Luù 22 - WƆŊ FƐ̀Ì EBÒ SÌÀŊ DAYÀA

E ɗèweɛ̀ wèè aŋ maàŋ wo Jisɛ̀ koɓɛ̀ aŋ joouŋ nyàŋ

¹ E teengaà wa naàŋ gbɛ̀ɛ̀ wèè wɔŋ Ɗàà Gè Gbɔ̀u Gò Jowàa wɔŋ yèɔ àŋ nyaaŋ nyààŋ wɔŋ Ɗaa Gèe Hɔ̀ɛ̀ɛ̀ŋ Diɛɔ̀ŋ.

² Aŋ kànà sìèfèìŋ zòòlo nyàŋ yèè aŋ kààmɔ̀ɔ̀ŋ maŋ Sàwà Dayà nyaŋ yaà wa kààmè e ɗewe wèè aŋ kùwà wo Jisɛ̀ wèè aŋ jìwàuŋ ke gbùnu sùà, esaɓù kɛ̀ àŋ duɔŋ wa anyùùŋ nyaŋ.

Wo Juɗà nyimèè wèè wo maàŋ Jisɛ̀ koɓɛ̀ aŋ joouŋ nyàŋ

³ Kpeiŋ wo Sɛ̀tanàaŋ naŋ jɔ̀ ke jìì Juɗà Àkaaliɔ̀ sùà, anyùùŋ màŋjɛ̀wɛ̀ zììyà jɛ̀wɛ̀ tìyèe nyàŋ bà guùŋ.

⁴ Wo Juɗà naŋ kɔ̀ koɓɛ̀ aŋ kànà sìèfèìŋ zòòlo nyàŋ yaà anyuùŋ tùnìàŋ ke Saaŋ Zòòlò Dayàa yèè wò naŋ nyiŋ woò wààŋ wò ɓɛ̀nɛ̀ŋ kìɛ̀ŋ e kpùùmàŋ weè aŋ kùwà wo Jisɛ̀.

⁵ Maŋ jii nyiŋ màŋ naŋ wa fɔ̀ wèè aŋ kòmàŋ e nɛ̀ɛŋ wò naŋ nyiŋ woò lɛ, yèè àŋ naŋ jɔ̀ɔ̀ ɗààhiì wèè auŋ kìɛ̀ŋ e nɛɛnɛŋ.

⁶ Wo Juɗà naŋ wa tɔ̀ɔ̀tù e ɗewe kàme wèè wo kìlà wo Jisɛ̀ ko nɛ̀ɛ̀ŋ nyiŋ niìŋ e yèɛ anyùùŋ aŋ naàŋ wa nyìmè lɛ.

Wo Jisɛ̀ yèè anyùùŋ màŋjɛ̀wɛ̀uŋ nyàŋ banebànè wèè aŋ jè e nɛ̀ŋjè wɔŋ Ɗaa Gèe Hɔ̀ɛ̀ɛ̀ŋ Diɛɔ̀ŋ

⁷ Ke ɗɔɔɛ̀ naŋ haì wèè wɔŋ Ɗàà Gè Gbɔ̀u Gò Jòwàa, ke ɗɔɔɛ̀ àŋ naŋ wa gììyè aŋ ɓaawaa nyàŋ saàà wèè e nɛ̀ŋjè wɔŋ Ɗaa Gèe Hɔ̀ɛ̀ɛ̀ŋ Diɛɔ̀ŋ lɛ.

⁸ Kpeiŋ wo Jisɛ̀ naŋ tùɔ̀ŋ wo Pììlɛ yaà wo Jɔ̀ɔŋ yèè wò naŋ nyiŋ woò wààŋ, “Kɔ̀aìŋ yèè niŋ e nɛ̀ŋjè wɔŋ Ɗaa Gèe Hɔ̀ɛ̀ɛ̀ŋ Diɛɔ̀ŋ weè wi.”

⁹ Anyùùŋ màŋjɛ̀wɛ̀ Jisɛ̀ nyaŋ nauŋ dawè nyààŋ, “Kòò mùŋ manaŋ wèè eiŋ ka eiŋ bànèbànè e nɛ̀ŋjè wɔŋ Ɗaa Gèe Hɔ̀ɛ̀ɛ̀ŋ Diɛɔ̀ŋ?”

¹⁰ Kpeiŋ wo Jisɛ̀ naŋ nyiŋ woò wààŋ, “Sèè nìŋ haì ko jawa gbeeì, wo felaa bà wo yèɔ yaà kɔ̀à sùà e sàìŋ maŋ màì wɔ doiŋ nàŋ mɛɛ̀ŋ. Dè nùuŋ maŋjɛ̀wɛ niŋ jɔ̀à ko saaìŋ wò do nàŋ jɔ̀ lɛ,

¹¹ wòoìŋ wo kɛ̀ɛ̀nɛ̀ŋ saaàŋ nààŋ, ‘Wo Kààmɔɔŋ wààŋ, kòò ko loomùiŋ ko yèi wuŋ yaà anyùùŋ màŋjɛ̀wɛ̀uŋ nyàŋ aŋ do nàŋ jììyè e nɛ̀ŋjè wɔŋ Ɗaa Gèe Hɔ̀ɛ̀ɛ̀ŋ Diɛɔ̀ŋ?’

¹² Kpeiŋ wò doiŋ nàŋ tɔ̀ɔ̀ ko loomùŋ gbee ko sààŋ fùùiŋ, kò yaà bàne fo, bànèbaneìŋ kuii e nɛ̀ŋjeɛ̀ weè wi.”

¹³ Anyùùŋ màŋjɛ̀wɛ̀ nyaŋ naŋ yèwè dìì, aŋ kà ko jawaì, yèè àŋ naŋ mɛ̀ɛ̀ŋ e nɛ̀ɛŋ gbiŋ màànààŋ wo Jisɛ̀ naŋ nyiŋ woò lɛ, yèè àŋ nao bàànè e nɛ̀ŋjè wɔŋ Ɗaa Gèe Hɔ̀ɛ̀ɛ̀ŋ Diɛɔ̀ŋ.

E nɛ̀ŋje koyaà wèè wo Kanaà

¹⁴ Nààŋ e teengaà naŋ wa haì, wo Jisɛ̀ yaà aŋ keela tàeɗùùuŋ nyàŋ naŋ jɛi wèè aŋ jènɛ̀ŋ.

¹⁵ Yèè wo Jisɛ̀ naŋ nyiŋ woò wààŋ, “E wànàŋ zimgbe naim nyɛ̀nɛ̀ŋ wèè yàwiiŋ eiŋ jììyà e nɛ̀ŋjè wɔŋ Ɗaa Gèe Hɔ̀ɛ̀ɛ̀ŋ Diɛŋ lɛɛ̀ koɓɛ̀ guùŋ pangàà mìŋ kɔ̀à e keì nyìnga dìì.

¹⁶ Miŋ woòiŋ, miŋ naàŋ ɓɛìŋ jè è nɛ̀ŋje lɛɛ̀ bà e jèèsùà ka niŋ wa nàwèè jììyà e Kànà Dayàa sùà.”

¹⁷ Kpeiŋ wo Jisɛ̀ naŋ ɓèmè wɔŋ kpòò maŋ tala muaŋ yèè wò naŋ ge wo Dayà sɛ̀. Yèè wò naŋ wòò aŋ keela nyàŋ wààŋ, “Kùwaìŋ maŋ tala muaŋ mɛɛ̀ŋ yèè niŋ goonò miŋ nyɛiŋ bi e fèemàŋ.

¹⁸ Tɔ̀ miŋ woòiŋ kɛ̀ miŋ naàŋ ɓɛìŋ tìè màŋ tala muaŋ gbiŋ e jèèsùà e Kànà Dayàa e hnàŋ.”

¹⁹ Kpeiŋ wo Jisɛ̀ naŋ ɓèmè ke gbɔ̀u, wò naŋ gè wo Dayà ke sɛ̀. Wò naŋ nyiŋ nyime nyìmè nyɛ̀ɛ̀nyɛ̀ɛ̀, yèè wò naŋ nyiŋ kìɛ̀ŋ anyùùŋ màŋjɛ̀wɛ̀uŋ nyàŋ. Wò naŋ woò wààŋ, “Kùwaìŋ nyiŋ niŋ gbìlà, kɛɛ̀ nàŋ yaà ke kpùnaŋ miɛ̀ŋ, ke yèɛ naŋ nɔ̀ŋ kìɛŋ nyiŋ wèè nyɛ̀iŋ. Nyɛ̀nɛìŋ tɛɛ̀ wèè niŋ jààim jii.”

²⁰ E ɗèwè guùŋ nɛɛ̀ sùà, nààŋ àŋ naŋ kpɛ̀ɛ̀yɛ̀ e nɛ̀ŋjè koyaà jèe, wò naŋ ɓèmè wɔŋ kpòò wààŋ, “Wɔŋ kpòò wɛɛ̀ŋ naŋ yaà maŋ sɛnìim màŋ yè maŋ naŋ hèè le fèè e mìèsùàgùùŋ jɛ̀ì Dayàa. E teenga gbiŋ nìŋ tìè miìŋ, nyɛ̀nɛìŋ niŋ ke jii jàa sùà weèim.”

²¹ “Kɛɛ yɛ̀mɛìŋ kià! Wo nyùnɔ̀ɔŋ doim nàŋ maàŋ wɔ kòò wò yaà kià è yààìŋ jììyè nɛ̀ŋje koɓɛ̀ guùŋ!

²² Miàim wo Jɔ̀àfèlàà Nyuùŋ Kpùnɔɔ̀ŋ do nàŋ fɔ̀ màànààŋ nɔŋ è yaà sìnga niŋ wɔŋ fɛ̀ì Dayàa sùà e nyaàiŋ eim dè lɛ. Kɛɛ diè e keì nyìnga do yɛi nàŋ nɔ̀ŋ wèè wo nyùnɔ̀ɔŋ do nàŋ mààŋ miàim wo Jɔ̀àfèlàà Nyuùŋ Kpùnɔɔ̀ŋ le!”

²³ Àŋ naŋ tɔ̀ɔ̀tù dàwè dawe nyiŋ bi e fèemàŋ kɛ̀ ɓòò e tɛɛ nyiŋ nàŋ do nàŋ nyɛ̀nɛ̀ŋ e keì mààŋ tɛɛ̀.

Ɓòò nàŋ yaà wo gbeeɔ̀?

²⁴ E kpàànè kpaane naŋ sɛ̀ɛ̀ anyùùŋ màŋjɛ̀wɛ̀ nyaŋ e fèemàŋ kɛ̀ ɓòò e tɛɛ nyiŋ nàŋ yaà wo gbeeɔ̀.

²⁵ Wo Jisɛ̀ naŋ nyiŋ woò wààŋ, “Aŋ kànà anyùùŋ nyaŋ fè àŋ Juùù nyaŋ tɔɔ̀ kɛ̀ àŋ kuwa gààŋ anyuùŋ nyiŋ nyàŋ diɛŋ, yèè aŋ sìèfèìŋ gààŋ nyaŋ nyaaŋ nyiŋ bi nyààŋ ‘Anyùùŋ mɔ̀ɔ̀nɔ̀ŋ anyùùŋ nyaŋ gbiŋ.’

²⁶ Kɛɛ ɓɔ̀ nìŋ nɔ̀ŋ mààŋ nyiŋ. Wo nyùnɔ̀ɔŋ manaŋ wo Dayà wouŋ ɓemè wèè wo nɔ̀ŋ wo gbeeɔ̀ e tɛɛiŋ wɔ̀, sɔɔ̀ wo ɓèmè wuŋ bi wo nɔ̀ŋ mààŋ wo tòloòɔ wo tomo wèè anyùùŋ nyaŋ sìaùŋ feìŋ nyaŋ. Wo nyùnɔ̀ɔŋ gbiŋ yaà wo sìèfenɔ̀ɔŋ wɔ̀, wo nɔ̀ŋ wo ɓɔìjɔ̀àa wo tomo wèè anyuùŋ gbànaŋ nyàŋ.

²⁷ Ɓòò anyùùŋ àŋ gongà kɛ̀ wuŋ nàŋ yaà wo gbeeɔ̀, wo yèɔ jaà aŋ hìàŋ e nɛ̀ŋjeuŋ nɛ̀ wo jè wɔ, ɔ̀ɔ̀ wo yèɔ tomàŋ wo hìàŋ e nɛ̀ŋjeɛ̀ wɔ? Wo yèɔ jaà aŋ hìàŋ e nɛ̀ŋjeuŋ nɛ̀ wɔ nàŋ yaà wo gbeeɔ̀. Kɛɛ kàiŋ naàŋ nɔ̀ŋ e tɛɛ mààŋ wo ɓɔìjɔ̀à tòmo.”

²⁸ “Nàim naàŋ nɔ̀ŋ maŋjɛ̀wɛ maŋ keì nyìngaim màŋ gbiŋ sùà.

²⁹ Yèè nààŋ nɔŋ wo Dèda miɔ̀ŋ naim kìɛ̀ŋ e tɔ̀ɔ̀nyaàaŋ wèè ka kɛ̀ɛ̀ e kana, yɛi nɔŋ mìŋ doiŋ nàŋ kìɛ̀ŋ e tɔ̀ɔ̀nyaàŋ bì.

³⁰ Nìŋ do nàŋ jènɛ̀ŋ yèè naŋ tìà wɔŋ gbɛ̀gbɛ̀ miɔ̀ŋ diɛŋ e Kana mɛ̀ sùà. Yèè nìŋ do nàŋ jɛ̀ì maŋ kpùà kana diɛŋ wèè naŋ nɔ̀ŋ aŋ sìèfeìŋ maŋ zìì ɗì zììyà jɛ̀wɛ̀ tìyèe màŋ diɛŋ ko Ezɔ̀ɛ̀.”

Wo Jisɛ̀ naŋ woò wààŋ wo Pììlɛ douŋ nàŋ gììyè maŋhɛɛ

³¹ Wo Jisɛ̀ naŋ woò wààŋ, “Saimɔ̀ŋ, kùmiàim! Wo Sɛ̀tanàŋ dàwè wo Dayà wèè wouŋ gè nyààŋ diɛŋ wèè wo wàà nyɛ̀iŋ nààŋ gbiŋ, wèè wo gè aŋ siaŋ sìàŋ nyaŋ aŋ naanààŋ nyaŋ sùà, màànààŋ nɔŋ wo nyuùŋ tòmò ɓùɔ gè e kpàliuŋ nɛ̀ŋ maŋ kpàli dɛɛ màŋ sùà.

³² Kɛɛ kà zoolò weèum Saimɔ̀ŋ, wèè kɛ̀ e hààwe mɔ̀ɛ̀ nyìngà sùà. Yèè sèè muŋ kɛɛ maŋjɛ̀wɛ ko nɛ̀ɛ̀ŋ miìŋ, kpùùmaŋ aŋ wùìya gbànaŋ nyàŋ.”

³³ Wo Pììlɛ naŋ fasàì wààŋ, “Kanaà, kà banebànè wèè yàwium e jɔ̀à ko sààŋ nyìwì yèè e fɔ̀ɔ̀yɛ̀ koɓɛ̀ guùŋ.”

³⁴ Wo Jisɛ̀ naŋ wòò wo Pììlɛ wààŋ, “Miŋ woòum kɛ̀ wo tɔɔ wowoɔ̀ naàŋ kolèè wɔ̀ŋ dùùm wɛɛ̀ŋ e jèèsùà maŋ woò e sùà taai mààŋ muŋ nyimààìm.”

Ɓɔ̀ nìŋ koà wɔ̀ŋ ɓùù nɛɛnɛŋ, wɔ̀ŋ ɓuù kàaiŋ, yèè e koya fòo

³⁵ Kpeiŋ wo Jisɛ̀ naŋ dàwè anyùùŋ màŋjɛ̀wɛ̀uŋ nyàŋ wààŋ, “E teengaà mìŋ naiŋ wa tùɔ̀ŋ maŋ tàta maŋ sùà lɛ, niŋ gò wa kòà wɔ̀ŋ pɔsɛ̀ ɔ̀ɔ̀ wɔ̀ŋ ɓuù kàaiŋ yèè màŋ ba, kɛɛ nìŋ naŋ wa nyɛ̀nɛ̀ŋ e wànàŋ nɛ̀ŋ gbiŋ?” Yèè àŋ naŋ fasàì nyààŋ, “Kpele.”

³⁶ Yèè wo Jisɛ̀ naŋ woò wààŋ, “Kɛɛ tɔ̀ miŋ woòiŋ naàŋ kɛ̀, wo nyùnɔ̀ɔŋ gbiŋ wò kuwià wɔŋ pɔsɛ̀ ɔ̀ɔ̀ wɔŋ ɓuù kàaiŋ wɔ̀ŋ wo koà wuŋ. Wo nyùnɔ̀ɔŋ kuwà è koya fòo wɔ̀, wo maàŋ wɔŋ kotìuŋ nɔɔ̀ŋ wo dènàŋ è guùŋ.

³⁷ Esaɓù, tɔ̀ miŋ woòiŋ naàŋ kɛ̀ è yaà sìnga niŋ wɔŋ fɛ̀ì Dayàa sùà wààŋ, ‘Àŋ nauŋ wa nyààŋ wo nyuùŋ gò nɔ̀ŋ sàwà dìì’ Tɛɛ̀ àŋ naŋ wa sìngè e nyaàiŋ eim dè, è do nàŋ hɛɛnɛ̀ŋ e teenga kpuu sùà.”

³⁸ Anyùùŋ màŋjɛ̀wɛ̀ nyaŋ naŋ woò nyààŋ, “Kanaà, maŋ kòyà fòò tìyèe mɛɛ̀ŋ kià.” Wo Jisɛ̀ naŋ fasàì wààŋ, “Maŋ mìè gbòa miiŋ dìà kuii.”

Wo Jisɛ̀ naŋ zoolò wɔŋ tòò maŋ Ɔlè Kùùɔ dimɛ̀

³⁹ Wo Jisɛ̀ naŋ yèwè ko jawa gbeeì yèè wò naŋ kɔ̀ wɔŋ tòò maŋ Ɔlè Kùùɔ dimɛ̀, màànààŋ nɔŋ wò nyɛnɛŋ wa lɛ̀. Anyùùŋ màŋjɛ̀wɛ̀uŋ nyàŋ nauŋ dè maŋjɛ̀wɛ.

⁴⁰ Nààŋ àŋ nao haì, wò naŋ nyiŋ woò wààŋ, “Zòòloìŋ wèè niŋ go nàŋ kɔ̀ e wàa dìì.”

⁴¹ Kpeiŋ wò naŋ nyiŋ jòò wo kà ko fènòo tòloò, wo dè maŋ gɛ̀ɛ̀ŋ nùuŋ màŋ ko dììnaŋ, yèè wò naŋ zoolò.

⁴² Wò naŋ zoolò wààŋ, “Dèda, sèè mùŋ mɔnɔŋ, gèim wɔŋ kpòò keì nyìnga wɛɛ̀ŋ diɛŋ. Kɛɛ miŋ sɔ̀ɔ̀ è yèɛ mìŋ manaŋ lɛ̀, kɛɛ è yèɛ muàŋ mùŋ manaŋ e kaaìŋ lɛ̀.”

⁴³ Wo màikà e yìwìà ko àìjɛnɛ̀ŋ nauŋ fòlò feìŋ wèè wouŋ kpuumàŋ.

⁴⁴ Ke jii mɔ̀ɔ̀nɛŋ gbee sùà wò naŋ ɓɛìŋ zoolò. Yèè maŋ jɛi màŋ nauŋ wa fòlò kɔɔ màŋ yaà wa mààŋ maŋ sɛ̀ìŋ màŋ yaà dè sùà ko dììnaŋ.

⁴⁵ Nààŋ wò naŋ kpɛ̀ɛ̀yɛ̀ zòòlo, wò naŋ yèwè dìì wo kɛ̀ɛ̀ koɓɛ̀ anyùùŋ màŋjɛ̀wɛ̀uŋ nyàŋ kɛɛ wò naŋ nyiŋ mɛɛ̀ŋ àŋ yaà maŋ jàwè esàɓù, ke jii mɔ̀ɔ̀nɛŋ naŋ nyiŋ yɔkpɔ̀ yèè àŋ naŋ sɛ̀ɛ̀ maŋ jàwè.

⁴⁶ Yèè wo Jisɛ̀ naŋ nyiŋ woò wààŋ, “Wèè kiìŋ nìŋ yaà maŋ jàwè? Yèwaìŋ dìì niŋ zoolò wèè niŋ go nàŋ kɔ̀ e wàa dìì.”

Aŋ kùwà wo Jisɛ̀

⁴⁷ E gò wa pɛɛ jùà wo Jisɛ̀ nyààŋ nààŋ wo Juɗà, wo nyùùŋ màŋjɛ̀wɛ̀ zììyà jɛ̀wɛ̀ tìyèeɔ̀ bà guùŋ, nao haì. Wo naŋ hìɛ̀ŋ aŋ nyuùŋ zimgbe. Kpeiŋ wò naŋ kɔ̀ wèè wo kpuuwò wo Jisɛ̀.

⁴⁸ Kɛɛ wo Jisɛ̀ nauŋ dawè wààŋ, “Juɗà, mùŋ yaà mààŋ sùà miàim wo Jɔ̀àfèlàà Nyuùŋ Kpùnɔɔ̀ŋ e yìwìà e kpùùwo sùà?”

⁴⁹ Nààŋ anyùùŋ màŋjɛ̀wɛ̀ nyaŋ yaà wa wo Jisɛ̀ kɔɔ nyàŋ naŋ yɛ̀mɛ̀ e nɛ̀ɛŋ hewa nàŋ kaaìŋ lɛ, àŋ naŋ dawè nyààŋ, “Kanaà, e sumiàiŋ maŋ kòyà fòo wi màŋ?”

⁵⁰ Kɛɛ anyùùŋ nyaŋ bà guùŋ koɓɛ̀ bi naŋ gè e koya fòuŋ nɛ̀ yèè wò naŋ nyɛ̀mɛ̀ŋ wo ɓɔ̀ìjɔ̀à wo Kànà Sìèfèìŋ Zòòlo Gbeeɔ̀, wouŋ kɛ̀ɛ̀ ke nùŋ kùàŋ jìka kpo.

⁵¹ Kɛɛ wo Jisɛ̀ naŋ woò wààŋ, “E dìà yɛi!” Yèè wò naŋ mɛ̀lɛ̀ɛ̀ŋ ke nùŋ felaaà wouŋ sùngà.

⁵² Kpeiŋ wo Jisɛ̀ naŋ wòò aŋ kànà sìèfèìŋ zòòlo nyàŋ yèè anyuùŋ tùnìàŋ ke Saaŋ Zòòlò Dayàa yaà aŋ màmànkùmɛ̀ŋ fuɔɔ̀ŋ naŋ wa hnè ko kuwieuŋ nyàŋ wààŋ, “Wèè kiìŋ nìŋ naŋ hìɛ̀ŋ maŋ koya fòo yèè maŋ kuù kpuu kpùù ko kuwieim, e teenè mààŋ mìŋ yaà wo nyuùŋ dàà ke kpùùnɛɛ̀?

⁵³ Maŋ ɗɔɔ màŋ gbiŋ mìŋ yààìŋ wa e tɛɛ ko Saaŋ Zòòlò Dayài, yèè niŋ gòim wa kùwà. Kɛɛ e jeiŋ e teengaà lɛɛ̀, yèè e gààŋ ke nyìwìɛ kuwa e tomo.”

Wo Pììlɛ gè maŋhɛɛ wààŋ wo nyimààŋ Jisɛ̀

⁵⁴ Kpeiŋ àŋ naŋ kɔ̀ɔ̀ wo Jisɛ̀ ko gbòò wo Kànà Sìèfèìŋ Zòòlo Gbeeɔ̀. Wo Pììlɛ kùwà nyìŋ wa maŋjɛ̀wɛ e fèemàŋ mùnlaŋ sùà.

⁵⁵ Anyùùŋ bà naŋ wa dììyè e hmɔ̀ɔ̀ŋ ko jɔ̀ɔ̀lègbèè wɔŋ gbòò kuàŋ kanaà, yèè wo Pììlɛ naŋ jɛ̀ì anyùùŋ nyaŋ kɔɔ ko hmɔ̀ɔ̀ŋ kɔɔì.

⁵⁶ Nààŋ wo ɓɔì jɔùŋjɔaà bà guùŋ nauŋ yɛmɛ̀ wò jaa ko hmɔ̀ɔ̀ŋ kɔɔì, wò nauŋ yɛmɛ̀ dììŋ yèè wò naŋ woò wààŋ, “Wo kenàŋ wɛɛ̀ wuŋ pɛɛ yaà weè wo Jisɛ̀ maŋjɛ̀wɛ!”

⁵⁷ Kɛɛ wo Pììlɛ naŋ niŋ gè maŋhɛɛ wààŋ, “Nìe wɛɛ̀, mìŋ nyimààŋ ngèè pɛɛ wò felaa wii!”

⁵⁸ E teenga kpàa bà naŋ ɓɛìŋ mààŋ, wo felaa bà naŋ jàà wo Pììlɛ jii yèè wò nauŋ woò wààŋ, “Muàŋ pɛɛ mùŋ yaà wo bà guùŋ!” Yèè wo Pììlɛ naŋ niŋ ɓɛìŋ gè maŋhɛɛ wààŋ, “Felaa wɛɛ̀, miŋ fè wò bà.”

⁵⁹ E teenga kpàa bà naŋ ɓɛìŋ mààŋ yèè wo felaa bà naŋ woò wààŋ, “Maŋhɛɛ ge bà gbiŋ fè ɓɛ̀nɛ̀ŋ nɔɔ̀ŋ kɛ̀ wo felaa wɛɛ̀ yaà wo Jisɛ̀ fè weè koɓɛ̀ guùŋ, esaɓù kɛ̀, wò yaà wo nyùnòò ko Galaliì.”

⁶⁰ Kɛɛ wo Pììlɛ naŋ fasàì wààŋ, “Felaa wɛɛ̀, miŋ nyimààŋ kɛ̀ kiìŋ mùŋ yaà woo!” Ko fɛɛ̀feìŋ nààŋ wò yaà wa nɔŋ gbuuye, wo tɔɔ wowo naŋ kolèè.

⁶¹ Kpeiŋ wo Kanaà naŋ kìlè wo yɛ̀mɛ̀ wo Pììlɛ dììŋ, yèè Pììlɛ naŋ jàà jii kɛ̀ wo Kanaà nauŋ woò wààŋ, “Wo tɔɔ wowoɔ̀ naàŋ kolèè wɔ̀ŋ dùùm wɛɛ̀ŋ e jèèsùà maŋ woò e sùà taai mààŋ muŋ nyimààìm.”

⁶² Yèè wo Pììlɛ naŋ fòlò ko jɔɔlèi wo ɓàà ɗì gòla.

Aŋ kààlòòɗùà nyaŋ naŋ ɓùlò wo Jisɛ̀ yèè àŋ nauŋ hiilè

⁶³ Anyùùŋ nyaŋ yaà wa tùnìè Jisɛ̀ diɛŋ nyàŋ nauŋ hiilè yèè àŋ nauŋ ɓùlò.

⁶⁴ Aŋ nauŋ wa dèkè le fɛ̀ɛ̀ yèè àŋ nauŋ dawè nyààŋ, “Wòò wi kɛ̀ ɓòò naum jùò!”

⁶⁵ Yèè àŋ nauŋ kìɛ̀ŋ maŋ mìè ɓɛ̀ɛ̀pɔ̀ɔ zimgbe.

Àŋ kòà wo Jisɛ̀ anyùùŋ gbèègbèè aŋ Juùù nyaŋ fɛɛ̀feìŋ

⁶⁶ Nààŋ e nììɛ naŋ sìè, aŋ màmànkùmɛ̀ŋ fuɔɔ̀ŋ, aŋ kànà sìèfèìŋ zòòlo nyàŋ, yaà aŋ kààmɔ̀ɔ̀ŋ maŋ Sàwà Dayà nyaŋ naŋ dèènè koɓɛ̀ guùŋ, yèè àŋ naŋ hìɛ̀ŋ wo Jisɛ̀ anyùùŋ gbèègbèè aŋ Juùù nyaŋ fɛɛ̀feìŋ.

⁶⁷ Àŋ naŋ dàwè wo Jisɛ̀ nyààŋ, “Wòò wi! Muàŋ nàŋ yaà wo Kulaìɔ, wo yèɔ wo Dayà naŋ tàeɗùù wèè wo joeyè e ɗuunyaàŋ wɔ?” Wo Jisɛ̀ naŋ nyiŋ fasàì wààŋ, “Sèè kaiŋ niŋ woò, niŋ naàŋ niìŋ haawè.

⁶⁸ Yèè sèè kaiŋ pɛɛ dàwè wɔŋ mààŋdàwè, niŋ naàim fasàì.

⁶⁹ Kɛɛ e yìwìà nàaŋ e hàì e teenga bà nìŋ do nàŋ yɛ̀mɛ̀ miàim wo Jɔ̀àfèlàà Nyuùŋ Kpùnɔɔ̀ŋ mìŋ jaa wɔŋ kùàŋ jìkà Dàyà Gaàŋ Gbeeɔ̀.”

⁷⁰ Yèè aŋ gbiŋ nauŋ dawè nyààŋ, “Weètii muàŋ nàŋ yaà wo Jɔ̀àfèlàà Dayàa?” Wo Jisɛ̀ naŋ nyiŋ fasàì wààŋ, “Nyɛ̀iŋ naŋ woò nààŋ miàŋ nàŋ yàaùŋ!”

⁷¹ Àŋ naŋ woò nyààŋ, “E manàìŋ ɓɛìŋ kè mìè seì joo bà gbiŋ! Yàwi bi èiŋ kòmàŋ e nɛ̀ɛŋ wò naŋ woò lɛ.”