Nyɛ̀nɛ̀ŋ 15 - WƆŊ FƐ̀Ì EBÒ SÌÀŊ DAYÀA

Maŋ mààŋdàwè e nyaàiŋ dè maŋ Sàwà Mòòze màŋ ko Jùlusɛ̀làm

¹ Anyùùŋ bà naŋ wa hnè e yìwìà ko Jùdià aŋ kà ko Aŋtiɔ̀ yèè àŋ naŋ tɔ̀ɔ̀tù anyuùŋ hààwe nyàŋ kàa nyààŋ, “Wo Dayà naàìŋ joeyè, sɔɔ̀ naŋ nɔ̀ŋ kpùa jàaiŋ màànààŋ e làngì Mòòzeɛ̀ naŋ kaà lɛ.”

² E keì bi naŋ wa hìɛ̀ŋ e nyaàntàaŋ wo Pɔɔ̀ yèè wo Bànaŋɓà fèemàŋ. Kpeiŋ àŋ naŋ wa tà wo Pɔɔ̀ yèè wo Bànaŋɓà ɗùù e kpùlìà anyùùŋ bà e yìwìà ko Aŋtiɔ̀ wèè aŋ ka ko Jùlusɛ̀làm aŋ kiɛ̀ŋ ke jii gbài koɓɛ̀ aŋ keela nyàŋ yèè aŋ màmànkùmɛ̀ŋ anyuùŋ hààwe nyàŋ e nyaàiŋ dè e keì lɛɛ̀.

³ Anyuùŋ hààwe nyàŋ naŋ nyiŋ wa tùɔ̀ŋ. Yèè nààŋ àŋ yaà wa kɔɔyɛ, àŋ naŋ kɔ̀ɛ̀ ko Fònisìà yèè ko Sàmilià, àŋ yaà wòò anyùùŋ nyaŋ e ɗeweɛ̀ anyùùŋ nyaŋ fè àŋ Juùù nyaŋ naŋ kìlè koɓɛ̀ Dayài lɛ̀. Ebò lɛɛ̀ naŋ wa fɔ̀ɔ̀yɛ̀ anyùùŋ màŋjɛ̀wɛ̀ Kanaà maŋ jii yèè è naŋ nyiŋ nyìnìè zɔlɔ̀.

⁴ E hài nyiŋ nɛ̀ ko Jùlusɛ̀làm, anyuùŋ hààwe nyàŋ, aŋ keela nyàŋ, yèè aŋ màmànkùmɛ̀ŋ anyuùŋ hààwe nyàŋ naŋ nyiŋ ɓeeè yèè àŋ naŋ nyiŋ jàà kùàŋ dìì. Wo Pɔɔ̀ yèè aŋ dàwiuŋ nyàŋ naŋ nyiŋ gbàìè jii e nyaàiŋ dè e yèɛ kinɛiŋ wo Dayà naŋ nyiŋ kpuumò àŋ naŋ nyɛ̀nɛ̀ŋ lɛ.

⁵ Kɛɛ anyuùŋ hààwe nyàŋ bà nyiŋ ke gbòò aŋ Fɛlosiì nyaŋ sùà naŋ woò nyààŋ, “Anyùùŋ nyaŋ fè àŋ Juùù yèè àŋ naŋ kìlè koɓɛ̀ Dayài nyàŋ nɔ̀ŋ kpùa jàa nyiŋ e kìlà aŋ jɔɔlɔ̀ maŋ Sàwà maŋ wo Mòòze naŋ wi kiɛ̀ŋ maŋ dìì.”

⁶ Aŋ keela nyàŋ yèè aŋ màmànkùmɛ̀ŋ anyuùŋ hààwe nyàŋ naŋ dèènè koɓɛ̀ guùŋ wèè aŋ yɛmɛ̀ e keì lɛɛ̀ dìò sùà.

⁷ Nààŋ àŋ naŋ niŋ kpaane kpàànè wèè e teenga mùnlaŋ bà, wo Pììlɛ naŋ sie yèè wò naŋ nyiŋ woò wààŋ, “Wùìyaim nyàŋ, nàŋ nyìmàŋ kɛ̀ wo Dayà naim wa tàeɗùù e teenga gɔu bà sùà wèè ka wòò Ebò Siaàŋ koɓɛ̀ anyùùŋ nyaŋ fè àŋ Juùù nyaŋ. Wo Dayà naŋ wa tɛɛ̀ nyɛ̀nɛ̀ŋ wèè aŋ kòmàŋ niŋ e kìlà aŋ kɛɛnɛ̀ŋ hààwe.

⁸ Wo Dayà nyìmàŋ kɛ̀ ke jìì nyuùŋkpùuŋ gbiŋ kiɛ̀ŋ mìè seì, nààŋ wò naŋ kìɛ̀ŋ wo Jìnàŋ Nɛɛmaàŋ koɓɛ̀ anyùùŋ nyaŋ fè àŋ Juùù nyaŋ, màànààŋ nɔŋ wò naŋ wi wuŋ kiɛ̀ŋ yàwi pɛɛ lɛ̀.

⁹ Wo kuwà è tɛɛ gòòno yàwi nyiŋ è fèemàŋ. Àŋ naŋ sìè e hààwe nyiŋ nɛ̀ wo Dayà sùà, yèè wò naŋ nyɛ̀nɛ̀ŋ maŋ jii nyiŋ màŋ maŋ zɛ̀nɛ̀ŋ.

¹⁰ Kpeiŋ, wèè kiɛ̀ŋ nìŋ manaŋ naŋ nyɛ̀nɛ̀ŋ wo Dayà wo tuù esàɓù wɔŋ nɛ̀ŋfoo mùŋgaà nìŋ yaà jàà sùà anyuùŋ hààwe nyɛɛ̀ŋ ɗì lɛ, wɔŋ yèɔ aŋ nèwàènèwe wi nyàŋ ɔ̀ɔ̀ yàwi bi fèiŋ ɓɛ̀nɛ̀ŋ kòa wɔ̀ŋ, esaɓù kɛ̀ e kuwàìŋ è gààaŋ wèè eiŋ wuŋ koà?

¹¹ Kɛɛ è naiŋ haawè kɛ̀ è doiŋ nàŋ jòèyè esàɓù ke kpèè sìàŋ wo Kanaà Jisɛ̀ɛ sùà, màànààŋ nɔŋ nyiŋ pɛɛ do nàŋ nɔ̀ŋ lɛ.”

¹² Anyùùŋ fuɔŋ nyàŋ gbiŋ naŋ wa nɔ̀ŋ gìli nààŋ àŋ yaà wa kùmìàŋ sùà e jìwààjɛ̀wɛ̀ɛ wo Bànaŋɓà yèè wo Pɔɔ̀ yaà wa kìɛ̀ŋ sùà lɛ nyaàiŋ dè e gàaŋ wo Dayà naŋ wa kiɛ̀ŋ wèè aŋ nyɛ̀nɛ̀ŋ maŋ kèè mèè yèè maŋ tɔ̀ɔ̀màŋsèì keì wèè anyùùŋ nyaŋ fè àŋ Juùù nyaŋ.

¹³ Nààŋ àŋ naŋ kpɛ̀ɛ̀yɛ̀ gbòa, wo Jìiiŋ naŋ nyiŋ woò wààŋ, “Wùìyaim nyàŋ, kùmiaŋ nìim!

¹⁴ Wo Saamɔ̀ŋ Piilɛ̀ naŋ wi nɔŋ wòò e ɗeweɛ̀ wo Dayà naŋ wa hnè jɛɛ̀ yèè wò naŋ kìɛ̀ŋ e kpùùmaŋ koɓɛ̀ anyùùŋ nyaŋ fè àŋ Juùù nyaŋ. Wo Dayà naŋ wa tii nyɛ̀nɛ̀ŋ nààŋ wò naŋ wa tà aŋ bà nyiŋ ɗùù wèè aŋ nɔ̀ŋ anyunùuŋ.

¹⁵ Tɛɛ̀ naŋ nyɛ̀nɛ̀ŋ e yèɛ aŋ wɛ̀ijì nyaŋ naŋ wa sìngè lɛ naŋ hɛɛnɛ̀ŋ. Wɔŋ fɛ̀ì Dayàa naŋ woò wààŋ,

¹⁶ ‘Eɓìèmàŋjɛ̀wɛ̀ tɛɛ̀, miàim wo Kanaà Dayà do ɓɛìŋ nàŋ kɛ̀ɛ̀ maŋjɛ̀wɛ, e kìlà ka gè e kànà Dèèweɛ̀ naŋ sɔ̀ɔ̀ lɛ dìì. Mìŋ do ɓɛìŋ nàŋ nyɛ̀lɛ̀ maŋ saaŋfaa nyiŋ màŋ e kìlà ka miŋ nyɛ̀nɛ̀ŋ maŋ ɓɛìŋ nɔ̀ŋ tìntìŋ.

¹⁷ Mìŋ do tii nàŋ nyɛ̀nɛ̀ŋ wèè anyuùŋ gbànaŋ nyàŋ gbiŋ e ɗuunyaàŋ aŋ hnàŋ ko nɛ̀ɛ̀ŋ miìŋ, wo Kanaà Dayà, anyùùŋ nyaŋ fè àŋ Juùù nyaŋ aŋ gbiŋ, e kìlà mìŋ naŋ nyiŋ nyààŋ wèè aŋ nɔ̀ŋ anyunùim e deè mɛ̀ diɛŋ nyàŋ.

¹⁸ Tɛɛ̀ mìŋ naŋ wa nyɛ̀nɛ̀ŋ anyunùim nyàŋ aŋ nyìmàŋ e teenga gɔuo sùà.’ ”

¹⁹ Wo Jìiiŋ naŋ ɓɛìŋ woò wààŋ, “Weètii wùìyaim nyàŋ, miŋ gò gongò kɛ̀ è yaà tɛ̀ɛ̀ wèè eiŋ mɔ̀ɔ̀nɛ̀ŋ anyùùŋ nyaŋ fè àŋ Juùù nyaŋ, nààŋ àŋ yaà kìlà sùà kòɓɛ̀ Dayài lɛ̀.

²⁰ Kɛɛ sìngà wiìŋ nyiŋ wɔŋ fɛi e woò nyiŋ kɛ̀ ɓɔ̀ àŋ jè è nɛ̀ŋ gbiŋ e yèɛ fè zɛ̀nɛŋ niŋ lɛ̀ e fèfoo kɛ̀ àŋ naŋ niŋ gììyè saaà koɓɛ̀ wò dayà joo, e kìlà aŋ gbaaì e kèè e hmɔŋtu nyɛ̀nɛŋ, yèè ɓɔ̀ àŋ gbìlà wò yilìɔ naŋ fɔ̀ yèè wo gò wùàŋ màŋ sɛ̀ìŋ wɔ, yèè ɓɔ̀ àŋ gbìlà màŋ sɛ̀ìŋ.

²¹ Jàà wiìŋ jii kɛ̀ maŋ Sàwà mɛɛ̀ŋ wo Dayà naŋ wa fè wo Mòòze, yèè màŋ nɔ̀ŋ kàa miŋ maŋ jawa gbeegbèè maŋ gbiŋ sùà wèè maŋ doa jika, yèè ke Ɗɔ̀ɔ̀ Zòòlò aŋ Juùù nyaŋ diɛŋ àŋ kpɛ̀nɛ̀ŋ miìŋ maŋ sààŋ zòòlò aŋ Juùù nyaŋ dìì.”

Wɔŋ fɛiɔ̀ àŋ naŋ wa sìngè koɓɛ̀ anyuùŋ hààwe nyàŋ fè àŋ Juùù nyaŋ

²² Aŋ keela tàeɗùù nyaŋ, yèè aŋ màmànkùmɛ̀ŋ anyuùŋ hààwe nyàŋ, e kpùlìà ke gbòò anyuùŋ hààwe nyàŋ naŋ ɗewè wèè aŋ tà anyùùŋ bà ɗùù wèè aŋ dè wo Pɔɔ̀ yèè wo Bànaŋɓà maŋjɛ̀wɛ aŋ ka ko Aŋtiɔ̀. Kpeiŋ àŋ naŋ tà wo Silà yèè wo Juɗà wo yèɔ àŋ nyaaŋ wa ɓɛìŋ wo Bàsaɓà wɔ ɗùù, aŋ sìèfèìŋ tìyèe anyuùŋ hààwe nyàŋ sùà.

²³ E mìè nyààŋ wɔŋ fɛiɔ̀ àŋ naŋ wa sìngè wɔŋ naŋ woò wààŋ, “Yàwi, aŋ wùìya nyàŋ, aŋ keela tàeɗùù nyaŋ yaà aŋ màmànkùmɛ̀ŋ anyuùŋ hààwe nyàŋ, naŋ tùɔ̀ŋ e zùùmò e mɔ̀ɔ̀nɔŋ koɓɛ̀ nyɛ̀iŋ nyàŋ kinɛiŋ naŋ kìlè koɓɛ̀ wo Kanaà Dayà nyaŋ, kɛɛ niŋ fè àŋ Juùù nyuuŋ nyàŋ ko Aŋtiɔ̀, ko Siilià, yèè ko Sèlesìà.

²⁴ È naiŋ kòmò kɛ̀ anyùùŋ bà e yìwìà ke gboò wiɛ̀ sùà naŋ hnè ko nɛ̀ɛ̀iŋ niìŋ yèè àŋ naiŋ wòò e keì bà e yèɛ naiŋ mɔ̀ɔ̀nɛ̀ŋ maŋ jii lɛ̀. Kɛɛ yàwi nààŋ e gò nyiŋ tùàŋ.

²⁵ Weètii è naiŋ deenè yèè è naiŋ ɗewè wèè eiŋ tà anyùùŋ bà e ɗùù wèè aŋ hnàŋ ko nɛ̀ɛ̀iŋ niìŋ e kpùlìà aŋ dàwi siaŋ wi nyàŋ Bànaŋɓà yèè wo Pɔɔ̀.

²⁶ Anyùùŋ nyɛɛ̀ŋ naŋ jàà maŋ nyiiŋ nyiŋ màŋ e mìilì diɛŋ wèè wo Kana wiɔ̀ Jisɛ̀ Kulaì.

²⁷ Weètii è yààìŋ tùàŋ sùà wo Juɗà yèè wo Silà, yèè àŋ doiŋ nàŋ wòò e kèì guùŋ nɛ è naiŋ sìngè lɛ.

²⁸ Wo Jìnàŋ Nɛɛmaàŋ yèè yàwi bi èiŋ nyimèè kɛ̀ ɓɔ̀ è gbùwàiŋ wɔ̀ŋ nɛ̀ŋfoo mùnga joo ɗì màŋ do nìàŋ màŋ Sàwà kɛnɛ mɛɛ̀ŋ,

²⁹ kɛ̀ ɓɔ̀ nìŋ jè mànɛ̀ŋ jè saaà gbiŋ è yèɛ àŋ naŋ gììyè saaà koɓɛ̀ àŋ dayà joo lɛ̀, yèè ɓɔ̀ nìŋ gbìlà màŋ sɛ̀ìŋ. Ɓɔ̀ nìŋ gbìlà wò yilìɔ naŋ fɔ̀ yèè wo gò wùàŋ màŋ sɛ̀ìŋ wɔ, e kìlà nìŋ kuwa naŋ gbààì e kèè e hmɔŋtu nyɛ̀nɛŋ. Sèè nìŋ kuwo maŋ sàwà mɛɛ̀ŋ, kɛ̀ nàŋ nyɛ̀nɛ̀ŋ tɛ̀ɛ̀. È naiŋ tùɔ̀ŋ e zùùmo siaŋ, enììsìàiŋ.”

³⁰ Aŋ fèlàà tiinàŋ nyaŋ naŋ yèwè ko Jùlusɛ̀làm yèè àŋ naŋ kɔ̀ ko Aŋtiɔ̀. Kpeiŋ àŋ naŋ nyààŋ anyuùŋ hààwe nyàŋ gbiŋ koɓɛ̀ guùŋ yèè àŋ naŋ nyiŋ kìɛ̀ŋ wɔŋ fɛiɔ̀.

³¹ E zɔlɔ̀ naŋ wa nyɛ̀nɛ̀ŋ anyùùŋ nyaŋ nààŋ àŋ naŋ kpɛ̀nɛ̀ŋ wɔŋ fɛiɔ̀, esaɓù kɛ̀ ke miè gbìaàŋ naŋ nyiŋ wa kìɛ̀ŋ ke jii nyingè.

³² Aŋ wɛ̀ìjì tìyèe nyàŋ, wo Juɗà yèè wo Silà, naŋ wa gbòò anyuùŋ hààwe nyàŋ kɔɔ wèè e teenga mùnlaŋ wèè kɛ̀ aŋ kɛɛnɛ̀ŋ maŋ jii nyingè yèè e gààŋ.

³³ Aŋ wùìyà tìyèe nyàŋ e yìwìà ko Jùlusɛ̀làm naŋ nɔ̀ŋ ko Aŋtiɔ̀ wèè e teenga kpàa bà koɓɛ̀ anyuùŋ hààwe nyàŋ. Yèè nààŋ àŋ yaà wa naàŋ kɛ̀ɛ̀ sùà maŋjɛ̀wɛ koɓɛ̀ anyùùŋ nyaŋ naŋ nyiŋ tùɔ̀ŋ nyaŋ, anyuùŋ hààwe nyàŋ naŋ nyiŋ gè nyààŋ diɛŋ wèè aŋ ka ke jii fàa sùà. [

³⁴ Kɛɛ wo Silà naŋ wa ɗewè wèè wo jòò ko Aŋtiɔ̀.]

³⁵ Wo Pɔɔ̀ yaà wo Bànaŋɓà naŋ jòò ko Aŋtiɔ̀ wèè e teenga kpàa bà, yèè nyiŋ e kpùlìà anyuùŋ zimgbe bà yaà wa kaa yèè àŋ yaà wòò ke mìè gbìàŋ Ebò Siaàŋ e nyaàiŋ dè wo Kanaà.

Wo Pɔɔ̀ yèè wo Bànaŋɓà gòònò tɛɛ

³⁶ E teenga bà naŋ mààŋ yèè wo Pɔɔ̀ naŋ wòò wo Bànaŋɓà wààŋ, “Kɛ̀ɛ̀ wì maŋjɛ̀wɛ yèè ejaamè anyùùŋ màŋjɛ̀wɛ̀ Kanaà ko jawa gbee gbiŋ ko yèei àŋ naŋ gbòò ke mìè Kanaà Dayà, wèè e yɛmɛ̀ sèè mààŋ kɛ̀ diè àŋ yaà nyinie.”

³⁷ Kɛɛ wo Bànaŋɓà manaŋ wa wèè wo Jɔ̀ɔŋ Mài wo nyiŋ dèmanjɛ̀wɛ aŋ ka,

³⁸ kɛɛ wo Pɔɔ̀ gò wa nyimèè, esaɓù kɛ̀ wo Mài gò nyiŋ wa jèè màŋjɛ̀wɛ wèè àŋ do kpɛ̀ɛ̀yɛ̀ è tòmo nyiŋ nɛ̀, kɛɛ wò naŋ wa fè jɛwɛ yèè wò naŋ nyiŋ jòò ko Pàŋfelià.

³⁹ Tɛɛ̀ naŋ wa hìɛ̀ŋ kpàànè kpaane e fèèmàŋ nyiŋ tìyèe, yèè àŋ naŋ gòònòè tɛɛ. Wo Bànaŋɓà naŋ ɓèmè wo Mài yèè àŋ naŋ sɛ̀ɛ̀ wɔŋ meeè sùà aŋ nìàŋ ke tììŋ Sapulɔ̀ɛ sùà,

⁴⁰ kɛɛ wo Pɔɔ̀ naŋ ɓèmè wo Silà yèè àŋ naŋ kɔ̀. Anyuùŋ hààwe nyàŋ naŋ nyiŋ gè sɛ̀ yèè àŋ naŋ nyiŋ gbìɛ̀ŋ zòòlo maŋjɛ̀wɛ wèè e tɛ̀ɛ̀tɛ̀ɛ̀ Kanaà e nɔ̀ŋ nyiŋ diɛŋ.

⁴¹ Yèè àŋ naŋ kɔ̀ɛ̀ wɔŋ fùɔ̀ŋ Siilìàa yaà ko Sèlesìà, àŋ yaà nyììne sùà ke gbòò anyuùŋ hààwe nyàŋ maŋ jii e nyaàiŋ dè wo Jisɛ̀.