Luùm 15 - WƆŊ FƐ̀Ì EBÒ SÌÀŊ DAYÀA

Kpùùmaìŋ aŋ dàwiiŋ nyàŋ, kɛɛ ɓɔ̀ è nɔ̀ŋ nyɛ̀iŋ bi

¹ Yàwiiŋ nyàŋ e hààwe wilɛ̀ naŋ nyìngè sùà nyaŋ, è kuwa eiŋ kìɛ̀ŋ kpùùmaŋ koɓɛ̀ anyùùŋ nyaŋ e hààwe nyiŋ nɛ̀ gò nyìngà sùà nyaŋ. Ɓɔ̀ è nyɛ̀nɛ̀iŋ è keì è doiŋ fɔ̀ɔ̀yɛ̀ yàwi bi jii.

² Gòngò wiìŋ wèè e tuwò nyiŋ tɛ̀ɛ̀ wèè e kèì sìàŋ nyiŋ bi lɛ̀, wèè kɛ̀ è naiŋ nyiŋ ɓɛ̀nɛ̀ŋ kpùùmaŋ wèè e nyɛ̀nɛ̀ŋ e hààwe nyiŋ nɛ̀ nyìngà sùà.

³ Wo Jisɛ̀ Kulaì gò wa nɔ̀ŋ wɔ̀ŋ nyiiŋ gèeɔ̀ sùà wèè wo nyɛ̀nɛ̀ŋ è kèì wùmauŋ. Wɔŋ fɛ̀ì Dayàa naŋ woò wààŋ, “Maŋ mìè ɓɛ̀ɛ̀pɔ̀ɔ maŋ aŋ naiŋ kiɛ̀ŋ maŋ, maŋ mìè ɓɛ̀ɛ̀pɔ̀ɔ bi naim kpɛ̀lɛ̀.”

⁴ Maŋ keì maŋ gbiŋ yaà sìnga miŋ wɔŋ fɛ̀ì Dayàa maŋ, naŋ nɔ̀ŋ sìnga miŋ wèè maŋ wi kaà, yèè maŋ wi kìɛ̀ŋ ke jii tɔumtɔ̀ùm yaà ke jii nyingè wèè eiŋ kùwìè ke jii tùlia, ke yèɛ wɔŋ fɛ̀ì Dayàa naŋ wi kiɛ̀ŋ lɛ.

⁵ Tɔ̀ wo Dayà, ko tɔ̀ɔ̀tù ke jii tɔumtɔ̀ùm yèè ke jii nyingè, nyɛ̀nɛ̀ŋ e kɛɛnɛ̀iŋ e gòngò guùŋ nɛ yàwi bi e fèemàŋ, nààŋ è dèìŋ e tɔ̀ɔ̀màŋsèì Jisɛ̀ Kulaì lɛ maŋjɛ̀wɛ,

⁶ wèè kɛ̀ nyɛ̀iŋ nààŋ gbiŋ naŋ tɛ̀nɛ̀ŋ wo Dayà koɓɛ̀ guùŋ, wo Dèdaà wèè wo Kana wiɔ̀ Jisɛ̀ Kulaì.

Ebò Siaàŋ è yaà wèè aŋ Juùù nyaŋ yèè anyùùŋ nyaŋ fè àŋ Juùù nyaŋ

⁷ Jàaìŋ aŋ dàwiiŋ nyàŋ kùàŋ dìì, kɛ̀ nàŋ jòòwò wo Dayà, màànààŋ wo Jisɛ̀ Kulaì naiŋ jàà kùàŋ dìì lɛ.

⁸ Tɔ̀ miŋ woòiŋ e tɔɔɓaaà kɛ̀, wo Jisɛ̀ Kulaì naŋ hnè wèè wo wa nɔ̀ŋ wo ɓɔìjɔ̀à tòmo wèè aŋ Juùù nyaŋ àŋ naŋ wa jàà kpùa nyàŋ, wèè wo tɔɔ̀ kɛ̀ wo Dayà yaà e tɔ̀ɔ̀nyaàŋ sùà wèè e ɗààhiìɛ wò naŋ wa ɓemè koɓɛ̀ aŋ nèwàènèwè nyiŋ nyàŋ lɛ e hɛɛnɛ̀ŋ,

⁹ yèè wèè e nyɛ̀nɛ̀ŋ anyùùŋ nyaŋ fè àŋ Juùù nyaŋ aŋ tɛ̀nɛ̀ŋ wo Dayà, wèè ke nyowoɛ̀ wò naŋ nyiŋ wa tɔɔ̀ lɛ. Wɔŋ fɛ̀ì Dayàa naŋ woò wààŋ, “Mìŋ doum nàŋ tɛnɛ̀ŋ anyùùŋ nyaŋ fè àŋ Juùù nyaŋ e fèemàŋ. Mìŋ do nàŋ tɛ̀nɛ̀ŋ e deè mɔ̀ɛ̀.”

¹⁰ Wɔŋ fɛ̀ì Dayàa naŋ ɓɛìŋ woò wààŋ, “Nyɛ̀iŋ nààŋ nyùùŋ nyaŋ fè àŋ Juùù nyaŋ, hnaìŋ wèè nyɛ̀iŋ nààŋ nyùùŋ Dayà nyaŋ niŋ giiyà zɔlɔ̀ koɓɛ̀ guùŋ!”

¹¹ Wɔŋ fɛ̀ì Dayàa naŋ ɓɛìŋ woò wààŋ, “Nyɛ̀iŋ nààŋ nyùùŋ nyaŋ fè àŋ Juùù nyaŋ, tɛ̀nɛìŋ wo Kanaà! Nyɛ̀iŋ nààŋ nyùùŋ nyaŋ gbiŋ e ɗuunyaàŋ, tɛ̀nɛìŋ wo Kanaà!”

¹² Wo Àzaayà naŋ ɓɛìŋ woò wààŋ, “Wo nyùùŋ e yìwìà ke kpòò Jɛ̀seɛ̀ sùà do nàŋ hnè. Wò do nàŋ hnè wo nɔ̀ŋ wo kana wèè anyùùŋ nyaŋ fè àŋ Juùù nyaŋ diɛŋ, yèè àŋ douŋ nàŋ sìè maŋ jii tùlia nyiŋ màŋ sùà.”

¹³ Tɔ̀ wo Dayà, wo yèɔ kiɛ̀ŋ ke jii tùlia wɔ̀, wo kpuumàiŋ niŋ kɛɛnɛ̀ŋ e zɔlɔ̀ kɛnɛ yèè ke jii fàa, esàɓù e hààweiŋ nɛ̀, wèè kɛ̀ ke jii tùliaiŋ nɛɛ̀ŋ e gààŋ wo Jìnàŋ Nɛɛmaàŋ sùà, e nɔ̀iŋ maŋjɛ̀wɛ e teenga gbiŋ.

Esaɓùɛ wo Pɔɔ̀ naŋ sìngè ke jii nyingè sùà lɛ

¹⁴ Wùìyaim nyàŋ, mìŋ kuwa ke jii tùlia kɛ̀ nìŋ kuwa maŋ kpèè siaŋ zimgbe, yèè nìŋ kuwa e jiikɛ̀ɛɛ̀ gbiŋ, e kìlà nàŋ ɓɛ̀nɛ̀ŋ kàà aŋ dàwiiŋ nyàŋ.

¹⁵ Wɔŋ fɛi wɛɛ̀ŋ sùà, kà gbòà janjai yèè kà kàmè ɗewe wèè ka dè maŋ jiiŋ màŋ koɓɛ̀ maŋ keì titi bà. Mìŋ naŋ tɛɛ̀ nyɛ̀nɛ̀ŋ esàɓù e keì sìàaŋ wo Dayà naim kiɛ̀ŋ lɛ.

¹⁶ Wò naim wa tàeɗùù wèè ka nɔ̀ŋ ɓɔìjɔ̀à tòmo wèè Jisɛ̀ Kulaì anyùùŋ nyaŋ fè àŋ Juùù nyaŋ tɛɛ, e kìlà wèè ka nyɛ̀nɛ̀ŋ e tòmo mààŋ wo sìèfèìŋ zòòlo, nààŋ mìŋ wòò ke mìè gbìàŋ Ebò Siauŋ nɛ̀, wèè e nyɛ̀nɛ̀ŋ wo jàà anyùùŋ nyaŋ fè àŋ Juùù nyaŋ naŋ hààwè Jisɛ̀ nyaŋ kùàŋ dìì. Àŋ do nàŋ nɔ̀ŋ mààŋ e nɛ̀ŋ kìɛŋ koɓɛ̀ Dayài e yèɛ àŋ naŋ jàà e ɓula ko nɛ̀ɛ̀uŋ niìŋ e yìwìà wo Jìnàŋ Nɛɛmaàŋ.

¹⁷ Nààŋ mìŋ yaà wo bàimbà wo Jisɛ̀ Kulaì sùà lɛ, ke jii naim fɔ̀ wèè e tòmoɛ̀ mìŋ nyɛnɛŋ wèè Dayà lɛ.

¹⁸ E yèɛ gbiŋ ngèè mìŋ do nàŋ woò lɛ, nàŋ yaà e nɛ̀ɛŋ wo Jisɛ̀ Kulaì naim gè nyààŋ diɛŋ wèè ka woò janjai lɛ, yèè e tòmoɛ̀ wò manaŋ ka nyɛ̀nɛ̀ŋ lɛ, nàŋ yaà wèè anyùùŋ nyaŋ fè àŋ Juùù nyaŋ auŋ jɔ̀ɔ̀lɔ̀ dìì.

¹⁹ Tɔɔɓaa, mìŋ doiŋ nàŋ wòò e ɗeweɛ̀ wo Jisɛ̀ Kulaì naŋ wa tɔ̀ɔ̀ e tɔ̀ɔ̀màŋsèì maŋ keì, yèè wò naŋ nyɛ̀nɛ̀ŋ maŋ kèè mèè e yìwìà e gààŋ wo Jìnàŋ Nɛɛmaàŋ sùà. Kà wòò Ebò Siaàŋ e nyaàiŋ euŋ dè e yìwìà ko jawa gbeeì Jùlusɛ̀làm e kà ko Ilekùùm.

²⁰ E ɗèwe mɛ̀ nàŋ yaà e teenga gbiŋ, wèè ka wòò Ebò Siaàŋ koɓɛ̀i yèi anyùùŋ kòò àŋ kòmò wa è kèè Jisɛ̀ Kulaì lɛ. Mìŋ yaà mààŋ wo nyuùŋ nyɛ̀lɛ, wo yèɔ manàŋ wèè wo nyɛ̀lɛ̀ è sààŋ mìì nyùùŋ bà diɛŋ.

²¹ Wɔŋ fɛ̀ì Dayàa naŋ woò wààŋ, “Anyùùŋ nyaŋ kòò àŋ wòò nyiìŋ wa è kiiuŋ nyàŋ, àŋ douŋ nàŋ yɛmɛ̀, anyùùŋ nyaŋ kòò àŋ kòmò wa è kiiuŋ nyàŋ àŋ do niŋ nàŋ nyìmè.”

E ɗèweɛ̀ Pɔɔ̀ɛ wèè wo jaamè anyùùŋ ko Luùm

²² E tòmo mɛ̀ èim kèèwè kùàŋ feìŋ e teenga gbiŋ, miŋ fè hnàŋ kò nɛ̀ɛ̀iŋ niìŋ.

²³ Kɛɛ kà naàŋ kpɛ̀ɛ̀yɛ̀ e tòmo mɛ̀ maŋ kpàlàùŋ kpàlàùŋ mɛɛ̀ŋ sùà, yèè wèè maŋ doa zimgbe mìŋ naŋ nyɛ̀nɛ̀ŋ wànàŋ wèè kaiŋ jaamè.

²⁴ E ɗèwe mɛ̀ nàŋ yaà wèè kaiŋ jaamè sèè mìŋ nɔ̀ŋ kɔ̀ɔ̀yɛ̀ ko Sipiìŋ. Yèè wèè e teenga kpuuɛ̀ mìŋ doiŋ nàŋ nɔ̀ŋ le gòlò lɛ, mìŋ kuwa ke jii tùlia kɛ̀ nìŋ doim nàŋ kpuumò wèè kao haì fiò.

²⁵ Kɛɛ mìŋ yaà naàŋ dòmaŋ mìŋ yaà kɔ̀ɔ̀yɛ̀ ko Jùlusɛ̀làm wèè ka nyɛ̀nɛ̀ŋ e tòmò Dayàa wèè anyùùŋ nɛɛmaŋ nyàŋ koɓɛ̀ bi.

²⁶ Maŋ gbòò anyuùŋ hààwe nyàŋ ko Mɛ̀sèdonià yèè ko Àkaayà naŋ gbònògbònò e nɛɛnɛŋ, wèè ka niŋ kòà koɓɛ̀ anyùùŋ nɛɛmaŋ nyàŋ ko Jùlusɛ̀làm, wèè e nɔ̀ŋ e kpùùmaŋ koɓɛ̀ anyuùŋ pɔ̀ɔ nyàŋ.

²⁷ Anyùùŋ nyaŋ nyiŋ bi naŋ wa tɛɛ̀ ɗewè, esaɓù kɛ̀ anyùùŋ nyaŋ fè àŋ Juùù yèè àŋ naŋ hààwè Dayà nyaŋ, è yaà e kpàŋ è kɔɔ nyiŋ wèè aŋ kpùùmàŋ aŋ Juùù kɛ̀ɛ̀nɛ̀ŋ hààwe nyàŋ manɛ̀ŋ mɛɛ̀ŋ ke ɗɔɔ gbiŋ. Àŋ kuwa aŋ tɛɛ̀ nyɛ̀nɛ̀ŋ esaɓù kɛ̀, àŋ yaà aŋ bà nyiŋ bà wèè manɛ̀ŋ maŋ wo Dayà kiɛ̀ŋ nyiìŋ maŋ wo Jìnàŋ Nɛɛmaàŋ sùà wèè aŋ tomo weèuŋ lɛ̀.

²⁸ Sèè mìŋ kɔ̀à mìŋ kiɛ̀ŋ nyiìŋ e nɛɛnɛŋ lɛɛ̀ gbiŋ e yèɛ anyùùŋ nyaŋ naŋ gbonogbònò lɛ, mìŋ doiŋ nàŋ jaamè paŋgàà mìŋ kɔ̀à ko Sipiìŋ.

²⁹ Sèè mìŋ haì ko nɛ̀ɛ̀iŋ niìŋ ko Luùm, kà nyìmàŋ mìŋ doiŋ nàŋ hìɛ̀ŋ e kpùùmaàŋ gbiŋ e yìwìà Kulaì sìwè.

³⁰ Nyɛ̀iŋ nààŋ wùìyaim nyàŋ, e yìwìà e gààŋ Kanaà Jisɛ̀ Kulaìɛ sùà yèè e mànaàŋ yewe wo Jìnàŋ Nɛɛmaàŋ sìwè lɛ, mìŋ yààìŋ pɔ̀wɔ sùà wèè yàwi nààŋ gbiŋ eiŋ zòòlò wo Dayà koɓɛ̀ guùŋ e weèim.

³¹ Zòòloìŋ Dayà wèè wo joeyèim e yìwìà anyuùŋ gò kɛ̀ɛ̀nɛ̀ŋ hààwe nyàŋ e fèemàŋ ko Jùdià, wèè anyùùŋ nɛɛmaŋ nyàŋ ko Jùlusɛ̀làm aŋ jàà e tòmoɛ̀ mìŋ yaà nyinie lɛ̀ kùàŋ dìì.

³² Mìŋ dawà Dayà wèè wo gèim nyààŋ diɛŋ wèè ka hnàŋ ko nɛ̀ɛ̀iŋ niìŋ, yèè miŋ nɔ̀ŋ ke jìì fà zɔlɔ̀ gbee sùà e tɛɛiŋ.

³³ Tɔɔɓaa mìŋ zoolà Dayà, wo yèɔ kiɛ̀ŋ ke jii fàa wɔ̀, wèè wo nɔ̀ŋ nyɛ̀iŋ gbiŋ maŋjɛ̀wɛ. Àmiinàŋ.