Hogusra 28 - Winnebego Bible Portions 1907

¹ Egi Isaak Jakob gigorna egi najojana egi ushina egi wagena: Inke Kana‐an hinug‐wahirera hisha khanagnianje.

² Nashine, Mesopotamia‐eja howarare, Bethuel hojhieja hiuniraga hianjra, eja hinug‐khanag‐gaje Laban hinugwahira hisha hiuniraga khinubra.

³ Egi Mau homashjara harnaj harninagra naj‐hornijankjanena egi woja‐ninkjanena, egi woroha‐ninkjanena, wankshig woroha ranikjege.

⁴ Egi Abraham najojaine harnira hornik’unkjanena, ne‐nineanaga egi su hashinira wakarakishu, managre eja warakuruxarajera hashinikjanena, e Maura Abraham hok’ura.

⁵ Egi Isaak Jakob nige‐howaregigina, egi Mesopotamiaeja howarena, Laban‐eja Bethuel hinigra, Sirian wankshig‐hirena, Rebekah khinubra, Jakob egi Esau hiunihirera.

⁶ Jaja Esau hajagi, Isaak Jakob naj‐hojanaga, egi Mesopotamia‐eja howaregigigi, eja hinug‐khanaikjege egi najhojanaga u’shina wagena, inke Kana‐an hinug‐wahirera hisha khanag‐nianje.

⁷ Egi Esau hajagi Jakob hianjra egi hiunira warnaxguanaga egi Mesopotamia‐eja howarera,

⁸ Egi Esau hajagi Kana‐an hinug‐wahirera hianjra Isaak wajara inke waiphinigi,

⁹ Esge Esau Ishmael‐eja howarena, egi hijawi wahira Mahalath hirassa russana Ishmael hinugra, Abraham hinigra Nabajoth hinug‐jabra khanagshana.

¹⁰ Egi Jakob Be‐er‐sheba‐eja rena egi Haran eja howarena.

¹¹ Egi ma‐eja nige hina egi eja haiserej hiwusharna, wira hirege esge. Egi ini eja rus‐anaga egi wipei kik’una, egi eja ming‐anaga nana.

¹² Egi washin hantena, egi horuxujre mainja hirotisha kererena, egi hissawara wangeja hirakerena. Egi horuxujre Maura waxopini‐warajire warnira harnukanag‐nankshana egi hogiti‐nankshana.

¹³ Egi horuxujre, Jehowa hihageja nashinjena egi wena: Newinena Jehowa Mau Abraham harnira hianjraga. Egi Mau Isaak harnira ma horaming‐shawangre hornik’unkjanena egi su hashinira.

¹⁴ Egi su hashinira manegi majushigra wikinakjanena. Egi wioireja hipa hahi hornierekjanena, egi wiaxebhueja egi wioweshguni‐eja, egi wiorojanjeja. Egi ne‐nineanaga egi su hashinieja howahi wojhirera harnaj maneginagre washophi howairekjanena.

¹⁵ Egi horuxujre, harnikishu hauanjena, egi higu hajinja horawasheregi hirani‐karakjanena, egi ma‐tegi shige harnini‐hakirikjanena. Inke nintutanikjanena egi jagu manigitajre harnaj hak’ungi epa.

¹⁶ Egi Jakob nanaki hikhina, egi wena: Hisgexjingaja, Jehowa ma‐tegi unjegaja, egi inke hiaperesni.

¹⁷ Egi naxirena, egi wena: Hisgexji ma‐tegi naxiresgegaja. De‐e inke washinjahini Maura hojhira heregaja, egi de‐e wangregi jhirobra heregaja.

¹⁸ Egi Jakob hainixji khikawa‐ana egi inira rus‐shana, e hipeinra, egi nashi‐kerena wijanti‐u, egi hihageja wikini hawaxuna.

¹⁹ Egi ma‐she‐e rashra Beth‐el higena, eshi jhinag she‐e jegeja Lus rashra higairena.

²⁰ Egi Jakob washa manaj hisha manajshana, wena: Maura hinkishu unjegi, egi nagu tegi wawatahare hiraikarakjanegi egi waisgabduj ruj hunk’ungi egi waini hingiungi,

²¹ Jajiga hojhiregi rashguni shige hakirigi, hisgexji Jehowa Mau niarnikjanegaja.

²² Egi ini de‐e nashi hakerere wijanti, Maura hojhira herekjanena. Egi washara jarnaga hunak’unkjanegi jasgegi hikerepanaishara hornik’unkjanena.