Luùm 10 - WƆŊ FƐ̀Ì EBÒ SÌÀŊ DAYÀA

¹ Wùìyaim nyàŋ, e mànaŋ gbee mɛ̀ ke jii miɛ̀ŋ sùà yèè e zòòlo mɛ̀ nàŋ yaà wèè wo Dayà jòèyè anyunùim nyàŋ ko Ezɔ̀ɛ̀.

² Mìŋ yaà wo seì kɛ̀ àŋ manaŋ wo Dayà zimgbe, kɛɛ aŋ kuwà è jiikɛ̀ɛ kɛnɛ niŋ.

³ Kòò àŋ nyìmè è ɗeweɛ̀ wò Dayà jaa ànyùùŋ kùàŋ dìì wèè aŋ nɔ̀ŋ ànyùùŋ tɔ̀ɔ̀nyaàŋ kò nɛ̀ɛ̀uŋ niìŋ lɛ. Kɛɛ àŋ naŋ kàmè ɗewe wèè aŋ kàmè ke dòmàŋ nyiŋ bi. Weètii àŋ naŋ wa gè maŋhɛɛ wèè aŋ hààwè wo Dayà, wèè wo nyiŋ ɓemè wèè aŋ nɔ̀ŋ anyùùŋ tɔ̀ɔ̀nyaàŋ ko nɛ̀ɛ̀uŋ niìŋ.

⁴ Wo Jisɛ̀ Kulaì naŋ wa hìɛ̀ŋ maŋ Sàwà maŋ ko dìa, wèè kɛ̀ anyùùŋ nyaŋ gbiŋ kɛɛnɛ̀ŋ hààwe nyàŋ, àŋ do nàŋ nɔ̀ŋ anyùùŋ tɔ̀ɔ̀nyaàŋ koɓɛ̀ Dayài.

Wo Dayà joeyà wo nyùùŋ gbiŋ

⁵ Wo Mòòze naŋ wa tɛɛ̀ sìngè e nyaàiŋ dè e ɗeweɛ̀ wo Dayà jaa nyùùŋ kùàŋ dìì wèè wo nɔ̀ŋ wo nyùùŋ tɔ̀ɔ̀nyaàŋ ko nɛ̀ɛ̀uŋ niìŋ lɛ. Wò naŋ woò wààŋ, “Wo nyùnɔ̀ɔŋ gbiŋ jɔɔlɔ̀ maŋ sàwà maŋ dìì wɔ, wò do nàŋ nɔ̀ŋ wɔŋ nyiiŋ gèe sùà.”

⁶ Kɛɛ e nɛ̀ɛŋ wɔŋ fɛ̀ì Dayàa naŋ woò e nyaàiŋ dè e ɗeweɛ̀ wo Dayà jaa wo nyùùŋ kùàŋ dìì wèè wo nɔ̀ŋ wo nyùùŋ tɔ̀ɔ̀nyaàŋ esàɓù hààwe sùà lɛ tɛɛ̀. Wɔ̀ŋ naŋ woò wààŋ, “Ɓɔ̀ mùŋ dawè muàŋ bi kè jii mɔɛ̀ŋ sùà mààŋ, Ɓòò nàŋ do nàŋ jòwò ko àìjɛnɛ̀ŋ?” Tɛɛ̀ naŋ tɔɔ̀ kɛ̀ wèè maŋ dèèyè wo Jisɛ̀ Kulaì ko nɛ̀ɛ̀ŋ wiì.

⁷ “Ɓɔ̀ mùŋ dawè mààŋ, Ɓòò nàŋ do nàŋ dèyè koɓɛ̀ anyuùŋ fàa nyàŋ e gùòɛ dìì?” Tɛɛ̀ naŋ tɔɔ̀ wèè wo jùwìà wo Jisɛ̀ Kulaì ko nɛ̀ɛ̀ŋ wiì e yìwìà e fàa dìì.

⁸ Tɛɛ̀ wɔŋ fɛ̀ì Dayàa naŋ woò. “Ke mìè gbìàŋ Dayàa yààìŋ kɔɔ fɔ̀ɔ̀, kè yaà maŋ nyaàŋ kɔɔiŋ màŋ diɛŋ yèè maŋ jiiŋ màŋ sùà.” Ke mìè gbìàŋ guùŋ yɛɛ̀ è woàìŋ e nyaàiŋ dè e hààwe kɛ̀ɛ̀nɛŋ wo Dayà sùà.

⁹ Sèè mùŋ kilià dèè kɛ̀ wo Jisɛ̀ yàa wo Kana, e kìlà maŋ haawè ke jii mɔɛ̀ŋ sùà kɛ̀ wo Dayà nauŋ gè e fàaà dìì wɔŋ nyiiŋ gèeɔ̀ sùà, wo Dayà doum nàŋ joeyè.

¹⁰ Wo Dayà doum nàŋ jàà kùàŋ dìì wèè maŋ nɔ̀ŋ wo nyùùŋ tɔ̀ɔ̀nyaàŋ, yèè wò doum nàŋ joeyè, sèè tɔɔɓaa mùŋ haawà tɛɛ̀ ke jii mɔɛ̀ŋ sùà, e kìlà maŋ niŋ wòò koɓɛ̀ anyuùŋ joo.

¹¹ Wɔŋ fɛ̀ì Dayàa naŋ woò wààŋ, “Wo nyùnɔ̀ɔŋ gbiŋ kuwa hààwe wo Dayà sùà wɔ, e sàngè naàuŋ kùwò.”

¹² Tɛɛ̀ è yaà wèè anyùùŋ nyaŋ gbiŋ, esaɓù kɛ̀ e tɛɛ gòòno fè è fèèmàŋ aŋ Juùù nyaŋ yaà anyùùŋ nyaŋ fè àŋ Juùù nyaŋ. Wo Dayà nàŋ yaà wo Kànà È Gunɔ̀ɔŋ wèè anyùùŋ nyaŋ gbiŋ, yèè wò kpuumàŋ wo nyùnɔ̀ɔŋ gbiŋ dawàuŋ wèè e kpùùmaŋ wɔ̀.

¹³ Wɔŋ fɛ̀ì Dayàa naŋ woò wààŋ, “Wo nyùnɔ̀ɔŋ gbiŋ nyaaŋ e dèè wo Kanaà Dayà wèè e kpùùmaŋ wɔ̀, wò do nàŋ jòèyè.”

¹⁴ Kɛɛ dièsɔa àŋ naŋ ɓɛ̀nɛ̀ŋ nyààŋ e dèè Kanaà wèè e kpùùmaŋ sèè àŋ go kɛ̀ɛ̀nɛ̀ŋ hààwe? Dièsɔa àŋ naŋ ɓɛ̀nɛ̀ŋ kɛ̀ɛ̀nɛ̀ŋ hààwe sèè àŋ go kòmàŋ ke miè gbìaàŋ? Dièsɔa àŋ naŋ ɓɛ̀nɛ̀ŋ kòmàŋ ke miè gbìaàŋ sèè wo nyùùŋ bà go nyiŋ niŋ woò?

¹⁵ Dièsɔa wo nyùùŋ bà naŋ nyiŋ ɓɛ̀nɛ̀ŋ wòò ke miè gbìaàŋ sèè wo Kànà È Gunɔ̀ɔŋ go tùàŋ anyùùŋ ko nɛ̀ɛ̀ŋ nyiŋ niìŋ? Wɔŋ fɛ̀ì Dayàa naŋ woò wààŋ, “È yaà e keì sìàŋ wèè maŋ yɛ̀mɛ̀ wo nyùùŋ bà, wò yaà hinie wèè wo wòò ke mìè gbìàŋ ebò siaàŋ!”

¹⁶ Yɛi nɔŋ è yaà koɓɛ̀ anyùùŋ nyaŋ gbiŋ nààŋ kòò àŋ hààwè kè mìè gbìàŋ Èbò Siaàŋ nyaŋ. Tɛɛ̀ naŋ wa kaaìŋ wèè e nyɛ̀nɛ̀ŋ e yèɛ wo wɛ̀ijìɔ Àzaayà naŋ wa woò lɛ e hɛɛnɛ̀ŋ. Wò naŋ woò wààŋ, “Kanaà, ɓòò naŋ wa hààwè maŋ miè gbìaŋ wi màŋ?”

¹⁷ Sèè è nɔ̀ŋ yɛi, kɛ̀ wo nyùùŋ gbiŋ fè ɓɛ̀nɛ̀ŋ kɛ̀ɛ̀nɛ̀ŋ hààwe sèè wò go kòmàŋ ke miè gbìaàŋ, e nyaàiŋ dè wo Jisɛ̀ Kulaì.

¹⁸ Kɛɛ tɔ̀ miŋ dawè weè, è ɓɛ̀nɛ̀ŋ nɔ̀ŋ tɔɔɓaa kɛ̀, anyùùŋ Ezɔ̀ɛ̀ nyaŋ kòò àŋ kòmò wa kè miè gbìaàŋ? Tɔɔɓaa àŋ nyiŋ wa kòmàŋ. Wɔŋ fɛ̀ì Dayàa naŋ woò wààŋ, “Ke miè gbìaàŋ naŋ wa nɔ̀ŋ wòo nyiŋ koɓɛ̀ anyùùŋ fuɔŋ nyàŋ gbiŋ e ɗuunyaàŋ diɛŋ. Maŋ mìè gbòa nyiŋ màŋ naŋ wa hàì ko dìà e dììɛ gbiŋ e ɗuunyaàŋ.”

¹⁹ Tɔ̀ miŋ dawè ɓɛìŋ, anyùùŋ Ezɔ̀ɛ̀ nyaŋ gò wa kòmàŋ kè miè gbìaŋ yɛɛ̀, yèè aŋ nyiŋ nyìmàŋ tɛ̀ɛ̀? Wo Mòòze wuŋ bi, wo yèɔ yaà wa gbuuye wèè Dayà wɔ, wuŋ jiɛ̀ naŋ wa fàsàì wɔŋ mààŋdàwè wɛɛ̀ŋ, nààŋ wò naŋ wa woò wààŋ, “Wo Kanaà Dayà wààŋ, ‘Mìŋ do nàŋ nyààŋ anyùùŋ nyaŋ kuwà màŋ fuɔŋ ɗi nyàŋ, wèè e sùàŋ anyunùim nyàŋ maŋ jii. Yèè e yìwìà anyùùŋ maŋ fùɔ̀ŋ ɗì anyuùŋ zùwo, mìŋ do nàŋ nyɛ̀nɛ̀ŋ anyunùim nyàŋ aŋ tuù.’ ”

²⁰ Wo wɛ̀ijìɔ Àzaayà naŋ wa gbùùyè ke jii nyingè sùà, nààŋ wò naŋ wa woò wààŋ, “Wo Kanaà Dayà wààŋ, ‘Anyùùŋ nyaŋ fèìm wa kaame nyàŋ, nyiŋ naim mɛɛ̀ŋ, Anyùùŋ nyaŋ fè wa dààwè kiim nyàŋ, nyiŋ mìŋ naŋ wa fòlò feìŋ.’ ”

²¹ Wo Dayà naŋ ɓɛìŋ woò e nyaàiŋ dè anyùùŋ Ezɔ̀ɛ̀ nyaŋ wààŋ, “Wɔŋ niìsìaà gbiŋ sùà mìŋ joowà maŋ kùàŋ fùùŋ wèè ka jàà anyuùŋ gò jɔɔlɔ̀ yaà anyùùŋ dàà ke gbòà nyaŋ kùàŋ dìì.”