Nyɛ̀nɛ̀ŋ 11 - WƆŊ FƐ̀Ì EBÒ SÌÀŊ DAYÀA

E jìwààjɛ̀wɛ̀ Pììlɛɛ̀ koɓɛ̀ anyuùŋ hààwe nyàŋ ko Jùlusɛ̀làm

¹ Aŋ keela tàeɗùù nyaŋ yèè anyuùŋ hààwe nyàŋ ko Jùdià kòmàŋ kɛ̀ anyùùŋ nyaŋ fè àŋ Juùù nyaŋ jàà ke mìè gbìàŋ Dayàa kùàŋ dìì.

² Nààŋ wo Pììlɛ naŋ kɔ̀ ko Jùlusɛ̀làm, anyùùŋ nyaŋ naŋ wa haawè kɛ̀ e kpùà jàa è yaà e keì kɛnɛ nyàŋ, naŋ wa gè maŋhɛɛ e nyaàiŋ dè e yèɛ wo Pììlɛ naŋ woò lɛ, yèè àŋ naŋ woò nyààŋ,

³ “Mùŋ naŋ mɛ̀iŋ kɔ̀ maŋ gbòòkùàŋ anyùùŋ nyaŋ fè àŋ Juùù aŋ yè nyaŋ fè kpùa jàa nyàŋ yèè nyɛ̀iŋ nyiŋ naŋ jììyè e nɛ̀ŋje koɓɛ̀ guùŋ!”

⁴ Kɛɛ wo Pììlɛ naŋ nyiŋ wòò e yèɛ naŋ kaikpɔ kaaìŋ e yìwìà ko tɔɔtuì lɛ.

⁵ Wò naŋ nyiŋ woò wààŋ, “E teengaà mìŋ yaà dài ko jawaì àŋ nyaaŋ Jɔpà ko zòòlò Dayà lɛ, mìŋ naŋ gò e gɔa yèè mìŋ naŋ yɛ̀mɛ̀ e nɛ̀ŋ bà mààŋ wɔŋ deè fàà gbee, wɔ̀ŋ yaà dèyà sùà e yìwìà ko àìjɛnɛ̀ŋ e teenè mààŋ anyùùŋ bà kùwà wuùŋ maŋ gènè tiinàŋ maŋ, wɔ̀ŋ naŋ hàì koɓɛ̀i mìŋ yaà lɛ yèè wɔ̀ŋ naŋ jɛi gìli.

⁶ Mìŋ naŋ wuŋ yɛ̀mɛ̀ sùà dììŋ, yèè mìŋ naŋ yɛ̀mɛ̀ maŋ ɗolònɛ̀ŋ yaà aŋ yilì kùùno, aŋ yilì gɔ̀ɛ̀ɛ̀ dìì e dììɛ diɛŋ, yaà aŋ woì gbeegbèè e yìwìà ko fùùiŋ àŋ yaà wuùŋ sùà.

⁷ Yèè mìŋ naŋ kòmò ke mìè gbòà nyùùŋ naim woò wààŋ, ‘Pììlɛ, yewà dìì, jiwà yèè muŋ gbìlà!’

⁸ Kɛɛ mìŋ naŋ woò mìàŋ, ‘Kpele Kanaà, kòò mìŋ jè wa è nɛ̀ŋje gò zɛ̀nɛ̀ŋ e yèɛ fè tɛ̀ɛ̀ lɛ.’

⁹ Ke mìèɛ naŋ ɓɛìŋ gbòò e yìwìà ko àìjɛnɛ̀ŋ kè naŋ woò wààŋ, ‘Sèè wo Dayà wo woò wààŋ e nɛ̀ŋ yaà tɛ̀ɛ̀ wèè e nɛ̀ŋjè, ɓɔ̀ mùŋ woò mààŋ e fè zɛ̀nɛŋ niŋ yèè e fè tɛ̀ɛ̀ wèè jèe.’

¹⁰ E keì lɛɛ̀ naŋ wa kaaìŋ e sùà taai, yèè ko diemeì maŋ gbiŋ naŋ ɓɛìŋ jòwò ko àìjɛnɛ̀ŋ.

¹¹ Ko fɛɛ̀feìŋ aŋ fèlàà taai nyàŋ e yìwìà ko Sesèlià naŋ hnè ko gbooì mìŋ yaà wa lɛ̀.

¹² Wo Jìnàŋ Nɛɛmaàŋ naim woò wààŋ miŋ dè nyiŋ maŋjɛ̀wɛ e kaiŋ e kìlà wààŋ ɓɔ̀ mìŋ gè màŋhɛɛ. Anyuùŋ hààwe nyàŋ àŋ nɔɔnɔŋ dièguùŋ naim dè maŋjɛ̀wɛ e yìwìà ko Jɔpà yèè è naiŋ kɔ̀ ko Sesèlià, yèè yàwi nààŋ gbiŋ naiŋ jɔ̀ ko sààŋ Kɔ̀nilìɔ̀.

¹³ Wò naŋ wi wòò e ɗeweɛ̀ wò naŋ yɛ̀mɛ̀ wo màikà wò sia ko saauŋ niìŋ. Wo màikàa nauŋ woò wààŋ wo tùàŋ anyùùŋ bà ko Jɔpà wèè wo felaa bà àŋ nyaaŋ wo Saimɔ̀ŋ Piilɛ̀.

¹⁴ Wò doum nàŋ kìɛ̀ŋ maŋ miè gbìaŋ maŋ yè maŋ do nàŋ jòèyè muàŋ yèè anyunùum nyàŋ gbiŋ ko gboo moo.

¹⁵ Yèè nààŋ mìŋ naŋ tɔ̀ɔ̀tù gbòa, wo Jìnàŋ Nɛɛmaàŋ naŋ nyiŋ dèyè diɛŋ, màànààŋ nɔŋ wo Jinàaŋ naŋ wi wa dèyè diɛŋ yàwi pɛɛ ko tɔɔtuì lɛ.

¹⁶ Kpeiŋ mìŋ naŋ jààèjii e yèɛ wo Kanaà naŋ wa woò lɛ wààŋ, ‘Wo Jɔ̀ɔŋ naŋ wa nɔŋ gùùyè anyùùŋ e wùìyè, kɛɛ wo Dayà doiŋ nàŋ gùùyè wo Jìnàŋ Nɛɛmaàŋ.’

¹⁷ E yaà janyai kɛ̀ wo Dayà naŋ kìɛ̀ŋ anyùùŋ nyaŋ nààŋ fè àŋ Juùù nyaŋ e kìɛ̀ŋ guùŋ nɛ wò naŋ wi wa kiɛ̀ŋ lɛ nààŋ è naiŋ wa sìè e hààwe wilɛ̀ wo Kanaà Jisɛ̀ Kulaì sùà. Kpeiŋ ɓòò nàŋ yààìm wèè ka gììyà wo Dayà maŋhɛɛ?”

¹⁸ Nààŋ àŋ naŋ wa kòmò e yèɛ wo Pììlɛ naŋ woò lɛ, aŋ gbiŋ naŋ wa kumiè yèè àŋ naŋ tɛ̀nɛ̀ŋ wo Dayà. Àŋ naŋ woò nyààŋ, “Wo Dayà naàŋ nyɛ̀nɛ̀ŋ anyùùŋ nyaŋ fè àŋ Juùù nyaŋ àŋ fè maŋ tùwo naanààŋ nyiŋ màŋ jɛwɛ, e kìlà wò nyiŋ kìɛ̀ŋ wɔŋ nyiiŋ gèe.”

Anyuùŋ Zòòlo nyàŋ ko Aŋtiɔ̀

¹⁹ Kpeiŋ kɛ̀ anyùùŋ màŋjɛ̀wɛ̀ Kanaà naŋ wa ɓààyè maŋ tàta màŋ sùà esàɓù e kèì nimilàa naŋ wa tɔɔtù e teengaà àŋ naŋ wa jìwè wo Siiwììŋ lɛ. Àŋ naŋ wa kɔ̀ ko Fònisìà, ko Sapulɔ̀, yèè ko Aŋtiɔ̀. Kɛɛ aŋ Juùù nyaŋ nɔŋ àŋ naŋ wa kìɛ̀ŋ ke miè gbìaàŋ.

²⁰ Aŋ Juùù gbòà Guliì mie nyaŋ bà nyiŋ e yìwìà ko Sapulɔ̀ yèè ko Sàlinìŋ naŋ wa kɔ̀ ko Aŋtiɔ̀ yèè àŋ naŋ tɔ̀ɔ̀tù Ebò Siaàŋ kìɛ̀ŋ nyaàiŋ dè wo Kanaà Jisɛ̀ koɓɛ̀ anyùùŋ nyaŋ fè àŋ Juùù nyaŋ.

²¹ E gààŋ Kanaà yaà nyiìŋ wa maŋjɛ̀wɛ, yèè anyuùŋ zimgbe naŋ wa kìlè koɓɛ̀ wo Kanaà yèè àŋ nauŋ sìè e hààwe sùà.

²² Ebò keì lɛɛ̀ naŋ hàì koɓɛ̀ anyuùŋ hààwe nyàŋ ko Jùlusɛ̀làm. Yèè àŋ naŋ tùɔ̀ŋ wo Bànaŋɓà ko Aŋtiɔ̀.

²³ Ke jii naŋ wa fɔ̀ wo Bànaŋɓà nààŋ wò nao wa haì yèè wò naŋ yɛ̀mɛ̀ e ɗeweɛ̀ wo Dayà naŋ wa kpùùmò anyùùŋ nyaŋ lɛ̀. Kpeiŋ wò naŋ nyiŋ dawè wèè aŋ kɛɛnɛ̀ŋ maŋ jii nyingè e kìlà aŋ jeè e hààwe yaà e tɔ̀ɔ̀nyaàŋ maŋ jii nyiŋ màŋ sùà koɓɛ̀ wo Kanaà.

²⁴ Wo Bànaŋɓà kuwa wa ke kpèè siaŋ yèè e hààwe gbee, yèè wo Jìnàŋ Nɛɛmaàŋ nauŋ wa dìèsùà. Esàɓù ke kpèèuŋ nɛɛ̀ŋ anyuùŋ zimgbe naŋ wa kɛ̀ɛ̀nɛ̀ŋ hààwe.

²⁵ Yèè wo Bànaŋɓà naŋ kɔ̀ ko Tasɔ̀ ko kààmè wo Sɔɔ̀.

²⁶ Nààŋ wò naŋ wa mɛ̀ɛ̀ŋ wo Sɔɔ̀, wò nauŋ hìɛ̀ŋ ko Aŋtiɔ̀. Kuŋ nyiiŋ tìyèe yaà ke gbòò anyuùŋ hààwe nyàŋ hewa dèènè koɓɛ̀ guùŋ wèè wɔŋ dòà guùŋ kpalauŋ, yèè àŋ naŋ kàà ke gbòò anyuùŋ zimgbe. Kuii ko Aŋtiɔ̀, nàŋ yaà koɓɛ̀ jiɛ̀jiɛ̀i anyùùŋ naŋ wa nyààŋ anyuùŋ hààwe nyàŋ aŋ Kulusɛ̀ɛ̀ìŋ wèè e teenga jiɛ̀jiɛ̀ɛ.

²⁷ E teenga lii sùà aŋ wɛ̀ijì nyaŋ bà naŋ wa kɔ̀ ko Aŋtiɔ̀ e yìwìà ko Jùlusɛ̀làm.

²⁸ Wo bà guùŋ, e deèuŋ nɛ̀ nàŋ yaà wa wo Àgaɓɔ̀. E yìwìà e gààŋ Jinàaŋ sùà wo Àgaɓɔ̀ naŋ wa sie yèè wò naŋ woò kɛ̀ e jiè gbee do nàŋ sɔ̀ɔ̀ e ɗuunyaàŋ gbiŋ sùà ko dòmàŋfeìŋ. E jìè bi zà naŋ wa sɔ̀ɔ̀ e teengaà wo Kulɔdiɔ̀ yaà wa wo Kana wèè wɔŋ fùɔ̀ŋ anyùùŋ Luùm nyaŋ lɛ̀.

²⁹ Anyùùŋ màŋjɛ̀wɛ̀ nyaŋ gbiŋ ko Aŋtiɔ̀ naŋ wa ɗewè wèè aŋ toomò koɓɛ̀ guùŋ aŋ nyɛ̀nɛ̀ŋ maŋ kuàŋ gbònògbono e yìwìà e yèɛ naŋ wa ɓɛ̀ɛ̀nɛ̀ŋ wo nyùùŋ gbiŋ kùàŋ sùà lɛ wèè aŋ tùàŋ anyuùŋ hààwe dàwi nyiŋ nyàŋ ko Jùdià.

³⁰ Kpeiŋ àŋ naŋ wa tà wo Bànaŋɓà yèè wo Sɔɔ̀ ɗùù wèè aŋ koà e nɛɛnɛɛ̀ŋ koɓɛ̀ aŋ màmànkùmɛ̀ŋ anyuùŋ hààwe nyàŋ ko Jùlusɛ̀làm.