Luùm 6 - WƆŊ FƐ̀Ì EBÒ SÌÀŊ DAYÀA

È yààìŋ wɔŋ nyiiŋ gèe sùà esàɓù Jisɛ̀ Kulaì

¹ Kiìŋ kai è naiŋ naàŋ ɓɛ̀nɛ̀ŋ wòo? E nɔ̀iŋ nyìnìè maŋ jùumù keleiŋ wèè wo Dayà tɔɔ̀ wi è tɛ̀ɛ̀tɛ̀ɛ̀uŋ nɛ̀ zimgbe zimgbe?

² Kpele! Ɓɔ̀ è nyɛ̀nɛ̀iŋ yɛi! Maŋ kpèè naanààŋ maŋ yàwì sùà maŋ màŋ fà. Kpeiŋ dièsɔa è naiŋ ɓɛ̀nɛ̀ŋ nɔ̀ɔ̀ŋ nyìnìè màŋ keì naanààŋ tutùtuuŋ màŋ nyiiŋ gèe wi màŋ sùà?

³ Tɔɔɓaa nàŋ nyìmàŋ kɛ̀, e teengaà àŋ naŋ wi wa gùò wèè eiŋ nɔ̀ŋ aŋ bàwibà wo Jisɛ̀ Kulaì sùà lɛ, àŋ naŋ wi wa gùò wèè eiŋ nɔ̀ŋ aŋ bàwibà e fàauŋ nɛ̀ sùà.

⁴ Nààŋ è naiŋ wa nɔ̀ŋ gùa wi, yàwi nààŋ Jisɛ̀ kulaì naiŋ wa fɔ̀ɔ̀yɛ̀ koɓɛ̀ guùŋ yèè àŋ naŋ wi sììyè koɓɛ̀ guùŋ. È naiŋ wa nɔ̀ŋ gùa wi wèè eiŋ nɔ̀ŋ wɔŋ nyiiŋ gèe jɛi sùà, nààŋ wo Dayà wo Dèdaà naŋ wa gè wo Jisɛ̀ Kulaì e fàa dìì koɓɛ̀ wɔŋ nyiiŋ gèe e yìwìà e jòòwò gààŋ nɛɛmaŋ gbee sùà.

⁵ Nààŋ è naiŋ nɔ̀ŋ anyùùŋ guùŋ wo Jisɛ̀ sùà e nyaàiŋ dè e fàauŋ nɛ̀, yɛi nɔŋ è doiŋ nàŋ nɔ̀ŋ anyùùŋ guùŋ wuŋ sùà wèè eiŋ yèwà e fàa dìì wɔŋ nyiiŋ gèe sùà màànààŋ wò naŋ wa nɔ̀ŋ lɛ.

⁶ Èiŋ nyìmàŋ kɛ̀ nààŋ wo Jisɛ̀ Kulaì naŋ wa fɔ̀ɔ̀yɛ̀ wɔŋ vènèkpaaà diɛŋ, yaà maŋ kpùnàŋ jùumù wi màŋ naŋ wa fɔ̀ɔ̀yɛ̀ koɓɛ̀ guùŋ. Tɛɛ̀ naŋ wa kaaìŋ wèè e nyɛ̀nɛ̀ŋ e gààŋ maŋ kpùnàŋ jùumù wi màŋ nɔ̀ŋ pɔ̀ɔ̀pɔɔ niŋ, wèè e go wi ɓɛìŋ nàŋ nyɛ̀nɛ̀ŋ eiŋ nɔ̀ŋ aŋ ɗo wèè maŋ jùumù nyɛ̀nɛŋ.

⁷ Èiŋ nyìmàŋ kɛ̀ sèè è fàìŋ, kɛ̀ èiŋ fòlà e gààŋ jùumù dìì.

⁸ Nààŋ yàwi nààŋ Jisɛ̀ Kulaì naiŋ fɔ̀ɔ̀yɛ̀ koɓɛ̀ guùŋ lɛ, è naiŋ ɓɛìŋ haawè kɛ̀ yàwi nààŋ gbiŋ doiŋ nàŋ nɔ̀ŋ koɓɛ̀ guùŋ wɔŋ nyiiŋ gèeɔ̀ sùà.

⁹ Esaɓù èiŋ nyìmàŋ kɛ̀ wo Dayà naŋ wa gè wo Jisɛ̀ Kulaì e fàaà dìì, wo naàŋ wa nàwèè ɓɛìŋ fɔ̀ julɔfɔ. E fàa kuwà ɓɛìŋ è gààŋ kò diɛuŋ.

¹⁰ Nààŋ wò naŋ wa fɔ̀, e jùumù kuwà è gààŋ kò diɛuŋ. Yèè wò yaà naàŋ nɔŋ wɔŋ nyiiŋ gèe sùà wèè Dayà wuŋ guùŋ kpò.

¹¹ E ɗèwè guùŋ nɛɛ̀ sùà nìŋ kuwa naŋ kɛ̀ɛ̀nɛ̀ŋ gòngo wèè nyɛ̀iŋ bi kɛ̀ nyɛ̀iŋ nààŋ Jisɛ̀ Kulaì naŋ fɔ̀ɔ̀yɛ̀ koɓɛ̀ guùŋ, e kìlà e jùumù kuwà gààŋ kò diɛiŋ. Kɛɛ nìŋ yaà naàŋ wɔŋ nyiiŋ gèe sùà e gààŋ Dayàa dìì e yìwìà wo Jisɛ̀ Kulaì sùà.

¹² Ɓɔ̀ nìŋ dangè ɓɛìŋ e jùumù do kɛ̀ɛ̀nɛ̀ŋ gààŋ màŋ kpùnaiŋ màŋ diɛŋ, wèè e goiŋ nàŋ nyɛ̀nɛ̀ŋ naŋ jɔ̀ɔ̀lɔ̀ e ɗèweɛ̀ nìŋ kuwa lɛ̀ ke kpèè maŋ keì naanààiŋ nɛɛ̀ŋ dìì.

¹³ Ɓɔ̀ nìŋ nyimèè wèè màŋ nɛ̀ɛ̀ŋ kɔ̀ɔ̀ màŋ kpùnaiŋ màŋ bà màŋ do nyɛ̀nɛ̀ŋ jùumù. Kɛɛ deìŋ ke dòmàŋ Dayàa diɛŋ, esaɓù kɛ̀ nìŋ yaà wa mààŋ anyùùŋ naŋ fɔ̀, kɛɛ wo Dayà wòiŋ kìɛ̀ŋ wɔŋ nyiiŋ gèe. Kìɛìŋ maŋ kpùnaiŋ màŋ ko nɛ̀ɛ̀uŋ niìŋ wèè wo toomò miŋ e tɔ̀ɔ̀nyaàŋ sùà.

¹⁴ Ɓɔ̀ nìŋ nyimèè wèè è jùumù do kɛ̀ɛ̀nɛ̀ŋ gààŋ màŋ nyiiŋ gèeiŋ màŋ diɛŋ. Nìŋ yaà e gààŋ e tɛ̀ɛ̀tɛ̀ɛ̀ Dayàa dìì, kɛɛ e fè e gààŋ kè sàwàa dìì.

Nɔ̀iŋ aŋ ɗo wèè e tɔ̀ɔ̀nyaàŋ

¹⁵ Nààŋ miŋ fè naàŋ kè sàwàa dìì lɛ, kà ɓɛ̀nɛ̀ŋ nyɛ̀nɛ̀ŋ maŋ jùumù esaɓù kɛ̀ mìŋ yaà e gààŋ e tɛ̀ɛ̀tɛ̀ɛ̀ Dayàa dìì? Kpele!

¹⁶ Tɔɔɓaa nàŋ nyìmàŋ kɛ̀ nìŋ yaà aŋ ɗo koɓɛ̀ wo nyùnɔ̀ɔŋ nìŋ jɔɔlɔ̀ dìì wɔ. Sèè naŋ kìlà nyɛ̀iŋ bi aŋ ɗo wèè naŋ jɔ̀ɔ̀lɔ̀ maŋ jùumù dìì, e jìwààjɛ̀wɛ̀ɛ nàŋ yaà e fàa. Sèè naŋ kìlà nyɛ̀iŋ bi aŋ ɗo wèè naŋ jɔ̀ɔ̀lɔ̀ wo Dayà dìì, e jìwààjɛ̀wɛ̀ɛ do nàŋ nyɛ̀nɛ̀ŋ wo Dayà woiŋ jàà kùàŋ dìì wèè naŋ nɔ̀ŋ anyùùŋ tɔ̀ɔ̀nyaàŋ.

¹⁷ Kɛɛ gè wììŋ wo Dayà ke sɛ̀! Esaɓù kɛ̀ nìŋ yaà wa mààŋ aŋ ɗo e kìlà nìŋ yaà jɔ̀ɔ̀lɔ̀ e ɗèweɛ̀ nìŋ kuwa lɛ̀ koɓɛ̀ maŋ jùumù, kɛɛ nàŋ kìlà yèè nàŋ kɛ̀ɛ̀nɛ̀ŋ e ɓɛ̀ɛ̀jàa maŋ jiiiŋ màŋ sùà wèè naŋ jɔ̀ɔ̀lɔ̀ e tɔ̀ɔ̀nyaàaŋ àŋ naiŋ wa kaà lɛ dìì.

¹⁸ Wo Dayà naiŋ wa gè e gààŋ jùumù dìì yèè nìŋ naŋ kìlè aŋ ɗò tɔ̀ɔ̀nyaàŋ koɓɛ̀ Dayài.

¹⁹ Mìŋ toomàŋ maŋ mìè maŋ è gbòòìŋ ke ɗɔɔ gbiŋ maŋ nyiiŋ gèe wi màŋ sùà, esàɓù e zɔ̀kpɔ̀ɛ yaà e kɔɔiŋ nɛ̀ sùà e nyaàiŋ dè e yèɛ nìŋ naŋ nyìmè lɛ. E teenga guùŋ bà nìŋ naŋ wa kìlè nyɛ̀iŋ bi aŋ ɗo wèè naŋ nyɛ̀nɛ̀ŋ maŋ keì kùwà ninaŋ yaà maŋ keì naanààŋ maŋ kpùnaiŋ màŋ sùà, nààŋ maŋ gòngoiŋ màŋ naiŋ wa hiiyè wèè naŋ miŋ nyɛ̀nɛ̀ŋ lɛ. E ɗèwè guùŋ nɛɛ̀ sùà, nìŋ kuwa naŋ niŋ nyɛ̀nɛ̀ŋ e kpààŋ kɔɔiŋ wèè maŋ gòngoiŋ màŋ hiiyà maŋ kpùnaiŋ màŋ maŋ kìlà e tɔ̀ɔ̀nyaàŋ sùà, wèè kɛ̀ niŋ nɔ̀ŋ anyùùŋ nɛɛmaŋ koɓɛ̀ Dayài.

²⁰ Nààŋ nìŋ yaà wa aŋ ɗo e gààŋ maŋ jùumù dìì lɛ, e fè wa è kpàŋ wèè naŋ nyɛ̀nɛ̀ŋ è tɔ̀ɔ̀nyaàaŋ wò Dayà manaŋ lɛ̀.

²¹ Kiìŋ è naiŋ wa nafà wèè maŋ keì maŋ nìŋ naŋ wa nyɛ̀nɛ̀ŋ yèè e sàngè yààìŋ naàŋ wèè naŋ miŋ ɓɛìŋ nyɛ̀nɛ̀ŋ lɛ? E jìwààjɛ̀wɛ̀ maŋ keì bi zà nàŋ yaà e fàa!

²² Niŋ fè ɓɛìŋ è gààŋ màŋ jùumù dìì, nàŋ naàŋ kìlà aŋ ɗo koɓɛ̀ Dayài. E nàfaiŋ nɛ̀ nàŋ yaà wɔŋ nyììŋ gè nɛɛmaŋ ko nɛ̀ɛ̀uŋ niìŋ, yèè e jìwààjɛ̀wɛ̀ɛ nàŋ yaà wɔŋ nyiiŋ gèe gò jùà.

²³ E jìwààjɛ̀wɛ̀ɛ wo nyùùŋ yɛmɛ̀ sèè wo nyɛnɛŋ e jùumù lɛ, nàŋ yaà e fàa. Kɛɛ wo Dayà kiɛ̀ŋ wɔŋ nyiiŋ gèe gò jùà foo koɓɛ̀ anyùùŋ nyaŋ yaà aŋ bà nyiŋ bà wo Jisɛ̀ Kulaì wo Kana wiɔ̀ sùà nyaŋ.