Luùm 5 - WƆŊ FƐ̀Ì EBÒ SÌÀŊ DAYÀA

Wo Dayà wò wi jàà kùàŋ dìì wèè eiŋ nɔ̀ŋ anyùùŋ tɔ̀ɔ̀nyaàŋ

¹ E yìwìà e hààwe wilɛ̀ sùà, wo Dayà wò wi jàà kùàŋ dìì wèè eiŋ nɔ̀ŋ anyùùŋ tɔ̀ɔ̀nyaàŋ, yèè è kùwàìŋ naàŋ ke jii fàa koɓɛ̀ Dayài esàɓù wo Kana wiɔ̀ Jisɛ̀ Kulaì sùà.

² Wò wi hiàŋ e yìwìà e hààwe sùà koɓɛ̀ e tɛ̀ɛ̀tɛ̀ɛ̀ Dayàa è yèɛ e gòiŋ tomo weè niŋ lɛ̀, e kìlà e yèɛ è joàìŋ naàŋ sùà lɛ. Weètii e zɔlɔ̀ yaà wì, nààŋ è kùwàìŋ ke jii tùlia wèè eiŋ nɔ̀ŋ aŋ bàwibà e jòòwò Dayàa sùà.

³ Kɛɛ tii fè è gbiŋ! E gèìŋ ɓɛìŋ zɔlɔ̀ e keì nyìnga wilɛ̀ sùà, esaɓù èiŋ nyìmàŋ kɛ̀ e keì nyìnga kpuumàŋ wì eiŋ kùwà koɓɛ̀ guùŋ kpaŋ e kìlà e zɔ̀kpɔ̀ fè wi nyɛ̀nɛ̀ŋ è hààwe wilɛ̀ sùà.

⁴ Koɓɛ̀ guùŋ kùwa kpaŋ e hààwe wilɛ̀ sùà nyɛnɛŋ wo Dayà wo wi jàà kùàŋ dìì, yèè sèè wò jàà wì kùàŋ dìì, è doiŋ nàŋ kɛ̀ɛ̀nɛ̀ŋ ke jii tùlia.

⁵ Ke jii tùlia yɛɛ̀ fè wi zuwò, esaɓù kɛ̀ wo Dayà gbìàŋ e mànauŋ nɛ̀ maŋ jii wi màŋ sùà, esàɓù wo Jìnàŋ Nɛɛmaàŋ wo yèɔ wò naŋ wi kiɛ̀ŋ wɔ.

⁶ E teengaà e zɔ̀kpɔ̀ yàwì wa lɛ̀, wo Jisɛ̀ Kulaì naŋ fɔ̀ wèè yàwi nààŋ nyuùŋ nyɛ̀nɛ̀ŋ maŋ tùwo naanààŋ nyaŋ e teengaà wo Dayà naŋ wa tàeɗùù lɛ.

⁷ Wo nyùùŋ gbiŋ fè ɓɛ̀nɛ̀ŋ nyìmee wèè wo fà wèè wò nyùùŋ tɔ̀ɔ̀nyaàŋ. Jòòpɛɛ è wɛ̀i ɓɛ̀nɛ̀ŋ nɔ̀ɔŋ kɛ̀ wo nyùùŋ ɓɛ̀nɛ̀ŋ nyìmee wèè wo fà wèè wo nyuùŋ kɛ̀ɛ̀nɛ̀ŋ ke kpèè siaŋ.

⁸ Kɛɛ wo Dayà wò wi tɔ̀ɔ̀ e mànaàŋ wò kuwa weè wilɛ̀, nààŋ wò naŋ nyimèè wèè wo Jisɛ̀ Kulaì wo fà weè wi, jòòpɛɛ è yààìŋ wa anyùùŋ maŋ jùumù.

⁹ Nààŋ wo Dayà naŋ wi naàŋ jàà kùàŋ dìì wèè eiŋ nɔ̀ŋ anyùùŋ tɔ̀ɔ̀nyaàŋ, esàɓù e ɗewe kiiɛ̀ wo Jisɛ̀ Kulaì naŋ wa fɔ̀ lɛ, e nɛ̀ŋ bà ngèè kòò è yaà weè wi è kuwa sɛmɛ weè wi e fàa kiiuŋ nɛ̀ sùà, tiŋ nàŋ yaà kɛ̀, wo Jisɛ̀ do wi wa nàwèè nàŋ joeyè e yìwìà e nìmìlàa wo Dayà kuwa weè wilɛ̀ sùà.

¹⁰ È yààìŋ wa aŋ joo koɓɛ̀ Dayài, kɛɛ wò naŋ wi nyɛ̀nɛ̀ŋ anyuùŋ mɔ̀ɔ̀nɔuŋ wèè euŋ ɓɛìŋ jɛ̀ì kɔɔ esàɓù e fà wo Jɔ̀àfelaauŋ nɔɔ̀ŋ sùà. Kɛɛ e nɛ̀ŋ bà ngèè kòò è yaà weè wi è kuwa sɛmɛ e nìàŋ e mɔ̀ɔ̀nɔŋ. Nààŋ è yààìŋ naàŋ ke jii fàa sùà koɓɛ̀ Dayài lɛ̀, wò do wi nàŋ joeyè e yìwìà wɔŋ nyììŋ wo Jɔ̀àfelaauŋ nɔɔ̀ŋ sùà.

¹¹ Kɛɛ tii fè è gbiŋ. È gèìŋ zɔlɔ̀ esàɓù e nɛ̀ɛŋ wo Dayà naŋ nyɛ̀nɛ̀ŋ e yìwìà wo Kanaà Jisɛ̀ Kulaì sùà lɛ, wo yèɔ naŋ jàànè e mɔ̀ɔ̀nɔŋ wilɛ̀ koɓɛ̀ Dayài wɔ̀.

Wo Adamàŋ yaà wo Jisɛ̀ Kulaì

¹² Esàɓù Adamàaŋ sùà anyùùŋ nyaŋ gbiŋ e ɗuunyaàŋ naŋ nɔ̀ŋ anyùùŋ maŋ jùumù, yèè e jùumù bi naŋ hìɛ̀ŋ e kèè fàa. Wèè esàɓù maŋ jùumù mɛɛ̀ŋ anyùùŋ nyaŋ gbiŋ e ɗuunyaàŋ kuwa aŋ fà.

¹³ E jùumù yaà wa e ɗuunyaàŋ paŋgàà wo Dayà naŋ wa kìɛ̀ŋ maŋ Sàwà maŋ wo Mòòze naŋ wa hiɛ̀ŋ maŋ. Kɛɛ e teengaà ke sàwà fòo wa lɛ̀, wo Dayà gò wa wòò è kèè màŋ jùumù.

¹⁴ Kɛɛ yɛi nɔŋ è yaà e fàa kuwa wa e gààŋ anyùùŋ nyaŋ gbiŋ diɛŋ aŋ yè nyaŋ yaà wa wɔŋ gèeɔ̀ sùà nyaŋ e yìwìà e tèèngà Adamàaŋ e hàì koɓɛ̀ e tèèngà Mòòzeɛ̀. Tɛɛ̀ naŋ wa kaaìŋ, jòòpɛɛ anyùùŋ nyaŋ gbiŋ nààŋ gò wa pɔ̀ɔ̀ kè sàwàa wò Dayà naŋ kiɛ̀ŋ màànààŋ wò Adamàŋ naŋ wa nyɛ̀nɛ̀ŋ lɛ. Wo Adamàŋ yaà mààŋ Jisɛ̀ Kulaì, wo yèɔ naŋ wa hnè eɓìèmàŋjɛ̀wɛ̀ wo Adamàŋ wɔ.

¹⁵ Kɛɛ nyiŋ tìyèe àŋ yaà gbàgbà, esaɓù kɛ̀ e nɛ̀ɛŋ wo Dayà naŋ wa kiɛ̀ŋ lɛ e fè mààŋ è jùùmù Adamàaŋ. È yaà tɔɔɓaa kɛ̀ anyuùŋ zimgbe naŋ fɔ̀ esàɓù e jùùmù wo nyùùŋ guùŋ wii. Kɛɛ e tɛ̀ɛ̀tɛ̀ɛ̀ Dayàa naŋ dɛɛ̀ zimgbe, yèè yɛi nɔŋ wo Dayà naŋ niŋ kiɛ̀ŋ foo koɓɛ̀ anyuùŋ zimgbe esàɓù e tɛ̀ɛ̀tɛ̀ɛ̀ɛ wo Jisɛ̀ Kulaì naŋ nyɛ̀nɛ̀ŋ lɛ.

¹⁶ E fèemàŋ gòòno kòò è yaào e nyaàiŋ dè e nɛ̀ɛŋ wo Dayà naŋ kiɛ̀ŋ foo lɛ̀, yaà e jùùmù wo nyùùŋ guùŋ. Eɓìèmàŋjɛ̀wɛ̀ e jùùmù guùŋ lɛɛ̀, wo Dayà naŋ wi hèè e kìtì e nimilà diɛŋ. Kɛɛ eɓìèmàŋjɛ̀wɛ̀ tɛɛ̀, anyuùŋ zimgbe naŋ nyɛ̀nɛ̀ŋ maŋ jùumù yèè wo Dayà naŋ nyiŋ kìɛ̀ŋ ke mìè gbòa siaŋ wààŋ kɛ̀ wo naàŋ nyiŋ jèè è keì.

¹⁷ È yaà tɔɔɓaa kɛ̀ esàɓù maŋ jùùmù wo anyùùŋ guùŋ sùà, e fàa naŋ kɛ̀ɛ̀nɛ̀ŋ gààŋ. Kɛɛ e sɛmɛ kɛnɛɛ̀ nàŋ yaà kɛ̀, anyùùŋ nyaŋ gbiŋ naŋ kɛ̀ɛ̀nɛ̀ŋ wɔŋ nyiiŋ gèe esàɓù e jìwààjɛ̀wɛ̀ e nɛ̀ɛŋ wo Jisɛ̀ Kulaì naŋ wa nyɛ̀nɛ̀ŋ lɛ. Wo Dayà naŋ nyiŋ kìɛ̀ŋ e tɛ̀ɛ̀tɛ̀ɛ̀ gò kɛ̀ɛ̀nɛ̀ŋ dìa e yèɛ e gò tomo weè niŋ lɛ̀, yèè wò naŋ nyiŋ jàà kùàŋ dìì wèè aŋ nɔ̀ŋ anyùùŋ tɔ̀ɔ̀nyaàŋ esàɓù e nɛ̀ɛŋ wo Jisɛ̀ Kulaì naŋ nyɛ̀nɛ̀ŋ lɛ.

¹⁸ Weètii, màànààŋ nɔŋ esàɓù maŋ jùùmù Adamàŋ maŋ sùà wo Dayà naŋ nìmìlà yàwi nààŋ gbiŋ lɛ̀, yɛi nɔŋ e ɗèwè guùŋ nɛ sùà, esàɓù e tɔ̀ɔ̀nyààŋ Jisɛ̀ Kulaìɛ wo Dayà naŋ wi jàà kùàŋ dìì wèè eiŋ nɔ̀ŋ anyùùŋ tɔ̀ɔ̀nyaàŋ, yèè wò naŋ wi kìɛ̀ŋ wɔŋ nyiiŋ gèe gò jùà.

¹⁹ Màànààŋ nɔŋ yàwi nààŋ gbiŋ naiŋ wa nɔ̀ŋ anyùùŋ maŋ jùumù esàɓù e jùùmù wo nyùùŋ guùŋ lɛ, wo Adamàŋ, e ɗèwè guùŋ bi sùà wo Dayà naŋ wi jàà kùàŋ dìì esàɓù e tɔ̀ɔ̀nyààŋ wo nyùùŋ guùŋ, wo Jisɛ̀ Kulaì.

²⁰ Ke Sàwà Dayàa naŋ nɔ̀ŋ bàne nyiŋ wèè kɛ̀, eiŋ nyìmàŋ e gààŋ maŋ jùumù maŋ anyùùŋ àŋ nyɛnɛŋ màŋ. Kpeiŋ koɓɛ̀i maŋ kèì jùumù naŋ gàŋ lɛ, kuŋ wo Dayà tooyà e gààŋ tɛ̀ɛ̀tɛ̀ɛ̀uŋ nɛ̀.

²¹ Kpeiŋ sèè è nɔ̀ŋ yɛi, màànààŋ nɔŋ e jùumù kuwa gààŋ esàɓù e fàa lɛ̀, yɛi nɔŋ pɛɛ è yaà e tɛ̀ɛ̀tɛ̀ɛ̀ Dayàa kuwa gààŋ esàɓù e tɔ̀ɔ̀nyaàŋ, esaɓù kɛ̀ wò wi jàà kùàŋ dìì esàɓù wo Kana wiɔ̀ Jisɛ̀ Kulaì. Tɛɛ̀ naŋ tɔɔ̀ kɛ̀ è doiŋ nàŋ kɛ̀ɛ̀nɛ̀ŋ wɔŋ nyiiŋ gèe gò jùà wèè julɔfɔ.