Luùm 1 - WƆŊ FƐ̀Ì EBÒ SÌÀŊ DAYÀA

¹ E yìwìà miàim Pɔɔ̀ sìwè, wo ɓɔìjɔ̀à wèè wo Jisɛ̀ Kulaì, nàŋ yaà sìngìè wɔŋ fɛi wɛɛ̀ŋ. Wo Dayà naim wa tàeɗùù wèè ka nɔ̀ŋ wo keela, e kìlà wò naim nyààŋ wèè ka wòò Ebò Siaàŋ.

² Wèè paŋ wo Jisɛ̀ hnàŋ wa e ɗuunyaàŋ, wo Dayà naŋ wa jɔ̀ɔ̀ e ɗààhiì kɛ̀ wò do nàŋ wòò Ebò Siaŋ lɛɛ̀ e yìwìà aŋ wɛ̀ijìuŋ nyàŋ sùà, nààŋ àŋ naŋ niŋ sìngè maŋ fɛ̀ì Nɛ̀ɛ̀màŋ Dayà maŋ sùà lɛ.

³ Ebò Siaŋ lɛɛ̀ e nyaàiŋ naŋ dè wo nyùnɔ̀ɔŋ è naiŋ nyìmè kɛ̀ wuŋ nàŋ yaà wo Jɔ̀àfèlàà Dayàa wɔ̀, wuŋ nàŋ yaà wo Kana wiɔ̀ Jisɛ̀ Kulaì. E nɔ̀uŋ nɛ̀ wo nyuùŋkpùuŋ, àŋ nauŋ wa kùmìè ke kpòò Dèèweɛ̀ sùà.

⁴ Wo Dayà naŋ tɔɔ̀ e gààŋ nɛɛmaŋ gbee sùà kɛ̀, wo Kanaà Jisɛ̀ Kulaì nàŋ yaà wo Jɔ̀àfèlàà wuŋ biɔ̀, wo yèɔ naŋ kìlè wo nyuùŋkpùuŋ wɔ̀. Wò naŋ wa tɛɛ̀ tɔɔ̀ e yìwìà wo Jìnàŋ Nɛɛmaàŋ, nààŋ wò nauŋ gè e fàaà dìì wɔŋ nyiiŋ gèe sùà.

⁵ Wo Dayà naim tàeɗùù yèè wò naim kìɛ̀ŋ e tòmoɛ̀ wèè ka nɔ̀ŋ wo keela. Wò naŋ wa tɛɛ̀ nyɛ̀nɛ̀ŋ esàɓù Jisɛ̀ Kulaìɛ sùà, wo yèɔ wò naŋ tàeɗùù wèè wo joeyè e ɗuunyaàŋ wɔ, wèè kɛ̀ anyùùŋ nyaŋ gbiŋ e ɗuunyaàŋ aŋ kɛɛnɛ̀ŋ hààwe e kìlà aŋ jɔɔlɔ̀uŋ dìì, sèè àŋ haawà ke miè gbìaŋ miɛ̀ŋ e nyaàiŋ euŋ dè.

⁶ Nyɛ̀iŋ nààŋ nyùùŋ nyaŋ pɛɛ nìŋ yaà ko Luùm nyaŋ, wo Dayà naiŋ tàeɗùù wèè naŋ dè wo Jisɛ̀ Kulaì maŋjɛ̀wɛ.

⁷ Weètii mìŋ naŋ sìngè wɔŋ fɛi wɛɛ̀ŋ koɓɛ̀ nyɛ̀iŋ nààŋ nyùùŋ nɛɛmaŋ nyàŋ gbiŋ ko Luùm. Wo Dayà mànàìŋ e kìlà wòiŋ tàeɗùù wèè naŋ nɔ̀ŋ anyùùŋ wuŋ bi. Tɔ̀ wo Dayà Dèda wiɔ̀ yaà wo Kanaà Jisɛ̀ Kulaì kiɛ̀iŋ e tɛ̀ɛ̀tɛ̀ɛ̀ yèè ke jii fàa!

E zòòlo wèè ke sɛ̀ gèe

⁸ E jiɛ̀jiɛ̀ɛ nàŋ yaà, mìŋ naŋ gè wo Dayà miɔ̀ŋ ke sɛ̀ e yìwìà wo Jisɛ̀ Kulaì sùà wèè nyɛ̀iŋ nààŋ gbiŋ, e fèfoo kɛ̀ anyùùŋ nyaŋ gbiŋ e ɗuunyaàŋ kòò àŋ yaà kùmìè e kèè e hààweɛ̀ nìŋ kuwa wo Jisɛ̀ Kulaì sùà lɛ.

⁹ Wo Dayà nàŋ yaà wo seì miɔ̀ŋ kɛ̀ e yèɛ mìŋ woà lɛ è yaà tɔ̀ɔ̀nyaàŋ, wo Dayàa mìŋ zoolà e yìwìà wɔŋ nyììŋ jinàŋ miɔ̀ŋ gbiŋ sùà wɔ, mìŋ woà Ebò Siauŋ nɛ̀ e teenga gbiŋ e nyaàiŋ dè wo Jɔ̀àfelaauŋ nɔɔ̀ŋ. Wo Dayà nyìmàŋ kɛ̀ mìŋ jààìŋ jii

¹⁰ e teenga gbiŋ e zòòlo mɛ̀ sùà. Mìŋ dawà wo Dayà e yìwìà e tɛ̀ɛ̀tɛ̀ɛ̀uŋ nɛ̀ sùà, wèè woim gè nyààŋ diɛŋ kaiŋ naàŋ jaamè.

¹¹ Mìŋ yaà e wùànàŋ sùà wèè kaiŋ yɛmɛ̀ e kìlà wèè kaiŋ kìɛ̀ŋ e kìɛɛ̀ŋ wo Jìnàŋ Dayàa naim kiɛ̀ŋ lɛ, wèè e hààweiŋ nɛ̀ e nyìngàà sùà.

¹² E yèɛ mìŋ yaà woo lɛ̀ nàŋ yaà wèè kɛ̀ yàwi nààŋ gbiŋ eiŋ kpùùmàŋ aŋ dàwi e tèèngà guùŋ nɛ, e yìwìà e hààwe wilɛ̀ sùà.

¹³ Jàaìŋ jii, nyɛ̀iŋ nààŋ wùìyaim nyàŋ, kɛ̀ e teenga zimgbe mìŋ naŋ ɗewè wèè kaiŋ jaamè. Kɛɛ e keì bà nàŋ keewàìm kùàŋ feìŋ e teenga zimgbe wèè miŋ gòim nàŋ jaamè. Mìŋ manaŋ ka hìàŋ anyùùŋ nyaŋ fè àŋ Juùù nyaŋ e yìwìà ko Luùm wèè aŋ dè ke dòmàŋ Jisɛ̀ Kulaìɛ diɛŋ, nààŋ mìŋ naŋ nyɛ̀nɛ̀ŋ maŋ tàta zimgbe sùà lɛ.

¹⁴ È yaà e kpàŋ è kɔɔim, koɓɛ̀ anyùùŋ nyaŋ gbiŋ, e kpùlìà anyùùŋ nyaŋ fè àŋ Juùù nyaŋ, anyùùŋ maŋ fuɔŋ joo, anyuùŋ nyìmàŋ keì fèemàŋ nyaŋ yaà anyuùŋ gò nyìmàŋ keì fèemàŋ nyaŋ, anyùùŋ nyaŋ naŋ nyìmè nɛ̀ŋ nyaŋ, yaà anyuùŋ gò nyìmàŋ nɛ̀ŋ nyaŋ.

¹⁵ Mìŋ kuwa ka wòò Ebò Siaàŋ koɓɛ̀ anyùùŋ nyaŋ gbiŋ. Weètii mìŋ yaà bànèbaneim wèè ka jààmè nyɛ̀iŋ gbiŋ ko Luùm.

E gààaŋ Ebò Siaàŋ kuwa lɛ̀

¹⁶ Mìŋ kuwa ke jii tùlia Ebò Siaàŋ sùà. Tiŋ nàŋ yaà e gààŋ Dayàa wèè wo jòèyè anyùùŋ nyaŋ gbiŋ kuwa hààwe nyàŋ, aŋ Juùù nyaŋ jiɛ̀ yèèngàà anyùùŋ nyaŋ fè àŋ Juùù nyaŋ.

¹⁷ Ebò Siaàŋ woà e ɗeweɛ̀ wo Dayà hiàŋ anyùùŋ koɓɛ̀ wuŋ biì wèè aŋ nɔ̀ŋ anyùùŋ tɔ̀ɔ̀nyaàŋ, e kìlà è yaà nɔŋ esàɓù ke jii tùliaà yaà e hààweɛ̀ anyùùŋ kuwa wo Jisɛ̀ sùà lɛ. Nààŋ wɔŋ fɛ̀ì Dayàa naŋ woò lɛ, “Anyùùŋ nyaŋ wo Dayà hiàŋ wèè aŋ nɔ̀ŋ anyùùŋ tɔ̀ɔ̀nyaàŋ esaɓù e hààweɛ̀ àŋ kuwa lɛ̀, do nàŋ nɔ̀ŋ wɔŋ nyiiŋ gèe siaŋ sùà wèè julɔfɔ.”

Wo Dayà do nàŋ nìmìlà anyùùŋ maŋ kpèè naanààŋ nyaŋ

¹⁸ E yìwìà ko àìjɛnɛ̀ŋ, wo Dayà naŋ tɔ̀ɔ̀ e ɗeweɛ̀ wò naŋ tuù lɛ wèè maŋ jùùmù yaà maŋ kpèè nàànààŋ anyùùŋ nyaŋ yè nyaŋ keewà e tɔ̀ɔ̀nyaàaŋ kùàŋ feìŋ nyaŋ.

¹⁹ Wo Dayà kiɛ̀ŋ nyiìŋ e keì nyìnga, esaɓù kɛ̀ manɛ̀ŋ maŋ gbiŋ àŋ naŋ nyìmè e nyaàiŋ dè wo Dayà maŋ màŋ yaà janjai ko nɛ̀ɛ̀ŋ nyiŋ niìŋ, e fèfoo wo Dayà wuŋ bi naŋ niŋ nyɛ̀nɛ̀ŋ è naŋ nɔ̀ŋ janjai.

²⁰ E yìwìà e teengaà wo Dayà naŋ wa bànè e ɗuunyaàŋ lɛ, anyùùŋ àŋ yɛ̀mɛ̀ manɛ̀ŋ bàneuŋ yaà maŋ kèè mèèuŋ màŋ, yèè àŋ nyìmàŋ janjai kɛ̀ e gààŋ Dayàa yaà wèè julɔfɔ e kìlà tɔɔɓaa wuŋ nàŋ yaà wo Dayà. Weètii anyùùŋ nyiiŋ aŋ kuwà kè kàfaì gbiŋ.

²¹ Àŋ nyìmàŋ wo Dayà, kɛɛ aŋ fòuŋ kìɛ̀ŋ è ɓɛ̀ɛ̀jàa ɔ̀ɔ̀ auŋ gè sɛ̀. Maŋ gòngo nyiŋ màŋ yaà wèè foo, yèè maŋ jiikɛ̀ɛ gò kɛɛnɛ̀ŋ nyiŋ màŋ naŋ nyɛ̀nɛ̀ŋ àŋ nɔ̀ŋ ke nyìwì sùà.

²² Àŋ naŋ woò nyààŋ àŋ kuwa jiikɛ̀ɛ, kɛɛ àŋ naŋ zùwò nyiŋ bi.

²³ Aŋ fè zòòlò wò Dayàa naŋ tɛ̀ɛ̀wɛ̀ jòòwo yèè wò yaà wɔŋ nyiiŋ gèeɔ̀ sùà wèè julɔfɔ wɔ̀. Kɛɛ àŋ zoolà aŋ dayà nyaŋ àŋ naŋ banè yèè àŋ naŋ tèènè nyuùŋkpùuŋ nyàŋ, aŋ yè nyaŋ fè wɔŋ nyiiŋ gèeɔ̀ sùà wèè julɔfɔ nyàŋ. Aŋ bà nyiŋ yaà mààŋ aŋ wòì, aŋ yìlì, yèè aŋ yilì gɔ̀ɛ̀ɛ̀ dìì.

²⁴ Weètii wo Dayà naŋ dàngè anyùùŋ nyɛɛ̀ŋ wèè aŋ nyɛ̀nɛ̀ŋ e kèì wùmaŋ nyiŋ. Àŋ naŋ wa nyɛ̀nɛ̀ŋ e yèɛ àŋ manaŋ lɛ̀, yèè maŋ keì kùwà ninaŋ màŋ maŋ jii nyiŋ màŋ sùà toomàŋ maŋ kpùnaŋ nyiŋ màŋ wèè aŋ nyɛ̀nɛ̀ŋ maŋ kèì sàngè mààŋ e hmɔŋtu nyɛ̀nɛŋ.

²⁵ Àŋ vɔɔnɔ̀ŋ e tɔ̀ɔ̀nyaàaŋ wèè e tòa e nyaàiŋ dè wo Dayà. Àŋ zoolà yèè àŋ kiɛ̀ŋ ɓɛ̀ɛ̀jàa koɓɛ̀ aŋ yìlì nyaŋ wo Dayà naŋ banè nyaŋ. E nɛ̀ɛŋ nyɛ̀nɛ̀ŋ aŋ zoolò wo Dayàa naŋ miŋ banè wɔ, wo yèɔ do nàŋ nɔ̀ŋ tɛ̀nɛuŋ wèè julɔfɔ wɔ̀. Àmiinàŋ.

²⁶ Wèè esaɓù lɛɛ̀ wo Dayà wò nyiŋ dangè wèè aŋ dè maŋ kpèè sàngè naanààŋ nyiŋ màŋ maŋjɛ̀wɛ. Aŋ jɔùŋ ɓemàŋ aŋ jɔùŋ dàwi nyiŋ wèè aŋ nyɛ̀nɛ̀ŋ ke yɛ̀ɛ̀, aŋ fè ɓɛìŋ nyɛ̀nɛ̀ŋ kè yɛɛ̀ kɛnɛ kòɓɛ̀ àŋ faniŋ nyiŋ nyàŋ.

²⁷ E ɗèwè guùŋ bi sùà aŋ felaa àŋ ɓemàŋ aŋ felaa dàwi nyiŋ nyàŋ wèè aŋ nɔ̀ŋ aŋ jawè nyiŋ. Tiŋ pɛɛ è yaà e kèè sàngè. Wèè esaɓù lii, àŋ hiàŋ e nimilàa naŋ nyiŋ tɛɛwɛ̀ lɛ nyiŋ bi diɛŋ.

²⁸ Nààŋ anyùùŋ nyɛɛ̀ŋ naŋ gè maŋhɛɛ wèè aŋ ngèè pɛɛ gòngò e kèè Dayàa, wò dangà wèè maŋ jìì kòmàŋ kàaɓì nyiŋ màŋ maŋ nyiŋ toomò. Weètii àŋ nyɛnɛŋ maŋ keì sàngè maŋ yè maŋ gò tɛɛwɛ̀ wèè aŋ nyɛ̀nɛ̀ŋ maŋ.

²⁹ Àŋ naŋ dìè maŋ jùumù, maŋ kpèè naanààŋ, yèè àŋ yaà wùànàŋ manɛ̀ŋ maŋ gbiŋ, àŋ naŋ kɛ̀ɛ̀fɛ̀ɛ̀ maŋ dòmaŋ nyaaŋ màŋ gbiŋ. Àŋ naŋ dìè le kòò, àŋ yaà anyuùŋ jìwà nyùùŋ, àŋ sumiàŋ aŋ dàwi, àŋ nyɛnɛŋ kàaɓì, yèè àŋ kuwa maŋ jii naanààŋ. Àŋ fiafìà nyùùŋ,

³⁰ àŋ woà maŋ keì naanààŋ wèè aŋ dàwi nyiŋ nyàŋ. Àŋ naŋ wùɔ̀ŋ Dayà, aŋ kuwà ɓɛ̀ɛ̀jàa màŋ mìè gbòa nyiŋ màŋ sùà, àŋ ɓemàŋ nyiŋ bi gbee, àŋ kɛɛ maŋ nyòngà. Àŋ gongà tutùtuuŋ wèè aŋ yɛmɛ̀ e ɗewe jɛi wèè aŋ nyɛ̀nɛ̀ŋ e keì naanààŋ. Anyùùŋ nyɛɛ̀ŋ kuwà ɓɛ̀ɛ̀jàa wèè ànyuùŋ kòmaŋ nyiŋ nyàŋ.

³¹ Aŋ kuwà jiikɛ̀ɛ, aŋ fè ànyuùŋ tùlìà jii, aŋ fè tɔ̀ɔ̀ è mànaŋ yèè aŋ kuwà kè nyowo wèè àŋ dàwi nyiŋ nyàŋ.

³² Àŋ nyìmàŋ ke Sàwà Dayàa naŋ woò wààŋ kɛ̀ wo nyùnɔ̀ɔŋ gbiŋ naŋ nyɛ̀nɛ̀ŋ maŋ tùwo mààŋ mɛɛ̀ŋ wɔ naŋ tɛɛwɛ̀ wèè wo fà. Kɛɛ yɛi nɔŋ è yaà kòò àŋ yaà nyìnìè maŋ keì naanààŋ mɛɛ̀ŋ, yèè àŋ nyiinàŋ anyuùŋ joo maŋ jii wèè aŋ miŋ nyɛ̀nɛ̀ŋ nyiŋ pɛɛ.