Luùm 16 - WƆŊ FƐ̀Ì EBÒ SÌÀŊ DAYÀA

Wo Pɔɔ̀ naŋ tùɔ̀ŋ zùùmo titi ko Luùm

¹ Mìŋ kuwa e keì sìàŋ wèè ka wòò wo jaa miɔ̀ŋ Foɓɛ̀, wo yèɔ yaà wo ɓɔìjɔ̀à wèè ke gbòò anyuùŋ hààwe nyàŋ ko Sìŋkulià wɔ.

² Jàa nùuŋ kùàŋ dìì e dèè Kanaà diɛŋ, màànààŋ anyùùŋ nɛɛmaŋ nyàŋ wèè Dayà àŋ nyɛnɛŋ lɛ̀. Kìɛŋ nùuŋ e kpùùmaàŋ gbiŋ wò manaŋ lɛ̀. Wuŋ bi wò tɔɔ̀ janjai kɛ̀ wò nɔ̀ŋ e kpùùmaŋ gbee koɓɛ̀ anyuùŋ zimgbe e kpùlìà miàŋ bi.

³ Mìŋ naŋ tùɔ̀ŋ maŋ mìè gbìàŋ zùùmo titi mɛɛ̀ŋ koɓɛ̀ wo nìeɔ̀ Pikà yaà wo fanuuŋ nɔɔ̀ŋ Àkuilà, anyuùŋ tòmo dàwiim nyàŋ wo Jisɛ̀ Kulaì sùà.

⁴ Anyùùŋ nyɛɛ̀ŋ naŋ jàà maŋ nyiiŋ nyiŋ màŋ sɛɛ e weèim. Maŋ jii wi màŋ naŋ fɔ̀ weè nyiŋ, miàŋ yèè ke gbòò anyuùŋ hààwe nyàŋ gbiŋ maŋ sààŋ zòòlò anyùùŋ nyaŋ fè àŋ Juùù nyaŋ dìì.

⁵ Mìŋ zuumàŋ ɓɛìŋ anyuùŋ hààwe nyàŋ deenàŋ ko gbòò Pikà yaà Àkuilà nyaŋ. Mìŋ zuumàŋ wo wùìya miɔ̀ŋ Ɛpanetù, wo yèɔ jiɛ̀ naŋ wa kɛ̀ɛ̀nɛ̀ŋ hààwe wo Jisɛ̀ Kulaì sùà wɔ, paŋgàà anyùùŋ nyaŋ gbiŋ wɔŋ fùɔ̀ŋ Eesìàa sùà.

⁶ Mìŋ zuumàŋ wo nìeɔ̀ àŋ nyaaŋ wo Mèèle, wo yèɔ naŋ tomo nyìnga weèiŋ wɔ̀.

⁷ Mìŋ zuumàŋ ɓɛìŋ wo Andònikà yèè wo Junià, aŋ Juùù nyuuŋ dàwiim nyàŋ yàwi nyiŋ yààìŋ wa ko sààŋ nyìwìi koɓɛ̀ guùŋ nyaŋ. Aŋ felaa nyɛɛ̀ŋ yaà wa aŋ keela tàeɗùù, e kìlà anyùùŋ nyaŋ kiɛ̀ŋ nyiìŋ wa e ɓɛ̀ɛ̀jàa gbee, yèè nyiŋ jiɛ̀ naŋ wa nɔ̀ŋ anyùùŋ màŋjɛ̀wɛ̀ Kanaà Jisɛ̀ Kulaì nyaŋ paŋgàà miŋ naŋ nɔ̀ŋ wo bà.

⁸ Mìŋ zuumàŋ wo Aŋpiletù, wo dàwi mɔ̀ɔ̀nɔŋ siaŋ miɔ̀ŋ, wo yèɔ yaà wo bàuŋbà wèè wo Kanaà Jisɛ̀ wɔ.

⁹ Mìŋ zuumàŋ ɓɛìŋ wo Ɔbanɔ̀, wo nyuùŋ tòmo dàwi wiɔ̀ wo Jisɛ̀ Kulaì sùà, yaà wo Sitachè, wo dàwi mɔ̀ɔ̀nɔŋ siaŋ miɔ̀ŋ.

¹⁰ Mìŋ zuumàŋ wo Àpɛlè, wo yèɔ naŋ jàà kùàŋ dìì janjai kɛ̀ wò kuwa e hààwe wo Jisɛ̀ Kulaì sùà wɔ. Mìŋ zuumàŋ anyùùŋ nyaŋ ke kpòò Àlèsoɓulɔ̀ɛ sùà.

¹¹ Mìŋ zuumàŋ wo Hɛlɔdiɔ̀ŋ, wo Juùù ziì wilɛ̀ bà guùŋ, yèè koɓɛ̀ anyùùŋ nyaŋ kuwa hààwe wo Kanaà Jisɛ̀ sùà nyaŋ, e yìwìà ke kpòò Nàsisɔ̀ɛ sùà.

¹² Mìŋ zuumàŋ wo Tafanàŋ yaà wo Tafosà, anyuùŋ tòmo dàwi wi nyàŋ wo Jisɛ̀ Kulaì sùà, yèè wo dàwi mɔ̀ɔ̀nɔŋ siaŋ miɔ̀ŋ Pɛsì wo yèɔ naŋ tomo nyìnga wuŋ pɛɛ wèè wo Kanaà wɔ.

¹³ Mìŋ zuumàŋ wo Lufɔ̀, wo nyuùŋ tàeɗùù tòmo titi wii wèè Kanaà Jisɛ̀, yèè mìŋ zuumàŋ wo yèyeuŋ nɔɔ̀ŋ, wo yèɔ naŋ nyɛ̀nɛ̀ŋ e kpùùmaŋ zimgbe ko nɛ̀ɛ̀ŋ miìŋ mààŋ wo jɔ̀àfèlàà wuŋ bi wɔ̀.

¹⁴ Mìŋ zuumàŋ wo Àsɛinkuletù, wo Felegɔ̀ŋ, wo Hɛmɛ̀, wo Patobà, wo Hɛmàŋ, yèè aŋ wùìya gbànaŋ nyàŋ gbiŋ yaà nyiìŋ maŋjɛ̀wɛ nyàŋ.

¹⁵ Mìŋ zuumàŋ wo Fèlologɔ̀ yèè wo Juliɔ̀, wo Nilɔ̀ yèè wo jaa, wo Òleinpà yèè koɓɛ̀ anyùùŋ nɛɛmaŋ nyàŋ gbiŋ wèè Dayà.

¹⁶ Zùùmoìŋ aŋ dàwi e ɓɛ̀ɛ̀jàà titi sùà. Maŋ gbòò anyuùŋ hààwe nyàŋ gbiŋ wo Jisɛ̀ Kulaì sùà zuumàìŋ.

Maŋ mìè gòo dìàmaŋ màŋ

¹⁷ Mìŋ yààìŋ dàwè sùà, nyɛ̀iŋ nààŋ wùìyaim nyàŋ kɛ̀, jàaìŋ fɛ̀ɛ̀ dìì wèè anyùùŋ nyaŋ nyɛnɛŋ anyùùŋ aŋ gòònò e tɛɛ, yèè aŋ sùmìàŋ aŋ dàwi wèè e hààweɛ̀ nìŋ naŋ jàà kùàŋ dìì lɛ. Ɓɔ̀ nìŋ ka nyiŋ è tɛɛ!

¹⁸ Anyùùŋ nyaŋ nyɛnɛŋ maŋ keì mɛɛ̀ŋ nyaŋ, aŋ gò kpɛɛ̀ŋ wèè aŋ tomo wèè wò Kana wiɔ̀ Jisɛ̀ Kulaì, àŋ naŋ nɔŋ kpɛɛ̀ŋ wèè nyiŋ bi. Maŋ mìè gbòa ɓuuyè nyiŋ màŋ zuwà anyuùŋ gò nyìmàŋ keì fèemàŋ nyaŋ.

¹⁹ Ke jii naim fɔ̀ esaɓù kɛ̀ anyùùŋ nyaŋ gbiŋ àŋ nyìmàŋ e ɗeweɛ̀ nìŋ jɔɔlɔ̀ wo Kanaà dìì tɛ̀ɛ̀ lɛ. Kɛɛ e tèèngà guùŋ bi sùà, mìŋ manaŋ wèè naŋ nyìmàŋ kɛ̀ kiìŋ nàŋ siaŋ yèè ɓɔ̀ nìŋ kɛɛnɛ̀ŋ è nɛ̀ŋ gbiŋ wèè nìŋ do nyìnìàŋ è keì naanààŋ.

²⁰ Wo Dayà, wo yèɔ kiɛ̀ŋ ke jii fàa wɔ̀, do nàŋ jìwè wo Sɛ̀tanàŋ e teenga kpuu sùà, e kìlà woiŋ wuŋ hòà ko gòlòò dìì. Mìŋ zoolà wèè e tɛ̀ɛ̀tɛ̀ɛ̀ wo Kana wiɔ̀ Jisɛ̀ Kulaì eiŋ nɔ̀ŋ maŋjɛ̀wɛ.

²¹ Wo Timetè, wo nyuùŋ tòmo dàwi miɔ̀ŋ, naiŋ tùɔ̀ŋ zùùmo. E kìlà aŋ Juùù nyuuŋ dàwiim nyàŋ tèènè mààŋ wo Lusìù, wo Jasɔ̀ŋ, yèè wo Sòsipatɔ̀, naiŋ tùɔ̀ŋ zùùmo nyiŋ pɛɛ.

²² Miàim Tɛtiɔ̀ pɛɛ, naiŋ tùɔ̀ŋ zùùmo. Mìŋ yaà wo nyùùŋ màŋjɛ̀wɛ̀ Kanaà Jisɛ̀ Kulaì, yèè wo Pɔɔ̀ naim sìè maŋ mìè gbòà fɛi wɛɛ̀ŋ nyààŋ mìŋ naiŋ yaà sìngè wɔŋ.

²³ Wo Gayɔ̀, wo yèɔ naim jàà kùàŋ dìì wèè ka nɔ̀ŋ ko gboouŋ noo wɔ̀, ko yèi ke gbòò anyuùŋ hààwe nyàŋ deenàŋ wèè zòòlo lɛ̀, naiŋ tùɔ̀ŋ zùùmo. Aŋ wùìya wi nyàŋ tèènè mààŋ wo Ɛlesitù, wo nyùnɔ̀ɔŋ banàŋ e nɛɛnɛɛ̀ŋ hàa wèè ko jawa gbeeì wɔ, yèè wo Kɔatù, nyiŋ pɛɛ naiŋ tùɔ̀ŋ zùùmo.

²⁴ [E tɛ̀ɛ̀tɛ̀ɛ̀ wo Kana wiɔ̀ Jisɛ̀ Kulaì e nɔ̀ŋ nyɛ̀iŋ gbiŋ maŋjɛ̀wɛ̀. Àmiinàŋ.]

E zòòlo dìàmaàŋ wèè e tɛ̀nɛŋ

²⁵ Jòòwò wiìŋ e tɛ̀ɛ̀tɛ̀ɛ̀ Dayàa! Wò ɓɛ̀nɛ̀ŋ nyɛ̀nɛ̀ŋ e hààwe mɔ̀ɛ̀ e nyìngà sùà wèè julɔfɔ esàɓù Ebò Siaàŋ mìŋ naiŋ woò lɛ e nyaàiŋ dè wo Jisɛ̀ Kulaì. Tɛɛ̀ nàŋ yaà ɓɛìŋ e yèɛ ke gbùnuɛ̀ yaà wa ko nyɛɛnɛŋ maŋ doà gɔu bà sùà yɛ.

²⁶ Kɛɛ e tɔ̀ɔ̀nyaàŋ lii è nɔ̀ŋ wòo niŋ ke fòolàa e yìwìà e sìngà aŋ wɛ̀ijì nyaŋ wɔŋ fɛ̀ì Dayàa sùà. Wo Dàyà nyiiŋ gèe gò jùàa naŋ nyiŋ wa woò yèè wò naŋ nyiŋ nyɛ̀nɛ̀ŋ aŋ ɓààyè ebò siaŋ bi koɓɛ̀ anyùùŋ nyaŋ gbiŋ e ɗuunyaàŋ sùà, wèè kɛ̀ aŋ jɔɔlɔ̀ e kìlà aŋ kɛɛnɛ̀ŋ hààwe.

²⁷ Tɔɔɓaa, esàɓù Jisɛ̀ Kulaìɛ sùà, è joowàìŋ wo Dayà guùŋ kɛ̀ɛ̀nɛ̀ŋ jiikɛ̀ɛɔ̀ wèè julɔfɔ. Àmiinàŋ.