Nyɛ̀nɛ̀ŋ 13 - WƆŊ FƐ̀Ì EBÒ SÌÀŊ DAYÀA

Àŋ naŋ tà wo Bànaŋɓà yaà wo Sɔɔ̀ ɗùù yèè àŋ naŋ nyiŋ tùɔ̀ŋ

¹ Ke gbòò anyuùŋ hààwe nyàŋ ko Aŋtiɔ̀ kuwa wa aŋ wɛ̀ijì yèè aŋ kààmɔɔŋ zimgbe. Nyiŋ nàŋ yaà wa wo Bànaŋɓà, wo Sìmiaŋ, wo yèɔ àŋ hewa ɓɛìŋ nyààŋ wo Nijà wɔ, wo Lùsiɔ̀ e yìwìà ko Sàlinìŋ, wo Manàŋ, wo dàwì mɔ̀ɔ̀nɔ̀ŋ Hɛɛlɔ̀ Aŋtipàa, yaà wo Sɔɔ̀.

² E teengaà àŋ yaà wa zòòlò wo Kanaà yèè àŋ yaà kùwìè ke tɔùŋ lɛ, wo Jìnàŋ Nɛɛmaàŋ naŋ nyiŋ woò wààŋ, “Jàaìŋ wo Bànaŋɓà yèè wo Sɔɔ̀ e ɓula weèim wèè e tòmoɛ̀ mìŋ naŋ nyiŋ nyààŋ wèè aŋ nyɛ̀nɛ̀ŋ lɛ.”

³ Àŋ naŋ wa kùwò ke tɔùŋ yèè àŋ naŋ zoolò, aŋ nyiŋ gbùwà maŋ kùàŋ diɛŋ yèè àŋ naŋ nyiŋ tùɔ̀ŋ.

Ko Sapulɔ̀

⁴ Nààŋ wo Jìnàŋ Nɛɛmaàŋ naŋ tùɔ̀ŋ wo Bànaŋɓà yaà wo Sɔɔ̀, àŋ naŋ kɔ̀ ko Sèlesìà. E yìwìà kuii àŋ naŋ wa sɛ̀ɛ̀ wɔŋ meeè sùà yèè àŋ naŋ kɔ̀ ko Sapulɔ̀.

⁵ Nààŋ àŋ naŋ wa hài ko Salamì, àŋ naŋ tɔ̀ɔ̀tù ke mìè Dayàa gbòa ke sààŋ zòòlò aŋ Juùù nyaŋ dìì. Kuii wo Jɔ̀ɔŋ Mài naŋ wa nɔ̀ŋ wo ɓɔìjɔ̀à kpùùmaŋ nyiŋ ke nyɛ̀nɛŋ bi sùà.

⁶ Wo Bànaŋɓà yèè wo Sɔɔ̀ naŋ wa kìlìè ke tiìŋ yii gbiŋ sùà e hàì ko jawa gbeeì ko Pafɔ̀. Àŋ nao mɛ̀ɛ̀ŋ wo Juùù nyuuŋ nyɛ̀nɛ̀ŋ kɔìɗòlò bà, wo wɛ̀ijì tòa àŋ nyaaŋ wo Ɓà-Jisɛ̀ wɔ.

⁷ Wo Ɓà-Jisɛ̀ hewa ɓɛìŋ tomo wèè wo Sɛ̀giiù Pɔɔlù. Wo Sɛ̀giiù Pɔɔlù nàŋ yaà wa wo sìèfèìŋ ke tiìɛŋ yèè wò naŋ wa nyìmè e keì fèemàŋ. Wò manaŋ wa wèè wo kòmàŋ ke mìè Dayàa, Kpeiŋ wò naŋ tùɔ̀ŋ wèè wo Bànaŋɓà yaà wo Pɔɔ̀, wo yèɔ àŋ hewa nyààŋ Sɔɔ̀ wɔ.

⁸ Kɛɛ wo Ɓà-Jisɛ̀, wo yèɔ àŋ hewa ɓɛìŋ nyààŋ wo Ɛlemɔ̀ wɔ, wo nyùùŋ kɔìɗòlòɔ, naŋ nyiŋ wa kèèwè kùàŋ feìŋ, e kìlà wo manàŋ wa wèè wò nyuùŋ gbeeuŋ nɔɔ̀ŋ wò do kɛ̀ɛ̀nɛ̀ŋ è hààweɛ̀.

⁹ Kɛɛ wo Sɔɔ̀, wo yèɔ àŋ hewa ɓɛìŋ nyààŋ wo Pɔɔ̀ wɔ, wo Jìnàŋ Nɛɛmaàŋ nauŋ wa dìèsùà. Wò naŋ wa yɛ̀mɛ̀ wo Ɓà-Jisɛ̀ dììŋ

¹⁰ yèè wò nauŋ woò wààŋ, “Muàum jɔ̀àfèlàà Dɛwìɔ! Mùŋ yaà wo jooɔ̀ wèè e keì jìlɛŋ gbiŋ. Mùŋ naŋ dìè kàaɓì ɗewe gbiŋ, yèè kòò mùŋ yaà kààmè ɗewe e teenga gbiŋ wèè maŋ kìlà e tɔ̀ɔ̀nyààŋ Kanaà koɓɛ̀ e tòa!

¹¹ Yɛ̀mɛ̀ naàŋ, wɔŋ kùàŋ Kanaà kòò wɔ̀ŋ yààùm diɛŋ, mùŋ yaà hinie maŋ zììlè le fɛ̀ɛ̀, yèè wèè e teenga bà muŋ naàŋ yɛ̀mɛ̀ è gbòlòùŋ è gɔɛɛ̀.” Ko fɛɛ̀feìŋ, ke nyiwì gènaŋ nauŋ ɓùwò le fɛ̀ɛ̀, yèè wo naŋ tɔ̀ɔ̀tù wo nyuùŋ kàme wèè wo kùwàuŋ wɔŋ kùàŋ wo kaaìŋ.

¹² E kàa kii lɛɛ̀ naŋ wa fòònò wo nyuùŋ gbeeɔ̀ nààŋ wò naŋ yɛ̀mɛ̀ e yèɛ naŋ wa kaaìŋ lɛ e nyaàiŋ dè wo Kanaà. Kpeiŋ wò naŋ sìè e hààweuŋ nɛ̀ wo Kanaà sùà.

Ko Aŋtiɔ̀ wɔŋ fùɔ̀ŋ Pɛ̀siidìàa sùà

¹³ Wo Pɔɔ̀ yèè aŋ dàwiuŋ nyàŋ naŋ yèwè ko Pafɔ̀ yèè àŋ naŋ kɔ̀ ko Pɛgà ko jawa gbeeì wɔŋ fùɔ̀ŋ Pàŋfelìàa sùà. Yèè wo Jɔ̀ɔŋ Maì naŋ nyiŋ noo jòò yèè wò naŋ kɛ̀ɛ̀ maŋjɛ̀wɛ ko Jùlusɛ̀làm.

¹⁴ Àŋ naŋ yèwè ko Pɛgà yèè àŋ naŋ kɔ̀ ko Aŋtiɔ̀ wɔŋ fùɔ̀ŋ Pɛ̀siidìàa sùà. Kpeiŋ ke Ɗɔ̀ɔ̀ Zòòlò aŋ Juùù nyaŋ diɛŋ àŋ naŋ kɔ̀ ko sààŋ zòòlò aŋ Juùù nyaŋ yèè àŋ naŋ jɛi.

¹⁵ Nààŋ anyùùŋ nyaŋ naŋ kpɛ̀ɛ̀yɛ̀ maŋ sàwà Dayà maŋ yèè maŋ fɛi màŋ aŋ wɛ̀ijì nyaŋ naŋ sìngè maŋ kpɛ̀nɛŋ, aŋ sìèfeìŋ nyaŋ ko sààŋ zòòlò aŋ Juùù nyaŋ naŋ tùɔ̀ŋ wo nyùùŋ koɓɛ̀ wo Pɔɔ̀ yaà wo Bànaŋɓà koɓɛ̀i àŋ jaa lɛ̀ yèè wò naŋ nyiŋ woò wààŋ, “Wùìya wi nyàŋ, sèè nìŋ kɛɛnɛ̀ŋ e keì bà gbiŋ wèè naŋ wòò anyùùŋ nyaŋ e yèɛ naŋ nyiŋ ɓɛ̀nɛ̀ŋ kìɛ̀ŋ ke jii nyingè lɛ, nàŋ niŋ ɓɛ̀nɛ̀ŋ wòo.”

¹⁶ Wo Pɔɔ̀ naŋ sie, yèè wò naŋ jòòwò wɔŋ kuàuŋ nɔɔ̀ŋ fùùŋ yèè wò naŋ woò wààŋ, “Nyɛ̀iŋ nààŋ nyùùŋ Ezɔ̀ɛ̀ nyaŋ, yèè nyɛ̀iŋ nyàŋ duɔŋ Dayà nyaŋ, jàaìŋ maŋ nùŋ dìì.

¹⁷ Wo Dayàa wèè anyùùŋ Ezɔ̀ɛ̀ nyɛɛ̀ŋ naŋ wa tà aŋ nèwàènèwe wi nyàŋ ɗùù yèè wò naŋ nyiŋ nyɛ̀nɛ̀ŋ aŋ ɓuù e teengaà àŋ yaà wa e dìì Ijèɛ diɛŋ lɛ̀. Yèè e yìwìà e gaàŋ gbee sùà wo Dayà naŋ nyiŋ noo gè,

¹⁸ yèè wèè maŋ doà kpɛ̀ɛ̀ùŋ tìyèe wò naŋ nyiŋ yɛ̀mɛ̀ diɛŋ ke fòùngà e diì wòaà diɛŋ.

¹⁹ Wò naŋ pɔ̀ɔ̀pɔ̀ɔ̀ anyùùŋ maŋ fùɔ̀ŋ ɗì nɔɔnɔŋ le tìyèe maŋ yè maŋ hewa jòò e dìì lɛɛ̀ diɛŋ wɔŋ fùɔ̀ŋ Kenàaŋ sùà, yèè wò naŋ kìɛ̀ŋ e diì nyiŋ nɛ̀ koɓɛ̀ aŋ nèwàènèwe wi nyàŋ wèè e nɔ̀ŋ e je nyiŋ.

²⁰ Tɛɛ̀ gbiŋ naŋ kaaìŋ e fèèmàŋ maŋ doa hɔ̀nɔ̀ɔ̀ tiinàŋ kpɛ̀ɛ̀ùŋ tìyèe jɛ̀wɛ̀ zììyà (450) sùà. “Eɓìèmàŋjɛ̀wɛ̀ tii wo Dayà naŋ nyiŋ wa kìɛ̀ŋ aŋ sìèfeìŋ wèè aŋ gbaì gòlàà diɛŋ nyiŋ e jèèsùà e tèèngà wo wɛ̀ijìɔ Samiɔ̀ e haì.

²¹ Kpeiŋ àŋ naŋ dawè wèè wo kana, yèè wo Dayà naŋ nyiŋ kìɛ̀ŋ wo Sɔɔ̀, wo jɔ̀àfèlàà Kiìɔ. Wo felaa wɛɛ̀ yewe wa ke kpòò Bɛ̀njìmaiɛ̀ŋ sùà, yèè wò naŋ wa nɔ̀ŋ wo kana wèè maŋ doa kpɛ̀ɛ̀ùŋ tìyèe.

²² E teenga bà naŋ mààŋ, yèè wo Dayà naŋ gè wo Sɔɔ̀ ke kpùà kanaà diɛŋ yèè wò naŋ nyɛ̀nɛ̀ŋ wo Dèèwe wo jɔ̀àfèlàà Jɛ̀seɔ̀ wo kana nyiŋ nɔɔ̀ŋ. Wo Dayà naŋ wòò e kiiuŋ wààŋ, ‘Wo Dèèwe wo jɔ̀àfèlàà Jɛ̀seɔ̀ nàŋ yaà wo nyùnɔ̀ɔŋ ke jii miɛ̀ŋ naŋ ɓemè zimgbe. Wò nyɛnɛŋ e yèɛ gbiŋ mìŋ manaŋ wo nyɛ̀nɛ̀ŋ lɛ.’

²³ Wo Dayà naŋ wa jɔ̀ɔ̀ ɗààhiì kɛ̀ wo nyùùŋ bà hewa nàŋ fòlò ke kpòò Dèèweɛ̀ sùà wèè wo nɔ̀ŋ wo Nyuùŋ Jòèyeɔ̀ wèè anyùùŋ Ezɔ̀ɛ̀ nyaŋ, yèè wo nyùùŋ bi nàŋ yaà wo Jisɛ̀.

²⁴ Wèè paŋ wo Jisɛ̀ hnàŋ wa, wo Jɔ̀ɔŋ naŋ wa wòò anyùùŋ nyaŋ gbiŋ ko Ezɔ̀ɛ̀ wèè aŋ fè maŋ tùwo naanààŋ nyiŋ màŋ jɛwɛ yèè aŋ nɔ̀ŋ gùa nyiŋ.

²⁵ Kpeiŋ nààŋ e tòmò Jɔ̀ɔɛ̀ŋ naŋ wa naàŋ joo tòloò wèè e jùà, wò naŋ wòò anyùùŋ nyaŋ wààŋ, ‘Ɓòò anyùùŋ nyaŋ naŋ gongò kɛ̀ mìŋ yaà? Nìŋ gongà kɛ̀ miàŋ nàŋ yaà wo yèɔ wo Dayà naŋ tàeɗùù wèè wo joeyè e ɗuunyaàŋ wɔ, wo Kulaìɔ? Kpele, miàŋ nàŋ fòuŋ. Kpele, kɛɛ wò do nàŋ hnè eɓìèmàŋjɛ̀wɛ̀ miàŋ, yèè miŋ siàŋ ngèè pɛɛ tɛ̀ɛ̀ wèè kauŋ gè màŋ bauŋ màŋ gòlò.’

²⁶ “Wùìyaim nyàŋ e yìwìà ke kpòò Eɓulɔhɛɛ̀ŋ, yèè nyɛ̀iŋ nyàŋ nààŋ fè àŋ Juùù nyaŋ kɛɛ nìŋ duɔŋ Dayà, ko nɛ̀ɛ̀ŋ wiì ke mìè gbìàŋ e jòèye yɛɛ̀ naŋ wa nɔ̀ŋ tùaŋ nyiŋ.

²⁷ Anyùùŋ nyaŋ ko Jùlusɛ̀làm yèè anyuùŋ gbeegbèè nyiŋ nyàŋ naŋ wa gè maŋhɛɛ wèè aŋ nyìmàŋ kɛ̀ wò Jisɛ̀ nàŋ yaà wa wò yèɔ wo Dayà naŋ tàeɗùù wèè wo nɔ̀ŋ wo Nyuùŋ Jòèyeɔ̀ wèè anyùùŋ nyaŋ gbiŋ e ɗuunyaàŋ. Yèè aŋ gò wa nyìmàŋ màŋ miè gbìaŋ màŋ aŋ wɛ̀ijì nyaŋ naŋ wa sìngè maŋ, jòòpɛɛ àŋ kpɛ̀nɛ̀ŋ miìŋ wa e teenga gbiŋ ke Ɗɔ̀ɔ̀ Zòòlò aŋ Juùù nyaŋ diɛŋ. Yèè àŋ naŋ wa gììyè wo Jisɛ̀ maŋhɛɛ màànààŋ nɔŋ aŋ wɛ̀ijì nyaŋ naŋ wa woò lɛ. Àŋ naŋ wa nyɛ̀nɛ̀ŋ e yèɛ nɔŋ wɔŋ Fɛ̀ì Dayàa naŋ wa woò lɛ.

²⁸ Yèè jòòpɛɛ aŋ gò wa yɛ̀mɛ̀ èsaɓù bà gbiŋ wèè aŋ wa jìwà wò Jisɛ̀, yɛ̀ì nɔŋ è yaà àŋ naŋ wa dàwè wo Paalè wèè wo jìwàuŋ.

²⁹ Nààŋ àŋ naŋ wa naàŋ kpɛ̀ɛ̀yɛ̀ nyɛ̀nɛ̀ŋ e yèɛ wɔŋ Fɛ̀ì Dayàa naŋ woò lɛ, nààŋ àŋ naŋ wa jìwè wo Jisɛ̀, àŋ naŋ wa gè e dieuŋ nɛ̀ e yìwìà wɔŋ vànèkpaaà diɛŋ yèè àŋ nauŋ hèè ke hùaàŋ sùà.

³⁰ Kɛɛ wo Dayà nauŋ gè e fàaà dìì wɔŋ nyiiŋ gèeo sùà,

³¹ yèè e teenga zimgbe wo Jisɛ̀ naŋ wa fòlò aŋ nyùùŋ màŋjɛ̀wɛ̀uŋ nyàŋ fèìŋ, aŋ yè nyaŋ heuŋ wa kààìŋ maŋjɛ̀wɛ e yìwìà ko Galaliì e kà ko Jùlusɛ̀làm. Kòò àŋ yaà naàŋ kìɛ̀ŋ sùà maŋ mìè seì e nyaàiŋ euŋ dè koɓɛ̀ anyuùŋ wi nyàŋ.

³² Wo Dayà naŋ wa jɔ̀ɔ̀ ɗààhiì koɓɛ̀ aŋ nèwàènèwe wi nyàŋ. Yàwi pɛɛ è yààìŋ wòò sùà ebò siaŋ lɛɛ̀.

³³ Wò niŋ naàŋ nyɛ̀nɛ̀ŋ weè wi, nààŋ wò naŋ gè wo Jisɛ̀ e fàa dìì wɔŋ nyiiŋ gèeɔ̀ sùà. È yaà nɔŋ màànààŋ è yaà sìnga niŋ wɔŋ fɛ̀ì dìà tìyèè Saààm sùà lɛ wààŋ, ‘Muàŋ nàŋ yaà wo Jɔ̀àfelaa miɔ̀ŋ, esaɓù kɛ̀ kà nàaŋ kìlà wo Dèda mɔɔ̀ŋ.’

³⁴ Wo Dayà naŋ gè wo Jisɛ̀ e fàa dìì yèè julɔfɔ wo naàŋ dàngè kè kpùnauŋ nɛɛ̀ŋ kè do hìwìà kè hùaàŋ sùà. È yaà nɔŋ màànààŋ wo Dayà naŋ wa wòò anyuùŋ hààwe nyàŋ wo Jisɛ̀ sùà lɛ wààŋ, ‘Mìŋ doiŋ nàŋ kìɛ̀ŋ e nɛɛmaàŋ yèè e kpùùmàŋ ke jii tùliaà mìŋ naŋ wa jɔ̀ɔ̀ ɗààhiì koɓɛ̀ Dèèweì lɛ.’

³⁵ Yèè nààŋ wò naŋ woò koɓɛ̀ bà wɔŋ Fɛ̀ì Dayàa sùà lɛ wààŋ, ‘Miàŋ nàŋ yaà wò ɓɔ̀ìjɔ̀à nɛɛmaŋ mɔɔ̀ŋ, muŋ naàŋ nyimèè wèè kè kpùnaŋ miɛ̀ŋ ke hèwà kè hùaàŋ sùà.’

³⁶ E teengaà wo Dèèwe yaà wa wɔŋ nyiiŋ gèeɔ̀ sùà lɛ, wò naŋ wa tomo wo Dayà dìì. E teengaà wò naŋ wa fɔ̀ lɛ, àŋ nauŋ wa sììyè wo dèdauŋ nɔɔ̀ŋ kɔɔ ke hùaàŋ sùà, yèè ke kpùnauŋ nɛɛ̀ŋ naŋ wa hèwè.

³⁷ Kɛɛ tɛɛ̀ gò wa kààìŋ kòɓɛ̀ Jisɛ̀i wò yèɔ wò Dayà naŋ wa gè è fàa dìì wɔ, ke kpùnauŋ nɛɛ̀ŋ gò wa hèwà.

^38-39 Nyɛ̀iŋ nààŋ wùìyaim nyàŋ gbiŋ, mìŋ manaŋ wèè naŋ nyìmàŋ kɛ̀, wo Dayà juuyàìŋ hakɛ̀ wèè maŋ jùumùiŋ màŋ gbiŋ esàɓù Jisɛ̀ɛ sùà. Maŋ Sàwà maŋ wo Dayà naŋ wa fè wo Mòòze màŋ fè ɓɛ̀nɛ̀ŋ gè wò nyùùŋ gbiŋ è nìmìlà màŋ jùumùuŋ màŋ sùà. Kɛɛ wo nyùnɔ̀ɔŋ gbiŋ kuwa hààwe wo Jisɛ̀ sùà wɔ wo Dayà douŋ nàŋ jùùyè hakɛ̀ wèè maŋ tùwo naanààuŋ màŋ.

⁴⁰ Weètii, yɛ̀mɛìŋ nyɛ̀iŋ bi diɛŋ, wèè kɛ̀ e yèɛ aŋ wɛ̀ijì nyaŋ naŋ wa woò lɛ ɓɔ̀ è kaaìŋ kò nɛ̀ɛ̀iŋ niìŋ.

⁴¹ ‘Yɛ̀mɛìŋ tɛɛ̀, nyɛ̀iŋ nyàŋ nìŋ gboo naanààŋ koɓɛ̀ Dayài nyàŋ! Tɔ̀ e keì foonòiŋ yèè niŋ fà! Esaɓù mìŋ do nàaŋ nàŋ nyɛ̀nɛ̀ŋ e nɛ̀ŋ bà e yèɛ niŋ naàŋ haawè lɛ, sèè pɛɛ wo nyùùŋ bà woiŋ niŋ wòò e kiiŋ.’ ”

⁴² Nààŋ wo Pɔɔ̀ yèè wo Bànaŋɓà yaà wa kɔɔyɛ e yìwìà ko sààŋ zòòlò aŋ Juùù nyaŋ, anyùùŋ nyaŋ naŋ nyiŋ wa pɔwɔ̀ wèè aŋ hnàŋ ɓɛìŋ ke Ɗɔ̀ɔ̀ Zòòlò aŋ Juùù nyaŋ do ɓɛìŋ nàŋ hnè lɛ diɛŋ wèè wo Pɔɔ̀ yèè wo Bànaŋɓà aŋ nyiŋ ɓɛìŋ wòò e zimgbe niŋ nyaàiŋ dè ke mìè Dayàa.

⁴³ Yèè nààŋ e dèèneɛ ko sààŋ zòòlò aŋ Juùù nyaŋ naŋ wa naàŋ ɓaa, aŋ Juùù nyuuŋ yèè anyùùŋ nyaŋ fè àŋ Juùù nyaŋ zimgbe nyiŋ naŋ wa kìlè koɓɛ̀ e zòòlò aŋ Juùù nyaŋ lɛ̀, naŋ wa dè wo Pɔɔ̀ yaà wo Bànaŋɓà maŋjɛ̀wɛ. Wo Pɔɔ̀ yaà wo Bànaŋɓà naŋ nyiŋ kìɛ̀ŋ jii nyingè wèè aŋ jeèè e hààwe sùà koɓɛ̀ Dayài esàɓù ke kpèè siaàŋ wo Dayà naŋ nyiŋ tɔɔ̀ lɛ.

⁴⁴ Ke Ɗɔ̀ɔ̀ Zòòlò aŋ Juùù nyaŋ bàa naŋ haì yèè anyùùŋ nyaŋ zimgbe nyiŋ naŋ hnè wèè aŋ kòmàŋ ke mìè wo Kanaà Dayà.

⁴⁵ Kɛɛ nààŋ anyùùŋ gbèègbèè aŋ Juùù nyaŋ naŋ wa yɛ̀mɛ̀ e faaŋ lɛɛ̀, e kooɛ̀ naŋ nyiŋ diè. Kpeiŋ àŋ naŋ wa gììyè e yèɛ wo Pɔɔ̀ yaà wa woo lɛ̀ maŋhɛɛ, yèè àŋ nauŋ fè maŋ mìè ɓɛ̀ɛ̀pɔ̀ɔ.

⁴⁶ Kɛɛ wo Pɔɔ̀ yaà wo Bànaŋɓà naŋ ngèè ɓɛìŋ gbòò maŋ jii nyingè sùà nyààŋ, “È yaà weè tɛ̀ɛ̀ wèè eiŋ gbòà ke mìè Dayàa ko nɛ̀ɛ̀iŋ niìŋ jiɛ̀. Kɛɛ nààŋ niŋ gò nyiŋ jàà kùàŋ dìì yèè niŋ gò ɓèmè nyɛ̀iŋ bi wèè naŋ nɔ̀ŋ anyuùŋ kɛnɛ wèè wɔŋ nyiiŋ gèe gò jùà lɛ̀, è yààìŋ jòà sùà eiŋ kìlà koɓɛ̀ anyùùŋ nyaŋ fè àŋ Juùù nyaŋ.

⁴⁷ Maŋ keì maŋ wo Kanaà Dayà naŋ wi woò wèè e nyɛ̀nɛ̀iŋ màŋ mɛɛ̀ŋ. Wò naŋ woò wààŋ, ‘Kàiŋ tàeɗùù wèè naŋ nɔ̀ŋ e gbolòùŋ wèè anyùùŋ nyaŋ fè àŋ Juùù nyaŋ. Nìŋ kuwa naŋ kòà e gààŋ jòèyè Dayàa koɓɛ̀ anyùùŋ nyaŋ gbiŋ e dììɛ diɛŋ ɗuunyaàŋ wèè aŋ nɔ̀ŋ jòèye nyiŋ.’ ”

⁴⁸ Ke miè gbìaŋ yɛɛ̀ naŋ wa fɔ̀ɔ̀yɛ̀ anyùùŋ nyaŋ fè àŋ Juùù nyaŋ maŋ jii, yèè àŋ naŋ tɛ̀nɛ̀ŋ ke mìè Dayàa. Kpeiŋ anyùùŋ nyaŋ gbiŋ naŋ wa nɔ̀ŋ ke ɗuù tà nyàŋ wèè wɔŋ nyiiŋ gèe gò jùàa naŋ gbìɛ̀ŋ e hààwe nyiŋ nɛ̀ wo Kanaà Jisɛ̀ sùà.

⁴⁹ Ke mìè gbìàŋ wo Kanaà Dayà naŋ wa ɓaayè koɓɛ̀ gbiŋ maŋ tàta miiŋ sùà.

⁵⁰ Kɛɛ anyùùŋ gbèègbèè aŋ Juùù nyaŋ naŋ kɔ̀ koɓɛ̀ aŋ kpàkòò ɓììɓìì nyaŋ bà ko jawaì yèè aŋ jɔùŋ kɛ̀ɛ̀nɛ̀ŋ ɓɛ̀ɛ̀jàa nyàŋ bà aŋ yè nyaŋ fè àŋ Juùù nyaŋ kɛɛ àŋ zoolà Dayà nyaŋ, yèè àŋ naŋ nyiŋ nyɛ̀nɛ̀ŋ aŋ kɛ̀ɛ̀nɛ̀ŋ maŋ jii fiìì wèè wo Pɔɔ̀ yèè wo Bànaŋɓà, yèè aŋ naŋ nyiŋ nimilà, e nɔ̀ŋ esaɓù aŋ nyiŋ nyìmàŋ aŋ nyiŋ gè maŋ tàta miiŋ wɔŋ fuɔɔ̀ŋ sùà.

⁵¹ Wo Pɔɔ̀ yaà wo Bànaŋɓà naŋ gbùmò e heiɛ̀ ko jawa wii maŋ gòlòò dìì nyiŋ màŋ wèè aŋ tɔɔ̀ kɛ̀ anyùùŋ nyaŋ gò wa jàà kè mìè gbìàŋ Dayàa kùàŋ dìì, yèè àŋ naŋ kɔ̀ ko jawa gbeeì Ìkɔniɔ̀ŋ.

⁵² Kɛɛ anyuùŋ hààwe nyàŋ ko Aŋtiɔ̀ yaà wa e zɔlɔ̀ zimgbe sùà yèè wo Jìnàŋ Nɛɛmaàŋ yaà nyiìŋ wa maŋjɛ̀wɛ.