Nyɛ̀nɛ̀ŋ 5 - WƆŊ FƐ̀Ì EBÒ SÌÀŊ DAYÀA

Wo Ananayà yèè wo Sàfilà

¹ Kɛɛ wo kenàŋ bà yaào wa àŋ nyaaŋ wo Ananayà, wuŋ yaà wo jàwèuŋ nɔɔ̀ŋ Sàfilà, naŋ mààŋ e diì nyiŋ nɛ̀ bà.

² Kɛɛ wo Ananayà yaà wo jàwè naŋ wa nyimèè, e kìlà wò nao gè e nɛɛnɛɛ̀ŋ bà wo niŋ bànè hàa wèè wuŋ bi yèè wò naŋ hìɛ̀ŋ e gbànaàŋ wo niŋ kìɛ̀ŋ aŋ keela tàeɗùù nyaŋ.

³ Wo Pììlɛ nauŋ dawè wààŋ, “Ananayà, wèè kiɛ̀ŋ mùŋ naŋ dàngè wo Sɛ̀tanàŋ naum zuwò e kìlà wo jɔ̀à ke jii mɔɛ̀ŋ sùà, yèè mùŋ naŋ tɔ̀ɔ̀ koɓɛ̀ wo Jìnàŋ Nɛɛmaàŋ, e kìlà mùŋ naŋ bànè e nɛɛnɛɛ̀ŋ bà hàa e yìwìà e yèɛ mùŋ naŋ yɛmɛ̀ lɛ nààŋ mùŋ naŋ mààŋ e diì mɔ̀ɛ̀?

⁴ Wèè paŋ muŋ maàŋ wa e diì mɔ̀ɛ̀, muàŋ nàŋ kànàŋ niìŋ wa. Nààŋ mùŋ naŋ niŋ wa maàŋ, e nɛɛnɛŋ mɔ̀ɛ̀ yaà wa e gaàŋ mɔ̀ɛ̀ dìì. Wèè kiɛ̀ŋ mùŋ naŋ ɗewè ke jii mɔɛ̀ŋ sùà wèè maŋ nyɛ̀nɛ̀ŋ e keì mààŋ tii? Muŋ gò tòà kòɓɛ̀ anyuùŋ kpùuŋ. Mùŋ naŋ tɔ̀ɔ̀ koɓɛ̀ Dayài!”

⁵ Wo Ananayà naŋ nɔŋ tɛɛ̀ kòmò fa, wò sɔ̀à ko dììnaŋ wò fà Kpeiŋ. Yèè anyùùŋ nyaŋ gbiŋ naŋ niŋ wa kòmò lɛ eɓìèmàŋjɛ̀wɛ̀ aŋ yè nyaŋ yaà wa ko fɛɛ̀feìŋ nyaŋ e jùù naŋ nyiŋ nyɛ̀nɛ̀ŋ.

⁶ Aŋ felaajɔa kàmaiŋ naŋ hnè, aŋ kpènèkpènè e fàauŋ nɛ̀ wɔŋ dèè, aŋ ka auŋ sìà.

⁷ E hààwà taai naŋ mààŋ yèè wo jàwè Ananayàa naŋ hnè, kɛɛ wo nyimààŋ kɛ̀ kiɛ̀ŋ naŋ kaaìŋ.

⁸ Wo Pììlɛ naŋ dàwè wo nìeɔ̀ wààŋ, “Wòòim e tɔɔɓaà, e nɛɛnɛɛ̀ŋ gbiŋ muàŋ nyɛ̀iŋ fanium nìŋ naŋ yɛmɛ̀ wèè e diìiŋ nɛ̀ nìŋ naŋ maàŋ lɛ tɛɛ̀?” Wò naŋ fasàì wààŋ, “Hɛ̀ɛɛ̀ŋ, e nɛɛnɛɛ̀ŋ gbiŋ lii.”

⁹ Wo Pììlɛ nauŋ dawè wààŋ, “Wèè kiɛ̀ŋ muàŋ nyɛ̀iŋ wo faniŋ mɔɔ̀ŋ naŋ ɗewè wèè naŋ wàà wo Jìnàŋ Kanaà Dayà? Aŋ felaa nyàŋ naŋ kɔ̀ɔ̀ wo fanium àŋ nauŋ sìè nyaŋ kòò àŋ yaà wɔŋ gbemgbeeɔ̀ feìŋ sààmɛ, yèè àŋ doum nàŋ kɔɔ̀ muàŋ pɛɛ aum sìà!”

¹⁰ Ko fɛɛ̀feìŋ wo nìeɔ̀ naŋ sɔ̀ɔ̀ ko dììnaŋ yèè wò naŋ fɔ̀. Aŋ felaa nyàŋ naŋ hnè aŋ yɛmɛ̀ kɛ̀ wò fà, yèè àŋ nauŋ fuliè aŋ ka auŋ sììyà wo faniuŋ nɔɔ̀ŋ kɔɔ.

¹¹ E jùù naŋ wa nyɛ̀nɛ̀ŋ ke gbòò anyuùŋ hààwe nyàŋ yèè anyùùŋ nyaŋ gbiŋ naŋ niŋ wa kòmò lɛ.

Maŋ kèè mèè yaà maŋ tɔ̀ɔ̀màŋsèì keì naŋ kaaìŋ

¹² Aŋ keela tàeɗùù nyaŋ naŋ wa kààìŋ maŋ kèè mèè yèè àŋ naŋ tɔ̀ɔ̀ maŋ tɔ̀ɔ̀màŋsèì keì anyùùŋ nyaŋ tɛɛ. Anyuùŋ hààwe nyàŋ gbiŋ hewa dèènè koɓɛ̀ guùŋ mààŋ ke kpòò guùŋ ko Pìàzà Salemàiŋ.

¹³ Wo nyùnɔ̀ɔŋ gbiŋ wo yèɔ fè wa kè gbòò anyuùŋ hààwe nyàŋ sùà wɔ gò wa nyimèè wèè wo kà àŋ keela nyàŋ kɔɔ, jòòpɛɛ anyùùŋ nyaŋ fè wa kè gbòòɛ sùà nyaŋ hewa gbòà tɛ̀ɛ̀ wèè aŋ keela nyàŋ.

¹⁴ Kɛɛ anyuùŋ zimgbe, felaa yèè jɔùŋ yè nyaŋ kuwa wa hààwe wo Kanàa Dayà sùà nyaŋ naŋ wa sɛ̀ɛ̀ ke gbòòɛ sùà.

¹⁵ Esàɓù ke nyɛ̀nɛɛ̀ŋ aŋ keela tàeɗùù nyaŋ yaà wa kòasùà feìŋ yɛ, anyùùŋ nyaŋ hewa kòà anyuùŋ sàaŋ nyàŋ maŋ dòmaŋ màŋ diɛŋ e kìlà aŋ nyiŋ hàà maŋ gbùmaŋ yaà maŋ ɓɛɛ diɛŋ wèè kɛ̀ sèè pɛɛ wo Pììlɛ nɔ̀ŋ weè kɔ̀ɛ̀ sùà wɔŋ fàà anyuùŋ sàaŋ nyàŋ wɔŋ miimiiuŋ nɔɔ̀ŋ wɔŋ nyiŋ dè diɛŋ sèè wò nɔ̀ŋ màaŋ sùà.

¹⁶ Ke gbòò anyuùŋ zimgbe naŋ hnè e yìwìà maŋ jawa màŋ naŋ kìlìè ko Jùlusɛ̀làm maŋ, àŋ yaà hìaŋ sùà anyuùŋ sàaŋ nyiŋ nyàŋ yaà aŋ yè nyaŋ aŋ jinàŋ naanààŋ yaà wa maŋjɛ̀wɛ nyàŋ, yèè aŋ gbiŋ naŋ wa jòèyè.

Àŋ gbìàŋ aŋ keela nyàŋ ko sààŋ nyìwì

¹⁷ Kpeiŋ e kooɛ̀ naŋ wa dìè wo Kànà Sìèfèìŋ Zòòlo Gbeeɔ̀ yaà aŋ jeuŋ anyuùŋ kpùùmaŋ nyàŋ, aŋ yè nyaŋ yaà wa ke gbòò aŋ Sadusiì nyaŋ sùà, wèè aŋ keela nyàŋ, yèè àŋ naŋ ɗewè wèè aŋ keewè nyiŋ kùàŋ feìŋ.

¹⁸ Àŋ naŋ kùwò aŋ keela nyàŋ yèè àŋ naŋ nyiŋ gbìɛ̀ŋ ko sààŋ nyìwì.

¹⁹ Kɛɛ wɔŋ dùùm wiiŋ wo màìkà Kanaà Dayàa naŋ yìlè wɔŋ gbèmgbèè ko sààŋ nyìwìi, wo nyiŋ fulià, yèè wò naŋ nyiŋ woò wààŋ,

²⁰ “Kɔ̀àiŋ niŋ sie ko Saaŋ Zòòlò Dayài, e kìlà niŋ woò anyùùŋ nyaŋ e kèè wɔŋ nyiiŋ jɛi wɛɛ̀ŋ gbiŋ.”

²¹ Wɔŋ niìsìaà aŋ keela nyàŋ naŋ jɔ̀ ko Saaŋ Zòòlò Dayài, nààŋ wo màikàa naŋ nyiŋ woò wèè aŋ nyɛ̀nɛ̀ŋ lɛ, yèè àŋ naŋ tɔ̀ɔ̀tù anyùùŋ nyaŋ kàa. Wo Kànà Sìèfèìŋ Zòòlo Gbeeɔ̀ yaà anyuùŋ kpùùmauŋ nyàŋ naŋ nyààŋ aŋ màmànkùmɛ̀ŋ fuɔɔ̀ŋ e kpùlìà anyùùŋ gbèègbèè fuɔŋ nyàŋ gbiŋ ko Ezɔ̀ɛ̀ wèè aŋ deenè. Kpeiŋ àŋ naŋ tùɔ̀ŋ anyùùŋ ko sààŋ nyìwìi wèè aŋ hiàŋ aŋ keela nyàŋ ko fɛɛ̀feìŋ nyiŋ niìŋ.

²² Kɛɛ nààŋ anyuùŋ tùnìàŋ ke saaŋ zòòloɛ̀ nao haì, aŋ gòo wa mɛ̀ɛ̀ŋ àŋ keela nyàŋ kò sààŋ nyìwìi. Kpeiŋ àŋ naŋ kɛ̀ɛ̀manjɛ̀wɛ koɓɛ̀ anyùùŋ gbèègbèè fuɔɔ̀ŋ àŋ naŋ nyiŋ gbàì jii nyààŋ,

²³ “È naiŋ kɔ̀ eiŋ mɛ̀ɛ̀ŋ ke sààŋ nyìwìɛ kè yaà yìla kpaŋ e kìlà anyuùŋ tùniaŋ nyiŋ nyàŋ sia wɔŋ gbemgbeeɔ̀ feìŋ, kɛɛ nààŋ è naiŋ yìlè wɔŋ gbemgbeeɔ̀, e gòiŋ mɛ̀ɛ̀ŋ wò nyùùŋ gbiŋ kò saaìŋ.”

²⁴ E teengaà aŋ kànà sìèfèìŋ zòòlo nyàŋ yaà wo sìèfèìŋ anyuùŋ tùnìàŋ ke saaŋ zòòlò Dayàa naŋ tɛɛ̀ kòmò lɛ, àŋ naŋ kùùnò gòngo sèè mààŋ kɛ̀ kiìŋ naŋ wɛ̀i kààìŋ koɓɛ̀ aŋ keela tàeɗùù nyaŋ.

²⁵ Kpeiŋ wo nyùùŋ bà naŋ hnè ko nɛ̀ɛ̀ŋ nyiŋ niìŋ yèè wò naŋ woò wààŋ, “Sààmɛ! Aŋ felaa nyàŋ nìŋ naŋ gbìɛ̀ŋ ko sààŋ nyìwìi nyàŋ kòò àŋ sia ko Saaŋ Zòòlò Dayài àŋ yaà kàà anyùùŋ nyaŋ!”

²⁶ Kpeiŋ wo sìèfèìŋ anyuùŋ tùnìàŋ ke Saaŋ Zòòloɛ̀ yaà aŋ kpàkòòuŋ nyàŋ naŋ kɔ̀ yèè àŋ naŋ hìɛ̀ŋ aŋ keela tàeɗùù nyaŋ koɓɛ̀ anyùùŋ gbèègbèè fuɔɔ̀ŋ. Kɛɛ aŋ gò wa ɓùlà aŋ keela nyàŋ, esaɓù kɛ̀ e jùùɛ yaà nyiìŋ wa wèè anyùùŋ nyaŋ go nyiŋ wa nàŋ hɔ̀wɔ̀ nyinoo nyuùŋ tùnìàŋ Saaŋ Zòòloɛ̀.

²⁷ Àŋ naŋ hìɛ̀ŋ aŋ keela nyàŋ ko saaìŋ, yèè àŋ naŋ nyiŋ sèèlè anyùùŋ gbèègbèè fuɔŋ nyàŋ fɛɛ̀feìŋ, yèè wo Kànà Sìèfèìŋ Zòòlo Gbeeɔ̀ naŋ nyiŋ tɛɛ̀ woò wààŋ,

²⁸ “È naiŋ naàà kɛ̀ ɓɔ̀ nìŋ kaà ànyùùŋ nyaŋ è dèè Kanaà Jisɛ̀ɛ diɛŋ. Yɛ̀mɛìŋ naàŋ e ɗeweɛ̀ nìŋ naŋ yɛi ɓààyè e kàaiŋ nɛ̀ koɓɛ̀ anyùùŋ nyaŋ gbiŋ ko Jùlusɛ̀làm, yèè nìŋ manaŋ naŋ woò kɛ̀ yàwi nauŋ jìwè.”

²⁹ Wo Pììlɛ yèè aŋ keela tàeɗùù gbànaŋ nyàŋ naŋ nyiŋ fasàì nyààŋ, “È kuwa eiŋ nyɛ̀nɛ̀ŋ e yèɛ wo Dayà manaŋ wèè eiŋ nyɛ̀nɛ̀ŋ lɛ, e kuwàìŋ è kpàŋ wèè eiŋ nyɛ̀nɛ̀ŋ è yèɛ anyuùŋ kpùuŋ manaŋ lɛ̀.

³⁰ Nìŋ naŋ wa jìwìè wo Jisɛ̀ wɔŋ vànèkpaa diɛŋ. Kɛɛ wo Dàyà aŋ nèwàènèwe wi nyàŋ nauŋ gè e fàaà dìì wɔŋ nyiiŋ gèeo sùà.

³¹ Wo Dayà nauŋ jàà wɔŋ kùàŋ jìkauŋ nɔɔ̀ŋ, yèè wò nauŋ nyɛ̀nɛ̀ŋ wo Kana yèè wo Nyuùŋ Jòèyeɔ̀ weè wì, wèè kɛ̀ anyùùŋ Ezɔ̀ɛ̀ nyaŋ fè maŋ tùwo naanààŋ nyiŋ màŋ jɛwɛ aŋ kìlà ko nɛ̀ɛ̀uŋ niìŋ e kìlà maŋ jùumù nyiŋ màŋ nɔ̀ŋ hakɛ̀ jùùya miŋ.

³² Yàwi nàŋ yaà aŋ sèì nyaŋ e kìlà è woàìŋ ke mìè gbìàŋ wo Kanaà Dayà e nyaàiŋ dè e yèɛ wò naŋ nyɛ̀nɛ̀ŋ lɛ yàwi yèè wo Jìnàŋ Nɛɛmaàŋ, wo yèɔ wo Dayà naŋ kìɛ̀ŋ koɓɛ̀ anyùùŋ nyaŋ nyɛnɛŋ e yèɛ wò manaŋ lɛ̀.”

³³ Nààŋ anyùùŋ gbèègbèè fuɔɔ̀ŋ naŋ wa tɛɛ̀ kòmò, àŋ naŋ wa tuù yèè àŋ manaŋ wa wèè aŋ jìwà aŋ keela tàeɗùù nyaŋ.

³⁴ Kɛɛ wo Fɛlosiì bà àŋ nyaaŋ wo Gàmalià, wo kààmɔ̀ɔ̀ŋ maŋ Sàwà Dayàa bà guùŋ, e kìlà anyùùŋ nyaŋ gbiŋ kiɛ̀uŋ wa e ɓɛ̀ɛ̀jàa gbee, naŋ sìè anyùùŋ gbèègbèè fuɔŋ nyàŋ feìŋ, yèè wò naŋ wòò anyuùŋ tùnìàŋ ke Sààŋ Zòòloɛ̀ kɛ̀ aŋ fulià aŋ keela nyàŋ ko jɔɔlèi tòloò,

³⁵ yèè wo naŋ wòò anyùùŋ gbèègbèè fuɔɔ̀ŋ wààŋ, “Nyɛ̀iŋ nààŋ nyunùim nyàŋ ko Ezɔ̀ɛ̀, e jùù nɔ̀iŋ wèè e nɛ̀ɛŋ nìŋ manaŋ naŋ nyìnìàŋ aŋ felaa nyɛɛ̀ŋ lɛ.

³⁶ Nàŋ jààèjii kɛ̀ wo Teoɗà naŋ wa hnè e teenga gɔu bà sùà, wò naŋ wa ɓèmè wuŋ bi wo nyùùŋ gààŋ gbee wèè auŋ tùlìà jii. E sɔ̀ngɔ̀ anyuùŋ hɔ̀nɔ̀ɔ̀ tiinàŋ nauŋ wa dè maŋjɛ̀wɛ. Àŋ nauŋ wa jìwè, anyùùŋ màŋjɛ̀wɛ̀uŋ nyàŋ gbiŋ aŋ ɓaayè, yèè ke gboòuŋ nɛɛ̀ŋ naŋ wa sɔ̀ɔ̀ dìì ke hàì dìà.

³⁷ Eɓìèmàŋjɛ̀wɛ̀ tii, wo Juɗà, wo nyùùŋ fùɔ̀ŋ Galaliìɔ naŋ hnè e tèèngà anyuùŋ kpɛ̀nɛŋ nyàŋ. Wò naŋ wa ɓèmè wuŋ bi wo nyùùŋ gààŋ gbee wèè auŋ tùlìà jii. Anyuùŋ zimgbe nauŋ wa dè maŋjɛ̀wɛ, kɛɛ wuŋ pɛɛ àŋ nauŋ wa jìwè, yèè anyùùŋ màŋjɛ̀wɛ̀uŋ nyàŋ gbiŋ naŋ ɓaayè.

³⁸ Weètii e keì lɛɛ̀ sùà, miŋ woòiŋ, ɓɔ̀ nìŋ nyɛ̀nɛ̀ŋ ànyùùŋ nyɛɛ̀ŋ è keì naanààŋ gbiŋ. Dàngeìŋ nyiŋ aŋ ka! Sèè mààŋ è yèɛ àŋ naŋ ɗewè yèè àŋ yaà nyinie lɛ̀ è yaà ke nyɛ̀nɛ̀ŋ nyuùŋkpùuŋ, è do nàŋ sɔ̀ɔ̀ e hàì ko dìa.

³⁹ Kɛɛ sèè mààŋ zà wo Dayà naŋ nyiŋ kìɛ̀ŋ è gààaŋ e kìlà wuŋ àŋ naŋ tùlìè jii, niŋ naàŋ nyiìŋ ɓɛ̀nɛ̀ŋ kèèwè kùàŋ feìŋ. Sèè nìŋ nyɛnɛŋ yɛi, nìŋ do nàŋ yɛmɛ̀ kɛ̀ nìŋ yaà sùmiaŋ sùà wo Dayà.” Anyùùŋ gbèègbèè fuɔɔ̀ŋ naŋ jàà e gò Gàmaliàa kùàŋ dìì.

⁴⁰ Aŋ naŋ nyààŋ aŋ keela nyàŋ ko saaìŋ, yèè anyuùŋ gbeegbèè nyaŋ naŋ wa kìɛ̀ŋ e gààŋ koɓɛ̀ anyuùŋ tùnìàŋ ke sààŋ nyìwìɛ wèè aŋ nyiŋ ɓùlà. Kpeiŋ àŋ naŋ nyiŋ naàà kɛ̀ ɓɔ̀ àŋ gbuuyà wa ɓɛìŋ è dèè Kanaà Jisɛ̀ɛ sùà julɔfɔ, yèè àŋ naŋ nyiŋ dangè àŋ naŋ kɔ̀.

⁴¹ Nààŋ aŋ keela tàeɗùù nyaŋ naŋ wa yèwè anyùùŋ gbèègbèè fuɔɔ̀ŋ feìŋ àŋ yaà kɔɔyɛ, e zɔlɔ̀ naŋ nyiŋ wa diè, esaɓù kɛ̀ wo Dayà naŋ nyiŋ wa tàeɗùù wèè aŋ nɔ̀ŋ anyuùŋ kɛnɛ wèè aŋ kà e mɔ̀ɔ̀nɛŋ dìì wèè esàɓù wo Kanaà Jisɛ̀.

⁴² Ke ɗɔɔ gbiŋ àŋ hewa kà ko Saaŋ Zòòlò Dayài yaà maŋ saaŋ joo dìì wèè aŋ wòò ke mìè gbìàŋ Ebò Siaàŋ nyaàiŋ dè wo Kanaà Jisɛ̀, wo yèɔ wo Dayà naŋ tàeɗùù wèè wo joeyè e ɗuunyaàŋ wɔ.