Nyɛ̀nɛ̀ŋ 16 - WƆŊ FƐ̀Ì EBÒ SÌÀŊ DAYÀA

Wo Timetè dè wo Pɔɔ̀ yèè wo Silà maŋjɛ̀wɛ

¹ Wo Pɔɔ̀ yèè wo Silà naŋ kɛ̀ɛ̀ maŋjɛ̀wɛ ko Dɛɓì yèè ko Lesità. Kuŋ àŋ naŋ wa mɛ̀ɛ̀ŋ wo nyùùŋ màŋjɛ̀wɛ̀ɔ bà guùŋ àŋ nyaaŋ wo Timetè. Wo yèyeuŋ nɔɔ̀ŋ wuŋ pɛɛ yaà wa wo nyuùŋ hààwe, kɛɛ wò yaà wa wo Juùù nyuuŋ, yèè wo dèdauŋ nɔɔ̀ŋ yaà wa wo Guliì nyuuŋ.

² Anyuùŋ hààwe nyàŋ gbiŋ ko Lesità yèè ko Ìkɔniɔ̀ŋ naŋ wa gbòò tɛ̀ɛ̀ e nyaàiŋ dè wo Timetè.

³ Wo Pɔɔ̀ manaŋ wa wo Timetè wouŋ dè maŋjɛ̀wɛ; Kpeiŋ wò naŋ jàà wo Timetè ke kpùa, esaɓù kɛ̀ aŋ Juùù nyaŋ gbiŋ maŋ tàta miiŋ sùà wa nyìmàŋ kɛ̀ wo dèdà Timetèɔ yaà wa wo Guliì nyuuŋ.

⁴ Nààŋ wo Pɔɔ̀ yèè aŋ dàwiuŋ nyàŋ yaà wa kɔ̀ɛ sùà maŋ jawa gbeegbèè maŋ sùà, àŋ naŋ wòò anyuùŋ hààwe nyàŋ e yèɛ aŋ keela tàeɗùù yèè aŋ màmàŋkùmɛŋ nyàŋ ko Jùlusɛ̀làm naŋ wa ɗewè lɛ, yèè àŋ naŋ nyiŋ kìɛ̀ŋ ke jii nyingè wèè aŋ jɔɔlɔ̀ maŋ sàwà maŋ dìì.

⁵ Anyuùŋ hààwe nyàŋ naŋ wa kɛ̀ɛ̀nɛ̀ŋ gààŋ e hààwe nyiŋ nɛ̀ sùà, yèè ke ɗɔɔ gbiŋ ke gbòò anyuùŋ hààwe nyàŋ dɛkɛ̀ wa sùà.

Wo Pɔɔ̀ naŋ gò e gɔa ko Toà

⁶ Wo Pɔɔ̀ yèè aŋ dàwiuŋ nyàŋ naŋ kɔ̀ɛ̀ maŋ kpàlàùŋ kpàlàùŋ Fɛgìà maŋ yèè Gàlatìà maŋ sùà, nààŋ wo Jìnàŋ Nɛɛmaàŋ gò wa nyimèè wèè aŋ gbòà kè mìè Dayàa wɔ̀ŋ fùɔ̀ŋ Eesìàa sùà.

⁷ Nààŋ àŋ naŋ wa hàì ke konaàŋ fèemàŋ ko Masià, àŋ manaŋ wa weè aŋ kà ko Bɛ̀tenìà, kɛɛ wo Jìnàŋ Jisɛ̀ɔ gò nyiŋ wa nyimèè.

⁸ Kpeiŋ, àŋ naŋ gɛ̀ɛ̀ ko Masià yèè àŋ naŋ kɔ̀ ko jawaì àŋ nyaaŋ ko Toà.

⁹ Wɔŋ dùùm wiiŋ, wo Pɔɔ̀ naŋ gò e gɔa, wò naŋ yɛ̀mɛ̀ wo felaa bà e yìwìà ko Mɛ̀sèdonià wò siao wò yàaùŋ pɔɔwɔ wààŋ, “Hnaàŋ ko Mɛ̀sèdonià muŋ kpuumàŋ wi.”

¹⁰ Nààŋ wo Pɔɔ̀ naŋ gò e gɔa lɛɛ̀, è naiŋ tɔ̀ɔ̀tù e ɗewe kàme wèè eiŋ kà ko Mɛ̀sèdonià. È naiŋ wa haawè kɛ̀ wo Dayà naŋ wi wa nyààŋ wèè e ka e daanèiŋ Ebò Siaàŋ koɓɛ̀ anyùùŋ nyaŋ koɓɛ̀ bi.

E ɗewe kiiɛ̀ wo Leɗià naŋ kìlè koɓɛ̀ Dayài lɛ ko Fèlepì

¹¹ È naiŋ sɛ̀ɛ̀ wɔŋ meeè sùà e yìwìà ko Toà yèè è naiŋ nìè ko Sàmɔ̀tolè, yèè wɔŋ niìsìaà bàa è naiŋ hàì ko Niepolì.

¹² E yìwìà kuii è naiŋ kɔ̀ ko Fèlepì, e jawa gbee ke tiìŋ jiɛ̀jiɛ̀ɛ sùà ko Mɛ̀sèdonià. Ko Fèlepì yaà wa ko jawa gbee ko yèi anyùùŋ e yìwìà wɔŋ fùɔ̀ŋ anyùùŋ Luùm nyaŋ naŋ wa nyɛ̀lɛ̀ lɛ. È naiŋ wa nɔ̀ŋ ko Fèlepì wèè maŋ ɗɔɔ kpàa bà.

¹³ Kpeiŋ ke Ɗɔ̀ɔ̀ Zòòlò aŋ Juùù nyaŋ diɛŋ è naiŋ yèwè ko jawa gbeeì yèè è naiŋ kɔ̀ e wùìyèɛ kɔɔ, ko yèi è yààìŋ wa goongo kɛ̀ ko nɛ̀nɛ̀ŋ yaào ko yèi aŋ Juùù nyaŋ deenàŋ wa wèè zòòlo lɛ. È naiŋ wa jɛi yèè è naiŋ gbòò koɓɛ̀ aŋ jɔùŋ nyaŋ nao wa gbònò koɓɛ̀ guùŋ nyaŋ.

¹⁴ Wo nìeɔ̀ àŋ nyaaŋ wo Leɗià wɔ nàŋ yaà wa wo nyùnɔ̀ɔŋ bà guùŋ naŋ wi wa kumìè wɔ. Wò yewe wa ko jawa gbeeì aŋ nyaaŋ Tàyatilà, wò yaà wa wo nyuùŋ mààŋ maŋ dèè sɛ̀ìŋ tɔɔ nyìngà ɓaà titi, yèè wò hewa zòòlò Dayà. Wo Kanaà naŋ wa yìlè ke jiiuŋ nɛɛ̀ŋ wèè wo kumiàŋ e yèɛ wo Pɔɔ̀ yaà wa woo lɛ̀.

¹⁵ Nààŋ wuŋ yaà anyùùŋ nyaŋ ko gboouŋ noo naŋ wa nɔ̀ŋ gùa nyiŋ, wò naŋ wi wa woò wààŋ, “Sèè mààŋ nàim naàŋ jàà kùàŋ dìì wèè ka nɔ̀ŋ wo nyuùŋ hààweɔ̀ bà wo Kanaà sùà, kɛ̀ hnaìŋ niŋ nɔ̀ŋ ko gboo mio.” Yèè wò naŋ wi kai pɔwɔ̀ wèè è kaiŋ noo.

Ko sààŋ nyìwìi ko Fèlepì

¹⁶ Ke ɗɔ̀ɔ̀ guùŋ nààŋ è yààìŋ wa kɔ̀ɔ̀yɛ̀ koɓɛ̀i àŋ zoolà lɛ, è naiŋ wa mɛ̀ɛ̀ŋ wo ɗo jɔùŋ jɔa bà. Wò kuwa wa e gààŋ jinàŋ naanààŋ wo yèɔ kiɛ̀uŋ wa e gààŋ wèè wo wòò wo nyùùŋ kɛ̀ kiɛ̀ŋ nàŋ do nàŋ kaaìŋ ko dòmàŋfeìŋ. Esàɓù ke nyɛ̀nɛuŋ yɛɛ̀ aŋ kɛ̀ɛ̀nɛuŋ nyàŋ heuŋ wa gììyà e nɛɛnɛŋ zimgbe sùà.

¹⁷ Wo jɔùŋjɔaà naŋ dè yàwi nààŋ Pɔɔ̀ maŋjɛ̀wɛ, wò yaà kpàaŋ sùà wààŋ, “Anyùùŋ nyɛɛ̀ŋ àŋ yaà aŋ ɓɔìjɔ̀à wèè wo Dàyà Gaàŋ Gbeeɔ̀! Àŋ yààìŋ woo kɛ̀ diè nìŋ naŋ ɓɛ̀nɛ̀ŋ nɔ̀ŋ jòèyeiŋ.”

¹⁸ Wò naŋ wa tɛɛ̀ nyɛ̀nɛ̀ŋ wèè maŋ ɗɔɔ kpàa bà. E keì lɛɛ̀ naŋ wa naàŋ dìè wo Pɔɔ̀ nyààŋ, yèè wò naŋ kìlè koɓɛ̀ wo jɔùŋjɔaà wò naŋ wòò wo jinàŋ naanààaŋ wààŋ, “E dèè Jisɛ̀ Kulaìɛ sùà, mìŋ manaŋ maŋ fòlà wo jɔùŋ jɔa wɛɛ̀ ko sùà.” Ko fɛɛ̀feìŋ wo jinàaŋ nauŋ fòlò ko sùà.

¹⁹ Nààŋ aŋ kɛ̀ɛ̀nɛ̀ŋ wo jɔùŋjɔaà naŋ wa naàŋ jàà jii kɛ̀ ke jìì tùlìà dòmàŋ e nɛɛnɛŋ bàne nyiŋ nɛɛ̀ŋ kè nyiŋ fòlà sìwè, àŋ naŋ kùwò wo Pɔɔ̀ yèè wo Silà yèè àŋ naŋ nyiŋ kɔ̀ɔ̀ anyùùŋ gbèègbèè sàwà nyaŋ fɛɛ̀feìŋ.

²⁰ Àŋ naŋ wòò anyuùŋ gbeegbèè nyaŋ nyààŋ, “Aŋ Juùù nyɛɛ̀ŋ yaà nyìnìè e keì naanààŋ ko jawa gbee wiì.

²¹ Àŋ yaà kàà sùà maŋ langi maŋ yè maŋ ke sàwà wiɛ̀ yàwi anyùùŋ ko Luùm nyaŋ gò wi gè nyààŋ diɛŋ wèè eiŋ miŋ nyɛ̀nɛ̀ŋ lɛ.”

²² Yèè e faaàŋ naŋ hnè koɓɛ̀ guùŋ wèè aŋ gbùwà wo Pɔɔ̀ yèè wo Silà ke gùuŋ. Kpeiŋ anyuùŋ gbeegbèè nyaŋ naŋ sɛ̀ɛ̀sɛ̀ɛ̀ maŋ dèè kɔ̀ɔ̀ aŋ fèlàà tìyèe nyàŋ yèè àŋ naŋ kìɛ̀ŋ aŋ kààlòòɗùà nyaŋ e gààŋ wèè aŋ ɓulià nyiŋ ke sele.

²³ Yèè nààŋ àŋ naŋ nyiŋ ɓùlò yèè e kɔɔ nyiŋ nɛ̀ gbiŋ naŋ nɔ̀ŋ manɛ̀ŋjèla, àŋ naŋ nyiŋ gbìɛ̀ŋ ko sààŋ nyìwì, yèè àŋ naŋ wòò wo nyùnɔ̀ɔŋ gbiɛŋ wo nyùùŋ ko sààŋ nyìwìi wɔ̀ wèè wo yìlà nyiŋ kpaŋ kpaŋ.

²⁴ Wo nyùnɔ̀ɔŋ gbiɛŋ wo nyùùŋ ko sààŋ nyìwìi wɔ̀ naŋ nyɛ̀nɛ̀ŋ e yèɛ àŋ nauŋ woò wèè wo nyɛ̀nɛ̀ŋ lɛ. Wò naŋ nyiŋ gbìɛ̀ŋ fauŋ ko sààŋ nyìwìi yèè wò naŋ nyiŋ sìè maŋ jɔ̀ɔɔ maŋ gòlò wo miŋ dìkìà maŋ kuùkpù mùnga.

²⁵ E tèèngà wɔŋ duùm hàì tɛɛ wo Pɔɔ̀ yèè wo Silà naŋ tɔ̀ɔ̀tù zòòlo yèè àŋ yaà dàà sùà maŋ nùŋ tɛ̀nɛŋ koɓɛ̀ Dayài, yèè aŋ pèesìnàŋ gbànaŋ nyàŋ ko sààŋ nyìwìi yaà nyiŋ wa kùmiaŋ sùà.

²⁶ Ko fɛɛ̀feìŋ e dììɛ naŋ gbiinè sɛmɛ, yèè ke sààŋ nyìwìɛ gbiŋ naŋ gbiinè e hàì ko tɔ̀ɔ̀tù ke saaàŋ e dììɛ dìì. Ko fɛɛ̀feìŋ maŋ gbemgbee maŋ gbiŋ naŋ yilè yèè maŋ jɔ̀ɔɔ màŋ naŋ fìlè aŋ pèesìnàŋ nyaŋ gbiŋ maŋ gòlò.

²⁷ Nààŋ wo nyùnɔ̀ɔŋ gbiɛŋ wo nyùùŋ ko sààŋ nyìwìi wɔ̀ naŋ yèwè dìì yèè wò naŋ yɛmɛ̀ kɛ̀ maŋ gbemgbee màŋ gbiŋ yaà wa yìle miŋ, wò naŋ gɔ̀ɛ̀ɛ̀ e kòyà ɗùàuŋ nɛ̀ e ɓula wèè wo jìwà wuŋ bi. E fèfoo wò yaà goongo kɛ̀ anyùùŋ nyaŋ gbiŋ ko sààŋ nyìwìi àŋ dùàŋ.

²⁸ Kɛɛ wo Pɔɔ̀ naŋ kpààŋ sɛiŋ wààŋ, “Ɓɔ̀ mùŋ nɛɛmùŋ muàŋ bi! Yàwi nààŋ gbiŋ kòò è yààìŋ kià.”

²⁹ Wo nyùnɔ̀ɔŋ gbiɛŋ wo nyùùŋ ko sààŋ nyìwìi wɔ̀ naŋ dawè wèè ke sìnga kùwa, yèè wò naŋ kɔ̀ɔ̀ maŋ dùàŋ wo jɔ̀à ko sààŋ nyìwìi; e jùùɛ yaàùŋ wa wò gè jèla kpàkpà yèè wò naŋ kɔ̀ wo sɔ̀à ko dììnaŋ wo Pɔɔ̀ yèè wo Silà fɛɛ̀feìŋ.

³⁰ Kpeiŋ wò naŋ nyiŋ fùlìè ko jɔɔlèi yèè wò naŋ nyiŋ dawè wààŋ, “Dàa, kiìŋ mìŋ naŋ ɓɛ̀nɛ̀ŋ nyɛ̀nɛŋ wèè ka nɔ̀ŋ e jòèyeim?”

³¹ Wo Pɔɔ̀ yèè wo Silà nauŋ fasàì nyààŋ, “Sèè mùŋ kɛɛnɛ̀ŋ e hààwe wo Kanaà Jisɛ̀ Kulaì sùà, muàŋ yèè anyùùŋ nyaŋ ko gboo moo nìŋ do nàŋ jòèyè.”

³² Kpeiŋ wo Pɔɔ̀ yèè wo Silà naŋ gbòò ke mìè Kanaà Dayà ko nɛ̀ɛ̀uŋ niìŋ e kpùlìà yaà anyunùuŋ nyàŋ gbiŋ ko gboouŋ noo.

³³ E tèèngà guùŋ bi sùà wɔŋ dùùm wiiŋ, wo nyùnɔ̀ɔŋ gbiɛŋ wo nyùùŋ ko sààŋ nyìwìi wɔ̀ naŋ nyiŋ kɔ̀ɔ̀ koɓɛ̀ bà yèè wò naŋ gùò manɛ̀ŋjèla nyiŋ maŋ. Kpeiŋ wuŋ yèè anyùùŋ nyaŋ gbiŋ ko gboouŋ noo naŋ wa nɔ̀ŋ gùa nyiŋ e tèèngà guùŋ bi sùà.

³⁴ Wo felaaà naŋ kɔ̀ɔ̀ wo Pɔɔ̀ yèè wo Silà ko gboouŋ noo yèè wò naŋ nyiŋ kìɛ̀ŋ e nɛ̀ŋje wèè aŋ jè. E zɔlɔ̀ naŋ wa dìè wuŋ yèè anyunùuŋ nyàŋ ko gboouŋ noo, esaɓù kɛ̀ àŋ kuwa wa naàŋ e hààwe wo Dayà sùà.

³⁵ Wɔŋ niìsìaà bàa anyùùŋ gbèègbèè anyùùŋ ko Luùm nyaŋ naŋ tùɔ̀ŋ aŋ pòèsià yèè àŋ naŋ nyiŋ woò nyààŋ, “Wo nyùnɔ̀ɔŋ gbiɛŋ wo nyùùŋ ko sààŋ nyìwìi wɔ̀ wo dangè wo Pɔɔ̀ yèè wo Silà aŋ ka.”

³⁶ Yèè wo nyùnɔ̀ɔŋ gbiɛŋ wo nyùùŋ ko sààŋ nyìwìi wɔ̀ naŋ wòò wo Pɔɔ̀ wààŋ, “Anyuùŋ gbeegbèè nyaŋ nyààŋ miŋ dangèiŋ niŋ ka. Weètii nàŋ ɓɛ̀nɛ̀ŋ kàa ke jii fàa sùà.”

³⁷ Kɛɛ wo Pɔɔ̀ naŋ wòò aŋ pòèsià nyaŋ wààŋ, “È yààìŋ anyùùŋ ko Luùm, yèè anyùùŋ gbèègbèè ko Luùm nyaŋ naŋ wi ɓùlò e yèɛ aŋ gò wi gbaì wèè aŋ woò nyààŋ è keì naŋ wi jeè. Àŋ naŋ wi gbìɛ̀ŋ ko sààŋ nyìwì. Kpeiŋ àŋ manaŋ naàŋ aŋ wi dangè wèè e ka mɔ̀ɔ̀ŋ? Kpele, aŋ fè yɛi ɓɛ̀nɛ̀ŋ nyɛ̀nɛŋ! Tɔ̀ nyiŋ bi aŋ hnàŋ kià aŋ fulià wi.”

³⁸ Aŋ pòèsià nyaŋ naŋ kɔ̀ yèè àŋ naŋ wòò anyùùŋ gbèègbèè anyùùŋ ko Luùm nyaŋ e yèɛ wo Pɔɔ̀ naŋ woò lɛ. Kɛɛ nààŋ anyuùŋ gbeegbèè nyaŋ naŋ kòmò kɛ̀ wo Pɔɔ̀ yèè wo Silà, àŋ yaà anyùùŋ ko Luùm, e jùù naŋ nyiŋ nyɛ̀nɛ̀ŋ.

³⁹ Yèè àŋ naŋ kɔ̀ aŋ nyiŋ hùmàŋ hakɛ̀. Kpeiŋ àŋ naŋ nyiŋ gè ko sààŋ nyìwìi yèè àŋ naŋ nyiŋ dawè wèè aŋ yèwà ko jawa gbeeì.

⁴⁰ Wo Pɔɔ̀ yèè wo Silà naŋ fòlò ko sààŋ nyìwìi yèè àŋ naŋ kɔ̀ ko gbòò Leɗià. Kuŋ àŋ naŋ mɛ̀ɛ̀ŋ anyùùŋ hààwè Kanaà, yèè àŋ naŋ nyiŋ kìɛ̀ŋ maŋ mìè gbòà jii nyingè wèè e hààwe nyiŋ nɛ̀, yèè àŋ naŋ kɔ̀.