Hoixgara 15 - Winnebego Bible Portions 1907

¹ Egi wangra hisge Judea‐eja howajirena wakhinubhirera washa wagigus‐hirena egi wairena: Inke manijehirawinigi Mosesga woshga harnira hish’uwinigi, inke nina‐ambnikjanihawina.

² Esge jaja Paulus egi Barnabas wakhiba‐wakhira inke xununira, egi wakitak‐hirena, wowewira hakishjeg‐hirena, Paulus egi Barnabas egi hijanera hisge Jerusalem‐eja howarairanaga Apostelra egi xetera de‐e wawigiwax‐hirekjege.

³ Egi wohokhu‐hojhi hakishu harairawina, Phenike egi Samaria e hahiowairena, horaghirena hirarujeja herera wakshainegi, egi wakhinub‐hirera harnaj wogishawara rokana wahirena.

⁴ Egi jaja Jerusalem‐eja hahiregi wohokhu‐hojhieja rus‐hirawina egi Apostelra egi xetera wauinena, egi washara harnaj horaghirena Maura jagu wagiungi.

⁵ Eshi Pharisera woinjab‐khina hota nashinena, e harnaxgunagra wairena: Wamajairegi e‐phinana egi Mosesga woehi harnira uinekje wigairena.

⁶ Egi Apostelra egi xetera stoirena washa de‐e haehi.

⁷ Egi jaja kikitagra rokana wairegi Peter nashina egi wawagena: Wangra egi hikhinubwira, hirapereswina, sireja Maura horogregi wangaijawina, hirarujeja herera hoit’e woragphira naxguinekjanera i‐harninegi howahira egi harnaxguinena.

⁸ Egi Maura, E najgera wawiperes‐jena, wawogiragshana Naxirag Wakanjangra wawogaga wangagiuwira shesgena.

⁹ Egi e hereranaga ne inke hisha hijan wangahiwinina, najge warninera waphi‐unjena harnaxgura hiu.

¹⁰ Egi jagu‐u Maura gishja hish’uwishe, wironagra jashe warnineja je‐winapin waragit’umbwishe, e hianjiwahiwira egi shige ne inke hoxere hiruxurugwinina?

¹¹ Eshi harnaxguwina, Hirukanara Jesus Kristus najoja harnira hiu hiniambwina, hishge shesgairekjanena.

¹² Egi worohanka harnaj xapgunixji‐nankshana, egi Barnabas egi Paulus harnagixgu‐nangwina, horagnankshana Maura woijanti egi wowakanjang hirarujeja herera wagiu gigirawigi.

¹³ Egi rashjainegi hageja Jakobga horniharna wena: Wangra egi hikhinubwira, harnaigixguwine:

¹⁴ Simon horagshana, Maura jasge hounahianaga hirarujeja herera jorni wirahigi, wankshignanka eja warusanaga rash harnira harniwagigina.

¹⁵ Egi de‐e hikisgegaja prophetra hoit’e warninera, wagaxangra.

¹⁶ Egi de‐e hagnigi hakja hakirikjanena egi Dawid jhi harnira shige haunkjanena, e khanarnihera. Egi homahujaireja shige jhira haunkjanena, egi roja hakanaikjanena.

¹⁷ Wankshig hirotara nigete Hirukanara horninege, egi hirarujeja herera harnaj jarnaga rash harnira hihokhuinegi, Hirukanara ena, E washa de‐e ungi.

¹⁸ Maura wore harnira harnaj hiperes‐nanksana managre jeg‐ungi epareja.

¹⁹ Esge de‐e wahena: Jarnaga hirarujeja howajira Maura eja howakshainera inke najge wojhi wahiwinine.

²⁰ Eshi wawagax hiwagiunkjawina, mau‐kiku gikarajra hinakewe khinekjena shishigkhinekjanege, egi inke hikikshaksha hiranikjena, egi warni‐doxi horushga russaghire ruj hinakewe‐khinekjena, egi wa‐i.

²¹ Mosesga sirejaxji jhinag‐nagre eja harnaj wahogikhuinena, e woehira giairena wohokhu‐hojhieja Sabath hamb‐hokahi.

²² Egi Apostelra egi xetera egi wahokhu‐hojhira harnaj hirairena, wang gijainekje hornihe warnineja egi Antiox‐eja howare‐wagigirekjege Paulus egi Barnabas wakishu. Rashra warajirena: Judas, rash hinup harnira Barsabas higairera, egi Silas, e wang xetera herena wakhinub horogeja.

²³ Egi wawagax hisha harni‐rewagigirena deshesge airena: Apostelra egi xetera egi wahkinubwira, hinikaragi rehirawina hikhinubwira hirarujeja hereraniwira, jarnaga Antiox‐eja egi Siria‐eja egi Silikia‐eja haranishawigi.

²⁴ De‐e naxguwira esge wauwina, hota eegi howahi hoit’e najge hiwoji ninawigi, naxirag washiniwira wanigirusheshe hirawi, wairena: Jasgegi manije hirawigishana phinashe egi woehira sh’uwingishana, wangnanka inke u‐washi shesge hinigairekjawi hihawinina.

²⁵ Egi histowianaga warnaina hishankira hawira, phinguni hirewahina, wang gijainja eja howare‐hawina Barnabas egi Paulus wawagixetewira wakishu.

²⁶ Wang de‐e wankshighoi harninera wakurushjanehirena, Hirukana harniwira Jesus Kristus rash harnira hawau.

²⁷ Esge shige Judas egi Silas rewagigiwina, e shige washa de‐e i‐hironigirag‐hirekjanihawina.

²⁸ Naxirag Wakanjangra giphinguni hirewahina egi nishge phinguni hiarawina inke wak’in xete hiraijera k’in‐ningiginikjanihawina washa de‐e phinana eshana.

²⁹ Egi mau‐kik’u warni nab higiruxajhire ruj hinakewe khiwianje, egi wa‐i egi washa doxi horushga russaghire ruj hinakewe khiwianje egi hikikshaksha hinakewe khiwianje. Washa de‐e hinakewe warakhiwingi, phirawinana. Hophi howe ronigiguwine.

³⁰ Egi jaja rewagigiregi Antiox‐eja hahiregi, egi jaja worohanka sto‐wahiregi wawagaxra wawogairena.

³¹ Egi jaja hajairegi, warukhegnanka hawau wogishawa hirena.

³² Egi Judas egi Silas prophet hishge waunanke, wakhinubra hoit’era rohaxji wirakara’shina egi mashja wahina.

³³ Egi hirarexji hipa hiwushairegi wakhinubwira rashguni keregigirawina, Apostel‐eja howakarairena.

³⁴ Shesgarnunige Silas higu eja unjera giphina.

³⁵ Paulus egi Barnabas hishge Antiox‐eja higu unankshana, Hirukanara hoit’e harnira wagigus egi wahokhunankshana egi hijanera roha shige.

³⁶ Egi hamb jarnahangiregi Paulus Barnabas wagena: Hiwakhinubra shige hiwomakhini hinekjena, jhinag hajainjashana. Hirukanara hoit’e harnira hiwihokhuna, jasge hinankhi hiwajakjena.

³⁷ Egi Barnabas Johnga rash hinup harnira Markus higairera hakishu re‐naina.

³⁸ Eshi Paulus inke shesgera hisha hakishu re‐phini hiranaina, e wat’unegi Pamphilia‐eja gurna egi inke ware wakishu ranina.

³⁹ Egi kikitagra rokana wairege khiruje‐hirena egi Barnabas Markus russana egi wajowe Kiprus‐eja howarena.

⁴⁰ Egi Paulus Silas gijana egi harairena, wakhinubra Maura najwoja harnieja horushja rehirena.

⁴¹ Egi Siria egi Kilikia eahiwowena, wohokhu‐hojhira mashjawahi.