Nyɛ̀nɛ̀ŋ 21 - WƆŊ FƐ̀Ì EBÒ SÌÀŊ DAYÀA

Wo Pɔɔ̀ kà ko Jùlusɛ̀làm

¹ Yèè nààŋ è naŋ nyiŋ naàŋ diemè wèè eiŋ ka, è naiŋ sɛ̀ɛ̀ wɔŋ meeèɔ sùà yèè è naiŋ kɔ̀ ko Kɔɔ̀. Wɔŋ niìsìaà bàa è naiŋ hàì ko Lɔɗì, e yìwìà kuii è naiŋ jèè wɔŋ meeèɔ sùà è naiŋ kɔ̀ ko Patalà.

² Kuŋ è naiŋ wa mɛ̀ɛ̀ŋ wɔŋ meeè wɔ̀ŋ yaà kɔ̀ɔ̀yɛ̀ ko Fònisìà, yèè è naiŋ wuŋ sɛ̀ɛ̀ sùà è naiŋ kɔ̀.

³ È naiŋ wa hàì koɓɛ̀ bà ko yèi è yɛmɛ̀ìŋ wa ko Sapulɔ̀, yèè è naiŋ kɔ̀ wɔŋ kùàŋ gbɔnɔŋ wɔŋ dakìɔ diɛŋ ko Taà wɔŋ fùɔ̀ŋ Siilìàa, ko yèi anyùùŋ nyaŋ yaà wa kɔɔyɛ wèè aŋ gè manɛ̀ŋ foo nyiŋ màŋ wɔŋ meeèɔ sùà.

⁴ È naiŋ wa kuii mɛ̀ɛ̀ŋ anyùùŋ hààwè Kanaà bà yèè è naiŋ nɔ̀ŋ ko nɛ̀ɛ̀ŋ nyiŋ niìŋ wèè maŋ ɗɔ̀ɔ̀ nɔɔnɔŋ le tìyèe. Wo Jìnàŋ Nɛɛmaàŋ naŋ wa wòò anyuùŋ hààwe nyàŋ wèè aŋ woò wo Pɔɔ̀ kɛ̀ ɓɔ̀ wò ka kò Jùlusɛ̀làm.

⁵ Kɛɛ nààŋ e teengaà è manaŋ wa è nɔ̀ŋ ko nɛ̀ɛ̀ŋ nyiŋ niìŋ lɛ naŋ jùò, è naiŋ wa ɓɛìŋ tɔ̀ɔ̀tù e kàaiŋ wilɛ̀. Aŋ kpàkòò nyaŋ gbiŋ, e hààwè aŋ jàwè yèè aŋ jɔ̀à nyiŋ nyàŋ, naŋ wi wa dè maŋjɛ̀wɛ e yìwìà ko jawaì eiŋ kà wɔŋ juwoɔ̀ kɔɔ, kuŋ yàwi nààŋ gbiŋ naiŋ wa dè maŋ gɛ̀ɛ̀ŋ dìì yèè è naiŋ zoolò.

⁶ Eɓìèmàŋjɛ̀wɛ̀ tii è naiŋ dìèmè aŋ dàwi, yèè è naiŋ sɛ̀ɛ̀ wɔŋ meeèɔ sùà, yèè anyuùŋ gbànaŋ nyàŋ naŋ kɛ̀ɛ̀ ko jawaì.

⁷ È naiŋ sùònò e kàaiŋ wilɛ̀ e yìwìà ko Taà eiŋ kà ko Tɔlemàì, yèè è naiŋ zùùmò anyuùŋ hààwe nyàŋ yèè è naŋ nɔ̀ŋ ko nɛ̀ɛ̀ŋ nyiŋ niìŋ wèè e gɔ̀ɛ̀ɛ̀ guùŋ.

⁸ Wɔŋ niìsìaà bàa è naiŋ kɔ̀ ko Sesèlià; yèè è naiŋ kɔ̀ ko gbòò Felè, wo nyuùŋ gbòà ke mìè Dayàa. Wò yaà wa anyùùŋ nɔɔnɔŋ le tìyèe nyàŋ bà guùŋ wo yèɔ naŋ wa kpùùmò aŋ keela tàeɗùù nyaŋ, yèè àŋ naŋ nɔ̀ŋ ko nɛ̀ɛ̀uŋ niìŋ.

⁹ Wo Felè kuwa wa aŋ jɔ̀àjɔ̀ùŋ tiinàŋ aŋ yè nyaŋ yaà wa aŋ jɔ̀ùŋ jɔ̀à bɛ̀ɛ̀, àŋ hewa gbòà ke mìè Dayàa koɓɛ̀ anyùùŋ.

¹⁰ E teengaà è yààìŋ wa ko Sesèlià wèè maŋ ɗɔɔ kpàa bà lɛ, wo wɛ̀ijì bà àŋ nyaaŋ wo Àgaɓɔ̀ naŋ hnè ko nɛ̀ɛ̀ŋ wiì e yìwìà ko Jùdià.

¹¹ Wo wɛ̀ijìɔ naŋ ɓèmè e tɛkìɛ wo Pɔɔ̀ dikìà wa e tɛɛ lɛ̀, yèè wò naŋ niŋ dìkìè wuŋ bi maŋ gòlò yèè maŋ kùàŋ. Yèè wò naŋ woò wààŋ, “Tɛɛ̀ wo Jìnàŋ Nɛɛmaàŋ naŋ woò, kɛ̀ anyùùŋ gbèègbèè aŋ Juùù nyaŋ bà ko Jùlusɛ̀làm do nàŋ dèkè wo nyùnɔ̀ɔŋ kanaŋ e tɛkì lɛɛ̀ wɔ, yèè àŋ douŋ nàŋ kìlè koɓɛ̀ anyùùŋ nyaŋ fè àŋ Juùù nyaŋ.”

¹² Nààŋ wo wɛ̀ijìɔ Àgaɓɔ̀ naŋ tɛɛ̀ woò, yàwi yèè anyùùŋ nyaŋ joà wa ko Sesèlià nyaŋ naŋ pɔ̀wɔ̀ wo Pɔɔ̀ kɛ̀ ɓɔ̀ wò ka kò Jùlusɛ̀làm.

¹³ Kɛɛ wo Pɔɔ̀ naŋ nyiŋ fasàì wààŋ, “Wèè kiìŋ nìŋ yaà gulie e kìlà nìŋ yaà pɔ̀ɔ̀pɔɔ sùà ke jii miɛ̀ŋ? Miŋ gò nɔŋ nyimèè wèè aim gbìàŋ kò sààŋ nyìwì wèè èsàɓù e dèè wò Kanaà Jisɛ̀, kɛɛ mìŋ naŋ ngèè pɛɛ nyimèè wèè ka fà e weèuŋ ko Jùlusɛ̀làm!”

¹⁴ Nààŋ wo gò wa jàà màŋ mìè gbòa wi màŋ kùàŋ dìì wèè wo nyimèè kɛ̀ ɓɔ̀ wò kao, è nauŋ hɔ̀ànè pɔ̀wɔ yèè è naŋ woò wìà, “Tɔ̀ e yèɛ wo Kanaà manaŋ lɛ̀ e hɛɛnɛ̀ŋ.”

¹⁵ Nààŋ maŋ ɗɔɔ mɛɛ̀ŋ naŋ mààŋ wèè e tèèngà e nɔ̀ŋ wilɛ̀ ko Sesèlià, è naiŋ nyɔ̀wɔ̀ manɛ̀ŋ foo wi màŋ wèè e kaiŋ ko Jùlusɛ̀làm.

¹⁶ Anyuùŋ hààwe nyàŋ bà e yìwìà ko Sesèlià naŋ wi wa dè maŋjɛ̀wɛ yèè àŋ naŋ wi kɔ̀ɔ̀ ko gbòò Meesìŋ wèè eiŋ noo nɔ̀ŋ. Wo Meesìŋ yewe wa ko Sapulɔ̀ yèè wò yaà wa wo nyuùŋ hààweɔ̀ bà guùŋ e yìwìà ko tɔɔtuì.

Wo Pɔɔ̀ jààmè wo Jìiiŋ

¹⁷ E hài wi ko Jùlusɛ̀làm, anyùùŋ hààwè Kanaà naŋ wi ɓeè e zɔlɔ̀ sùà.

¹⁸ Wɔŋ niìsìaà bàa, è naiŋ dè wo Pɔɔ̀ maŋjɛ̀wɛ eiŋ kà koɓɛ̀ Jìiìŋ, aŋ màmànkùmɛ̀ŋ anyuùŋ hààwe nyàŋ gbiŋ yao wa ko fɛɛ̀feìŋ.

¹⁹ Wo Pɔɔ̀ naŋ nyiŋ zuumò yèè wò naŋ nyiŋ wòò e ɗeweɛ̀ wo Dayà nauŋ toomò wèè wo kpùùmàŋ anyùùŋ nyaŋ fè àŋ Juùù nyaŋ.

²⁰ Anyùùŋ nyaŋ gbiŋ naŋ wa kòmò e nɛ̀ɛŋ wo Pɔɔ̀ naŋ woò lɛ naŋ wa tɛ̀nɛ̀ŋ wo Dayà yèè àŋ naŋ wòò wo Pɔɔ̀ nyààŋ, “Wùìya wiɔ̀, màŋ yɛ̀mɛ̀ anyuùŋ taasùùŋ jika nyàŋ kinɛiŋ aŋ Juùù nyaŋ sùà naŋ hààwè Kanaà Jisɛ̀ nyaŋ. Aŋ gbiŋ yaà e wànàŋ sùà wèè aŋ jɔ̀ɔ̀lɔ̀ maŋ Sàwà Dayà maŋ dìì.

²¹ Anyuùŋ hààwe nyàŋ naŋ kòmò kɛ̀ muàŋ nàŋ yaà kàà sùà aŋ Juùù nyaŋ maŋ fùɔ̀ŋ anyùùŋ nyaŋ fè àŋ Juùù nyaŋ sùà kɛ̀, ɓɔ̀ àŋ jɔɔlɔ̀ màŋ Sàwà Mòòze màŋ dìì, yèè mààŋ ɓɔ̀ àŋ jàà àŋ jɔ̀à nyiŋ nyàŋ kpùa ɔ̀ɔ̀ ɓɔ̀ àŋ dè langi wilɛ̀ màŋjɛ̀wɛ.

²² Kiìŋ è naiŋ naàŋ ɓɛ̀nɛ̀ŋ nyɛ̀nɛŋ? Tɔɔɓaa anyuùŋ wi nyàŋ do nàŋ kòmò kɛ̀ kòò mùŋ yaà kià.

²³ Kɔ̀nɛɛ̀ŋ nyɛnɛ̀ŋ e yèɛ è woàùm lɛ. È kùwàìŋ aŋ fèlàà tiinàŋ aŋ yè nyaŋ naŋ jɔ̀ɔ̀ ɗààhiì titi koɓɛ̀ Dayài.

²⁴ Kɔ̀à sɛ̀ɛ̀ nyiŋ sùà yèè muŋ nɔ̀ŋ wo bàumbà yèè niŋ nyɛ̀nɛ̀ŋ e nɛ̀ɛŋ maŋ Sàwà Dayà maŋ naŋ woò lɛ nààŋ wò naŋ miŋ wa kìɛ̀ŋ wo Mòòze wèè niŋ nɔ̀ŋ zɛ̀nɛiŋ ko fɛ̀ɛ̀fèìŋ Dayà lɛ. E kìlà muŋ paawà wèè manɛ̀ŋ saà nyiŋ màŋ, Kpeiŋ kɛ̀ àŋ dòò maŋ ɗìiŋ màŋ. E ɗewe lɛɛ̀ sùà anyùùŋ nyaŋ do nàŋ nyìmè kɛ̀ e yèɛ àŋ naŋ kòmò e nyaàiŋ eum dè lɛ è yaà e tòa, yèè kɛ̀ muàŋ bi kòò mùŋ yaà jɔ̀ɔ̀lɔ̀ maŋ Sàwà maŋ wo Dayà naŋ wa kìɛ̀ŋ wo Mòòze màŋ dìì.

²⁵ Kɛɛ sèè è nɔ̀ŋ wèè anyùùŋ nyaŋ fè àŋ Juùù aŋ yè nyaŋ naŋ kìlè anyuùŋ hààwe nyàŋ, è nyiŋ tùàŋ wɔŋ fɛi e nyaàiŋ dè e kiti wilɛ̀. È naŋ nyiŋ woò kɛ̀ ɓɔ̀ àŋ jè mànɛ̀ŋ jè saaà maŋ yè maŋ àŋ naŋ gììyè saaà koɓɛ̀ aŋ dayà joo lɛ̀, ɔ̀ɔ̀ ɓɔ̀ àŋ gbìlà maŋ sɛ̀ìŋ ɔ̀ɔ̀ wò yìlì wo yèɔ naŋ fɔ̀ yèè wo gò wùàŋ màŋ sɛ̀ìŋ wɔ, e kìlà aŋ gbaaì e kèè e hmɔŋtu nyɛ̀nɛŋ,.”

²⁶ Wo Pɔɔ̀ naŋ nyimèè wèè wo nyɛ̀nɛ̀ŋ e yèɛ àŋ nauŋ woò wèè wo nyɛ̀nɛ̀ŋ lɛ. Wɔŋ niìsìaà bàa wò naŋ kɔ̀ɔ̀ aŋ felaa nyàŋ wèè aŋ nyɛ̀nɛ̀ŋ e langiɛ̀ maŋ Sàwà Dayà maŋ naŋ woò lɛ wèè aŋ nɔ̀ŋ zɛ̀nɛŋ nyiŋ ko fɛ̀ɛ̀fèìŋ Dayà. Kpeiŋ wò naŋ kɔ̀ ko Saaŋ Zòòlò Dayài, wèè wo tɔɔ̀ ke ɗɔɔɛ̀ àŋ do nàŋ kpɛ̀ɛ̀yɛ̀ ke nyɛ̀nɛ̀ŋ e làngì zɛ̀nɛɛ̀ŋ nààŋ maŋ Sàwà Dayà maŋ naŋ woò lɛ, e kìlà ke ɗɔɔ bi diɛŋ wuŋ noo Pɔɔ̀ do nàŋ hìɛ̀ŋ e nɛ̀ŋ saaà wèè wo nyùùŋ gbiŋ wo gè e jeuŋ saàa.

Anyùùŋ nyaŋ naŋ kùwò wo Pɔɔ̀ ko Saaŋ Zòòlò Dayài

²⁷ Nààŋ maŋ ɗɔ̀ɔ̀ nɔɔnɔŋ le tìyèe màŋ naŋ wa naàŋ joo tòloò wèè maŋ jùà, aŋ Juùù nyaŋ bà nyiŋ naŋ yèwè wɔŋ fùɔ̀ŋ Eesìàa nyàŋ, naŋ yɛ̀mɛ̀ wo Pɔɔ̀ ko Saaŋ Zòòlò Dayài, yèè àŋ naŋ dàà ke gboà gbee e faaàŋ sùà, e kìlà aŋ kùwà wo Pɔɔ̀.

²⁸ Kpeiŋ àŋ naŋ tɔ̀ɔ̀tù kpàaŋ nyààŋ, “Nyɛ̀iŋ nààŋ nyùùŋ Ezɔ̀ɛ̀ nyaŋ, kìɛìŋ e kpùùmaŋ! Wo felaa wɛɛ̀ nàŋ yaà kàà sùà anyùùŋ nyaŋ gbiŋ maŋ tàta màŋ sùà kɛ̀ aŋ fè anyuùŋ wi nyàŋ jɛwɛ e kìlà ɓɔ̀ àŋ jɔɔlɔ̀iŋ maŋ Sàwà maŋ wo Dayà naŋ kìɛ̀ŋ Mòòze màŋ dìì; eɓìèmàŋjɛ̀wɛ̀ tii, wò naŋ hìɛ̀ŋ anyùùŋ nyaŋ fè àŋ Juùù nyaŋ wo nyiŋ jɔ̀ɔ̀yɛ̀ ko Saaŋ Zòòlò Dayài, yèè wò gè e ɓɛ̀ɛ̀jàa zɛ̀nɛɛ̀ŋ ko zòòlò nɛɛmaŋ yaà!”

²⁹ Àŋ naŋ wa tɛɛ̀ woò e fèfoo àŋ naŋ yɛ̀mɛ̀ wo nyùùŋ e yìwìà ko Ɛfesɔ̀ àŋ nyaaŋ Tofimù yaà wo Pɔɔ̀ koɓɛ̀ guùŋ ke ɗɔɔɛ̀ bàa ko jawaì, e kìlà àŋ yaà wa goongo kɛ̀ wo Pɔɔ̀ nauŋ jɔ̀ɔ̀yɛ̀ ko Saaŋ Zòòlò Dayài.

³⁰ E gbɔ̀ɔ gbee naŋ wa sɔ̀ɔ̀ ko jawa gbeeì, e kìlà anyùùŋ naŋ hnè àŋ yaà duunyɛŋ e yìwìà maŋ tàta màŋ gbiŋ sùà ko jawaì. Àŋ naŋ kùwò wo Pɔɔ̀ auŋ gɔ̀ɛ̀ɛ̀ dìì auŋ gè ko Saaŋ Zòòlò Dayài, ko fɛɛ̀feìŋ àŋ naŋ yìlè maŋ gbemgbee màŋ gbiŋ ko Saaŋ Zòòlò Dayài.

³¹ Nààŋ àŋ yaà wa ɓùlìè wo Pɔɔ̀ wèè auŋ jìwà, ebò naŋ hàì koɓɛ̀ wo kànà aŋ kààlòòɗùà nyaŋ e yìwìà wɔŋ fùɔ̀ŋ anyùùŋ Luùm nyaŋ sùà kɛ̀ anyùùŋ nyaŋ dàà ke gbòà ko Jùlusɛ̀làm jawaì gbiŋ.

³² Ko fɛɛ̀feìŋ wò naŋ ɓèmè aŋ kààlòòɗùà nyaŋ yaà aŋ sìèfeìŋ nyaŋ bà yèè àŋ nao kɔ̀ maŋ dùaŋ dùaŋ. Nààŋ anyùùŋ nyaŋ naŋ yɛ̀mɛ̀ wo kànà aŋ kààlòòɗùàa yaà aŋ kààlòòɗùàuŋ nyàŋ, àŋ naŋ hɔ̀ànè wo Pɔɔ̀ ɓùla.

³³ Kpeiŋ wo kànà aŋ kààlòòɗùàa naŋ hnè yèè wò naŋ kùwò wo Pɔɔ̀ yèè àŋ nauŋ sìè maŋ jɔ̀ɔ̀ tìyèe. Kpeiŋ wò naŋ dawè wààŋ, “Ɓòò nàŋ yaà wo felaa wɛɛ̀ yèè kiìŋ wò naŋ nyɛ̀nɛ̀ŋ?”

³⁴ Aŋ bà nyiŋ e faaàŋ sùà naŋ wòò e keì joo, yèè aŋ bà nyiŋ naŋ woò è gbà. E gbɔ̀ɔɛ̀ naŋ wa gàŋ e nyɛ̀nɛ̀ŋ wo kànà aŋ kààlòòɗùàa gò wa ɓɛ̀nɛ̀ŋ nyìmàŋ è keì titiɛ̀ naŋ wa kaaìŋ lɛ̀, yèè wò naŋ wòò aŋ kaalouŋ nyàŋ kɛ̀ aŋ koà wo Pɔɔ̀ ko gbòòkùàŋ aŋ kààlòòɗùà nyaŋ.

³⁵ Nààŋ àŋ nauŋ hàlèè koɓɛ̀ ke kùù kɛinyɛɛ̀ŋ wèè àŋ jòwà ko saaìŋ, sɔɔ̀ aŋ kààlòòɗùà nyaŋ nauŋ wa jòòwò fùùŋ auŋ juwià fiòfiò esaɓù kɛ̀ anyùùŋ nyaŋ naŋ wa tuù zimgbe.

³⁶ Anyùùŋ nyaŋ naŋ nyiŋ wa dè maŋjɛ̀wɛ yèè àŋ yaà kpàaŋ sùà nyààŋ, “Jiwàuŋ! Jiwàuŋ!”

Wo Pɔɔ̀ naŋ gbòò wèè wuŋ bi koɓɛ̀ e faaàŋ

³⁷ Nààŋ aŋ kààlòòɗùà nyaŋ yaà wa naàŋ hinie wèè aŋ jɔ̀ɔ̀yɛ̀ wo Pɔɔ̀ ko gbòòkùàŋ aŋ kààlòòɗùà nyaŋ, wo Pɔɔ̀ naŋ dàwè wo kànà aŋ kààlòòɗùà nyaŋ wààŋ, “Màim ɓɛ̀nɛ̀ŋ gè nyààŋ diɛŋ wèè kaum wòò e keì bà?” Wo kànà aŋ kààlòòɗùàa nauŋ dawè wààŋ, “Diè mùŋ naŋ nyìmè e ɗèwè e Guliì mieɛ̀ gbòa?

³⁸ Muàŋ nàŋ fè wò nyùùŋ Ijèɔ wò yèɔ naŋ wa dàà kè gboà gbeeɛ̀ yèè mùŋ naŋ kɔ̀ɔ̀ anyuùŋ jìwà nyùùŋ tààsùùŋ tiinàŋ (4,000) kè fòùngà e diì wòaà sùà?”

³⁹ Wo Pɔɔ̀ naŋ fasàì wààŋ, “Kpele! Mìŋ yaà wo Juùù nyuuŋ, àŋ naim kùmìè ko Tasɔ̀, ko jawa gbee kɛnɛì bà guùŋ wɔŋ fùɔ̀ŋ Sèlesìàa. Kɔ̀nɛɛ̀ŋ tɔ̀ miŋ gbòà koɓɛ̀ anyùùŋ nyɛɛ̀ŋ.”

⁴⁰ Wo kànà aŋ kààlòòɗùà nyaŋ nauŋ gè nyààŋ diɛŋ wèè wò gbòà, yèè wo Pɔɔ̀ naŋ sìè ke kùù kɛinyɛɛ̀ŋ diɛŋ wèè ko saaìŋ yèè wò naŋ mɛ̀ɛ̀mɛ̀ɛ̀ŋ maŋ kùàŋ koɓɛ̀ anyùùŋ nyaŋ. Nààŋ àŋ naŋ wa nɔ̀ŋ dìì tɔ̀ɔ̀ùŋ, wo Pɔɔ̀ naŋ gbòò ko nɛ̀ɛ̀ŋ nyiŋ niìŋ e Hiɓulù mieɛ̀ sùà, wɔŋ kàìŋ aŋ Hiɓulù nyaŋ.