Hebrews 8 - Wik-Mungkan

Nil Christ.ana Priest Piꞌan Ngampar Aak In Kenyana

¹ Niiy min-min wik inan ngeeyāna, ngay wik engkanang umpāng niiyant: nil Jesus pam priest wuut piꞌan ngampar in keny aak achantang piip-kunchantang God.antang wunana, aak min paththamangan. Pulan moom piꞌan karpam iiy-iiyanpul,

² aak in kenyan wun-wunanpul, aak min paththam an keny pulant nil God.angan yump, pamang yaꞌa.

³ Aak inganiya ngampan wunanamp-a, than pam piꞌ-piꞌanam priests al-alangan minh kiingk-kiingkin piip God.anta aꞌ puth way min thamp wamp-wampathin nunganta puth God.angan work inan theeꞌ thant priests al-alantan. Nil puth Jesus.an priest tham, nil puth minh thakan keꞌam theeꞌ nungant, nil nungamang ep theetath.

⁴ Nilwey Jesus aak ing pek yippakan wun-wuniywey-a, nilan priest keꞌ iiy-iiyiya, puth than priests yot wun-wuntan aak inganiya, wik thayan Moses.antaman piꞌ-piꞌantan, puth may minh thakan wamp-wampathantan nungant God.antan.

⁵ Nil keꞌ pam Moses alangan aawuch ngench thayanan kaachiy aak ing pekan-a, earthangan-a, nil piip God.an thaw nungant, “Ngay aawuch maanyan kanam meenathangan nungkara aak yoykang angana. Yaa, nintaniya yimanangan kaachān aawuch ngenchaniy, tabernacle.an, keꞌ ngayaman meenathangan nungkara.” Ngampaniy priests anangan thathāmp thanangan-a, work an pekan iiy-iiyantan aawuch ngench thayanang angan-a, aꞌ ngampaniya ngaantam-ngeeyāmp aak ngench thayan God.antam in kenyana -- puth tabernacle ngench thayan keenkan yumpin aak ingan-a, an keꞌ maanyang meenathan aak ngench thayan paththamana aak in kenya, aak heavenana. Puth than pam priests anangana keꞌam work iiy-iiyantan aak ang kenyana yaꞌa. Nil pam thonam priest iiy-iiyan Christ anman aak in kenyan.

⁶ Nil Christ.ana priest min paththam iiy-iiyan, than priests wiy anangan work chil way iiy-iiyantan. Puth inan thamp, nil Jesus.angan wik God.antam wampath pam wanchant. Wik God.antaman min paththama, an keꞌ wik thayan keenkanam yimanangan yaꞌa. Wik thayan keenkanam alangan pam wanch keꞌ kaaꞌ-piichanathiy yaꞌa. Puth wik thayan God.antam nyiingkanam inan ep paththam mina. Nil pamangwey wik God.antam nyiingkanaman ngeeyiywey-a, yaa, nil God.angan kan-kanam ngul kaaꞌ-piichanathowan, keꞌ nilaman kaaꞌngak, aꞌ nilan ngul kalowan nungantangan wunow aak umpuyaman.

⁷ Wik thayan keenkanam alanganweya kaaꞌ-piichanathiy pam wanchwey-a, yaa, an puth nil Jesus.ana keꞌ ukiy aak anpal kenyan aak iikanakan ngamparwey yaꞌa.

⁸ Than pam wanch anangan keenkanaman wunin-a, wik thayan God.antaman keꞌaman ngeeyina aꞌ putha keꞌaman piꞌin, nil God.an nanpalan wik inangan thaw pam wanch nungantam al-alantan lat ngench thayanangan: “Niiy in ngeeyāna, ngay wik nyiingkanaman min paththam kaaꞌngakāng niiyang maꞌmangkam Jews inangan mal kungkan wunaniya aak Judah.angan aꞌ putha mal yiipan wunaniya, aak Israel.angan.

⁹ Wik anangan ngayan keenkanaman waaꞌangan thant wuut mangk niiyantamakana -- wik anangan yaꞌa, ngay wik nyiingkanaman kaaꞌngakāng niiyang. Ngayana wuut mangk niiyantam kalangan thanang aak Egypt.am anpalan. Aꞌ ngayaniya wik ngatharam anangan waaꞌ-waaꞌangan thanta, puth thananiya wik ngatharamana keꞌam ngeey-ngeeyin yaꞌa, wik ngeengk-ngeengkin ngayang, yaa, ngayaniya too wantangan thanang, keꞌam ngul ngaantam-ngeeyangan thanang yaꞌa.

¹⁰ Puth ngay kan-ngul wik nyiingkanaman waaꞌāng niiyantweya, niiy wik in ngeeyāna: ‘Aakan ngul wampowa than pam wanch Jews anangan palaman wampayn ngathar. Aak an-aniyangana ngayan thaw-thawāng thant aꞌ wik ngatharam ngangkang ngul ngoonchow thanttang, aꞌ than woyan min ngatharaman wak-wakayn ngul. Ngayaniya God thanttam ngul iiyāng, thananiya pam wanch ngatharam ngul iiy-iiyayna.’

¹¹ Thananiya keꞌ-ngul thawiythan pam wanch wiy al-alantana, ‘Niiy piip God.an kan-kanang thiichān nunanga.’ Puth maꞌmangkamangan ngul thiichayn ngayanga -- wuut manth-thayan al-alangana putha puk manyiy al-alangan thampa thiichayn ngayanga, pam wanch piꞌ-piꞌanama putha pam wanch kaangk-keꞌanang al-alangan thamp, than yotamang ngul thiichayn ngayang, ngay God thanttamana.

¹² Ngay ngangk mamāng thanangweya, aꞌ putha ngayaniya keꞌ-ngul ngaantam-ngeeyāng way thanan yump-yumpina, yaꞌa, an kon-ngathowany ngula.”

¹³ Nil piip God.angan wik nyiingkanam inangan waaꞌ ngamparweya, puth nanpalan wik thayan keenkanamana min yaꞌ-ngulwey ngampar. Aꞌ work thanttam priests al-alantamana min yaꞌ-ngul ngampar thampa. Aak woyan thanan wakin-a, yip-yipam minchow.