Hogusra 11 - Winnebego Bible Portions 1907

¹ Egi managre harnaj hit’era hishankirana egi hoit’era hishankirana.

² Egi wauinena wiaxebhu sanigeja hikiware harairena hosunsh nige hirahirena Shinar mainja egi eja jhirena.

³ Egi wakigairena: Hinawianaga ini tashuj hiunkjawina egi s’i tashuj hiwahikjawina. Egi ini tashuj hiuinena inira e herewahire egi rexoro wirara‐ax hiuinena hirakira‐ax hiuine.

⁴ Egi wairena: Hinawianaga jhinagra hisha hinkik’unkjawina egi jhi‐hankshira, e hissawara maxiwangeja hirakerekjena, egi rash hinkik’unkjawina, inke managre harnaj wangoe‐ranikjawina.

⁵ Egi Jehowa jhinagra hajajina egi jhi‐hankshira, e wankshig ninkjangra uinera.

⁶ Egi Jehowa wena: Horuxujre wankshignagre hishankira hiregaja egi harnaj hit’era hishankira hiregaja. Egi de‐e un hajiarairare egi inke washanisha rushag hiranikjanegaja washanisha uinekje hirairegi.

⁷ Hinawianaga harnukanag‐wianaga egi hit’e warninera hikirupana hirekjena, hit’et’era inke nankixgu hiranikjege.

⁸ Egi Jehowa eja managre harnaj hoerare‐wahina egi jhinag una rushjainena.

⁹ Esge rashra Babel higairena, Jehowa eja hit’era hikirupana wahige maneginagra harnaj. Egi Jehowa eja managre harnaj hoerare‐wahina.

¹⁰ De‐e Shem hokijhu harnira herena. Shem ma hogihishangaja egi Arphaxshad hagarninena nijanaga hageja ma nupahanegi.

¹¹ Egi Shem Arphaxshad hagarninanaga hageja ma hogihi‐sajaha wankshig‐ina, egi hinigwahi jhuna egi hinugwahi.

¹² Egi Arphaxshad ma kerepana‐danianaga egi saja hashanaha wankshig‐ingaja egi Shalah hagarninena.

¹³ Arphaxshad Shalah hagarninanaga hageja ma hogihijop‐hanaga egi dani‐hashanaha wankshig‐ina egi hinigwahi jhuna egi hinugwahi.

¹⁴ Egi Shalah ma kerepana‐daniha wankshig‐ingaja egi Eber hagarninena.

¹⁵ Egi Shalah Eber hagarninanaga hageja ma hogihijop harnaga egi dani‐hashanaha wankshig‐ingaja egi hinigwahi jhuna egi hinugwahi.

¹⁶ Egi Eber ma kerepana‐danihanaga egi jop‐hashanaha wankshig‐ingaja egi Peleg hagarninena.

¹⁷ Egi Eber Peleg hagaruinanaga hageja ma hogihijopanaga egi kerepana‐dani‐hashanaha wankshig‐ingaja egi hinigwahi jhuna egi hinugwahi.

¹⁸ Egi Peleg ma kerepana‐daniha wankshig‐ingaja egi Reu hagarninena.

¹⁹ Egi Peleg Reu hagarninarnaga hageja ma hogihinupanaga egi hishankijushguniha wankshig‐ingaja egi hinigwahi jhuna egi hinugwahi.

²⁰ Egi Reu ma kerepana‐danianaga egi nup‐hashanaha wankshig‐ingaja egi Serug hagarninena.

²¹ Egi Reu Serug hagarninarnaga hageja hogihinupanaga egi shagowi‐hashanaha wankshig‐ingaja egi hinigwahi jhuna egi hinugwahi.

²² Egi Serug ma kerepana‐daniha wankshig‐ingaja egi Naxor hagarninena.

²³ Egi Serug Naxor hagarninarnaga hageja ma hogihinupaha wankshig‐ingaja egi hinigwahi jhuna egi hinugwahi.

²⁴ Egi Naxor ma kerepana‐nuphanaga egi hishankijushguni‐hashanaha wankshig‐ingaja egi Tarah hagarninena.

²⁵ Egi Naxor Tarah hagarninarnaga hageja ma hogihishanaga egi kerepanaishanaga‐hishankijushguni‐hashanaha wankshig‐ingaja, egi hinigwahi jhuna egi hinugwahi.

²⁶ Egi Tarah ma kerepana‐shagowiha wankshig‐ingaja egi Abram hagarninena egi Naxor egi Haran.

²⁷ Egi de‐e Tarah hokijhu harnira herena: Tarah Abram hagarninena egi Naxor egi Haran, egi Haran Lot hagarninena.

²⁸ Egi Haran d’ena hianjra Tarah kheni d’arni e mojabeja Ur eja Xaldea mainja.

²⁹ Egi Abram egi Naxor hinug khanag hirena. Abram hijawira rashra Sarai higairena. Egi Naxor hijawira rashra Milka higairena, Haran hinugra e Milka egi Jiska hianjra.

³⁰ Eshi Sarai nink‐jushgunisha herena, inke ninkjang jhunina.

³¹ Egi Tarah hinigra Abram russana egi Haran hinigra Lot e Tarah hinigra hinigra, egi Sarai e hinug‐jegjabshana hinigra Abram hijawira she‐e Ur eja Xaldea mainja wakishurena Kana‐an mainja howarairena egi Haran ma‐eja hahirena, egi eja jhirena.

³² Egi Tarah hamb warnira ma hogihi‐nupanaga egi saja‐hashanana. Egi Tarah d’ena, Haran mainja.