Nyɛ̀nɛ̀ŋ 14 - WƆŊ FƐ̀Ì EBÒ SÌÀŊ DAYÀA

Ko Ìkɔniɔ̀ŋ

¹ Wo Pɔɔ̀ yèè wo Bànaŋɓà naŋ gbòò koɓɛ̀ aŋ Juùù nyaŋ yèè anyùùŋ nyaŋ fè àŋ Juùù nyaŋ ko sààŋ zòòlò aŋ Juùù nyaŋ ko Ìkɔniɔ̀ŋ, màànààŋ nɔŋ àŋ naŋ wa nyɛ̀nɛ̀ŋ ko Aŋtiɔ̀ lɛ, yèè aŋ Juùù nyaŋ yaà aŋ yè nyaŋ fè àŋ Juùù nyaŋ zimgbe nyiŋ naŋ kɛ̀ɛ̀nɛ̀ŋ hààwe wo Kanaà Jisɛ̀ sùà.

² Kɛɛ aŋ Juùù nyaŋ yè nyaŋ kuwà wa e hààwe wò Kanaà Jisɛ̀ sùà nyaŋ naŋ wa nyɛ̀ŋɛ̀ŋ anyùùŋ nyaŋ fè àŋ Juùù nyaŋ aŋ kɛ̀ɛ̀nɛ̀ŋ maŋ jii fiiì wèè anyuùŋ hààwe nyàŋ.

³ Wo Pɔɔ̀ yaà wo Bànaŋɓà naŋ wa nɔ̀ŋ aŋ seì e hààwe nyiŋ nɛ̀ wo Kanaà Jisɛ̀ sùà, yèè àŋ nao nɔ̀ŋ wèè e teenga kpàa bà, àŋ yaà gbùùyè ke mìè Dayàa ke jii nyingèò sùà koɓɛ̀ anyùùŋ nyaŋ. Wo Kanaà Jisɛ̀ naŋ nyiŋ wa kìɛ̀ŋ e gààŋ wèè aŋ nyɛ̀nɛ̀ŋ maŋ kèè mèè e kìlà aŋ tɔ̀ɔ̀ maŋ tɔ̀ɔ̀màŋsèì keì. Wo Kanaà naŋ wa tɔɔ̀ kɛ̀ ke miè gbìaŋ nyiŋ nɛɛ̀ŋ e nyaàiŋ dè ke kpèè siauŋ nɛɛ̀ŋ kè yaà wa tɔ̀ɔ̀nyaàŋ.

⁴ Kɛɛ anyùùŋ nyaŋ ko Ìkɔniɔ̀ŋ naŋ wa gòònò sùà. Aŋ bà nyiŋ naŋ wa dè aŋ Juùù nyaŋ maŋjɛ̀wɛ, yèè aŋ bà nyiŋ naŋ dè aŋ kèèlà Dayà nyaŋ maŋjɛ̀wɛ.

⁵ Kpeiŋ anyùùŋ nyaŋ fè àŋ Juùù nyaŋ yaà aŋ Juùù nyaŋ nyiŋ bi, e kpùlìà anyuùŋ gbeegbèè nyiŋ nyàŋ, naŋ ɗewè wèè aŋ jàà e keì keekèè wo Pɔɔ̀ yaà wo Bànaŋɓà e kìlà wèè aŋ nyiŋ hɔ̀wà e jèèsùà aŋ nyiŋ jìwà.

⁶ Nààŋ aŋ kèèlà tìyèe nyàŋ naŋ wa tɛɛ̀ kòmò, àŋ naŋ yèwè ko jawa wii maŋ dùaŋ dùaŋ yèè àŋ naŋ kɔ̀ maŋ jawa gbeegbèè nyiŋ màŋ sùà àŋ nyaaŋ ko Lesità yèè ko Dɛɓì, maŋ kpàlàùŋ kpàlàùŋ Làkanià maŋ sùà.

⁷ Kuii àŋ naŋ wa wòò ke mìè gbìàŋ Ebò Siaàŋ.

Ko Lesità yèè ko Dɛɓì

⁸ Wo felaa bà yaà wa ko Lesità wo yèɔ naŋ wa kpɔɔkpɔ̀ɔ̀ e yìwìà e teengaà àŋ nauŋ wa kòmò lɛ, yèè wo gò wa ngèè pɛɛ ɓɛnɛ̀ŋ wèè wo kaaìŋ.

⁹ Wo felaaà jaao wa wò yaà kùmìè e yèɛ wo Pɔɔ̀ yaà wa woo lɛ̀. Nààŋ wo Pɔɔ̀ nauŋ wa yɛmɛ̀ kɛ̀ wò kuwa e hààwe wo Jisɛ̀ sùà yèè wò wa ɓɛ̀nɛ̀ŋ nɔ̀ŋ sùngauŋ, wo Pɔɔ̀ naŋ yɛ̀mɛ̀ wo felaaà dììŋ

¹⁰ yèè wò nauŋ woò ke miè gbeeo sùà wààŋ, “Sìè ɗeiiŋ maŋ golòum màŋ diɛŋ!” Wo felaaà naŋ vaì wo sie yèè wò naŋ tɔ̀ɔ̀tù kàaiŋ.

¹¹ Nààŋ e faaàŋ naŋ yɛ̀mɛ̀ e nɛ̀ɛŋ wo Pɔɔ̀ naŋ nyɛ̀nɛ̀ŋ lɛ, àŋ naŋ kpààŋ sɛiiŋ e Làkanià miè sùà, wɔŋ kaìŋ nyiŋ nɔɔ̀ŋ sùà nyààŋ, “Aŋ dayà nyaŋ àŋ mììnè anyuùŋ kpùuŋ yèè àŋ dèyà ko nɛ̀ɛ̀ŋ wiì!”

¹² Anyùùŋ nyaŋ naŋ jàà aŋ kèèlà tìyèe nyàŋ maŋ dèè aŋ dayà nyiŋ nyàŋ. Àŋ naŋ kìɛ̀ŋ wo Bànaŋɓà e dèèɛ Ziù, yèè àŋ naŋ kìɛ̀ŋ wo Pɔɔ̀ e dèèɛ Hɛmɛ̀, esaɓù kɛ̀ wuŋ nàŋ yaà wa wo nyuùŋ gbòaà.

¹³ Wo sìèfèìŋ zòòloɔ̀ wèè wo dayà nyiŋ nɔɔ̀ŋ bàa Ziù, wo yèɔ naŋ wa nyɛ̀lɛ̀ ke sààŋ zòòlouŋ nɛɛ̀ŋ e jawaà ɓula e gbɛ̀ɛ̀ wɔŋ gbèmgbèè wɔŋ gɔ̀ɔ̀ŋ e jawa gbeeɛ̀ wɔ, naŋ hìɛ̀ŋ wo dìi wowo yèè maŋ kuùfɛ̀ɛ̀ wɔŋ gbàngiɔ̀ feìŋ, wèè aŋ kiɛ̀ŋ miŋ e saàà gèeo sùà koɓɛ̀ Bànaŋɓài yaà wo Pɔɔ.

¹⁴ Kɛɛ nààŋ aŋ keela nyàŋ tèènè mààŋ wo Pɔɔ̀ yaà wo Bànaŋɓà naŋ wa tɛɛ̀ kòmò, àŋ naŋ sɛ̀ɛ̀sɛ̀ɛ̀ maŋ dèè kɔ̀ɔ̀ nyiŋ bi màŋ esaɓù kɛ̀ àŋ gò wa jàà è keì bi kùàŋ dìì, e kìlà àŋ naŋ dùɔ̀ŋ aŋ sɛ̀ɛ̀ e faaàŋ sùà àŋ gè kpàaŋ sɛiiŋ nyààŋ,

¹⁵ “Wèè kiɛ̀ŋ nìŋ yaà tɛɛ̀ nyinie? È yààìŋ anyuùŋ kpùuŋ mààŋ nyɛ̀iŋ bi. È yààìŋ kià wèè eiŋ dàànè Ebò Siaàŋ, wèè naŋ gè manɛ̀ŋ foofòò mɛɛ̀ŋ kùàŋ sùà naŋ kìlà koɓɛ̀ wo Dàyà nyiiŋ gèeɔ̀, wuŋ naŋ bànè ko àìjɛnɛ̀ŋ, e dììɛ e ɗuunyaàŋ yaà wɔŋ juwoɔ̀, e hààwè manɛ̀ŋ maŋ gbiŋ yaà miìŋ ko sùà maŋ.

¹⁶ E teenga gɔuɛ̀ sùà wo Dayà naŋ wa nyimèè wèè anyùùŋ nyaŋ gbiŋ e ɗuunyaàŋ aŋ nyɛ̀nɛ̀ŋ e yèɛ àŋ manaŋ wa lɛ̀.

¹⁷ Kɛɛ wò naŋ tɔɔ̀ kɛ̀ wò yaào wa e teenga gbiŋ e yìwìà maŋ keì sìàŋ maŋ wò naŋ nyɛ̀nɛ̀ŋ maŋ. Wo Dayà tuɔŋ maŋ gɔ̀àà e yìwìà ko àìjɛnɛ̀ŋ yèè màŋ nyɛnɛŋ manɛ̀ŋ wuiyeiŋ màŋ maŋ bɔù. Wò kiɛ̀ìŋ e nɛ̀ŋje yèè wò nyɛnɛŋ maŋ jiiŋ màŋ nɔ̀ŋ zɔlɔ̀ sùà.”

¹⁸ Jòòpɛɛ aŋ keela nyàŋ naŋ wa tɛɛ̀ kpɛɛ woò, kɛɛ e fè wa è keì ɓɛkɛ ɓɛ̀kɛ̀ wèè aŋ wa kèèwè ànyùùŋ nyaŋ kùàŋ feìŋ wèè è saàà ge nyiŋ nɛ̀.

¹⁹ Aŋ Juùù nyaŋ bà nyiŋ naŋ wa hnè e yìwìà ko Aŋtiɔ̀ wɔŋ fùɔ̀ŋ Pɛ̀siidìàa yèè e yìwìà ko Ìkɔniɔ̀ŋ yèè àŋ naŋ nyɛ̀nɛ̀ŋ anyùùŋ nyaŋ aŋ kɛ̀ɛ̀nɛ̀ŋ maŋ jii fiiì wèè wo Pɔɔ̀. Àŋ naŋ wa hɔ̀wɔ̀ wo Pɔɔ̀ le dùò yèè auŋ gɔ̀ɛ̀ɛ̀ dìì auŋ gè ko jawa gbeeì, yèè àŋ naŋ wa gongò kɛ̀ wò fà.

²⁰ Kɛɛ nààŋ anyùùŋ màŋjɛ̀wɛ̀ Kanaà Jisɛ̀ naŋ wa dèènè wo Pɔɔ̀ kɔɔ, wò naŋ wa yèwè dìì yèè yaà nyiŋ naŋ kɛ̀ɛ̀ ko jawa gbeeì. Wɔŋ niìsìaà bàa wo Pɔɔ̀ yaà wo Bànaŋɓà naŋ kɔ̀ ko Dɛɓì.

Wo Pɔɔ̀ yèè wo Bànaŋɓà naŋ kɛ̀ɛ̀ ko Aŋtiɔ̀ wɔŋ fùɔ̀ŋ Siilìàa sùà

²¹ Wo Pɔɔ̀ yèè wo Bànaŋɓà naŋ wòò Ebò Siaàŋ ko Dɛɓì yèè anyuùŋ zimgbe naŋ kìlè anyùùŋ màŋjɛ̀wɛ̀ wo Kanaà Jisɛ̀. Kpeiŋ àŋ naŋ kɛ̀ɛ̀ maŋjɛ̀wɛ ko Lesità, ko Ìkɔniɔ̀ŋ, yèè àŋ naŋ hàì ko Aŋtiɔ̀ wɔŋ fùɔ̀ŋ Pɛ̀siidìàa sùà.

²² Àŋ naŋ wa kìɛ̀ŋ anyuùŋ hààwe nyàŋ maŋ jii nyingè yèè àŋ naŋ nyiŋ pɔwɔ̀ wèè aŋ jeèè tɔ̀ɔ̀nyaàŋ e hààwe nyiŋ nɛ̀ sùà. Àŋ naŋ nyiŋ woò nyààŋ, “È kuwa eiŋ kà e keì nyìnga zimgbe dìì pangàà è kɔ̀àìŋ e Kànà Dayàa sùà.”

²³ Wo Pɔɔ̀ yaà wo Bànaŋɓà naŋ wa ɓèmè aŋ màmàŋkùmɛŋ wèè ke gbòò anyuùŋ hààwe nyàŋ gbiŋ. Kpeiŋ àŋ naŋ kùwò ke tɔùŋ e kìlà àŋ yaà zoolo wèè wo Dayà kpuumàŋ aŋ màmàŋkùmɛŋ nyɛɛ̀ŋ yè nyaŋ naŋ sìè e hààwe nyiŋ nɛ̀ wo Kanaà Jisɛ̀ sùà lɛ.

²⁴ Wo Pɔɔ̀ yèè wo Bànaŋɓà naŋ kɔ̀ɛ̀ maŋ kpàlàùŋ kpàlàùŋ Pɛ̀siidìà maŋ sùà, yèè àŋ naŋ hnè ko Pàŋfelià.

²⁵ Nààŋ àŋ naŋ gbòò ke mìè Dayàa koɓɛ̀ anyùùŋ nyaŋ ko jawaì àŋ nyaaŋ Pɛgà, àŋ nao yèwè aŋ dèyà ko Àtalià.

²⁶ Yèè e yìwìà kuii àŋ naŋ sɛ̀ɛ̀ wɔŋ meeè sùà aŋ kɛ̀ɛ̀ ko Aŋtiɔ̀. Kuŋ nàŋ yaà wa koɓɛ̀i ke gbòò anyuùŋ hààwe nyàŋ naŋ nyiŋ fè wo Dayà wèè wo nyiŋ yɛ̀mɛ̀ diɛŋ ke kpèè siauŋ nɛɛ̀ŋ sùà nààŋ àŋ naŋ wa naàŋ kpɛ̀ɛ̀yɛ̀ e tòmouŋ nɛ̀ wò manaŋ wa aŋ nyɛ̀nɛ̀ŋ lɛ.

²⁷ Nààŋ àŋ naŋ wa hàì ko Aŋtiɔ̀, wo Pɔɔ̀ yaà wo Bànaŋɓà naŋ nyààŋ ke gbòò anyuùŋ hààwe nyàŋ e dèène sùà. Yèè àŋ naŋ nyiŋ gbàìè jii wèè eɗewɛ̀ wo Dayà naŋ nyiŋ kpuumò lɛ, yèè e ɗeweɛ̀ wò naŋ yìlè wɔŋ gbemgbee wèè anyùùŋ nyaŋ fè àŋ Juùù nyaŋ aŋ kɛ̀ɛ̀nɛ̀ŋ hààwe wo Jisɛ̀ sùà.

²⁸ Kpeiŋ wo Pɔɔ̀ yaà wo Bànaŋɓà naŋ nɔ̀ŋ anyùùŋ màŋjɛ̀wɛ̀ nyaŋ e tɛɛ wèè e teenga mùnlaŋ.