Luù 8 - WƆŊ FƐ̀Ì EBÒ SÌÀŊ DAYÀA

Aŋ jɔùŋ nyaŋ naŋ wa kɔ̀ɔ̀ wo Jisɛ̀ dòmaŋ nyàŋ

¹ Eɓìèmàŋjɛ̀wɛ̀ tɛɛ̀, wo Jisɛ̀ yaà anyùùŋ màŋjɛ̀wɛ̀ zììyà jɛ̀wɛ̀ tìyèeuŋ nyàŋ naŋ kìlìè maŋ jawa yèè maŋ vàa màŋ gbiŋ sùà, wò yaà wòò ke mìè gbìàŋ Ebò Siaàŋ e nyaàiŋ dè e Kànà Dayàa.

² Aŋ jɔùŋ bà aŋ yè nyaŋ wò naŋ wa gè aŋ jinàŋ naanààŋ maŋjɛ̀wɛ yèè wò naŋ sùngò maŋ sàaŋ gɛ̀wɛɛ̀ nyiŋ màŋ gbiŋ nyàŋ, nauŋ dè maŋjɛ̀wɛ nyiŋ pɛɛ. Aŋ jɔùŋ bi bà guùŋ nàŋ yaà wa wo Mèèle e yìwìà ko jawaì àŋ nyaaŋ Màŋdalà, wo yèɔ wo Jisɛ̀ naŋ wa gè jìnàŋ nàànààŋ nɔɔnɔŋ le tìyèe maŋjɛ̀wɛ wɔ̀.

³ Aŋ jɔùŋ bi bà nàŋ yaà wa ɓɛìŋ wo Jòanàŋ, wo yèɔ wo fanuuŋ nɔɔ̀ŋ Kuzà hewa tòòmò ko gbòòkùàŋ Kanaà Hɛɛlɔ̀ wɔ, wo Sùzanàŋ, yèè aŋ jɔùŋ zimgbe bà, aŋ yè nyaŋ naŋ wa kpùùmò Jisɛ̀ yàà anyùùŋ màŋjɛ̀wɛ̀uŋ nyàŋ e yìwìà manɛ̀ŋ kɛ̀ɛ̀nɛ̀ŋ nyiŋ bi màŋ sùà.

Ke kàɓànè wo nyuùŋ tòmò ɓùɔ

⁴ Anyuùŋ zimgbe yaà wa hìnìè koɓɛ̀ Jisɛ̀i e yìwìà maŋ jawa màŋ sùà. Nààŋ anyuùŋ zimgbe naŋ wa dèènè koɓɛ̀ guùŋ, wo Jisɛ̀ naŋ nyiŋ wòò ke kàɓanè yɛɛ̀ wààŋ,

⁵ “Wo felaa bà naŋ wa kɔ̀ ko ɓùuŋ noo ko vààì manɛ̀ŋ koei. Nààŋ wò yaà wa vàài sùà manɛ̀ŋ koei màŋ, maŋ bà naŋ sɔ̀ɔ̀ ke dòmaàŋ diɛŋ, anyùùŋ naŋ miŋ kààìŋ diɛŋ yèè aŋ wòì nyaŋ e yìwìà ko fùùiŋ naŋ dèyè àŋ naŋ miŋ mìè.

⁶ Maŋ bà miŋ naŋ sɔ̀ɔ̀ e dìì le dùò diɛŋ, yèè nààŋ màŋ naŋ wa wùìyè, màŋ naŋ fɔ̀, esaɓù kɛ̀ e dììɛ gò wa dɔɔ̀.

⁷ Manɛ̀ŋ koei màŋ bà naŋ sɔ̀ɔ̀ maŋ dɛ̀ɛ̀ maŋ dɛiŋ sùà, miiŋ yaà maŋ dɛɛ màŋ naŋ wùìyè koɓɛ̀ guùŋ, yèè maŋ dɛɛ màŋ naŋ dèkè dèkè manɛ̀ŋ wuiye màŋ.

⁸ Kɛɛ manɛ̀ŋ koei màŋ bà miŋ naŋ sɔ̀ɔ̀ e diì sìàŋ diɛŋ, maŋ wùìyà, maŋ dɛɛdɛ̀ɛ̀, yèè màŋ naŋ kòmò. Maŋ bà guùŋ gbiŋ naŋ kòmò e komàŋ hɔ̀nɔ̀ɔ̀ guùŋ.” Wo Jisɛ̀ naŋ kpɛ̀ɛ̀yɛ̀ gbòa yèè wò naŋ woò wààŋ, “Weètii, jàaìŋ maŋ nùŋ dìì tɛ̀ɛ̀ sèè nìŋ kɛɛnɛ̀ŋ maŋ nùŋ!”

Esàɓù maŋ kàɓanè maŋ

⁹ Anyùùŋ màŋjɛ̀wɛ̀ Jisɛ̀ nyaŋ nauŋ dawè wèè wo gɔaì ke kàɓanèɛ sùa.

¹⁰ Wo Jisɛ̀ naŋ nyiŋ woò wààŋ, “Kàiŋ nyɛ̀nɛ̀ŋ nàŋ nyìmàŋ ke gbùnù e Kànà Dayàa. Kɛɛ sèè è nɔ̀ŋ wèè aŋ gbànaŋ nyàŋ, esaɓùɛ mìŋ gbuuyà nyiìŋ maŋ kàɓanè sùà lɛ nàŋ yaà kɛ̀, aŋ pɛɛ yɛmɛ yɛ̀mɛ̀, aŋ fè niŋ yɛmɛ̀, àŋ do jàà maŋ nùŋ dìì, kɛɛ aŋ naàŋ nyìmè kɛ̀ kiìŋ è naŋ fasàì.”

Wo Jisɛ̀ gɔ̀ì ke kàɓànè wo nyuùŋ tòmò ɓùɔ sùà

¹¹ Wo Jisɛ̀ naŋ ɓɛìŋ woò wààŋ, “Tɛɛ̀ nàŋ yaà e fàsàì ke kàɓanèɛ, manɛ̀ŋ koei nàŋ yaà ke mìè Dayàa.

¹² Manɛ̀ŋ koei màŋ naŋ sɔ̀ɔ̀ ke dòmaàŋ diɛŋ màŋ nàŋ yaà anyùùŋ nyaŋ komo ke mìè gbìàŋ Dayàa nyàŋ. Kɛɛ wo Dɛwìɔ hnàŋ wo gè ke miè gbìaàŋ maŋ jii nyiŋ màŋ sùà, wèè kɛ̀ aŋ gò nàŋ kɛ̀ɛ̀nɛ̀ŋ e hààwe yèè aŋ nɔ̀ŋ jòèye nyiŋ.

¹³ Manɛ̀ŋ koei màŋ naŋ sɔ̀ɔ̀ e dìì le dùò lɛ sùà maŋ, nàŋ yaà anyùùŋ nyaŋ komo ke mìè gbìàŋ Dayàa, aŋ nyiŋ jàà kùàŋ dìì e zɔlɔ̀ sùà. Kɛɛ ke miè gbìaàŋ fè gè lè gùlò màŋ jii nyiŋ màŋ sùà, yèè àŋ kɛɛnɛ̀ŋ nɔŋ e hààwe wèè e teenga kpuu. Sèè e wàà e keì nyìnga jɔa è hnàŋ nyiìŋ nɔŋ ko feìŋ, àŋ kɛ̀ɛ̀ maŋjɛ̀wɛ.

¹⁴ Manɛ̀ŋ koei màŋ naŋ sɔ̀ɔ̀ maŋ dɛ̀ɛ̀ maŋ dɛiŋ màŋ sùà maŋ, nàŋ yaà anyùùŋ nyaŋ komo ke mìè gbìàŋ Dayàa nyàŋ. Kɛɛ àŋ sɛɛ̀ jii wèè manɛ̀ŋ maŋ e ɗuunyaàŋ, yèè àŋ kamàŋ ɗewe wèè aŋ banè, e kìlà aŋ jìkà manɛ̀ŋ maŋ kiɛ̀ŋ nyiìŋ nyɛɛnkɛŋ wɔŋ nyiiŋ gèe wɛɛ̀ŋ sùà, mɛɛ̀ŋ nàŋ deka dèkà ke mìè Dayàa ke fè kà màŋ jii nyiŋ màŋ sùà, kpeiŋ aŋ fè kà feìŋ è kèè Dayàa sùà.

¹⁵ Manɛ̀ŋ koei màŋ naŋ sɔ̀ɔ̀ e diì sìàaŋ diɛŋ lɛ̀, nàŋ yaà anyùùŋ nyaŋ komo ke mìè Dayàa, aŋ nyiŋ jàà kùàŋ dìì e jɔ̀ɔ̀lɔ yèè ke jìì tɔ̀ɔ̀nyaàŋ sùà. Yèè àŋ jeeà nìŋ sùà e jèèsùà aŋ ɓuù, màànààŋ manɛ̀ŋ jè ɓù komo lɛ.

E laumpòɛ wɔŋ gɛ̀iɔ̀ dìì

¹⁶ “Wo nyùùŋ gbiŋ fè sìà è laumpò wo niŋ hòà wɔ̀ŋ pòum ɔ̀ɔ̀ wɔ̀ŋ gbùmaŋ dìì. Wò jàa niìŋ koɓɛ̀i e laumpòɛ jaà lɛ wèè e kìɛ̀ŋ anyùùŋ nyaŋ jɔ̀à ko saaìŋ nyaŋ e gbolòùŋ.

¹⁷ “E nɛ̀ɛŋ gbiŋ yaà ko nyɛɛnɛŋ lɛ̀, è do nàŋ fòlò ke fòolà, e nɛ̀ɛŋ gbiŋ yaà ke gbùnuo sùà lɛ, àŋ do niŋ nàŋ yɛmɛ̀ e kìlà aŋ niŋ hìàŋ ko gbolòùŋ janyai.

¹⁸ “Jàaìŋ maŋ nùŋ dìì tɛ̀ɛ̀ wèè e ɗeweɛ̀ nìŋ komo maŋ kàìŋ lɛ. Esaɓù kɛ̀ anyùùŋ nyaŋ kuwa e nɛ̀ŋ bà nyaŋ, wo Dayà do nyiŋ ɓɛìŋ nàŋ tooyè. Kɛɛ anyùùŋ nyaŋ kuwà è nɛ̀ŋ bà nyàŋ, e tòloòɛ pɛɛ àŋ naŋ gongò kɛ̀ àŋ kuwa lɛ̀, wò do nyiŋ niŋ nàŋ gè sìwè.”

Wo nààŋ Jisɛ̀ɔ yaà aŋ wùìyauŋ nyàŋ

¹⁹ Wo nààŋ Jisɛ̀ɔ yaà aŋ wùìyauŋ nyàŋ naŋ wa hnè ko nɛ̀ɛ̀uŋ niìŋ wèè auŋ yɛmɛ̀, kɛɛ esàɓù e faaàŋ aŋ gòuŋ wa ɓɛ̀nɛ̀ŋ hài.

²⁰ Wo nyùùŋ bà naŋ wòò wo Jisɛ̀ nyààŋ, “Wo yèyeum yaà aŋ wùìyaum nyàŋ kòò àŋ sia ko jɔɔlèi, àŋ manaŋ aum yɛmɛ̀.”

²¹ Wo Jisɛ̀ naŋ nyiŋ woò wààŋ, “Wo yèye miɔ̀ŋ yaà aŋ wùìyaim nyàŋ nàŋ yaà anyùùŋ nyaŋ komò ke mìè gbìàŋ Dayàa yèè aŋ nyiŋ jɔ̀ɔ̀lɔ̀ dìì nyaŋ.”

Wo Jisɛ̀ naŋ nyɛ̀nɛ̀ŋ wɔŋ dùfòìɔ gɔ̀àà dìì

²² Ke ɗɔ̀ɔ̀ guùŋ wo Jisɛ̀ naŋ wa sɛ̀ɛ̀ wɔŋ gɔ sùà yaà anyùùŋ màŋjɛ̀wɛ̀uŋ nyàŋ, yèè wò naŋ nyiŋ woò wààŋ, “Kàwiìŋ wɔŋ fàa bàa wɔŋ juwoɔ̀ nìngè.” Kpeiŋ àŋ naŋ tɔ̀ɔ̀tù kàa.

²³ Nààŋ àŋ yaà wa kɔɔyɛ wɔŋ gɔɔ̀ sùà, wo Jisɛ̀ naŋ sɛ̀ɛ̀ maŋ jàwè. Ko fɛɛ̀feìŋ wɔŋ dùfòì gbee naŋ yèwè dìì e wùìyèɛ diɛŋ, yèè e wùìyèɛ naŋ tɔ̀ɔ̀tù sɛɛ̀ wɔŋ gɔɔ̀ sùà. Àŋ yaà wa kɔ̀ɔ̀yɛ̀ e keì nyìnga gbee dìì.

²⁴ Anyùùŋ màŋjɛ̀wɛ̀ nyaŋ naŋ kɔ̀ koɓɛ̀ Jisɛ̀i yèè àŋ nauŋ tùngò àŋ naŋ woò nyààŋ, “Kààmɔɔŋ, Kààmɔɔŋ! È yààìŋ hinie eiŋ fà!” Wo Jisɛ̀ naŋ yèwè dìì wo wòò wɔŋ dùfòìɔ yaà e bɔiŋ nɛ̀ wààŋ, “E dìà yɛi!” Wɔŋ dùfòìɔ yaà e bɔiŋ nɛ̀ naŋ gɔ̀àà dìì, yèè e dìì naŋ nɔ̀ŋ gìli.

²⁵ Kpeiŋ wò naŋ wòò anyùùŋ màŋjɛ̀wɛ̀ nyaŋ wààŋ, “Kòò e hààweiŋ nɛ̀ yaà?” Kɛɛ è naŋ nyiŋ wa foonò e kìlà e jùù naŋ nyiŋ nyɛ̀nɛ̀ŋ, yèè àŋ naŋ kùùnò wòò nyiŋ bi e fèemàŋ nyààŋ, “Ɓòò naŋ yaà wo felaa wɛɛ̀? Wɔŋ dùfòìɔ yaà e bɔiŋ nɛ̀ kàìŋ nɛ pɛɛ jɔɔlɔ̀uŋ dìì!”

Wo Jisɛ̀ naŋ sùngò wo felaa kɛ̀ɛ̀nɛ̀ŋ aŋ jinàŋ naanààŋ

²⁶ Wo Jisɛ̀ yaà anyùùŋ màŋjɛ̀wɛ̀uŋ nyàŋ naŋ hàì maŋ kpàlàùŋ kpàlàùŋ Gɛ̀lesà maŋ sùà, ko yèi yaà wɔŋ juwoɔ̀ nìngè wɔŋ fùɔ̀ŋ Galaliìɔ sùà.

²⁷ Wò naŋ wa nɔŋ fòlò wɔŋ gɔɔ̀ sùà wò naŋ dè ko tiwiì fa, wò dèènè wo felaa bà ko jawa bi wo yèɔ kuwa wa aŋ jinàŋ naanààŋ zimgbe maŋjɛ̀wɛuŋ. Wo felaa gò wa gɔ̀àì màŋ dèè wèè è teenga mùnlaŋ bà, e kìlà wo fè wa jòò kò gboouŋ noo, kɛɛ wò hewa jòò maŋ hùaŋ màŋ sùà.

²⁸ E teengaà wo felaaà naŋ wa yɛ̀mɛ̀ wo Jisɛ̀ lɛ, wò naŋ dè maŋ gɛ̀ɛ̀ŋ nùuŋ màŋ dììnaŋ ko fɛɛ̀fenùuŋ yèè wò naŋ kpààŋ sɛiiŋ, wààŋ, “Kiìŋ mùŋ manaŋ maim nyiniàŋ, Jisɛ̀, Jɔ̀àfèlàà Dàyà Gaàŋ Gbeeɔ̀? Kɔ̀nɛɛ̀ŋ ɓɔ̀ mùŋ nimilàim.”

²⁹ Wò naŋ wa tɛɛ̀ woò esaɓù kɛ̀ wo Jisɛ̀ naŋ wa wòò aŋ jinàŋ naanààŋ nyaŋ kɛ̀ aŋ fòlàuŋ sùà. E teenga zimgbe aŋ jinàŋ nyaŋ dàaùŋ wa, jòòpɛɛ àŋ heuŋ wa jàà koɓɛ̀ guùŋ, aŋ dìkìà maŋ kuàuŋ màŋ yaà maŋ golòuŋ màŋ maŋ jɔ̀ɔ̀ maŋ kàì, kɛɛ wò he miŋ wa kɛtɛ kɛ̀tɛ̀, e kìlà aŋ jinàŋ naanààŋ nyaŋ auŋ kòà ke fòùngà e diì wòaà sùà.

³⁰ Wo Jisɛ̀ nauŋ dawè wààŋ, “E deèum mɔ̀ɛ̀ nàŋ yaà ɓòò?” Wo felaaà naŋ fasàì wààŋ, “E deè mɛ̀ nàŋ yaà Jinàŋ naanààŋ zimgbe,” esaɓù kɛ̀ aŋ jinàŋ naanààŋ zimgbe yàaùŋ wa sùà.

³¹ Aŋ jinàŋ naanààŋ nyaŋ naŋ pɔ̀wɔ̀ wo Jisɛ̀ nyààŋ ɓɔ̀ wò tùàŋ nyiŋ kò golo zutùùŋ, ko yèi àŋ hewa nàŋ kɔ̀ e keì nyìnga dìì lɛ.

³² Ke gbòò aŋ nyuàŋ gbee bà yaà wa e gbɛ̀ɛ nyiŋ nɛ̀ wɔŋ tolòɔ ɓula koɓɛ̀ bi ko gbilie. Aŋ jinàŋ naanààŋ nyaŋ naŋ pɔ̀wɔ̀ wo Jisɛ̀ wèè wo gè nyiŋ nyààŋ diɛŋ aŋ ka aŋ jɔ̀à aŋ nyùàŋ nyaŋ ko sùà, yèè wò naŋ nyiŋ gè nyààŋ diɛŋ wèè aŋ ka aŋ jɔ̀à nyiŋ ko sùà.

³³ Aŋ jinàŋ naanààŋ nyaŋ naŋ fòlò wo felaaà ko sùà aŋ ka aŋ jɔ̀à aŋ nyùàŋ nyaŋ ko sùà. Ke gbòò aŋ nyuàŋ tɛ̀mɛ̀ɛ̀ yii gbiŋ naŋ dùɔ̀ŋ ke dèyà e toònyàa vauŋvàùŋ lii ke ka ke sɛ̀ɛ̀ ko kòiì keo jeeè.

³⁴ Nààŋ aŋ kpàkòò nyaŋ yaà wa yɛ̀ɛ̀mɛ̀ aŋ nyùàŋ nyaŋ diɛŋ nyàŋ naŋ yɛ̀mɛ̀ e nɛ̀ɛŋ naŋ kaaìŋ lɛ, àŋ naŋ dùɔ̀ŋ aŋ ka aŋ ɓààyè ebò lɛɛ̀ ko jawaì yaà maŋ kpàlàùŋ kpàlàùŋ maŋ sùà.

³⁵ Anyùùŋ nyaŋ naŋ wa kɔ̀ wèè aŋ yɛmɛ̀ e nɛ̀ɛŋ naŋ kaaìŋ lɛ. Nààŋ àŋ naŋ wa hnè koɓɛ̀ Jisɛ̀i, àŋ naŋ wa yɛ̀mɛ̀ wo felaaà aŋ jinàŋ naanààŋ nyaŋ naŋ wa naàŋ fòlò ko sùà wɔ, wò jaa wo Jisɛ̀ gòlòò dìì. Wò naŋ wa gɔ̀àì maŋ dèè e kìlà e jiikɛ̀ɛuŋ nɛ̀ gbiŋ naŋ kpɛɛlɛ̀, kɛɛ e jùù naŋ wa nyɛ̀nɛ̀ŋ anyùùŋ nyaŋ gbiŋ.

³⁶ Anyùùŋ nyaŋ naŋ wa yɛ̀mɛ̀ e keì bi sùà nyaŋ, naŋ gbàì anyùùŋ nyaŋ jii e nyaàiŋ dè e ɗeweɛ̀ wo felaaà aŋ jinàŋ naanààŋ nyaŋ yaà wa weè maŋjɛ̀wɛ wɔ̀ naŋ jòèyè lɛ.

³⁷ Kpeiŋ anyùùŋ nyaŋ gbiŋ maŋ kpàlàùŋ kpàlàùŋ miiŋ sùà e gbɛ̀ɛ̀ ko Gɛ̀lesà naŋ pɔ̀wɔ̀ wo Jisɛ̀ wèè wo yèwà wɔŋ fuɔŋ nyiŋ nɔɔ̀ŋ sùà, esaɓù kɛ̀ e jùù naŋ wa nyɛ̀nɛ̀ŋ aŋ gbiŋ. Wo Jisɛ̀ naŋ sɛ̀ɛ̀ wɔŋ gɔɔ̀ sùà wò naŋ kɔ̀.

³⁸ Wo fèlaaà aŋ jinàŋ naanààŋ nyaŋ naŋ wa fòlò ko sùà wɔ, naŋ pɔ̀wɔ̀ wo Jisɛ̀ wààŋ, “Tɔ̀ miŋ dèum maŋjɛ̀wɛ e ka.” Kɛɛ wo Jisɛ̀ gòuŋ wa nyimèè. Wò naŋ wòò wo felaaà wààŋ,

³⁹ “Kpele, kɛ̀ɛ̀ ko gboo moo muŋ woò anyùùŋ kɛ̀ kiìŋ wo Dayà naŋ nyɛ̀nɛ̀ŋ weèum.” Wo felaaà naŋ kɔ̀ ko jawaì, wo wòò anyùùŋ e nɛ̀ɛŋ wo Jisɛ̀ naŋ nyɛ̀nɛ̀ŋ weèuŋ lɛ̀.

Wo jɔ̀àjɔ̀ùŋ Jalɔ̀ɔ yaà wo nìeɔ̀ naŋ wa mɛ̀ŋlɛ̀ɛ̀ŋ wɔŋ kùmà Jisɛ̀ɔ wɔ̀

⁴⁰ Nààŋ wo Jisɛ̀ yaà anyùùŋ màŋjɛ̀wɛ̀uŋ nyàŋ naŋ kɛ̀ɛ̀ maŋjɛ̀wɛ wɔŋ fàa bàa wɔŋ juwoɔ̀ kɔɔ ko Kepanàùm, anyùùŋ nyaŋ naŋ wa ɓèè wo Jisɛ̀, esaɓù kɛ̀ aŋ gbiŋ yàaùŋ wa fulie.

⁴¹ E tèèngà guùŋ bi sùà, wo felaa bà àŋ nyaaŋ wa wo Jalɔ̀, wo nyuùŋ gbeeɔ̀ bà guùŋ wèè ko sààŋ zòòlò aŋ Juùù nyaŋ naŋ hnè ko nɛ̀ɛ̀uŋ niìŋ. Wò naŋ gbùwò wɔŋ dewàuŋ ko dììnaŋ wo Jisɛ̀ fɛɛ̀feìŋ wò nauŋ pɔwɔ̀ wèè wò hnàŋ ko gboouŋ noo,

⁴² esaɓù kɛ̀ wo jɔ̀àjɔ̀ùŋ gunùuŋ nɔɔ̀ŋ wo yèɔ yaà wa maŋ dòà zììyà jɛ̀wɛ̀ tìyèe wɔ̀, yaà wa siinyɛŋ ebɛ̀ŋ fàa. Nààŋ wo Jisɛ̀ yaà wa kɔɔyɛ, anyùùŋ nyaŋ nauŋ wa kìlìè kɔɔ maŋ fàà maŋ gbiŋ.

⁴³ Anyùùŋ bi e tɛɛ wo nìe bà yaào wa wo yèɔ e sààŋ aŋ jɔùŋ yaà wa wèè maŋ dòà zììyà jɛ̀wɛ̀ tìyèe wɔŋ nyiiŋ gèeuŋ nɔɔ̀ŋ sùà. Wò wa naàŋ mààŋ e nɛɛnɛuŋ nɛ̀ gbiŋ wò kuwa wa lɛ̀ koɓɛ̀ aŋ zòòlegòò, kɛɛ wo bà gbiŋ pɛɛ gòuŋ wa ɓɛ̀nɛ̀ŋ sùnga.

⁴⁴ Wo nìeɔ̀ naŋ hnè e faaàŋ sùà wo Jisɛ̀ ko jɛ̀wɛ̀, yèè wò naŋ mɛ̀nlɛ̀ɛ̀ŋ wɔŋ kùmàuŋ nɔɔ̀ŋ gòlòò dìì wèè wo jòèyà. Ko fɛɛ̀feìŋ e sààŋ jɔùŋ nɛ yàaùŋ wa lɛ̀ naŋ jùò.

⁴⁵ Wo Jisɛ̀ naŋ dawè wààŋ, “Ɓòò naim mɛnlɛ̀ɛ̀ŋ?” Anyùùŋ nyaŋ gbiŋ naŋ niŋ wa gè maŋhɛɛ, yèè wo Pììlɛ naŋ woò wààŋ, “Kààmɔɔŋ, anyùùŋ nyaŋ gbiŋ naum kiliè àŋ gèùm jùòmò juomo.”

⁴⁶ Kɛɛ wo Jisɛ̀ naŋ woò wààŋ, “Wo nyùùŋ bà naim mɛnlɛ̀ɛ̀ŋ, esaɓù kà nyìmàŋ kɛ̀ e gààŋ naim fòlò e kɔɔ sùà.”

⁴⁷ Wo nìeɔ̀ wa nyìmàŋ kɛ̀ wò fòònò jɛ̀wɛ̀, kpeiŋ wò naŋ hnè wò gè jèla kpàkpà yèè wò naŋ dè maŋ gɛ̀ɛ̀ŋ nùuŋ màŋ dìì wo Jisɛ̀ fɛɛ̀feìŋ. Kpeiŋ ko fɛ̀ɛ̀fèìŋ anyùùŋ nyaŋ gbiŋ wò naŋ wòò esaɓùɛ wò naŋ mɛ̀nlɛ̀ɛ̀ŋ wo Jisɛ̀ lɛ, yèè e ɗeweɛ̀ wò naŋ jòèyè fiò lɛ.

⁴⁸ Wo Jisɛ̀ naŋ wòò wo nìeɔ̀ wààŋ, “Nìe siaŋ wɛɛ̀, e hààwe mɔ̀ɛ̀ èum joeyè. Kɔ̀à ke jii fàa sùà.”

⁴⁹ Nààŋ wo Jisɛ̀ yaà wa nɔŋ tɛɛ̀ woo, wo keela naŋ hnè e yìwìà ko gbòò wo sìèfèìŋ ko sààŋ zòòlò aŋ Juùù nyaŋ. Wo keelaà naŋ wòò wo kenàaŋ Jalɔ̀ wààŋ, “Dàa, wo jɔ̀àjɔùŋ mɔɔ̀ŋ fà, weètii ɓɔ̀ mùŋ mɔɔnɛ̀ŋ ɓɛìŋ wò Kààmɔɔŋ.”

⁵⁰ Kɛɛ nààŋ wo Jisɛ̀ naŋ wa tɛɛ̀ kòmò, wò naŋ wòò wo kenàaŋ Jalɔ̀ wààŋ, “E jùù ɓɔ̀ è nyɛ̀nɛ̀um. Kùwiè nɔŋ e hààweɛ̀ kɛ̀ wo jɔ̀àjɔùŋ mɔɔ̀ŋ do nàŋ jòèyè.”

⁵¹ Nààŋ wo Jisɛ̀ naŋ wa hàì ko gbooì, wo gò wa nyimèè wèè yaà wò nyùùŋ bà gbiŋ àŋ do jɔ̀à kò saaìŋ, sɔɔ̀ nɔŋ wo Pììlɛ, wo Jɔ̀ɔŋ, wo Jìiiŋ e kpùlìà wo kɛ̀ɛ̀ yaà wo nààŋ kòmàŋ ɓɔ̀jɔaà.

⁵² Anyùùŋ nyaŋ gbiŋ yaà wa gulie e kìlà àŋ yaà ke nyowo sùà wèè wo ɓɔ̀jɔaà. Kɛɛ wo Jisɛ̀ naŋ nyiŋ woò wààŋ, “Ɓɔ̀ nìŋ gòlà, wo ɓɔ̀jɔaà gò fà, wò yaà nɔŋ maŋ jàwè!”

⁵³ Anyùùŋ nyaŋ gbiŋ nauŋ kùùnò hììle, esaɓù àŋ nyìmàŋ kɛ̀ wò fà.

⁵⁴ Kɛɛ wo Jisɛ̀ nauŋ kùwò kùàŋ yèè wò naŋ woò wààŋ, “Ɓɔ̀jɔa wɛɛ̀, yewà dìì!”

⁵⁵ Wɔŋ nyiiuŋ nɔɔ̀ŋ nauŋ kɛ̀ɛ̀ ko sùà yèè wò naŋ yèwè dìì ko fɛɛ̀feìŋ. Kpeiŋ wo Jisɛ̀ naŋ nyiŋ woò wààŋ aŋ kiɛ̀uŋ e nɛ̀ŋje wo jè.

⁵⁶ E keì lɛɛ̀ naŋ wa fòònò anyùùŋ kòmàŋ ɓɔ̀jɔaà, kɛɛ wo Jisɛ̀ naŋ nyiŋ wa woò wààŋ ɓɔ̀ àŋ woò wò nyùùŋ gbiŋ kɛ̀ kiìŋ naŋ kaaìŋ.