Maafiù 17 - WƆŊ FƐ̀Ì EBÒ SÌÀŊ DAYÀA

E nɛ̀ɛ̀màŋ Jisɛ̀ɛ naŋ wa nɔ̀ŋ tɔ̀ɔ niŋ koɓɛ̀ anyùùŋ màŋjɛ̀wɛ̀ taai

¹ E gɔ̀ɛ̀ɛ̀ nɔɔnɔŋ dièguùŋ naŋ mààŋ, yèè wo Jisɛ̀ naŋ ɓèmè wo Pììlɛ yèè wo wùìyauŋ nɔɔ̀ŋ Jìiiŋ yèè wo Jɔ̀ɔŋ, yaà nyiŋ naŋ kɔ̀ wɔŋ toò mùŋlaŋ bà dìmɛ̀ nyiŋ wouwòù.

² Nààŋ anyùùŋ màŋjɛ̀wɛ̀ nyaŋ yàaùŋ wa yɛɛmɛ, e nɔ̀ŋ kìì Jisɛ̀ɛ naŋ wa kìlè. Wɔŋ dewàuŋ nɔɔ̀ŋ yaà mɛ̀ɛ̀ŋ sùà mààŋ e gɔɛɛ̀, yèè maŋ dèè kɔɔuŋ màŋ naŋ fòò pepe, e nìàŋ maŋ yè maŋ wo nyùùŋ kpùùŋ ɗuunyaŋ naŋ weè ɓɛ̀nɛ̀ŋ sòa màŋ e ɗuunyaàŋ dìì.

³ Kpeiŋ anyùùŋ màŋjɛ̀wɛ̀ taai nyàŋ naŋ yɛ̀mɛ̀ wo Mòòze yèè wo Ìlaajà àŋ yaà gbùùyè wo Jisɛ̀ kɔɔ.

⁴ Kpeiŋ wo Pììlɛ naŋ gbòò yèè wò naŋ wòò wo Jisɛ̀ wààŋ, “Kanaà è yaà tɛ̀ɛ̀ wèè eiŋ kià nɔ̀ŋ. Tɔ̀ e nyɛ̀lɛ̀iŋ kià maŋ vààyà taai, kè guùŋ weèum, kè guùŋ wèè wo Mòòze, yèè kè guùŋ wèè wo Ìlaajà.”

⁵ Nààŋ wò yaà wa gbuuye, ke nyili fuaà naŋ hnè yèè kè naŋ nyiŋ ɓùwò. Yèè ke mìè naŋ fòlò ke nyili fuaà sùà kè naŋ woò wààŋ, “Wo jɔ̀àfelaa miɔ̀ŋ wɛɛ̀, wo yèɔ mìŋ manaŋ wɔ̀. Kòmaìŋ e mìè nyaàuŋ nɛ̀!”

⁶ Nààŋ anyùùŋ màŋjɛ̀wɛ̀ nyaŋ naŋ wa kòmò ke mìèɛ, e jùù naŋ nyiŋ nyɛ̀nɛ̀ŋ yèè àŋ naŋ hàwè ko dììnaŋ fukpù aŋ gbùwà maŋ feìŋ nyiŋ màŋ dìì.

⁷ Wo Jisɛ̀ naŋ hnè yèè wò naŋ nyiŋ mɛnlɛ̀ɛ̀ŋ yèè wò naŋ woò wààŋ, “Yèwaìŋ dìì, e jùù ɓɔ̀ è nyɛ̀nɛ̀iŋ!”

⁸ Nààŋ àŋ naŋ wa yèwè dìì, aŋ gò wa ɓɛìŋ yɛ̀mɛ̀ wò nyùùŋ bà gbiŋ è kɔɔ nyiŋ sɔɔ̀ nɔŋ wo Jisɛ̀.

⁹ E teengaà àŋ yaà wa yèwà sùà wɔŋ tolòɔ dìmɛ̀ àŋ yaà dèyà sùà lɛ, wo Jisɛ̀ naŋ nyiŋ hèè e nàà sìwè wèè kɛ̀ ɓɔ̀ àŋ woò è nɛ̀ɛŋ àŋ naŋ yɛmɛ̀ lɛ wò nyùùŋ gbiŋ e jèèsùà wuŋ wo Jɔ̀àfèlàà Nyuùŋ Kpùnɔɔ̀ŋ wo yèwà e fàaà dìì.

¹⁰ Kpeiŋ anyùùŋ màŋjɛ̀wɛ̀ nyaŋ naŋ dàwè wo Jisɛ̀ nyààŋ, “Wèè kiìŋ aŋ kààmɔ̀ɔ̀ŋ maŋ Sàwà Dayà nyaŋ nyààŋ sɔɔ̀ wo Ìlaajà wuŋ jiɛ̀ wo hnàŋ?”

¹¹ Wo Jisɛ̀ naŋ nyiŋ fasàì wààŋ, “Wo Ìlaajà kuwa wèè wo hnàŋ wuŋ jiɛ̀ wèè wo ɓànèɓànè maŋ keì maŋ gbiŋ sùà tɛ̀ɛ̀.

¹² Tɔ̀ miŋ woòiŋ kɛ̀, wo Ìlaajà wa hnàŋ, kɛɛ anyùùŋ nyaŋ gòuŋ wa jàà kùàŋ dìì, yèè àŋ nauŋ wa kààìŋ maŋ keì maŋ gbiŋ àŋ manaŋ wa wèè auŋ kaaìŋ maŋ màànààŋ nɔŋ àŋ manaŋ wa lɛ̀. Maŋ kèì nàànààŋ guùŋ bi nɔŋ àŋ do nàŋ kààìŋ miàim wo Jɔ̀àfèlàà Nyuùŋ kpùnɔɔ̀ŋ.”

¹³ Yèè anyùùŋ màŋjɛ̀wɛ̀ nyaŋ naŋ wa ngàà nyìmè kɛ̀ wò yaà wa gbùùyè ko nɛ̀ɛ̀ŋ nyiŋ niìŋ e nyaàiŋ dè wo Jɔ̀ɔŋ Gùà Nyùnɔ̀ɔŋ.

Wo Jisɛ̀ naŋ sùngò wo felaajɔa kɛ̀ɛ̀nɛ̀ŋ wo jinàŋ naanààŋ

¹⁴ E teengaà aŋ naŋ kɛ̀ɛ̀ koɓɛ̀ e faaàŋ lɛ, wo felaa bà naŋ hnè yèè wò naŋ dè maŋ gɛ̀ɛ̀ŋ nùuŋ màŋ dììnaŋ wo Jisɛ̀ fɛɛ̀feìŋ,

¹⁵ yèè wò naŋ woò wààŋ, “Dàa, tɔ̀ɔ̀ ke nyowo wo jɔ̀àfelaa miɔ̀ŋ diɛŋ! Wò kuwa e sààŋ gbògàngè, yèè sèè è dàaùŋ, wò sɛɛ̀ ko hmɔ̀ɔ̀ŋ yèè ko kòi.

¹⁶ Mìŋ naŋ dàwè anyùùŋ màŋjɛ̀wɛ̀uŋ nyàŋ wèè auŋ sùngà, kɛɛ aŋ gò ɓɛnɛ̀ŋ.”

¹⁷ Wo Jisɛ̀ naŋ nyiŋ woò wààŋ, “Kuoo nyɛ̀iŋ nààŋ nyuùŋ gò kùwìè hààwe yèè kpèè naanààŋ nyɛɛ̀ŋ! Kiìŋ è teenga mùnlaŋ mìŋ doiŋ naŋ nɔ̀ŋ e kɔɔ? Kiìŋ è teenga mùŋlaŋ mìŋ do nàŋ kùwò ke jii maŋjɛ̀wɛiŋ? Hìaìŋ kià wo felaajɔaà ko nɛ̀ɛ̀ŋ miìŋ.”

¹⁸ Wo Jisɛ̀ naŋ gbòò koɓɛ̀ wo jinàŋ naanààaŋ, yèè wò naŋ fòlò wo felaajɔaà sùà, ko fɛɛ̀feìŋ wò naŋ jòèyè.

¹⁹ Kpeiŋ anyùùŋ màŋjɛ̀wɛ̀ nyaŋ naŋ dàwè wo Jisɛ̀ ke gbùnuo sùà nyààŋ, “Kiìŋ naŋ nyɛ̀nɛ̀ŋ yàwi e gò ɓɛ̀nɛ̀ŋ nyìmàŋ wò jinàaŋ wò felaajɔaà màŋjɛ̀wɛ?”

²⁰ Wo Jisɛ̀ naŋ nyiŋ fasàì wààŋ, “E hààweiŋ nɛ̀ naŋ tolòò, esaɓùɛ lii niŋ gò ɓɛnɛ̀ŋ. Mìŋ yààìŋ wòo sùà e tɔɔɓaaà, sèè naŋ weè kɛ̀ɛ̀nɛ̀ŋ e hààwe e dɛɛ̀ mààŋ ke kaaŋ komaŋ, nàŋ ɓɛ̀nɛ̀ŋ wòò wɔŋ toò wɛɛ̀ŋ nààŋ, ‘Yewà kià muŋ ka wɔŋ fàà wiiŋ.’ È henàŋ kaaìŋ. E keì gbiŋ naàŋ weè nyìngè weèiŋ. [

²¹ E zòòlo yèè ke tɔùŋ kùwa nɔŋ nàŋ gè wo jinàŋ naanààŋ mààŋ wɛɛ̀ wo nyùùŋ maŋjɛ̀wɛ.”]

Wo Jisɛ̀ naŋ ɓɛìŋ wòò e kèè e fàauŋ nɛ̀

²² Nààŋ anyùùŋ màŋjɛ̀wɛ̀ nyaŋ gbiŋ naŋ wa dèènè ko Galaliì, wo Jisɛ̀ naŋ nyiŋ woò wààŋ, “Miàim wo Jɔ̀àfèlàà Nyuùŋ Kpùnɔɔ̀ŋ do nàŋ nɔ̀ŋ màaim koɓɛ̀

²³ anyùùŋ nyaŋ doim nàŋ jìwè nyaŋ. Kɛɛ sèè e gɔ̀ɛ̀ɛ̀ taai maaŋ mìŋ do nàŋ yèwè e fàaà dìì wɔŋ nyiiŋ gèeo sùà.” Ke nyowo naŋ wa nyɛ̀nɛ̀ŋ anyùùŋ màŋjɛ̀wɛ̀ nyaŋ wèè e yèɛ àŋ naŋ kòmò lɛ.

Wo Jisɛ̀ naŋ wòò e kèè e nɛɛnɛɛ̀ŋ àŋ paawà lɛ ko Saaŋ Zòòlò Dayài

²⁴ Nààŋ wo Jisɛ̀ yaà anyùùŋ màŋjɛ̀wɛ̀uŋ nyàŋ naŋ wa hnè ko Kepanàùm, anyuùŋ kùwà e nɛ̀ɛ̀nɛ̀ŋ ke Saaŋ Zòòlò Dayàa naŋ hnè koɓɛ̀ Pììlɛì yèè àŋ nauŋ dawè nyààŋ, “Wo kààmɔɔiŋ nɔɔ̀ŋ wò paawà e nɛ̀ɛ̀nɛ̀ŋ ke Saaŋ Zòòlò Dayàa?”

²⁵ Wo Pììlɛ naŋ nyiŋ fasàì wààŋ, “Hɛ̀ɛɛ̀ŋ, wò paawà nìŋ.” E teengaà wo Pììlɛ naŋ jɔ̀ ko saaìŋ lɛ, wò Jisɛ̀ nauŋ dawè wààŋ, “Saimɔ̀ŋ, kiìŋ nàŋ yaà e gòngo mɔ̀ɛ̀? Aŋ kànà ɗuunyaŋ lɛɛ̀ gè e nɛ̀ɛ̀nɛ̀ŋ fuɔŋ anyùùŋ nyiŋ bi nyàŋ sìwè, ɔ̀ɔ̀ àŋ gè nìŋ anyùùŋ fuɔŋ joo sìwè?”

²⁶ Wo Pììlɛ naŋ fasàì wààŋ, “Àŋ gè niìŋ anyùùŋ fuɔŋ joo sìwè.” Yèè wo Jisɛ̀ naŋ fasàì wààŋ, “Kɛ̀ aŋ jɔ̀à kùmìàŋ fuɔɔ̀ŋ kuwà wèè aŋ niŋ paawà.

²⁷ Kɛɛ e manàŋ wèè ànyùùŋ nyɛɛ̀ŋ aŋ wi tùù sìwè. Weètii kɔ̀à wɔŋ juwoɔ̀ muŋ dàào wɔŋ jàà yèè muŋ kùwà wo kɛì jiɛ̀jiɛ̀ɔ. Yìlè wo kɛìɔ nyààŋ, yèè mùŋ doo nàŋ mɛ̀ɛ̀ŋ ke kaiŋ fua nɛɛnɛŋ. Kɔ̀à muŋ kiɛ̀ŋ nyiŋ ke nɛɛnɛɛ̀ŋ wèè aŋ paawà nyiŋ weè wi ko Saaŋ Zòòlò Dayài.”