Hogusra 32 - Winnebego Bible Portions 1907

¹ Egi Jakob kerena egi Maura waxopiniwarajire warnira hirajirena.

² Egi jaja Jakob wajagi, wena: De‐e Maura hornihe harnira, egi ma she‐e rashra Mahanaim higena.

³ Egi Jakob woragra joweja khinubra Esau‐eja howarewagigina Seir mainja Edom mowagax‐eja.

⁴ Egi u‐washina, wena: De‐shesge hirukana harnira Esau hiragekjawina. Ware hashinira Jakob deshesge ena: Laban jhi‐hakuruxena, egi eja de‐shejaixji hipa eja hauna.

⁵ Egi je‐waruti harnina egi shungxete‐najawaxete egi wanoijge hornihe egi wang‐ware egi hinug‐ware. Egi hirukana harnixji hogirag re‐warnigigina joweraija naj‐hunaja hiaekjege.

⁶ Egi woragra Jakob hakja hirakiri‐rena, wairena: Rakinubra Esau eja hahiwina, egi higuana hinikipa jikjanena, egi wangra hogihi‐jop hakishu.

⁷ Egi Jakob naxirera rokanana egi nakewena. Egi wankshigra jarnaga hakishu u‐anka khiruje‐wahina, egi shige wanoijge xunura egi shige jera egi shige wanoijge hoxashogra, hornihe nup hina.

⁸ Wena: Esau hornihera hisha hirajianaga maisinjhigi, higuana hornihe hijane‐hotaka giasikjena.

⁹ Egi Jakob wena: Jaji Abraham Mau harnira egi jajiga Isaak Mau harnira Jehowa, e waigena, ma hashinieja hakja howakarare egi washa‐waraija, egi phi ningigikjanena.

¹⁰ Jarnaga naj‐hiroirajara worujis‐jira inke hiakisgarnina, egi wogisogra harnaj, e ware hashinira ragisha‐wahara. Hissagu harninashana hakarani Jordan de‐e hatujera, egi shegunegi hornihe nup harnigaja.

¹¹ Niamb‐wine ningitarna, hakhinubra nab harnieja, Esau nab harnieja. Nakewege. Nigete jiarnaga maisinjwiege egi hiunihirera ninkjangra wakarakishu.

¹² Egi wa’shena, jasgegi phi‐ningigikjanena, egi su hashinira tejainja pusakenanka wikinani‐kjanena, e inke gikarab phiranikjane worohaxjinge esge.

¹³ Egi eja hiwusharna hahe‐eja, egi jagu ruxurugra eja hisge rus‐harninakshana, khinubra Esau hok’unkjera.

¹⁴ Jharnax hinugra hogihi‐nup, egi jharnax wangra kerepana‐nup, jhasga hinugra hogihi‐nup egi jhasga wangra kerepana‐nup,

¹⁵ Wanoijge huxashog ning was hok’ura kerepana‐dani egi ningra wakarakishu, je hinugra kerepana‐jop egi je wangra kerepanaisha, shungxete‐najawaxete hinugra kerepana‐nup egi ningra kerepanaisha.

¹⁶ Egi ware warnira harni‐wagigina injabshana wawirawahas hirena, egi ware warnira wawagena: Jorni harujawire, egi wirawahasra hojakena‐hireja hokarageshana wirawahas wagigiwire.

¹⁷ Egi u‐washina jowexji‐eja herera wawagena: Jaja hakhinubra Esau hiraki‐pawigi, egi hinigiwax‐wigi, wekjanena: Peshe ninewishe? Egi hajinja horawashereshe? Egi jowereginagre peshe warnishe?

¹⁸ Egi washekjawina: Ware hashinira Jakob warnina. Woga hirena hirukana harnira Esau re‐wagigina. Egi horuxujre hagregi u‐wankshana.

¹⁹ Egi shesge hiwashina hinubeja herera egi shige hidanieja herera, egi jarnaga wirawahasra hironag hiregi, wena: Deshesge Esau hiragekjawina jaja hish’ewigi.

²⁰ Egi hijaira awiaje: Horuxujre ware hashinira Jakob hagregi u‐ankshana. Wena rashguni hiakinkjera wogara joweharegi howareagigina, egi hagnigi hishja earnira hajakjanena, ningete phi hinrusege.

²¹ Deshesge wogara jowehira howare‐gigina. Egi exji hahe‐eja worohainja hiwusharna.

²² Egi hahe‐eja nashina egi hijawi‐wahira hinuwinke warus‐anaga egi hinug‐warera hinuwinke egi hinig‐wahi hishankira‐hashanara egi Jabbok horujgax‐eja harujena.

²³ Egi warusanaga egi nishanag ageja howare wagigina, egi washara jarnaga harnigi ageja howare‐hina.

²⁴ Egi Jakob inekhi jijena, egi eja wang hisha hokinagshana hambgu‐eja hipa.

²⁵ Egi jaja hajagi inke warnanikjanera, regakere hoirakikereja hikiorna, egi Jakob regakere hoirakikere harnira kiwagash‐shana, hokinag‐jau.

²⁶ Egi wang‐jega wena: Hingirushjarehire hambguna. Egi Jakob wena: Inke ningitushjare‐harnikjanena inke naj‐hunajanigi.

²⁷ Egi wang‐jega wena: Jagu rashra hinigaireshe? Egi wena: Jakob hingairena.

²⁸ Egi wena: Rash hashinira inke hinupahana Jakob hinigai‐ranikjanena eshi Israel, Maura rakissarajege egi wankshigra egi washawarnage esge.

²⁹ Egi Jakob hiwaxshana egi wena: Hungiragre, ningitarna rash hashinira. Egi wang‐jega wena: Jagu‐u rash harnira hinagi‐shawaxshe? Egi eja naj‐hojana.

³⁰ Egi Jakob ma she‐e rashra Peniel higena: Maura hishja hirakijage, egi wankshig‐hoi harnira niambge.

³¹ Egi Penuel harujag‐un wira hagixebshana, egi hiwatebankshana regakerera.

³² Esge Israel ninkjangra khan‐rukhixra inke waruj hiranina, e regakere hoirakikereja nagra hamb de‐e hipa. Jakob regakere hoirakikere khan‐rukhix harnieja hikhioge esge.