Luùm 13 - WƆŊ FƐ̀Ì EBÒ SÌÀŊ DAYÀA

Kìɛ̀ŋ aŋ kànà fuɔum nyàŋ ɓɛ̀ɛ̀jàa

¹ Anyùùŋ nyaŋ gbiŋ maŋ nyiiŋ gèe nyiŋ màŋ sùà, kuwa aŋ jɔ̀ɔ̀lɔ̀ aŋ kànà fuɔŋ nyiŋ nyàŋ dìì. Wo Dayà nɔŋ nàŋ kiɛ̀ŋ wo nyùùŋ gbiŋ e gààŋ kana kɛ̀ɛ.

² Wo nyùnɔ̀ɔŋ gbiŋ naŋ gè maŋhɛɛ wèè aŋ kana nyàŋ wo Dayà naŋ tàeɗùù wèè aŋ nɔ̀ŋ aŋ kana nyàŋ, wò gììyà e gààŋ Dayàa maŋhɛɛ. Wo nyùnɔ̀ɔŋ gbiŋ wo yèɔ nyɛnɛŋ yɛi wɔ̀, wò hàà e kiti wuŋ bi diɛŋ.

³ Anyuùŋ kɛ̀ɛ̀nɛ̀ŋ kpèè siaŋ nyàŋ fè dùàŋ àŋ kana nyàŋ, sɔɔ̀ anyuùŋ kɛ̀ɛ̀nɛ̀ŋ kpèè naanààŋ nyaŋ. Esaɓù bà fè wèè maŋ dùàŋ àŋ kana nyaŋ. Sèè mùŋ nyɛnɛŋ e keì sìàŋ, àŋ doum nàŋ tɛnɛ̀ŋ weè niŋ.

⁴ Aŋ kana nyɛɛ̀ŋ àŋ yaà aŋ ɓɔ̀ìjɔ̀à Dayà aŋ yè nyaŋ yaà toomo wèè e tɛ̀ɛ̀tɛ̀ɛ̀, yèè e kpààŋ kɔɔ nyiŋ le wèè aiŋ kpuumàŋ. Kɛɛ sèè mùŋ nyɛnɛŋ e keì naanààŋ, kɛ̀ sɔɔ̀ maŋ nyiŋ dùàŋ, esaɓù kɛ̀ aŋ kuwa e gaàŋ kɛnɛɛ̀ wèè aum kìɛ̀ŋ keì nyìnga. Nyiŋ nàŋ yaà aŋ ɓɔ̀ìjɔ̀à Dayà nyaŋ, aŋ yè nyaŋ kiɛ̀ŋ e keì nyìnga koɓɛ̀ anyuùŋ nyɛ̀nɛ̀ŋ keì naanààŋ nyaŋ, wèè e tɔɔ̀ kɛ̀ wo Dayà doiŋ nàŋ kìɛ̀ŋ e keì nyìnga sèè nìŋ go niŋ nyɛ̀nɛ̀ŋ.

⁵ Wèè esaɓù lɛɛ̀, mùŋ kuwa maŋ jɔ̀ɔ̀lɔ̀ aŋ kana nyaŋ dìì, esaɓù kɛ̀ tɛɛ̀ nàŋ yaà e tɔ̀ɔ̀nyaàaŋ mùŋ kuwa maŋ nyɛ̀nɛ̀ŋ lɛ e yìwìà e gòngo mɔ̀ɛ̀ sùà, yèè e fè nɔŋ wèè wò Dayà woum kìɛ̀ŋ è keì nyìnga.

⁶ Esaɓùɛ lɛɛ̀ mùŋ kuwa maŋ kìɛ̀ŋ e nɛ̀ɛ̀nɛ̀ŋ fuɔŋ. Aŋ kànà fuɔŋ nyàŋ àŋ yaà aŋ ɓɔ̀ìjɔ̀à Dayà, yèè è yaà e kpààŋ kɔɔ nyiŋ wèè aŋ nyɛ̀nɛ̀ŋ maŋ tòmo mɛɛ̀ŋ.

⁷ Kpeiŋ, kìɛìŋ manɛ̀ŋ maŋ gbiŋ nìŋ kuwa e kpàŋ wèè naŋ kiɛ̀ŋ maŋ. Kìɛìŋ e nɛ̀ɛ̀nɛ̀ŋ fuɔŋ wèè manɛ̀ŋ kɛ̀ɛ̀nɛiŋ màŋ yaà manɛ̀ŋ bòliiŋ màŋ ko nɛ̀ɛ̀ŋ nyiŋ niìŋ. Jɔ̀ɔ̀lɔìŋ e kìlà niŋ kiɛ̀ŋ e ɓɛ̀ɛ̀jàa gbee koɓɛ̀ aŋ kana nyàŋ gbiŋ.

Kɛ̀ɛ̀nɛìŋ mànaŋ wèè aŋ dàwiiŋ nyàŋ

⁸ Ɓɔ̀ mùŋ nɔ̀ŋ è kpàŋ dìì wèè è nɛ̀ŋ bà gbiŋ kòɓɛ̀ wò nyùùŋ, kɛɛ nɔ̀ŋ e kpàŋ dìì wèè muŋ mànàŋ aŋ dàwiim nyàŋ. Wo nyùnɔ̀ɔŋ gbiŋ nyɛnɛŋ tɛɛ̀ wɔ, wò jɔ̀ɔ̀lɔ̀ ke Sàwà Dayà dìì.

⁹ Màŋ Sàwà Dayà maŋ naŋ woò wààŋ, “Ɓɔ̀ mùŋ nyɛ̀nɛ̀ŋ hmɔŋtu, ɓɔ̀ mùŋ jìwà nyùùŋ, ɓɔ̀ mùŋ wùà, ɓɔ̀ mùŋ jàà jii mɔɛ̀ŋ è nɛ̀ŋ kàmè dàwi mɔɔ̀ŋ màŋjɛ̀wɛ.” Kɛɛ maŋ sàwà mɛɛ̀ŋ gbiŋ naŋ nɔ̀ŋ gbònògbono miŋ kè sàwà guùŋ sùà, yèè kè naŋ woò wààŋ, “Manàŋ wo nyuùŋkpùuŋ dàwi mɔɔ̀ŋ màànààŋ mùŋ manaŋ muàŋ bi lɛ̀.”

¹⁰ Sèè maŋ mànàŋ wo nyuùŋkpùuŋ dàwi mɔɔ̀ŋ, muŋ naàuŋ jàà è keì naanààŋ, sèè mùŋ nyɛnɛŋ tɛɛ̀, kɛ̀ màŋ jɔ̀ɔ̀lɔ̀ maŋ Sàwà Dayà maŋ dìì.

¹¹ Yɛ̀mɛìŋ nyɛ̀iŋ bi diɛŋ, e kìlà niŋ nyɛ̀nɛ̀ŋ maŋ keì mɛɛ̀ŋ gbiŋ, esaɓù kɛ̀ nàŋ nyìmàŋ e teengaà è haì wèè eiŋ kɛɛyɛ̀. Nàŋ nyìmàŋ kɛ̀ ke ɗɔɔɛ̀ wèè wo Dayà wo wi joeyè kè naàŋ gbɛ̀ɛ̀, e nìàŋ e teenga jiɛ̀jiɛ̀ɛ è naiŋ wa sìè e hààwe wilɛ̀ wo Kanaà Jisɛ̀ Kulaì sùà lɛ.

¹² Wɔŋ dùmɔ̀ɔŋ joo tòloò wèè wɔŋ jùà, yèè sààmɛ e nììɛ do nàŋ sìè. Hɔ̀ànè wiìŋ nyɛ̀nɛ̀ŋ maŋ keì maŋ anyùùŋ nyaŋ nyɛnɛŋ ke nyìwìɛ sùà maŋ, yèè e nɔ̀iŋ bànèbane wi wèè e nɔ̀iŋ e gbolòùŋ nɛ sùà.

¹³ Tùwo wiìŋ tɛ̀ɛ̀, màànààŋ anyùùŋ nyaŋ nyɛnɛŋ wɔŋ niìsìaà sùà lɛ. Ɓɔ̀ è nɔ̀iŋ nɔŋ màaŋ sùà wèè è gbana nyɛ̀nɛŋ ɔ̀ɔ̀ màŋ muàŋ tìa yèè màŋ yɛɛ̀ gò kɛ̀ɛ̀nɛ̀ŋ ɓɛ̀ɛ̀jàa nyɛ̀nɛŋ. Ɓɔ̀ è nyɛ̀nɛ̀iŋ nyaàŋ tàaŋ ɔ̀ɔ̀ eiŋ gììyà aŋ dàwi wi nyàŋ koo.

¹⁴ Nɔ̀ŋ wiìŋ bànèbane wi, wèè wo Kanaà Jisɛ̀ Kulaì yɛmɛ̀ wi diɛŋ e kìlà e nɔ̀iŋ mààŋ wuŋ, wèè kɛ̀ anyuùŋ joo aŋ nyìmàŋ kɛ̀ kiìŋ wò nyùùŋ wò yaà, mààŋ maŋ dèè maŋ è gɔaìŋ maŋ wèè anyùùŋ nyìmàŋ ke gbòòɛ è fòlòìŋ sùà yɛ. Sèè mùŋ nyɛnɛŋ tɛɛ̀, kɛ̀ muŋ naàŋ nyɛ̀nɛ̀ŋ è keì wèè maŋ fɔ̀ɔ̀yɛ̀ kè kpùnaŋ mɔɛ̀ŋ jii.