Nyɛ̀nɛ̀ŋ 4 - WƆŊ FƐ̀Ì EBÒ SÌÀŊ DAYÀA

Wo Pììlɛ yèè wo Jɔ̀ɔŋ àŋ yaà anyùùŋ gbèègbèè fuɔŋ nyàŋ fɛɛ̀feìŋ

¹ E teengaà wo Pììlɛ yaà wo Jɔ̀ɔŋ yaà wa nɔŋ gbùùyè koɓɛ̀ anyùùŋ lɛ, aŋ sìèfèìŋ zòòlo nyàŋ yaà wo sìèfèìŋ anyuùŋ tùnìàŋ ke Saaŋ Zòòlò Dayà e kpùlìà aŋ Sadusiì nyaŋ bà nao hnè.

² Àŋ naŋ wa tuù esaɓù kɛ̀ aŋ keela tàeɗùù nyaŋ yaà wa kàà sùà anyùùŋ nyaŋ kɛ̀ wo Kanaà Jisɛ̀ yèwà e fàa dìì wɔŋ nyiiŋ gèeo sùà. Tii naŋ wa tɔɔ̀ kɛ̀ anyuùŋ fà nyàŋ gbiŋ do nàŋ yèwè e fàaà dìì wɔŋ nyiiŋ gèeo sùà.

³ Àŋ naŋ kùwò wo Pììlɛ yaà wo Jɔ̀ɔŋ. Kɛɛ nààŋ e gɔɛɛ̀ naŋ wa naàŋ jùò fùùŋ ebɛ̀ŋ duùmfeìŋ, àŋ naŋ nyiŋ gbìɛ̀ŋ ko sààŋ nyìwì aŋ jàwà e hàì wɔŋ niìsìaà bàa.

⁴ Kɛɛ anyùùŋ nyaŋ zimgbe nyiŋ naŋ wa kòmò ke miè gbìaàŋ nyaŋ naŋ wa kùwìè hààwe. Yèè anyùùŋ nyaŋ ke gbòò anyuùŋ hààwe nyàŋ sùà naŋ wa dɛ̀kɛ̀ sùà ke nɔ̀ŋ e sɔ̀ngɔ̀ anyuùŋ tààsùùŋ nɔɔnɔŋ (5,000.)

⁵ Wɔŋ niìsìaà bàa, anyùùŋ gbèègbèè aŋ Juùù nyaŋ, aŋ màmànkùmɛ̀ŋ fuɔŋ nyàŋ, yèè aŋ kààmɔ̀ɔ̀ŋ maŋ Sàwà Dayà nyaŋ naŋ dèènè ko Jùlusɛ̀làm.

⁶ Àŋ naŋ mɛ̀ɛ̀ŋ wo Kànà Sìèfèìŋ Zòòlo Gbeeɔ̀ wo Anàŋ yèè wo Kaifɔ̀, wo Jɔ̀ɔŋ, wo Àlèzanàŋ, yèè aŋ gbànaŋ nyàŋ ke gbòò wo Kànà Sìèfèìŋ Zòòlo Gbeeɔ̀ sùà.

⁷ Àŋ naŋ hìɛ̀ŋ wo Pììlɛ yaà wo Jɔ̀ɔŋ ko fɛɛ̀feìŋ yèè àŋ naŋ nyiŋ dawè nyààŋ, “Diè nìŋ naŋ nyɛ̀nɛ̀ŋ e keì lɛɛ̀ naŋ kaaìŋ? Kiìŋ è gààŋ ɔ̀ɔ̀ dèè ɓòò diɛŋ le?”

⁸ Wo Jìnàŋ Nɛɛmaàŋ naŋ wa dìè wo Pììlɛ sùà, yèè wò naŋ nyiŋ woò wààŋ, “Nyɛ̀iŋ nààŋ nyùùŋ gbèègbèè yèè màmànkùmɛ̀ŋ fuɔŋ nyàŋ,

⁹ sèè nìŋ nɔ̀ŋ wì nàaŋ daawe e nyaàiŋ dè e keì sìàaŋ è naŋ nyɛ̀nɛ̀ŋ koɓɛ̀ wo felaa nɛ̀ɛ̀muɔ̀ŋ yèè e ɗeweɛ̀ è naŋ nyɛ̀nɛ̀ŋ wò naŋ jòèyè lɛ,

¹⁰ tɔ̀ e woòiŋ, e kpùlìà nyɛ̀iŋ nààŋ nyùùŋ Ezɔ̀ɛ̀ nyaŋ gbiŋ kɛ̀, wo felaa wɛɛ̀ sìàìŋ yaà ko fɛɛ̀feìŋ wɔ naŋ nɔ̀ŋ jòèyauŋ janyai e gààŋ Jisɛ̀ Kulaìɛ sùà e yìwìà ko Naazɔ̀ɛ̀, wo yèɔ nìŋ naŋ wa jìwìè vànèkpaaà diɛŋ wɔ̀ yèè wo Dayà nauŋ gè e fàaà dìì wɔŋ nyiiŋ gèeo sùà.

¹¹ Wo Kanaà Jisɛ̀ nàŋ yaà e kèè wo nyùnɔ̀ɔŋ wɔŋ fɛ̀ì Dayàa naŋ woò wààŋ, ‘Ke dùòɛ aŋ nyùuŋ nyɛ̀lɛ nyàŋ naŋ wa gììyè maŋhɛɛ yɛ̀ naŋ nɔ̀ŋ ke duò kpɛnɛ tùlìà jii gbeeɛ̀ e nyɛ̀lɛɛ̀ gbiŋ sùà.’

¹² Wuŋ guùŋ nɔŋ naum ɓɛ̀nɛ̀ŋ jòèye. Wo nyùùŋ bà gbiŋ fè kò àìjɛnɛ̀ŋ dìì wò yèɔ wò Dayà naŋ wi kiɛ̀ŋ wɔ wèè wo wi joeyè eɓìèmàŋjɛ̀wɛ̀ wuŋ.”

¹³ È naŋ wa fòònò anyùùŋ gbèègbèè fuɔɔ̀ŋ wèè aŋ yɛ̀mɛ̀ wo Pììlɛ yèè wo Jɔ̀ɔŋ aŋ gbòà ko nɛ̀ɛ̀ŋ nyiŋ niìŋ janyai, tiŋ zà kɛ̀ aŋ fèlàà tìyèe nyɛɛ̀ŋ hewa jòò ko vàaì yèè aŋ gò wa kà kò sààŋ fɛi gbèe wèè aŋ gbèè wɔŋ fɛi. Kpeiŋ anyùùŋ gbèègbèè fuɔɔ̀ŋ naŋ ngàà jààèjii kɛ̀ aŋ fèlàà tìyèe nyɛɛ̀ŋ yaà wa wo Jisɛ̀ maŋjɛ̀wɛ.

¹⁴ Kɛɛ aŋ gò wa ɓɛ̀nɛ̀ŋ è keì gbiŋ wòo, esaɓù kɛ̀ àŋ naŋ wa yɛ̀mɛ̀ wo felaaà wo Pììlɛ yèè wo Jɔ̀ɔŋ naŋ wa sùngò wɔ sìà nyìŋ nèè kɔɔ.

¹⁵ Kpeiŋ àŋ naŋ wòò aŋ felaa nyàŋ kɛ̀ aŋ fɛɛnɛ̀ŋ weè feìŋ e yìwìà e dèèneɛ̀ sùà. Kpeiŋ anyùùŋ gbèègbèè fuɔŋ nyàŋ nao joo yèè àŋ naŋ tɔ̀ɔ̀tù ɗèwe nyiŋ wouwòù fèemàŋ.

¹⁶ Àŋ naŋ dawè nyààŋ, “Kiìŋ è naiŋ ɓɛ̀nɛ̀ŋ nyìnìàŋ aŋ felaa nyɛɛ̀ŋ, wo Pììlɛ yaà wo Jɔ̀ɔŋ? Anyùùŋ nyaŋ gbiŋ ko Jùlusɛ̀làm nyìmàŋ kɛ̀ aŋ felaa nyɛɛ̀ŋ nyɛ̀nɛ̀ŋ e kèè mèè gbee lɛɛ̀, yèè e fèìŋ niŋ ɓɛ̀nɛ̀ŋ gììyà màŋhɛɛ.

¹⁷ Kɛɛ wèè eiŋ kèèwè ke nyɛ̀nɛŋ yɛɛ̀ kùàŋ feìŋ wèè ke go nàŋ ɓààyè koɓɛ̀ dii anyùùŋ nyaŋ fèemàŋ, sɔɔ̀ eiŋ nyiŋ naàà wèè kɛ̀ ɓɔ̀ àŋ gbòà ɓɛìŋ kòɓɛ̀ wò nyùùŋ è dèè Kanaà Jisɛ̀ɛ sùà.”

¹⁸ Kpeiŋ àŋ naŋ nyiŋ ɓɛìŋ nyààŋ ko saaìŋ yèè àŋ naŋ nyiŋ woò kɛ̀ ɓɔ̀ àŋ gbòà ɓɛìŋ ɔ̀ɔ̀ aŋ kaà è dèè Kanaà Jisɛ̀ɛ diɛŋ kòɓɛ̀ wò nyùùŋ gbiŋ.

¹⁹ Wo Pììlɛ yaà wo Jɔ̀ɔŋ naŋ nyiŋ fasàì nyààŋ, “Nyɛ̀iŋ bi kɛ̀ɛìŋ kiti sèè mààŋ kòò niŋ nàŋ yaà e tɔ̀ɔ̀nyaàaŋ ko fɛ̀ɛ̀fèìŋ Dayài, wèè eiŋ jɔ̀ɔ̀lɔ̀ wo nyuùŋkpùuŋ dìì ɔ̀ɔ̀ eiŋ jɔ̀ɔ̀lɔ̀ wo Dayà dìì.

²⁰ Esaɓù e naìŋ hɔ̀ànè wòò e yèɛ è naiŋ yɛmɛ̀ yèè è naiŋ kòmò lɛ.”

²¹ Kpeiŋ anyùùŋ gbèègbèè fuɔŋ nyàŋ naŋ nyiŋ naàà nyìnga yèè àŋ naŋ nyiŋ dangè aŋ ka. Anyùùŋ fuɔŋ nyàŋ gò wa yɛ̀mɛ̀ kè dòmaŋ gbiŋ wèè àŋ do kìɛ̀ŋ àŋ felaa nyàŋ è keì nyìnga, esaɓù kɛ̀ anyùùŋ nyaŋ gbiŋ yaà wa tɛ̀ɛ̀nɛ̀ŋ Dayà wèè e keìɛ naŋ wa kaaìŋ lɛ.

²² Wo felaaà wo yèɔ naŋ wa nɔ̀ŋ jòèyeuŋ e yìwìà e gààŋ e kèè mèè gbèè lɛɛ̀ dìì wɔ naŋ wa nìe maŋ doa kpɛ̀ùŋ tìyèe.

Anyuùŋ hààwe nyàŋ naŋ wa zòòlò wo Dayà kɛ̀ ɓɔ̀ àŋ gbuuyà è jùù sùà

²³ Anyùùŋ fuɔŋ nyàŋ naŋ wa nɔŋ dàngè wo Pììlɛ yaà wo Jɔ̀ɔŋ fa, àŋ kɛ̀ɛ̀ maŋjɛ̀wɛ koɓɛ̀ anyuùŋ nyiŋ nyàŋ yèè àŋ naŋ nyiŋ wòò e keìɛ kinɛiŋ aŋ kànà sìèfèìŋ zòòlo nyàŋ yèè aŋ màmànkùmɛ̀ŋ fuɔŋ nyàŋ naŋ nyiŋ woò lɛ.

²⁴ Nààŋ anyuùŋ hààwe nyàŋ naŋ niŋ kòmò, aŋ gbiŋ naŋ dèènè koɓɛ̀ guùŋ aŋ zòòlò wo Dayà ke jìì guùŋ sùà nyààŋ, “Kanaà, muàŋ naŋ bànè ko àìjɛnɛ̀ŋ, e dììɛ e ɗuunyaàŋ yaà wɔŋ juwoɔ̀, e hààwè manɛ̀ŋ maŋ gbiŋ yaà miìŋ ko sùà maŋ,

²⁵ e yìwìà esàɓù wo Jìnàŋ Nɛɛmaàŋ mùŋ naŋ wa gbùùyè wo nèwàènèwe wiɔ̀ Dèèwe sùà wo ɓɔìjɔ̀à mɔɔ̀ŋ. Wò naŋ wa woò wààŋ, ‘Wèè kiìŋ anyùùŋ nyaŋ fè àŋ Juùù nyaŋ maŋ fuɔŋ màŋ sùà naŋ wa tuù, wèè kiìŋ anyùùŋ nyaŋ naŋ wa nyɛ̀nɛ̀ŋ e ɗèwe nyiŋ nɛ̀ wèè foo?

²⁶ Aŋ kànà fuɔŋ nyàŋ e dììɛ diɛŋ e ɗuunyaàŋ naŋ bànèbànè nyiŋ bi, yèè anyuùŋ gbeegbèè nyaŋ naŋ dèènè koɓɛ̀ guùŋ wèè aŋ sumiàŋ wo Kanaà yaà wo yèɔ wò naŋ tàeɗùù wèè wo joeyè e ɗuunyaàŋ wɔ, wo Kulaìɔ.’

²⁷ Kanaà, è nyìmàŋ kɛ̀ e yèɛ mùŋ naŋ wa woò lɛ è yaà tɔɔɓaa. Wo Hɛɛlɔ̀ yaà wo Pɔuŋtiɔ̀ Paalè naŋ dèènè koɓɛ̀ guùŋ e kpùlìà anyùùŋ nyaŋ fè àŋ Juùù nyaŋ yaà anyùùŋ Ezɔ̀ɛ̀ nyaŋ wèè aŋ nyɛ̀nɛ̀ŋ e ɗèwe naanààŋ koɓɛ̀ wo Ɓɔ̀ìjɔ̀à nɛɛmaŋ mɔɔ̀ŋ Jisɛ̀, wo yèɔ mùŋ naŋ tàeɗùù wèè wo joeyè e ɗuunyaàŋ wɔ.

²⁸ Àŋ naŋ wa deenè wèè aŋ nyɛ̀nɛ̀ŋ e yèɛ gbiŋ kɛ̀ muàŋ e yìwìà e gaàŋ mɔ̀ɛ̀ sùà mùŋ naŋ wa naàŋ ɗewè tɛ wèè e kaaìŋ lɛ.

²⁹ Weètii Kanaà, kùmiàŋ e yèɛ àŋ wòà lɛ yèè e kèè e nànàaŋ àŋ manaŋ aŋ wi jàà lɛ, yèè muŋ gè wi, aŋ ɓɔìjɔ̀àuŋ nyàŋ, nyààŋ diɛŋ, e jùù ɓɔ̀ è nyɛ̀nɛ̀ŋ wi wèè eiŋ wòò ke miè gbìaŋ mɔɛ̀ŋ janyai.

³⁰ Vùlɔ̀ŋ wɔŋ kuàŋ gaàŋ mɔɔ̀ŋ muŋ joeyè anyùùŋ, yèè muŋ tɔɔ̀ maŋ tɔ̀ɔ̀maŋsèì keì yèè maŋ kèè mèè maŋ kaaìŋ e dèè wo Ɓɔ̀ìjɔ̀à nɛɛmaŋ mɔɔ̀ŋ Jisɛ̀ sùà.”

³¹ Nààŋ àŋ naŋ wa kpɛ̀ɛ̀yɛ̀ Dayà zòòlo, koɓɛ̀i àŋ naŋ wa deenè lɛ naŋ wa mɛɛmɛ̀ɛ̀ŋ. Wo Jìnàŋ Nɛɛmaàŋ naŋ nyiŋ wa dìèsùà yèè àŋ naŋ tɔ̀ɔ̀tù ke mìè Dayàa gbòa janyai ke jii nyingè sùà.

Anyuùŋ hààwe nyàŋ naŋ wa gòònò manɛ̀ŋ kɛ̀ɛ̀nɛŋ nyiŋ màŋ aŋ dàwi e fèemàŋ

³² Ke gbòò anyuùŋ hààwe nyàŋ naŋ wa tòòmò koɓɛ̀ guùŋ e mìèsùàguùŋ yèè ke jìì guùŋ sùà. Aŋ bà gbiŋ gò wa woò kɛ̀ nyiŋ bi nàŋ kanaŋ wa è yèɛ àŋ kuwa wa lɛ̀, kɛɛ àŋ gbiŋ naŋ wa gòònò e yèɛ gbiŋ àŋ kuwa wa lɛ̀ nyiŋ bi e fèemàŋ.

³³ E gaàŋ gbee sùà aŋ keela tàeɗùù nyaŋ naŋ wa kìɛ̀ŋ ke mìè seì kɛ̀ wo Kanaà Jisɛ̀ yèwà e fàa dìì wɔŋ nyiiŋ gèeo sùà, e kìlà wo Dayà naŋ wa kìɛ̀ŋ aŋ gbiŋ e keì sìàŋ.

³⁴ Wo bà gbiŋ fòo wa kè gboò nyiŋ nɛɛ̀ŋ sùà wò do nɔ̀ŋ è wànàŋ nɛ̀ŋ gbiŋ sùà. Aŋ yè nyaŋ kuwa wa maŋ ɓù ɔ̀ɔ̀ maŋ saaŋ nyàŋ he miŋ wa maàŋ, aŋ hìàŋ e nɛɛnɛɛ̀ŋ àŋ naŋ yɛmɛ̀ lɛ e yìwìà e yèɛ àŋ naŋ maàŋ lɛ,

³⁵ e kìlà aŋ niŋ kìɛ̀ŋ koɓɛ̀ aŋ keela tàeɗùù nyaŋ. E nɛɛnɛɛ̀ŋ nɔ̀ŋ wa gòòno niŋ anyùùŋ nyaŋ e fèemàŋ nààŋ àŋ manaŋ wa lɛ̀.

^36-37 Kpeiŋ wo Jòòsɛ, wo Liivaà nyuuŋ e yìwìà ko Sapulɔ̀, wo yèɔ aŋ keela nyaŋ hewa nyààŋ wo Bànaŋɓà wɔ, naŋ wa mààŋ wɔŋ ɓùuŋ nɔɔ̀ŋ, yèè wò naŋ hìɛ̀ŋ e nɛɛnɛɛ̀ŋ, wo niŋ kìlà koɓɛ̀ aŋ keela nyàŋ. (E fàsàì e dèè Bànaŋɓà nàŋ yaà “Wo yèɔ kiɛ̀ŋ ke jii nyingè diɛŋ wɔ̀.”)