Luùm 3 - WƆŊ FƐ̀Ì EBÒ SÌÀŊ DAYÀA

¹ Kiìŋ è keì kɛnɛ aŋ Juùù nyaŋ kuwa anyùùŋ nyaŋ fè àŋ Juùù nyaŋ diɛŋ? Ɔ̀ɔ̀ kiìŋ nàŋ yaà e tɛ̀ɛ̀tɛ̀ɛ̀ɛ sèè àŋ jààùm kpùa?

² È kuwa e nàfa weè wi maŋ dòmaŋ nyaaŋ zimgbe! E sìèfeìŋ jiɛ̀jiɛ̀ɛ nàŋ yaà, è do wi nàŋ nafà esaɓù kɛ̀ wo Dayà kuwa wa ke jii tùlia aŋ Juùù nyaŋ sùà yèè wò naŋ nyiŋ kìɛ̀ŋ ke miè gbìauŋ nɛɛ̀ŋ.

³ È yaà tɔɔɓaa kɛ̀ aŋ Juùù nyaŋ bà nyiŋ gò wa hààwè kè miè gbìaàŋ wèè aŋ nyiŋ jɔ̀ɔ̀lɔ̀ dìì, màànààŋ àŋ naŋ wa jɔ̀ɔ̀ ɗààhiì kɛ̀ àŋ do nàŋ nyɛ̀nɛ̀ŋ lɛ. Weètii, tɛɛ̀ wɛ̀i ɓɛ̀nɛ̀ŋ tɔɔ̀ kɛ̀ wèè esàɓù e hààwe gò kɛɛnɛ̀ŋ nyiŋ nɛ̀, wo Dayà naàŋ nyiìŋ kpuumò nààŋ wò naŋ wa jɔ̀ɔ̀ e ɗààhiì wèè wo nyɛ̀nɛ̀ŋ lɛ?

⁴ Tii nààŋ e gò fasàì. Wo Dayà yaà tɔ̀ɔ̀nyaàŋ, jòòpɛɛ anyuùŋ kpùuŋ nyàŋ gbiŋ aŋ fè tɔ̀ɔ̀nyaàŋ. Wɔŋ fɛ̀ì Dayàa naŋ woò wààŋ, “Maŋ mìè gbòaum màŋ tɔɔ̀ kɛ̀ mùŋ yaà tɔ̀ɔ̀nyaàŋ sèè mùŋ woà e keì. Mùŋ kuwa maŋ kɛ̀ɛ̀nɛ̀ŋ gɛŋ sèè mùŋ nɔ̀ŋ kɔ̀ɔ̀yɛ̀ e gbài dìì.”

⁵ Weètii, sèè esàɓù e hààwe gò kɛɛnɛ̀ŋ wilɛ̀ yaà maŋ kpèè naanààŋ wi màŋ tɔɔ̀ kɛ̀ wo Dayà nyɛnɛŋ tɔ̀ɔ̀nyaàŋ, èiŋ ɓɛ̀nɛ̀ŋ wòo wìàà wo Dayà naŋ nyɛ̀nɛ̀ŋ e keì naanààŋ sèè wò tuù e kìlà wo wi nimilà? Tɛɛ̀ do nàŋ nɔ̀ŋ e zùwo sèè mùŋ dawà yɛi.

⁶ Ɓɔ̀ è haàiŋ è kiti dìàmaŋ kɛ̀ wo Dayà ɓɔ̀ wò gbaì wi. Sèè wo Dayà wo weè nɔ̀ŋ wo nyùùŋ kàaɓì, kɛ̀ dièsɔa wò naŋ weè ɓɛ̀nɛ̀ŋ gbàì anyùùŋ nyaŋ e ɗuunyaàŋ?

⁷ Esàɓù e tɔ̀ɔ̀nyaàŋ gò kɛɛnɛ̀ŋ mɛ̀ maŋ mìè gbòaim màŋ sùà, muŋ gò haawè kɛ̀ è hiàŋ e jòòwo koɓɛ̀ Dayài, esaɓù kɛ̀ anyùùŋ do nàŋ yɛmɛ̀ janjai kɛ̀ e yèɛ wo Dayà nyɛnɛŋ lɛ̀ è yaà tɔ̀ɔ̀nyaàŋ? Wèè kiìŋ wo Dayà naim naàŋ ɓɛ̀nɛ̀ŋ hàà kiti diɛŋ wèè maŋ jùumù maŋ mìŋ naŋ nyɛ̀nɛ̀ŋ maŋ?

⁸ Sèè nyɛ̀iŋ nìŋ naŋ tɛɛ̀ ɓɛ̀nɛ̀ŋ wòo, kɛ̀ nàŋ ɓɛ̀nɛ̀ŋ wòo nààŋ, “Nyɛ̀nɛ̀ŋ wiìŋ e keì naanààŋ, wèè e keì kɛnɛ hnàŋ ko nɛ̀ɛ̀ŋ wiì.” Anyùùŋ nyaŋ bà nyiŋ ngèè pɛɛ àŋ wi kìɛ̀ŋ maŋ mìè ɓɛ̀ɛ̀pɔ̀ɔ esaɓù kɛ̀ nyààŋ kòò è yààìŋ wòò e kèì guùŋ nɛɛ̀. Kɛɛ wo Dayà yaà wo nyùùŋ tɔ̀ɔ̀nyaàŋ yèè wò do nyiŋ nàŋ nimilà nyiŋ pɛɛ.

Wo nyùùŋ kpùuŋ gbiŋ fè tɔ̀ɔ̀nyaàŋ

⁹ Kiìŋ tɛɛ̀ gbiŋ naŋ fasàì? Tɛɛ̀ ɓɛ̀nɛ̀ŋ tɔ̀ɔ kɛ̀ yàwi nààŋ Juùù nyaŋ tuwàìŋ tɛ̀ɛ̀ e nìàŋ anyùùŋ nyaŋ fè àŋ Juùù nyaŋ? Kpele, e fè yɛi! Aŋ Juùù, e kpùlìà anyùùŋ nyaŋ fè àŋ Juùù nyaŋ, aŋ gbiŋ àŋ yaà e gààŋ maŋ jùumù dìì, màànààŋ nɔŋ mìŋ naŋ woò lɛ.

¹⁰ Wɔŋ fɛ̀ì Dayàa naŋ woò wààŋ, “Wo nyùùŋ tɔ̀ɔ̀nyaàŋ gbiŋ fè,

¹¹ e fè wò yèɔ kuwa jiikɛ̀ɛ miŋ dò nàŋ sɔ̀ wo yèɔ zoolà Dayà wɔ.

¹² Aŋ gbiŋ àŋ fè wo Dayà jɛwɛ. Aŋ gbiŋ àŋ nyɛ̀nɛ̀ŋ maŋ tùwo naanààŋ. Wo nyùùŋ guùŋ pɛɛ fè wò yèɔ nyɛnɛŋ è keì sìàŋ wɔ, e pɛɛ nɔ̀ŋ wò guùŋ.

¹³ Maŋ mìè gbòa nyiŋ màŋ yaà mààŋ ke hùaàŋ yìle, maŋ milè nyiŋ màŋ siaŋ nɔŋ wèè maŋ wòò e tòa, yèè ke mìè gbòa gbiŋ maŋ nyaàŋ kɔɔ nyiŋ màŋ dìì yaà mààŋ ke jììfìì kaì ke yèɛ jiwe nyùùŋ lɛ.

¹⁴ Maŋ mìè gbòa nyiŋ màŋ naŋ dìè maŋ gbòòno fiifìì.

¹⁵ Àŋ naŋ bìè wèè aŋ wùàŋ maŋ sɛ̀ìŋ yèè aŋ jìwà nyùùŋ.

¹⁶ Koɓɛ̀ gbiŋ àŋ kɔ̀à àŋ nɛɛmùŋ anyùùŋ e kìlà aŋ nyiŋ nyɛ̀nɛ̀ŋ àŋ kà e keì nyìnga dìì.

¹⁷ Kòò àŋ nyìmè kè dòmàŋ jii fàaà.

¹⁸ Aŋ fè ngèè dùàŋ Dayà.”

¹⁹ Èiŋ naàŋ nyìmàŋ kɛ̀ maŋ keì maŋ gbiŋ maŋ Sàwà Dayà maŋ sùà, naŋ wa nɔ̀ŋ sìnga miŋ wèè anyùùŋ nyaŋ yaà e gaàŋ miŋ nɛ̀ dìì nyaŋ, wèè wo nyùùŋ gbiŋ wo go nàŋ kìɛ̀ŋ ke kàfaì, yèè e nyɛ̀nɛ̀ŋ anyùùŋ nyaŋ gbiŋ e ɗuunyaàŋ aŋ nɔ̀ŋ e gbàì Dayàa dìì.

²⁰ Wo Dayà fè nɔŋ jàà nyuùŋkpùuŋ kùàŋ dìì wèè wo nɔ̀ŋ wò nyùùŋ tɔ̀ɔ̀nyaàŋ èsaɓù kɛ̀ àŋ kuwo màŋ Sàwà maŋ. E nɛ̀ɛŋ maŋ Sàwà maŋ nyɛnɛŋ lɛ̀ nàŋ yaà wèè maŋ wi nyɛ̀nɛ̀ŋ e nyìmàŋ tɔɔɓaa kɛ̀ èiŋ nyɛ̀nɛ̀ŋ maŋ jùumù.

E ɗeweɛ̀ wo Dayà jaa nyùùŋ kùàŋ dìì e tɔ̀ɔ̀nyaàŋ sùà lɛ

²¹ Èiŋ naàŋ nyìmàŋ e ɗeweɛ̀ wo Dayà jaa nyùùŋ kùàŋ dìì wèè wo nɔ̀ŋ nyùùŋ tɔ̀ɔ̀nyaàŋ lɛ. E fè wèè eiŋ jɔ̀ɔ̀lɔ̀ màŋ sàwà maŋ dìì, jòòpɛɛ maŋ Sàwà Dayà maŋ yèè aŋ wɛ̀ijì nyaŋ naŋ kìɛ̀ŋ ke mìè seì e weè niŋ.

²² Wo Dayà jaa nɔŋ anyùùŋ kùàŋ dìì e tɔ̀ɔ̀nyaàŋ sùà esàɓù e hààweɛ̀ àŋ kuwa wo Jisɛ̀ Kulaì sùà lɛ. Wo Dayà nyɛnɛŋ tɛɛ̀ koɓɛ̀ anyùùŋ nyaŋ gbiŋ kuwa hààwe wo Jisɛ̀ Kulaì sùà nyaŋ, esaɓù kɛ̀ aŋ gbiŋ naŋ seenè kpaŋ.

²³ Yàwi nààŋ gbiŋ èiŋ nyɛ̀nɛ̀ŋ maŋ jùumù yèè èiŋ ka fauŋ e yìwìà e jòòwò Dayàa fɛɛ̀feìŋ.

²⁴ Wo Dayà naŋ tɔ̀ɔ̀ e tɛ̀ɛ̀tɛ̀ɛ̀uŋ nɛ̀ koɓɛ̀ anyùùŋ nyaŋ gbiŋ, yèè esàɓù Jisɛ̀ Kulaìɛ sùà, wo Dayà naŋ wi jàà kùàŋ dìì wèè eiŋ nɔ̀ŋ anyùùŋ tɔ̀ɔ̀nyaàŋ yèè wò naŋ wi jùùyè hakɛ̀ wèè maŋ jùumù wi màŋ.

^25-26 Wo Dayà naŋ wa tùɔ̀ŋ wo yèɔ wò naŋ tàeɗùù wɔ, wo Kulaìɔ, wèè wo nɔ̀ŋ e nɛ̀ŋ saaà weè wì. Wo Jisɛ̀ Kulaì naŋ wa wùɔ̀ŋ maŋ sɛ̀ìŋ e kìlà wo fà weè wi, wèè kɛ̀ sèè è kɛɛnɛ̀uŋ hààwe sùà, wo Dayà do wi nàŋ jàà kùàŋ dìì. Wo Dayà naŋ wa tɛɛ̀ nyɛ̀nɛ̀ŋ e teenga gɔu sùà wèè wo tɔɔ̀ kɛ̀ wò yaà wa e tɔ̀ɔ̀nyaàŋ sùà wèè wo kɛ̀ɛ̀nɛ̀ŋ ke jii tɔumtɔ̀ùm e kìlà wo jùùyà anyùùŋ hakɛ̀ wèè maŋ jùumù nyiŋ màŋ. Tɛɛ̀ naŋ ɓɛìŋ tɔɔ̀ kɛ̀ wo Dayà yaà tɔ̀ɔ̀nyaàŋ, nààŋ wò jaa anyùùŋ kùàŋ dìì wèè aŋ nɔ̀ŋ anyùùŋ tɔ̀ɔ̀nyaàŋ e kìlà sèè àŋ kɛɛnɛ̀ŋ hààwe wo Jisɛ̀ sùà.

²⁷ Kiìŋ è kùwàìŋ naàŋ wèè eiŋ kɛ̀ɛ̀ maŋ nyòngà? E nɛ̀ŋ gbiŋ fè! Yèè kiìŋ nàŋ yaà esaɓùɛ wèè tɛɛ̀? Ɓàà è yaà wèè maŋ Sàwà Dayà maŋ è jɔɔlɔ̀ìŋ dìì maŋ? Kpele, è yaà wèè esàɓù e hààweɛ̀ è kùwàìŋ Jisɛ̀ Kulaì sùà lɛ.

²⁸ È naiŋ yɛmɛ̀ kɛ̀ wo Dayà jaa anyùùŋ kùàŋ dìì wèè aŋ nɔ̀ŋ anyùùŋ tɔ̀ɔ̀nyaàŋ esàɓù e hààweɛ̀ àŋ kuwa lɛ̀, kɛɛ e fè wèè màŋ Sàwà maŋ è jɔɔlɔ̀ìŋ dìì maŋ.

²⁹ Nyɛ̀iŋ nààŋ Juùù nyaŋ, nìŋ gongà kɛ̀ nyɛ̀iŋ guùŋ nɔŋ wo Dayà do nàŋ jàà kùàŋ dìì? Tɔɔɓaa nyìmaìŋ kɛ̀ wò do nàŋ jàà anyùùŋ nyaŋ fè àŋ Juùù nyaŋ nyiŋ pɛɛ kùàŋ dìì.

³⁰ Wò Dayà yaà nɔŋ wò guùŋ, yèè wò do nàŋ jàà aŋ Juùù nyaŋ àŋ naŋ jàà kpùa nyàŋ kùàŋ dìì esàɓù hààwe nyiŋ nɛ̀ wo Jisɛ̀ Kulaì sùà àŋ naŋ nyɛ̀nɛ̀ŋ lɛ, yèè wo jaa anyùùŋ nyaŋ fè àŋ Juùù yèè aŋ gò jàà kpùa nyàŋ kùàŋ dìì sèè àŋ haawà wo Jisɛ̀ Kulaì e tɔ̀ɔ̀nyaàŋ sùà.

³¹ Tɛɛ̀ ɓɛ̀nɛ̀ŋ tɔ̀ɔ kɛ̀ esàɓù e hààwe lɛɛ̀ e jàaiŋ maŋ Sàwà Dayà maŋ ɓula? Kpele! E fè yɛi gbiŋ. Kɛɛ tɔɔɓaa è kuwo maŋ Sàwà maŋ kpaŋ e kìlà eiŋ miŋ jɔ̀ɔ̀lɔ̀ dìì tɛ̀ɛ̀.