Luùm 11 - WƆŊ FƐ̀Ì EBÒ SÌÀŊ DAYÀA

Wo Dayà naŋ tɔ̀ɔ̀ ke nyowo koɓɛ̀ anyùùŋ Ezɔ̀ɛ̀ nyaŋ

¹ Sèè è nɔ̀ŋ yɛi, kɛ̀ tɔ̀ miŋ dawè, wo Dayà naŋ wa fè anyùùŋ wuŋ bi nyàŋ jɛwɛ? Wo Dayà gò nyiŋ fè jɛwɛ. Yèè ngèè miàŋ bi mìŋ yaà wo nyùnòò Ezɔ̀ɛ̀, e yìwìà ke kpòò Eɓulɔhɛɛ̀ɛŋ sùà, yèè e yìwìà e zìì Bɛ̀njìmaiɛ̀ŋ lɛ̀ sùà.

² Wo Dayà gò fè ànyunùuŋ nyàŋ wò naŋ tàeɗùù e yìwìà kò tɔɔtuì nyaŋ jɛwɛ. Nàŋ jàà jii e kpɛ̀nɛɛ̀ŋ wɔŋ fɛ̀ì Dayàa sùà, ko yèe wo wɛ̀ijìɔ Ìlaajà naŋ wa tɔ̀ɔ̀ e zàwè koɓɛ̀ Dayài, e nyaàiŋ dè anyùùŋ Ezɔ̀ɛ̀ nyaŋ lɛ̀?

³ Wò naŋ wa woò wààŋ, “Kanaà Dayà, anyùùŋ nyaŋ àŋ jìwà aŋ wɛ̀ijìum nyàŋ gbiŋ, e kìlà àŋ gɔ̀ɛ̀ɛ̀ maŋ gbɛ̀gbɛ̀ zòòloum màŋ. Miàŋ guùŋ kpò nɔŋ naŋ naàŋ joo, yèè kòò àŋ yaà kààmè ɗewe wèè aŋ pɔɔ̀ wɔŋ nyiiŋ miɔ̀ŋ.”

⁴ Kiìŋ è fàsai wo Dayà nauŋ wa kiɛ̀ŋ? Wo Kanaà Dayà naŋ wa wòò wo Ìlaajà wààŋ, “Kòò mìŋ kuwa nɔŋ anyùùŋ màŋjɛ̀wɛ̀ tààsùùŋ nɔɔnɔŋ lè tìyèe aŋ yè nyaŋ kòò àŋ zòòlò wò dayà tòaà àŋ nyaaŋ Baaà wɔ.”

⁵ Weètii e ɗèwè guùŋ lɛɛ̀ sùà nàaŋ pɛɛ, wo Dayà naŋ tà anyuùŋ kpàka ɗùù esàɓù e tɛ̀ɛ̀tɛ̀ɛ̀uŋ nɛ̀.

⁶ E kèì jìì Dayàa wò naŋ nyɛ̀nɛ̀ŋ esàɓù e tɛ̀ɛ̀tɛ̀ɛ̀uŋ nɛ̀ lɛ, e fè wèè è tòmo gbiŋ è yèɛ anyùùŋ naŋ nyɛ̀nɛ̀ŋ lɛ. Sèè e kèì jìì Dayàa e weè nɔ̀ŋ esàɓù tòmoɛ̀ anyùùŋ nyɛnɛŋ lɛ̀, kɛ̀ e tɛ̀ɛ̀tɛ̀ɛ̀uŋ nɛ̀ e naàŋ weè nɔ̀ŋ è tɛ̀ɛ̀tɛ̀ɛ̀ kɛnɛ.

⁷ Kiìŋ tɛɛ̀ naŋ tɔɔ̀? È naŋ tɔɔ̀ kɛ̀, anyùùŋ Ezɔ̀ɛ̀ nyaŋ gò wa mɛ̀ɛ̀ŋ è nɛ̀ɛŋ àŋ yaà wa kaame lɛ̀. Anyuùŋ kpàka nyàŋ wo Dayà naŋ wa tàeɗùù anyùùŋ Ezɔ̀ɛ̀ nyaŋ sùà nyaŋ, naŋ wa mɛ̀ɛ̀ŋ e nɛ̀ɛŋ aŋ gbiŋ yaà wa kaame lɛ̀. Aŋ gbànaŋ nyàŋ gbiŋ, wo Dayà naŋ wa nyiŋ nyɛ̀nɛ̀ŋ aŋ gò kòmàŋ è nyààneuŋ nɛ̀.

⁸ Nààŋ wɔŋ fɛ̀ì Dayàa naŋ woò lɛ, “Wo Dayà naŋ nyɛ̀nɛ̀ŋ maŋ jii nyiŋ màŋ nɔ̀ŋ dɔ̀ɔ̀mùùŋ. E yìwìà ke ɗɔɔ yii e hàì nàaŋ ɗɔɔ yɛɛ̀, wo Dayà naŋ nyiŋ nyɛ̀nɛ̀ŋ aŋ fè jàà keì jii e kìlà aŋ fè yɛ̀mɛ̀ keì gbiŋ dìò sùà tɛ̀ɛ̀ wɔ̀ŋ fàà Dayàa.”

⁹ Wo Dèèwe naŋ woò wààŋ, “Tɔ̀ aŋ sɛɛ̀ ke gbaù sùà maŋ ɗaa gèe nyiŋ màŋ diɛŋ. Tɔ̀ aŋ sɔ̀àà, tɔ̀ aŋ ka e keì nyìnga dìì.

¹⁰ Tɔ̀ aŋ ziilè le fɛ̀ɛ̀, wèè kɛ̀ ɓɔ̀ àŋ yɛmɛ̀ dìì, yèè nyɛnɛ̀ŋ nyiŋ aŋ fungo maŋ keì nyìnga nyiŋ màŋ dìì e teenga gbiŋ sùà.”

¹¹ Weètii tɔ̀ mìŋ dawè mìàŋ, nààŋ aŋ Juùù nyaŋ naŋ wa duonò, àŋ naŋ sɔ̀ɔ̀ aŋ gò wa yèwà dìì? E gò yɛi wa kaaìŋ. Àŋ naŋ wa yèwè dìì. Esàɓù maŋ keì naanààŋ nyiŋ màŋ, naŋ nyɛ̀nɛ̀ŋ anyùùŋ nyaŋ fè àŋ Juùù nyaŋ naŋ wa nɔ̀ŋ jòèye nyiŋ, yèè tɛɛ̀ nàŋ do nàŋ nyɛ̀nɛ̀ŋ anyùùŋ Ezɔ̀ɛ̀ nyaŋ aŋ nyiŋ gììyà le koo.

¹² E jùùmù aŋ Juùù nyaŋ naŋ hìɛ̀ŋ e kpùùmaŋ gbee koɓɛ̀ anyùùŋ e ɗuunyaàŋ, yèè e hààwe gò kɛɛnɛ̀ŋ nyiŋ nɛ̀ naŋ hìɛ̀ŋ e kpùùmaŋ gbee koɓɛ̀ anyùùŋ nyaŋ fè àŋ Juùù nyaŋ. Kpeiŋ e kpùùmaŋ bi do wa nàwèè nàŋ gàŋ zimgbe sèè aŋ Juùù nyaŋ aŋ wa nàwèè nɔ̀ŋ aŋ bà nyiŋ bà wèè e kpùùmaŋ bi.

E jòèyè aŋ nyùùŋ nyaŋ fè àŋ Juùù nyaŋ

¹³ Mìŋ yaà naàŋ gbùùyè ko nɛ̀ɛ̀iŋ niìŋ nyɛ̀iŋ nààŋ nyùùŋ nyaŋ fè àŋ Juùù nyaŋ. Mìŋ yaà wo keela tàeɗùù ko nɛ̀ɛ̀iŋ niìŋ. Mìŋ naŋ gè wo Dayà sɛ̀ wèè e tòmoɛ̀ wò naim kiɛ̀ŋ wèè ka nyɛ̀nɛ̀ŋ lɛ.

¹⁴ Mìŋ kuwa ke jii tùlia e ɗewe lɛɛ̀ sùà, wèè ka nyɛ̀nɛ̀ŋ anyùùŋ maŋ sɛ̀ìŋ miŋ bi màŋ, aim gììyà koo, wèè esàɓù e tòmoɛ̀ mìŋ naŋ nyɛ̀nɛ̀ŋ lɛ, wèè kɛ̀ wo Dayà joeyè aŋ bà nyiŋ.

¹⁵ Nààŋ wo Dayà naŋ wa gè anyùùŋ Ezɔ̀ɛ̀ nyaŋ kùàŋ dìì, anyuùŋ gbànaŋ nyaŋ gbiŋ e ɗuunyaàŋ aŋ yè nyaŋ yaà aŋ joo nyàŋ, naŋ kìlè yèè àŋ naŋ nɔ̀ŋ anyuùŋ mɔ̀ɔ̀nɔŋ koɓɛ̀ Dayài. Kiìŋ nàŋ do nàŋ kaaìŋ sèè wo Dayà jàà nyiìŋ kùàŋ dìì? Àŋ do nàŋ kɛ̀ɛ̀nɛ̀ŋ wɔŋ nyiiŋ gèe mààŋ anyuùŋ fàa nyàŋ naŋ kɛ̀ɛ̀ wɔŋ nyiiŋ gèe sùà.

¹⁶ Sèè maŋ kìɛ̀ŋ ke gbɔ̀u kpuu koɓɛ̀ Dayài e nɛɛmaŋ sùà, kɛ̀ ke gbɔ̀u gbànaàŋ gbiŋ do nàŋ nɔ̀ŋ e nɛɛmaŋ sùà kiiŋ pɛɛ. Yèè sèè maŋ kìɛ̀ŋ maŋ kùù gùlò ke kùlɛ̀ɛ e nɛɛmaŋ sùà koɓɛ̀ Dayài, maŋ kuù kpee màŋ gbiŋ dò nàŋ nɔ̀ŋ nɛɛmaŋ sùà miiŋ pɛɛ.

¹⁷ Nyɛ̀iŋ nààŋ nyùùŋ nyaŋ nààŋ fè àŋ Juùù nyaŋ, nìŋ yaà mààŋ maŋ kuù kpee wèè ke ɔlè kùù gbee ke yèɛ naŋ wùìyè kùàŋ kiiŋ bi yɛ̀, yèè wo Dayà naŋ nyɛ̀nɛ̀ŋ màŋ naŋ nɔ̀ŋ maŋ bà miŋ bà wèè ke ɔlè kùlɛ̀ɛ àŋ naŋ nyùɔ̀ŋ yɛ. Wo Dayà wòiŋ nyɛ̀nɛ̀ŋ nàŋ ɓèmè maŋ jɛ̀ì maŋ kuù kpee màŋ wò naŋ gbèyè maŋ e yìwìà ke yèɛ àŋ naŋ nyùɔ̀ŋ yɛ. Wèè esaɓù lɛɛ̀, nìŋ jikà e kpùùmaàŋ folo e gùlò ke kuù nyùaŋ yii sùà lɛ, nààŋ nìŋ naŋ nɔ̀ŋ aŋ bà nyiŋ bà.

¹⁸ Weètii, ànyùùŋ nyaŋ wò Dayà naŋ jàà è ɓula nyàŋ, ɓɔ̀ nìŋ niingè nyiŋ fɛ̀ɛ̀, nyiŋ nàŋ yaà mààŋ maŋ kuù kpee maŋ yè maŋ wò naŋ wa gbèyè e yìwìà ke kuù gbeeɛ̀ àŋ naŋ nyùɔ̀ŋ yɛ sùà. Niŋ fè ɓɛ̀nɛ̀ŋ nyɛ̀nɛ̀ŋ e kuù gùlò lɛɛ̀ e nyìngàà sùà. E kuù gùlò lɛɛ̀ naŋ nyɛnɛŋ naŋ nyìngàà sùà.

¹⁹ Nyɛ̀iŋ nààŋ bàiŋ nàŋ wɛ̀i ɓɛ̀nɛ̀ŋ wòo nààŋ, “Hɛ̀ɛɛ̀ŋ. Wo Dayà naŋ wa gbèyè maŋ kuù kpee miiŋ wèè eiŋ yɛ̀mɛ̀ ko jɛ̀i.”

²⁰ Tɛɛ̀ è yaà tɔɔɓaa. Wo Dayà naŋ nyiŋ wa jàà e ɓula esàɓù e hààwe gò kɛɛnɛ̀ŋ nyiŋ nɛ̀, yèè mùŋ jaa naàŋ ko jɛ̀i nyiŋ niìŋ, esaɓù kɛ̀ mùŋ kuwa e hààwe. Ɓɔ̀ mùŋ ɓemè muàŋ bi gbee weè niŋ, kɛɛ e jùù e nɔ̀um.

²¹ Wo Dayà gò wa yɛ̀mɛ̀ àŋ Juùù nyaŋ kè nyowo, aŋ yè nyaŋ yaà mààŋ maŋ kuù kpee kɛnɛ màŋ nyaŋ. Nìŋ naŋ gongò kɛ̀ wò doiŋ nàŋ yɛ̀mɛ̀ ke nyowo?

²² Nyìmaìŋ kɛ̀ wo Dayà ɓɛ̀nɛ̀ŋ nɔ̀ŋ tɛ̀ɛ̀ ko nɛ̀ɛ̀iŋ niìŋ, yèè wòiŋ ɓɛ̀nɛ̀ŋ kìɛ̀ŋ e keì nyìnga. Wò kiɛ̀ŋ e keì nyìnga koɓɛ̀ anyùùŋ nyaŋ nauŋ fè jɛwɛ nyàŋ, kɛɛ wò nɔ̀ŋ tɛ̀ɛ̀ ko nɛ̀ɛ̀iŋ niìŋ sèè nìŋ jeeà ke nyɛ̀nɛŋ siauŋ nɛɛ̀ŋ sùà. Kɛɛ sèè nìŋ fòuŋ jɛwɛ, wò doiŋ nàŋ gè kùàŋ dìì woiŋ jàà e ɓula nyɛ̀iŋ pɛɛ.

²³ Sèè aŋ Juùù nyaŋ àŋ gè e hààwe gò kɛɛnɛ̀ŋ nyiŋ nɛ̀ kùàŋ sùà, wo Dayà do nyiŋ ɓɛìŋ naŋ jàà kùàŋ dìì yèè wo nyiŋ nyɛ̀nɛ̀ŋ aŋ ɓɛìŋ nɔ̀ŋ aŋ bàuŋbà. Wo Dayà kuwa e gààaŋ wèè wo nyiŋ ɓɛìŋ kɛ̀lɛ̀ɛ̀ ko nɛ̀ɛ̀uŋ niìŋ.

²⁴ Nyɛ̀iŋ nààŋ nyùùŋ nyaŋ nààŋ fè àŋ Juùù nyaŋ, nìŋ yaà mààŋ maŋ kuù kpee wèè ke ɔlè kùù gbee ke yèɛ naŋ wùìyè kùàŋ kiiŋ bi yɛ̀, maŋ yè maŋ wo Dayà naŋ nyɛ̀nɛ̀ŋ màŋ naŋ nɔ̀ŋ maŋ bà miŋ bà wèè ke ɔlè kùlɛ̀ɛ àŋ naŋ nyùɔ̀ŋ yɛ, jòòpɛɛ tɛɛ̀ fè yɛi nɔŋ kaaìŋ, wèè aŋ gbèyà maŋ kuù kpee joo, kpeiŋ aŋ miŋ jàànè koɓɛ̀ ke kuù joo bà ke yèɛ àŋ naŋ nyùɔ̀ŋ. Aŋ Juùù nyaŋ nàŋ yaà mààŋ ke kuù nyùaŋ yɛɛ̀. Yèè e gò nyìngà wèè wò Dayà wo ɓɛìŋ jàànè maŋ kuù kpee mɛɛ̀ŋ, kòɓɛ̀ kè ɔlè kuù nyùaàŋ wò naŋ miŋ gbèyè sùà yɛ.

Ke nyòwò Dayàa koɓɛ̀ anyùùŋ nyaŋ gbiŋ

²⁵ Wùìyaim nyàŋ, miŋ manàŋ wèè nyɛ̀iŋ nààŋ nyùùŋ nyaŋ nààŋ fè àŋ Juùù nyaŋ, naŋ ɓèmè nyɛ̀iŋ bi gbee. Weètii mìŋ doiŋ nàŋ kpìnìè ke gbùnuɛ̀, wèè e nɛ̀ɛŋ naŋ kààìŋ koɓɛ̀ anyùùŋ Ezɔ̀ɛ̀ nyaŋ lɛ̀. Aŋ bà nyiŋ naŋ wa nyìngè ɗì yèè àŋ naŋ gè maŋhɛɛ wèè aŋ kɛɛnɛ̀ŋ hààwe, e ɗì nyinge nyiŋ bi naàŋ yɛi jeè, kɛɛ yɛi àŋ do nàŋ jeè, e jèèsùà ke gbòò anyùùŋ nyaŋ fè àŋ Juùù nyaŋ, ke yèɛ wo Dayà tàeɗùù yɛ, ke hnàŋ ko nɛ̀ɛ̀uŋ niìŋ e Kanauŋ nɛ̀ sùà.

²⁶ E ɗeweɛ̀ lɛɛ̀ anyùùŋ nyaŋ ko Ezɔ̀ɛ̀ do nàŋ yɛ̀mɛ̀ jòèye. Wɔŋ fɛ̀ì Dayàa naŋ woò wààŋ, “Wo Nyuùŋ Jòèyeɔ̀ do nàŋ yèwè ko jawa gbeeì àŋ nyaaŋ Zanyɔ̀ŋ lɛ, yèè wò do nàŋ gè maŋ keì naanààŋ maŋ gbiŋ ke kpòò Jègɔɛ̀ diɛŋ.

²⁷ E ɗààhìì e mìèsùàguùŋ lɛɛ̀ mìŋ do nàŋ ɓemè ko nɛ̀ɛ̀ŋ nyiŋ niìŋ sèè mìŋ gè nyiìŋ maŋ jùumù nyiŋ màŋ diɛŋ.”

²⁸ Nààŋ anyùùŋ Ezɔ̀ɛ̀ nyaŋ gò wa jàà è Ebò Siaàŋ kùàŋ dìì lɛ, àŋ naŋ kìlè aŋ joo koɓɛ̀ Dayài esàɓù anyùùŋ nyaŋ fè àŋ Juùù nyaŋ. Kɛɛ esàɓù e kèì jìì Dayàa, wo Dayà naŋ nyiŋ tàeɗùù wèè aŋ nɔ̀ŋ aŋ nyuùŋ mɔ̀ɔ̀nɔuŋ esàɓù aŋ nèwàènèwe nyiŋ nyàŋ.

²⁹ Wo Dayà fè kìlà kè jiiuŋ nɛɛ̀ŋ wèè wo nyùnɔ̀ɔŋ wò naŋ tàeɗùù yèè wò kiɛ̀ŋ e kpùùmaŋ wɔ̀.

³⁰ Sèè è nɔ̀ŋ wèè nyɛ̀iŋ nààŋ nyùùŋ nyaŋ nààŋ fè àŋ Juùù nyaŋ, nìŋ naŋ wa gèèyè wo Dayà maŋhɛɛ e tèèngà guùŋ bà. Kɛɛ wo Dayà wòiŋ naàŋ tɔ̀ɔ̀ ke nyowo esaɓù kɛ̀ aŋ Juùù nyaŋ nauŋ wa gèèyè maŋhɛɛ.

³¹ E ɗèwè guùŋ lɛɛ̀ sùà, esàɓù ke nyowoɛ̀ wo Dayà naiŋ tɔɔ̀ lɛ, aŋ Juùù nyaŋ àŋ naàŋ gììyà wo Dayà maŋhɛɛ wèè e nyɛ̀nɛ̀ŋ saɓù wo Dayà tɔɔ̀ nyiŋ ke nyowo nyiiŋ pɛɛ.

³² Wo Dayà naŋ nyɛ̀nɛ̀ŋ anyùùŋ nyaŋ gbiŋ anyùùŋ màŋ keì esàɓù maŋhɛɛ gèe nyiŋ màŋ, wèè kɛ̀ wo tɔɔ̀ aŋ gbiŋ ke nyowo.

E jòòwo yaà koɓɛ̀ Dayài

³³ Diè wo Dayà yaà yɛi tɛ̀ɛ̀ zimgbe koɓɛ̀ anyùùŋ nyaŋ gbiŋ le! Diè wò kuwa yɛi jiikɛ̀ɛ zimgbe yèè wò naŋ nyìmè e keì fèemàŋ le! Ɓòò naŋ ɓɛ̀nɛ̀ŋ gɔ̀àì è kitiuŋ nɛ̀ sùà? Ɓòò naŋ ɓɛ̀nɛ̀ŋ nyìmàŋ maŋ kpèèuŋ màŋ?

³⁴ Wɔŋ fɛ̀ì Dayàa naŋ woò wààŋ, “Ɓòò naŋ nyìmè e ɗeweɛ̀ wo Kanaà Dayà gongà lɛ? Ɓòò nauŋ ɓɛ̀nɛ̀ŋ kìɛ̀ŋ e gòo?

³⁵ Ɓòò nauŋ wa kìɛ̀ŋ e nɛ̀ŋ gbiŋ, wèè e nɔ̀ŋ e kpàŋ wo niŋ gè?”

³⁶ Tɔɔɓaa wo Dayà naŋ wa bànè manɛ̀ŋ maŋ gbiŋ. Wuŋ nàŋ kuwa e gàaŋ manɛ̀ŋ maŋ gbiŋ diɛŋ. E jòòwo nɔ̀ŋ koɓɛ̀ Dayài wèè julɔfɔ. Àmiinàŋ.