Hogusra 19 - Winnebego Bible Portions 1907

¹ Egi waxopiniwarajire nup hajega hoxjarnanegi Sodomeja hahirena, egi Lotga Sodom jhirobeja minaganankshana. Egi Lotga wajagi nashianaga hikipahina, egi wakhuna.

² Egi wawagena: Horuxujwire hirukana harnixjiwi, hokawawire ningitawina, ware hashiniwira hojhieja, egi haiserej hinwushawire egi si washiniwira wakurushawire, egi hainixji rakikawa‐awianaga egi sherekjawina. Egi wairena: Inka, eshi haiserej naguregi hauanje‐kjanihawina.

³ Egi hawexjiwahina, egi hakishu harairena egi hojhieja hokawairena. Egi waruj wagiuna egi waisgab hinawohi rokani duj‐hina egi waruj‐hirena.

⁴ Eshi kheni ming‐hirani wang jhinag‐eja herera Sodomitra wankshigra jhinaka haikshainena, shagra egi wajegra, jhinaganaka harnaj wankshigra hajirena.

⁵ Egi Lotga gigoirena egi wagairena: Wangra hajinja nankshe hahe de‐e hiranijirera, harni wigihinabwire, e waiaperes‐hikjawina.

⁶ Egi Lotga hihinabshana jhirob‐jangeja hijeanaga egi jhirobra hageja hornakarasse hijena.

⁷ Egi wena: Ningitawina hikhinubwira inke wowongra de‐shesgawinine.

⁸ Horuxujwire, nupiwi hinughara kheni wang hiperesnina, ningitawina hani winigi‐hinaibjawina, egi jasge raiphiwingi waragish unkjawina. Eshi wang‐nagre inke washa wagiu‐winine, shesge‐wagiu wajhiregi hokawairena.

⁹ Egi wairena: Hijahi nashine. Egi shige wairena: De‐e mawakuruxe jinihera egi hoishib wanghirukana naiwi, egi shegunegi ne hiraijera shishig ningigi‐kjanihawina, jasge wagigiwinana. Egi wangjega Lotga hiraijera mashja giuinena, egi jowe jhirobra gixux‐hiranana.

¹⁰ Eshi wangananka nabra hihinab‐wahiranaga egi Lotga jhirogeja horutirena, egi jhirobra hornassairena.

¹¹ Egi jhirobeja wangananka hishjaraning‐wahirena, xununigra egi xetera, hinjge khinena jhirobrahienai.

¹² Egi wangananka Lotga wagaireua: Washinigi higi hishaniheshe watohojhi washinigi egi hinigwaragi, egi hinugwaragi egi washa jagu jhinag‐egi hashinigi ma‐degi hani‐wihinabre.

¹³ Ma de‐e maisinsh hakjanihawige. Ma‐degi uwara rokana howahiake Jehowa hishja jowehieja esge. Egi Jehowa huingigiwina maisinsh‐hi.

¹⁴ Egi Lotga hihinabanaga egi watohojhi wajabra wawokit’ena hinugwahira wakishurekjanegi egi wena: Nashiwine ma‐degi hihinabwire Jehowa jhinag de‐e maisinsh‐hikjanege esge. Eshi watohojhi wajabra warashij‐waje hiranainena.

¹⁵ Egi jaja haini hakirigi waxopiniwarajire‐nanka Lotga hirawashij‐hirena, wairena: Nashine, hijawinaga rusanaga egi hinugwaraga nup higi‐harnagre inke ne hishge manisinshui‐kjawige jhinag‐nagre hawekjanera.

¹⁶ Egi jaja hiwusha‐shagi, wangnanka nabeja harukoshirena egi hijawira nab harnira egi hinugwahira hinuinke nab warninera, Jehowa najogija‐jeje esge, egi harni hihinab‐hirena egi jhinag‐jangeja kererena.

¹⁷ Egi herena, jaja hihinab‐harninegi wagena: Giasre niambnaine, inke hakjamb‐nianje, inke shige hosunsh‐eja unjanianje, xeja hogiasre inke ne‐shjarnikjege.

¹⁸ Egi Lotga wawagena: Hirukana harnixji inke shesgarnikjena.

¹⁹ Horuxujre ware hashinira joweraija najhojaine hiejanegi, najoja hashinira hiraijera hingigire, e hinagishawahara, wankshig‐hoi harnira niamb hinagigi. Inke xeja hogias duxurug‐nina, ningete washoshishig hiraijianaga egi jhege.

²⁰ Horuxujre, jhinag de‐e ashgenig‐nank hogiasra, egi xununig hisha heregaja, eja hogias‐hingigire jasge inke xununig hisha hereninakshe? Egi naxirag harnira niaimbkjena.

²¹ Egi wagena: Horuxujre gisij himashja jijenina, inke jhinag de‐e maisinsh harnikjanena, e waragarajane.

²² Xapge higire eja hogiasre, inke washara hisha haunikjanena hebregi hijarahigi hipa. Esge jhinag‐anaka rashra Soar higairena.

²³ Wira haxebshana jaja Lotga Soar‐eja higi.

²⁴ Egi Jehowa Sodom egi Gomorah Brimstone egi pej hashu wahina, wangregi Jehowa eja howaji.

²⁵ Egi jhinag‐ananka maisinsh wahina egi hosunshra harnaj, egi jhinag wawojhirera harnaj egi washara jarnaga mainja haxebankhi.

²⁶ Eshi hijawira hageja uankhi hakjambshana egi nisgujijena.

²⁷ Egi Abraham haininegi hainixjinig kikawaana hajinja Jehowa jowehieja nashira eja hina.

²⁸ Egi Sodom egi Gomorah sanig‐eja horuxujshana egi sanig ma‐hosunshra harnaj, egi hajarna, egi horuxujre mara xi wangra howarena, mas‐hotaxirihi xi‐nisge.

²⁹ Egi herena, jaja Maura hosunsh‐eja jhinag‐ananka maisiush wahigi Maura Abraham wewina, egi Lotga maisinsh wahire horogeja hihinab‐keregigina, jaja jhinagra maisinsh wahigi Lotga hojhiniheja.

³⁰ Egi Lotga Soar‐eja nigiowarena egi xeja jhina, egi hinugwahira hinuinke wakarakishu Soar‐eja jhira nakewege egi nish‐hopoxeja jhina e hereanaga egi hinugwahira hinuinke.

³¹ Egi jowarejega xunujega wagena: Hianj‐hihira shagkaja, egi manegi inke wangra hisha janina, wanghakishukjera, manegi woshga unagra ura.

³² Hure, egi hianj‐hihira nishuj rajga hingigikjena egi hakishu himinkjena e hianj‐hihira su eja horus‐hikjena.

³³ Egi hahe‐eja hianj‐hirera nishuj rajgan‐gigirena, egi jowarejega hijokewena egi hianjra hakishu mingshana. Egi Lotga inke hiperesnina jaja hakishu mingkhi egi shige iuke jaja kikawa‐angi.

³⁴ Egi herena haininegi jowarejega xununa wagena: Horuxujre hahere jajiga hakishu hamingshana, hahe de‐e shige nishuj rajga hingigikjena egi ne hijorakawanaga egi hakishu minggaje, e hianj‐hihira su eja horus‐hikjena.

³⁵ Egi hahe‐eja shige hianj‐hirera nishuj rajgan‐gigirena. Egi xunujega nashianaga egi hakishu mingshana, egi Lotga inke hiperesnina jaja hakishu mingkhi egi shige inke jaja kikawa‐angi.

³⁶ De‐shesge Lotga hinugwahira hinuwinke hirena hianj‐hirera waugijganag hirena.

³⁷ Egi jowarejega hojinjinig hisha harnina egi rashra Moab higena. De‐e Moabit wankshigra hianj‐hirera herena hamb de‐e hipa.

³⁸ Egi xunujega hishge hojinjinig hisha harnina egi rashra Ben‐am‐mi higena. De‐e Ammon wankshigra hianj‐hirera herena, hamb de‐e hipa.