Nyɛ̀nɛ̀ŋ 25 - WƆŊ FƐ̀Ì EBÒ SÌÀŊ DAYÀA

Wo Pɔɔ̀ naŋ pɔ̀wɔ̀ wo Kànà Gbèè fuɔɔ̀ŋ

¹ Nààŋ wo Fɛtɔ̀ naŋ tɔ̀ɔ̀tù e tòmouŋ nɛ̀, maŋ ɗɔ̀ɔ̀ taai naŋ mààŋ yèè wò naŋ kɔ̀ ko Jùlusɛ̀làm e yìwìà ko Sesèlià.

² Kuŋ aŋ kànà sìèfèìŋ zòòlo nyàŋ yèè aŋ ɓɛ̀màŋɗì aŋ Juùù nyaŋ bà naŋ tɔ̀ɔ̀ e zàwè ko nɛ̀ɛ̀uŋ niìŋ e nyaàiŋ dè e keìɛ àŋ naŋ gbùwò wo Pɔɔ̀ ɗì lɛ. Àŋ naŋ ɓɛìŋ dàwè wo Fɛtɔ̀ nyààŋ,

³ wo kpuumàŋ nyiŋ wo nyɛ̀nɛ̀ŋ esaɓù wo Pɔɔ̀ wo ka ko Jùlusɛ̀làm, fòfoo àŋ naŋ wa ɗewè wèè auŋ jìwìà ko dòmaìŋ sèè wò nɔ̀ŋ kɔɔyɛ.

⁴ Kɛɛ wo Fɛtɔ̀ naŋ nyiŋ woò wààŋ, “Wo Pɔɔ̀ do nàŋ nɔ̀ŋ ko Sesèlià, esaɓù kɛ̀ miàŋ bì mìŋ doo nàŋ kɛɛ̀ e teenga kpuu sùà.

⁵ Sèè mààŋ wò naŋ nyɛ̀nɛ̀ŋ e keì naanààŋ gbiŋ, kɛ̀ tɔ̀ aŋ ɓɛ̀màŋɗìiŋ nyàŋ aŋ dèim maŋjɛ̀wɛ aŋ ka aŋ tɔɔ̀ kuii e zawèuŋ nɛ̀.”

⁶ Wo Fɛtɔ̀ naŋ nɔ̀ŋ ko Jùlusɛ̀làm wèè maŋ ɗɔ̀ɔ̀ nɔɔnɔŋ le taai ɔ̀ɔ̀ maŋ ɗɔ̀ɔ̀ zììyà paŋgàà wò naŋ kɛ̀ɛ̀ maŋjɛ̀wɛ ko Sesèlià. Wɔŋ niìsìaà bàa wò naŋ jɛ̀ì ke kpùà kanauŋ nɛɛ̀ŋ diɛŋ yèè wò naŋ nyɛ̀nɛ̀ŋ aŋ kààlòòɗùà nyaŋ aŋ hìàŋ wo Pɔɔ̀ ko fɛɛ̀feìŋ.

⁷ Nààŋ wo Pɔɔ̀ naŋ hnè ko fɛɛ̀feìŋ, aŋ Juùù nyaŋ nao wa kɔ̀ nyaŋ e yìwìà ko Jùlusɛ̀làm naŋ sie yèè àŋ naŋ gbùwò maŋ keì zimgbe wo Pɔɔ̀ ɗì maŋ yè maŋ aŋ fè wa ɓɛ̀nɛ̀ŋ tɔ̀ɔ janyai è tɔ̀ɔ̀nyaàŋ sùà wèè maŋ nɔ̀ŋ kɛ̀ sɔ̀uŋ.

⁸ Kpeiŋ wo Pɔɔ̀ naŋ sie yèè wò naŋ gbaì wèè wuŋ bi wààŋ, “Miŋ gò pɔ̀ɔ̀ màŋ Sàwà Dayà maŋ, maŋ yè maŋ yaà wèè yàwi nààŋ Juùù nyaŋ. Miŋ gò nyɛ̀nɛ̀ŋ è keì naanààŋ gbiŋ è yèɛ naŋ tɔ̀ɔ̀ è ɓɛ̀ɛ̀pɔ̀ɔ kòɓɛ̀ kè Saaŋ Zòòlò Dayài ɔ̀ɔ̀ koɓɛ̀ Siisɔ̀i, wo Kànà anyùùŋ fùɔ̀ŋ Luùm nyaŋ.”

⁹ Kɛɛ wo Fɛtɔ̀ manaŋ wa aŋ Juùù nyaŋ auŋ mànàŋ, kpeiŋ wò naŋ dàwè wo Pɔɔ̀ wààŋ, “Màŋ ɓɛ̀nɛ̀ŋ nyìmee wèè maŋ kà ko Jùlusɛ̀làm wèè kaum kuii gbaì wèè maŋ keì mɛɛ̀ŋ àŋ naum yaà gbùwò ɗì maŋ?”

¹⁰ Wo Pɔɔ̀ naŋ fasàì wààŋ, “Mìŋ yaà kɔ̀ɔ̀yɛ̀ e gbài dìì ko sààŋ sàwà kanaà Siisɔ̀, wo Kànà anyùùŋ fùɔ̀ŋ Luùm nyaŋ, yèè kuŋ è naŋ tɛɛwɛ̀ wèè aim gbaì. Màŋ nyìmàŋ fo kɛ̀ kòò mìŋ nyɛ̀nɛ̀ŋ è keì naanààŋ gbiŋ è yèɛ do nàŋ dàà kè kpùùnɛɛ̀ kòɓɛ̀ wɔ̀ŋ fùɔ̀ŋ àŋ Juùù nyaŋ.

¹¹ Sèè ka weè pɔ̀ɔ̀ ke sàwàa ke yèɛ naŋ tɔɔ̀ kɛ̀ sɔɔ̀ ka kà e mɔ̀ɔ̀nɛ̀ŋ e fàa dìì, mìŋ naàŋ weè dawè wèè aim gè è kèì nyìngà è fàa bi dìì. Kɛɛ miŋ gò nyɛ̀nɛ̀ŋ màŋ keì mɛɛ̀ŋ bà guùŋ pɛɛ àŋ naim yaà gbùwò ɗì maŋ, yèè wo nyùùŋ kuwà è tɔ̀ɔ̀nyaàaŋ wèè woim kìlà kòɓɛ̀ ànyùùŋ nyɛɛ̀ŋ. Weètii tɔ̀ miŋ dawè wo kanaà Siisɔ̀, wo Kànà anyùùŋ fùɔ̀ŋ Luùm nyaŋ wuŋ bi woim gbaì.”

¹² Kpeiŋ wo Fɛtɔ̀ naŋ kùwìè e ɗì de koɓɛ̀ anyùùŋ nyaŋ kiɛ̀uŋ e go nyàŋ, yèè wò naŋ wòò wo Pɔɔ̀ wààŋ, “Mùŋ naŋ dawè wèè maŋ kà koɓɛ̀ wo kanaà Siisɔ̀, wo Kànà anyùùŋ fùɔ̀ŋ Luùm nyaŋ wèè wo gbaì e keì mɔ̀ɛ̀, weètii kuŋ mùŋ do nàŋ kɔ̀!”

Wo Fɛtɔ̀ gbàì wo Kanaà Àgulepɔ̀ jii e nyaàiŋ dè wo Pɔɔ̀

¹³ E teenga bà naŋ mààŋ yèè wo Kanaà Àgulepɔ̀ yaà wo jaauŋ nɔɔ̀ŋ Bɛ̀niìŋ naŋ hnè ko Sesèlià ko jààmè wo Fɛtɔ̀.

¹⁴ Àŋ naŋ nɔ̀ŋ ko Sesèlià wèè maŋ ɗɔɔ kpàa bà, yèè wo Fɛtɔ̀ naŋ gbàì wo kanaà jii e nyaàiŋ dè maŋ keì maŋ àŋ naŋ gbùwò wo Pɔɔ̀ e ɗì maŋ. Wò naŋ woò wààŋ, “Wo Filɛ̀ naŋ kià jòòwo felaa bà ko sààŋ nyìwì,

¹⁵ e teengaà mìŋ naŋ wa kɔ̀ ko Jùlusɛ̀làm lɛ, aŋ kànà sìèfèìŋ zòòlo nyàŋ yaà aŋ màmànkùmɛ̀ŋ aŋ Juùù nyaŋ naim dawè wèè kauŋ jèè keì.

¹⁶ Kɛɛ mìŋ naŋ nyiŋ woò mìàŋ tɛɛ̀ nàŋ fè è làŋgì ànyùùŋ fùɔ̀ŋ Luùm nyaŋ wèè aŋ kìlà wò nyùùŋ keì kòɓɛ̀ ànyùùŋ nyaŋ nauŋ gbùwò maŋ keì ɗì nyaŋ.

¹⁷ Kpeiŋ nààŋ àŋ naim dè maŋjɛ̀wɛ è naiŋ kià hnè, miŋ gò dɔɔnɔ̀ŋ. Wɔŋ niìsìaà bàa mìŋ naŋ jɛ̀ì ke kpùà kana miɛ̀ŋ diɛŋ yèè mìŋ naŋ nyɛ̀nɛ̀ŋ aŋ kààlòòɗùà nyaŋ aŋ hìàŋ wo Pɔɔ̀ ko fɛɛ̀feìŋ.

¹⁸ Kɛɛ nààŋ aŋ joouŋ nyàŋ naŋ sie wèè aŋ woò kɛ̀ kiìŋ wò naŋ nyɛ̀nɛ̀ŋ, aŋ gò wòò è kèì tɔ̀ɔ̀nyaàŋ gbiŋ janyai e yèɛ mìŋ yaà wa yɛ̀ɛ̀mɛ̀ dòmaŋ wèè è keìɛ nyààŋ wò naŋ nyɛ̀nɛ̀ŋ lɛ.

¹⁹ E yèɛ gbiŋ nɔŋ àŋ kuwa dài aŋ woò lɛ nàŋ yaà e keì kpàànè kpaane e nyaàiŋ dè maŋ langi nyiŋ màŋ bà yèè e kèè wo felaa bà naŋ wa fɔ̀ àŋ nyaaŋ wo Jisɛ̀. Wo Pɔɔ̀ naŋ woò wààŋ wo Jisɛ̀ bi naŋ yèwè e fàaà dìì yèè kòò wò yaà wɔŋ nyiiŋ gèeɔ̀ sùà.

²⁰ Kɛɛ nààŋ miŋ nyimààŋ kɛ̀ diè mìŋ naŋ ɓɛ̀nɛ̀ŋ è keì lɛɛ̀ tùàŋ màŋ nɔnɔŋ wèè ka nyìmàŋ è tɔɔɓaà lɛ, mìŋ naŋ dàwè wo Pɔɔ̀ sèè mààŋ wò ɓɛ̀nɛ̀ŋ nyìmee wèè wo kà ko Jùlusɛ̀làm wèè aŋ kuii wòò e keì bì.

²¹ Kɛɛ wo Pɔɔ̀ naŋ pɔwɔ̀ yèè wò naŋ dawè wèè wo nɔ̀ŋ ko sààŋ nyìwì e jèèsùà wo Kànà Gbèè wɔŋ fùɔ̀ŋ anyùùŋ Luùm nyaŋ wo hàà e kìtì e keìuŋ nɛ̀. Yèè mìŋ naŋ wòò aŋ kààlòòɗùà nyaŋ wèè aŋ kuwièuŋ kià e jèèsùà kauŋ tùàŋ koɓɛ̀ wo kanaà Siisɔ̀, wo Kànà anyùùŋ fùɔ̀ŋ Luùm nyaŋ.”

²² Kpeiŋ wo Àgulepɔ̀ naŋ wòò wo Fɛtɔ̀ wààŋ, “Miàŋ pɛɛ mìŋ manaŋ ka kùmìàŋ e nɛ̀ɛŋ wo felaa wɛɛ̀ kuwa wo woò lɛ.” Wo Fɛtɔ̀ naŋ fasàì wààŋ, “Mìŋ do nàŋ nyɛ̀nɛ̀ŋ auŋ hiàŋ nàwèè wèè mauŋ kumiàŋ.”

²³ Wɔŋ niìsìaà bàa wo Àgulepɔ̀ yaà wo jaauŋ Bɛ̀niìŋ naŋ dɛ̀ɛ̀kɛ̀ e keì bi gbee nààŋ àŋ naŋ jɔ̀ ko zɛ̀mɛ̀ɛ̀ŋ dèèneì, nààŋ àŋ naŋ wa kɔ̀ɔ̀ aŋ kààlòòɗùà kana gbeegbèè yèè anyùùŋ gbèègbèè jawa nyàŋ bà wèè e keì bì. Yèè wo Fɛtɔ̀ naŋ nyɛ̀nɛ̀ŋ aŋ hìàŋ wo Pɔɔ̀ ko fɛɛ̀feìŋ,

²⁴ yèè wo Fɛtɔ̀ naŋ woò wààŋ, “Kanaà Àgulepɔ̀ yèè nyɛ̀iŋ nààŋ gbiŋ e dèène lɛɛ̀ sùà, yɛ̀mɛìŋ wo felaa wɛɛ̀! Aŋ Juùù nyaŋ gbiŋ e yìwìà ko Jùlusɛ̀làm yèè ko Sesèlià àŋ hnàŋ ko nɛ̀ɛ̀ŋ miìŋ, yèè àŋ naŋ kpààŋ nyààŋ aŋ manàŋ wò do nɔ̀ŋ wɔ̀ŋ nyiiŋ gèeɔ̀ sùà.

²⁵ Kɛɛ miŋ gò yɛ̀mɛ̀ è keì gbiŋ è yèɛ wò naŋ nyɛ̀nɛ̀ŋ lɛ wèè wo yɛ̀mɛ̀ è fàa; yèè nààŋ wuŋ bi naŋ dawè wèè wo Kànà Gbèè wɔŋ fùɔ̀ŋ anyùùŋ Luùm nyaŋ wouŋ gbaì, mìŋ naŋ ɗewè wèè kauŋ tùàŋ ko Luùm.

²⁶ Mìŋ kuwa ka sìngà maŋ keì titi bà koɓɛ̀ wo Kànà Gbèè wɔŋ fùɔ̀ŋ anyùùŋ Luùm nyaŋ e nyaàiŋ dè wo felaa wɛɛ̀. Weètii mìŋ nauŋ hìɛ̀ŋ ko fɛ̀ɛ̀fèìŋ nyɛ̀iŋ nààŋ gbiŋ, kɛɛ ɓɔɔɓɔɔ, wo Kanaà Àgulepɔ̀. Sèè è kpɛɛyɛ̀ìŋ e keì lɛɛ̀ tùàŋ maŋ nɔnɔŋ, kɛ̀ kà kɛ̀ɛ̀nɛ̀ŋ e nɛ̀ŋ bà wèè ka sìngà.

²⁷ Esaɓù kɛ̀, e jiikɛ̀ɛ gbiŋ naàŋ nɔ̀ŋ wèè ka tùàŋ wò pèesìnàŋ koɓɛ̀ wò Kànà Gbèè wɔ̀ŋ fùɔ̀ŋ anyùùŋ Luùm nyaŋ e yèɛ miŋ gòuŋ tɔɔ̀ kɛ̀ kiìŋ màŋ keì àŋ nauŋ gbùwò e ɗì.”