhunkjege.

¹¹ Esge Troas‐eja wajowe tawina, rojaxji Samothrakia e wawatawina egi haininegi Neapolis‐eja hahiwina.

¹² Egi eja tawira, Philippi‐eja hahiwina, e jhinag hoxetera herena Makedonia mainja, egi koloni nakshana. Egi jhinageja hamb jarnahangi hauwina.

¹³ Egi Sabath hambregi jhinag jang nijejeja hahiwina, gikarajra eja hahireshunuge egi mianagwina, egi hinug hajirera wawakit’awina.

¹⁴ Egi hinugisha Lidia higairera Purpur wiruwisha herena, jhinag Thiatira‐eja hereisha, e Maura gikarajnank’u naixguwina. E najge harnira Hirukanara giruhas‐shana, hinugjege Paulus washa jagu era harnagixguxjina.

¹⁵ Egi jaja ni‐hawaxuinegi egi hojhira harnaj, hinugjega hinaxurug‐naiwina, wena: Hirukanara harnaxgu hirainashiwingishi jhi wajhieja hokawawire, egi eja hiwushawire, egi hahi‐hinaxurugwina.

¹⁶ Egi herena, gikaraj hahiwira, hinug warnihisha waxopinishishig harnine joweja washa horagisha, hakijawina, e hirukanara hakarani hajirena, washara rokana hiruxurug nankshana joweja washa horagjega.

¹⁷ E Paulus egi ne hiroinagwina, egi uwana, wena: Wangnagre Mau eshana xetera ware warnira waunankshana, e wankshighoi nagura wangogirag hajirawina.

¹⁸ Egi washa de‐e hamb roha shesge hina. Eshi Paulus najgerategshana, hakjampshana egi naxiragjega wagena: Jesus Kristus rash harnira hawau u‐ashina hinugjega eja hihinabre. Egi higuana howagixeja hihinabshana.

¹⁹ Egi jaja hinugjega hirukana warnira hajairegi washinruxurugnagra nigeowakerera Paulus egi Silas harukoshirawina woehieja harniokawairawina jhinag hirukanara hounanka eja.

²⁰ Egi manape hungeja warni‐hahirena, wairena: Wangnagre Judra waunankshana jhinag harniwinegi woxera rokana hinankshana.

²¹ Egi woshga wangagigus nangwina, e woehieja wangarogixi hirawira rusra egi ura, Roman hiniwinge esge.

²² Egi worohanka hishge harnaj nashinena wakhiraire. Egi manape hungra wainira wagirugas hirena, egi nanksig hiroji wa’shirena.

²³ Egi jaja roha wawojinegi jhi‐wawornassairena, jhiwornasse hirukanara wawirakaraxji wa’shirena.

²⁴ E shesge hi’shirawigi, jhi‐wornasse hojhi rog rogjieja wornassairena egi si warninera nainja howaxug shjawahirena.

²⁵ Egi hahe‐kissagregi Paulus egi Silas gikaraj‐hirena, egi Maura rajang nawainena. Egi hornassairera warnaxguinena.

²⁶ Egi sagrexji mara hixgara rokanana jhi‐wornassehojhi ini haminagra hixgana egi higuana jhirobra harnaj gihas‐hirena, egi rusgijra harnaj shgarairena.

²⁷ Egi jhi‐wornasse hojhi hirukanara nananki hikhina, egi jhi‐wornasse hojhi jhirobra gihas nank’u wajarna wigijguxra kurussana egi d’ekinkjege, jhi‐hornassairera gias hireguni hirege.

²⁸ Eshi Paulus mashja giwana wena: Inke washankishganine harnaj higi‐hauanagwina.

²⁹ Egi hiratashakerehi tarna egi damb‐hurna egi gissassa jina, egi Paulus egi Silas jowehireja jimpshana,

³⁰ Egi harni‐wawihinabshana, egi wena: Hirukanawira jasge hagi nia‐aimbjaneshe?

³¹ Egi wairena: Hirukana Jesus Kristus harnaxgune egi horajhira.

³² Egi Hirukanara hoit’e harnira hirokit’airena, egi jarnaga jhi‐ejakhi harnaj.

³³ Egi hahe howagixeja warussana egi wiroji hohimbra wawagirusharna, egi higuana niwawaxuinena, e hereanaga egi warnira harnaj.

³⁴ Egi jaja eojhieja warnigigi, jowehireja waruj wagishurna, egi wogishawajena Maura harnaxgunjege eojhira harnaj wakarakishu.

³⁵ Egi jaja hambgi manape hungra warukos hijowarewagigina wairena: Wangnanka wagirushjanehiwire.

³⁶ Egi jhiwornasse hojhi hirukanara jagu airare, Paulus hogiragshana. Manape hungra ningirushjanehi jihiwina, esge rashguni karawire.

³⁷ Eshi Paulus wawagena: Harusharanixji hunjinawina inke haewinawini, Roman harniwi‐nunige, egi jhihornaisairawina, egi shegunegi nuxawa hihinab hingigirekjanihawishe? Jasgegi inke shesgarnikjanena. Eshi exji hajirekjena egi harni hihinab‐hirekjawina.

³⁸ Egi warukosnanka hoit’e de‐e manape hungnanka wawogiraghirena, egi naxirairena jaja naxguinegi Roman waunangra.

³⁹ Egi hahirena egi wawokit’airena egi harni‐wawihinabhirena egi jhinageja ningewakere warnagi‐inena.

⁴⁰ Egi jhi‐wornasse hojhieja hihinabhirena egi Lidia hojhieja hokawairena egi jaja wakhinub‐hirera wajairegi, wakurukheg hirena egi wakiruje hirena.