Hoixgara 13 - Winnebego Bible Portions 1907

¹ Egi Antiox‐eja prophet egi wawagaxhajawagigi wohokhu‐hojhieja nangra Barnabas egi Simon Niger higairena egi Lukius Kirene‐eja hereisha, egi Manaen e Herodes tetrarxra hakishu xetena egi Saulus.

² Egi Hirukanara gikarajnank’u egi hantaginaj‐nank’u, Naxirag Wakanjangra wena: Injab waigigire Barnabas egi Saulus e wore u‐washikjanena.

³ Egi hantaginaj‐hirarnaga egi gikaraj‐hirena egi nassu, hihagra nab‐horewahiranaga nige‐howarewagigirena.

⁴ Egi Naxirag Wakanjangra rewagigina, nigeowarairena egi Seleukia‐eja hahirena egi eja wajowe harairanaga Kiprus‐eja hahirena.

⁵ Egi jaja Salamis‐eja hahiregi, Maura hoit’e harnira wihokhuinena Judra wohokhu‐hojhi harnineja. Egi Johnga hishge wagijire harninena.

⁶ Egi jaja wijnaka hahi haxebhiregi Paphos‐eja hahirena eja wang‐dosheweisha hierena, prophet woret’unk hisha, Jud‐hisha herena, rashra Barjesus higairena.

⁷ E ma‐hirukanara hakishu unjena Sergius Paulus higairera e wang wanaiksab hisha herena. E Barnabas egi Saulus gigornankshana, egi Maura hoit’e harnira naxgu rogunge.

⁸ Eshi Elimas wang‐doshewira (rash harnira shesge higairena hiroragra) wakirajena, ma‐hirukanajega inke warnaxguni nangi‐i hornijena.

⁹ Egi Saulus e hishge Paulus higairera Naxirag Wakanjangra hoixjina horuxuj‐jena,

¹⁰ Egi wena: O waxopinishishig ninkjang ranina, wakerej waruphira egi washingishanara hornixjina, washophira harnaj horashigshana, jasge inke shurushjanikjaneshe Hirukanara woshga‐phi harnira runakerera?

¹¹ Egi horuxujre, Hirukanara nab harnit’uimbkjanena egi hishjara‐nininkjanena, egi inke wira hirarexji hipa hashjarnikjanena. Egi higuana hoirokawas‐shana egi hishjakirujarna egi hisha airutikjera hornijena.

¹² Egi mai‐rukanajega jaja she‐e uine hajagi harnaxguna, Hirukanara wogus harnira gixixshana.

¹³ Egi jaja Paulus egi wawokishgara Paphos‐eja waj hominag hiregi Perga‐eja hagirena Pamphilia mowagax‐eja. Egi Johnga wakirujena Jerusalem‐eja hakja howakerena.

¹⁴ Egi jaja Perge‐eja harairegi Antiox‐eja hahirena Pisidia mowagax‐eja. Egi Sabath‐hambgi wohokhu‐hojhieja hokawairena, egi minaghirena.

¹⁵ Egi woehira egi prophet wowagaxra e‐rashjainegi hageja wohokhu‐hojhi hirukanara wirahiwagigina wairena: Wangra egi hikhinubwira, wankshignagre hoit’era hisha wiragekjawigi awire.

¹⁶ Egi Paulus nashina egi nabra hikuanaga wawigigussana wena: Israel wankshigra, egi Mau nakewera, harnaxguwine.

¹⁷ Israel wankshig de‐e Mau harninera hianj‐hiwahiwira waijana, egi wankshigra hankshi wakerena jaja hijahi jhi hiraniharegi Egipt mainja, egi a‐hankshira hik’uanaga harni wawihinabshana.

¹⁸ Egi ma kerepana‐jopaha warniuna egi wawirakarana mojainainja.

¹⁹ Egi Kanaan‐mainja wankshig howajehi shagowiankhi maisinsh‐wahina, egi mara khirujekhi wagigina horujga uinena.

²⁰ Egi hageja waehira wawogarna ejaxji mogihi‐jopanaga‐kerepana‐saja‐hashanaha, Samuel prophet ejipa.

²¹ Egi hageja hungra hisha roguinena, egi Maura Saul wogarna Kis hinigra Benjamin howajehi warnieja wang hisha, ma kerepana‐jopaha.

²² Egi jaja rushjangigigi Dawid nashi wagikerena hung harninekjege, e Maura wogiragshana egi wena: Dawid hiaena Jesse hinigra, wang she‐e najge harnira giphina, e woshga harnira harnaj hingiunkjanena.

²³ Maura wang de‐e su harnieja Israelra wankshig‐hoi ruxurug hisha Jesus higairegi wagikikawa‐akjane, wigegi karak’una.

²⁴ Khenijini Johnga Israel wankshigra washa woishana najgekarateg ni‐wawaxu wihokuna.

²⁵ Egi Johnga woshgara karak’ujanegi wena: Peshe wineguni hirarawishe? Inke E winenina. Eshi horuxujwire, hisha hiroinag jira, waguje hojana inke girushge hiakisgarnina.

²⁶ Wangra egi hikhinubwira ninkjang Abraham su warnira egi higu peshe higia‐shanakhi Mau nakewera, wankshighoi horuxurug de‐e hurnigigi‐hirawina.

²⁷ Egi jarnaga Jerusalem‐eja jhiakhi egi washirukana warninera inke hiperes‐ninanke, egi inke shige prophetra hora wawiperes‐ninanke, e Sabath‐hambhokahi arnagre, e herewagigiankshana hawehinai waunankshana.

²⁸ Egi inke washanisha hawau d’ehi phininunige, Pilatus d’ehi rogigu hirena.

²⁹ Egi jaja wowagaxeja wagax hirera harnaj exji herehiregi, najega eja rushib‐hirena, egi wanaxi‐hoshueja hot’umbhirena.

³⁰ Eshi Maura d’arnankhi‐eja niamb howakirihina.

³¹ Egi hamb roha hajairena, jarnaga Galilea‐eja hakishu howajiregi Jerusalem‐eja hajirega e worag warnina wankshigeja.

³² Egi woragphi hornigitag hajena hianj‐hiwahiwira jagu wamagirajgi.

³³ Maura karak’una wangagiuwina ninkjang warninera, Jesus niamb‐higa karak’u wauna. Psalm hoe‐hinubeja shesge wagaxankshana: Ne Hinignira, hamb de‐e harninina.

³⁴ Egi d’arnanka eja niamb‐howakirihiga hawau, inkaga d’egnikjanena, deshesge ena: Dawid najwoja wogisog harnira hornik’unkjanihawina.

³⁵ Esge Psalm hijaneja wena: Wakanjang hashinira inke d’eghaja wagiginina.

³⁶ Egi Dawidga wankshig‐hoiniheja Mau woshga harnira hiuna nana, egi hianj‐wahieja t’umbhirena egi d’ek hajairena.

³⁷ Eshi hisha Maura niambhira inke d’ek hajairanina.

³⁸ Esge hipereswire wangra egi hikhinubwira, wang de‐e eja howahi hornikhuwina washa woishana wagit’une.

³⁹ Egi jarnaga harnaxgungi E hiuirarnaga washara harnaj phi‐wahijena, inke Moses woehi harnira hiuanaga phi‐wahi ruxurugnina.

⁴⁰ Esge hirakara‐uwine, nigete prophet wowagaxeja jagu agra hiranijiwiege.

⁴¹ Horuxujwire, woshig’ke‐raniwina egi khorawire egi d’awire, esge hamb washiniwieja woreisha haunkjanena, she‐e inke harnanaxguwinina, hisha hornigiragwigishge.

⁴² Egi jaja Judra wohokhu‐hojhieja hihinab‐hiregi, hirarujeja herera Sabath joweja hoit’e de‐e wawihokhuhirekje tairena.

⁴³ Egi jaja hostora kiruje‐hiregi Judra roha egi proselit mau nakewera roha Paulus egi Barnabas wironag‐hirena. E wawokit’arnankshana egi wawigexjinankshana Maura najwoja harnieja unangikjege.

⁴⁴ Egi Sabath hamb joweja jhinagananka jowe harnaj stonarna Maura hoit’e harnira naxgu.

⁴⁵ Egi jaja Judra worohanka wajairegi, wakiwassara rokana hirena, egi Paulus washa jagu era hagikira hit’airena egi kibahirena egi raxjashguni‐hirena.

⁴⁶ Egi Paulus egi Barnabas wa’shoshe jijerena, egi wena: Mau hoit’era jorni ne hironikit’awigi phinana, eshi hajhawina shawajiswina egi inke wankshighoi hisgejaija here phi hiranana‐kikiwinina, horuxujwire, hirarujeja herenagre eja wawatekjanihawina.

⁴⁷ Hirukanara shesge hi’shiwina wena: Hirarujeja herera hohamb waragigikje warnigiuna, egi ma‐hoshejainja hipa wankshighoi waragi‐shuruxuruigiege.

⁴⁸ Egi jaja hirarujeja herera de‐e naxguinegi, wogishawairena, egi Hirukanara hoit’e harnira girajank‐hirena. Egi jarnaga gijangi wankshighoi hisgeja uinarnaga, harnaxguinekjanena.

⁴⁹ Egi Hirukanara hoit’e harnira manaka harnaj naxguinena.

⁵⁰ Eshi Judra hinug Mau nakewera egi gish’aghirera warapuru‐hirena egi jhinagananka eja wang washirukanara, egi Paulus egi Barnabas wawigishana nai‐wakirairena, egi mowagax sanigeja wowahas‐hirena.

⁵¹ Eshi majushishigra warnajohirena wakhira, egi Ikonium‐eja hahirena.

⁵² Egi wironagra wogishawara rokana hirena egi Naxirag Wakanjangra hoixji hirena.