Luù 18 - WƆŊ FƐ̀Ì EBÒ SÌÀŊ DAYÀA

Ke kàɓànè jɔ̀ùŋèèdààa yaà wo kana gbàì maŋ keìɔ

¹ Wo Jisɛ̀ naŋ gììyè anyùùŋ màŋjɛ̀wɛ̀uŋ nyàŋ ke kàɓanè kɛ̀ aŋ zoolò e teenga gbiŋ e kìlà e bɔ̀mɔ̀ŋ ɓɔ̀ è wùìyà nyiŋ julɔfɔ.

² Wò naŋ nyiŋ woò wààŋ, “Wo kana gbàì keì yaà wa ko jawa bà wo yèɔ fè wa dùàŋ Dayà e kìlà wo kuwà wa è ɓɛ̀ɛ̀jàà ànyùùŋ gbiŋ.

³ Wo jɔ̀ùnèèdàà bà hewa jòò ko jàwà guùŋ bi. Wo nìe wɛɛ̀ hewa kà koɓɛ̀ wo kana gbàì keì wɛɛ̀ pɛɛpɛɛ wèè e tɔ̀ɔ̀nyaàuŋ nɛ̀ wààŋ, ‘Kpùùmaàim muŋ kiɛ̀im e tɔ̀ɔ̀nyaàŋ mɛ̀ e yìwìà wo joo miɔ̀ŋ sìwè!’

⁴ Wèè e teenga mùnlaŋ wo kana gbàì keìɔ naŋ gè maŋhɛɛ wèè wo nyɛ̀nɛ̀ŋ e nɛ̀ɛŋ wo nìeɔ̀ manaŋ wa lɛ̀. Kɛɛ ko diemeì wò naŋ wòò koɓɛ̀ wuŋ biì wààŋ, ‘Jòòpɛɛ miŋ fè dùàŋ Dayà ɔ̀ɔ̀ miŋ kuwà è ɓɛ̀ɛ̀jàa wèè ànyùùŋ gbiŋ,

⁵ kɛɛ wèè esàɓù e mɔ̀ɔ̀nɛɛ̀ŋ kinɛiŋ wo jɔ̀ùnèèdàà wɛɛ̀ yààìm kìɛ̀ŋ sùà lɛ, mìŋ douŋ nàŋ kpuumò wò yɛ̀mɛ̀ e tɔ̀ɔ̀nyaàuŋ nɛ̀. Sèè mìŋ go niŋ nyɛ̀nɛ̀ŋ, wò do nàŋ nɔ̀ŋ hìnìè ko nɛ̀ɛ̀ŋ miìŋ keleiŋ, kpeiŋ ko diemeì, wò doim nàŋ nyɛ̀nɛ̀ŋ ka yɔkpɔ̀.’ ”

⁶ Wo Kanaà Jisɛ̀ naŋ ɓɛìŋ woò wààŋ, “Kùmiàìŋ e nɛ̀ɛŋ wò kana gbàì kèì kàaɓì wii naŋ woò lɛ.

⁷ Weètii niŋ gò gongò kɛ̀ wò Dayà do nàŋ gbàì e tɔ̀ɔ̀nyaàŋ sùà wèè àŋ yè nyaŋ wò naŋ tàeɗùù yèè àŋ zoolàuŋ dùùm yèè maŋ gɔɛɛ nyàŋ? Wò do nàŋ dɔɔnɔ̀ŋ wèè wo nyiŋ kpuumàŋ?

⁸ Miŋ woòiŋ, wò do nàŋ gbaì weè nyiŋ e tɔ̀ɔ̀nyaàŋ sùà yèè wò do niŋ nàŋ nyɛ̀nɛ̀ŋ fiò. Kɛɛ sèè miàim wo Jɔ̀àfèlàà Nyuùŋ Kpùnɔɔ̀ŋ hnàŋ wa nàwèè e ɗuunyaàŋ lɛɛ̀, mìŋ doo nàŋ mɛ̀ɛ̀ŋ wo nyuùŋ kɛ̀ɛ̀nɛ̀ŋ hààwe gbiŋ?”

Ke kàɓànè wo Fɛlosiìɔ yaà wo nyuùŋ kùwà nɛ̀ɛ̀nɛ̀ŋ fuɔɔ̀ŋ

⁹ Wo Jisɛ̀ naŋ ɓɛìŋ wòò ke kàɓanè koɓɛ̀ anyùùŋ bà aŋ yè nyaŋ naŋ tùlìè e tɔ̀ɔ̀nyaàŋ nyiŋ nɛ̀ jii yèè àŋ naŋ kɔ̀ɔ̀yɛ̀ anyuùŋ gbànaŋ nyàŋ gbiŋ fɛ̀ɛ̀ diɛŋ nyàŋ.

¹⁰ Wò naŋ woò wààŋ, “Aŋ fèlàà tìyèe bà naŋ wa kɔ̀ ko Saaŋ Zòòlò Dayài ko zoolo. Wò guùŋ yaà wa wo Fɛlosiì yèè wo bàa yaà wa wo nyuùŋ kùwà nɛ̀ɛ̀nɛ̀ŋ fuɔŋ.

¹¹ Wo Fɛlosiìɔ naŋ kɔ̀ wo sie fauŋ wɔŋ kùàŋ wùùŋ mauŋ yèè wò naŋ zoolò wààŋ, ‘Dayà, mìŋ naum gè sɛ̀, esaɓù kɛ̀ mìŋ fè nyɛ̀nɛ̀ŋ è wànàŋ gbiŋ, miŋ fè e kàaɓì, miŋ fè nyɛ̀nɛ̀ŋ hmɔŋtu mààŋ ànyuùŋ gbànaŋ nyàŋ nyɛnɛŋ lɛ̀. Mìŋ naum gè sɛ̀ miŋ fè mààŋ wò nyuùŋ kùwà è nɛ̀ɛ̀nɛ̀ŋ fuɔŋ gò kɛɛnɛ̀ŋ hààwe wii kuii.

¹² Mìŋ kuwo ke tɔùŋ maŋ ɗɔ̀ɔ̀ tìyèe ke wikì gbiŋ sùà, mìŋ goonàŋ e nɛ̀ŋ kàme mɛ̀ gbiŋ sùà zììyà yèè kaum kìɛ̀ŋ e ɗì guùŋ e jaaà gèe sùà.’

¹³ Kɛɛ wo nyuùŋ kùwà nɛ̀ɛ̀nɛ̀ŋ fuɔŋ wii naŋ sìè e fèemàŋ mùnlaŋ, yèè wo gò ngèè pɛɛ gè è ɗì dìì wèè wo yɛ̀mɛ̀ è tèèngà kò àìjɛnɛ̀ŋ, kɛɛ wò naŋ ɓùlò ke sɔɔ yèè wò naŋ woò wààŋ, ‘Dayà, mìŋ yaà wo nyùùŋ maŋ jùumù, yɛ̀mɛ̀im ke nyowo!’ ”

¹⁴ Kpeiŋ wo Jisɛ̀ naŋ woò wààŋ, “Nààŋ aŋ fèlàà tìyèe nyàŋ naŋ wa kɔ̀ maŋ gboo nyiŋ màŋ sùà, e kèè e tɔ̀ɔ̀nyààŋ wo nyuùŋ kùwà e nɛ̀ɛ̀nɛ̀ŋ fuɔɔ̀ŋ naŋ wa fɔ̀ɔ̀yɛ̀ wo Dayà jii, kɛɛ e fè wa wò Fɛlosiìɔ. Anyùùŋ nyaŋ joowà nyiŋ bi nyàŋ, wo Dayà do nyiŋ nàŋ deeyè. Anyùùŋ nyaŋ deeyà nyiŋ bi nyàŋ, wo Dayà do nyiŋ nàŋ joowò.”

Wo Jisɛ̀ naŋ gbìɛ̀ŋ e zòòlo aŋ jɔ̀à kàaiŋ nyàŋ maŋjɛ̀wɛ

¹⁵ Anyùùŋ bà naŋ wa hìɛ̀ŋ aŋ jɔaa bɔwɔ nyiŋ nyàŋ koɓɛ̀ Jisɛ̀i wèè wo gbùwà nyìŋ maŋ kùàŋ yèè wo zoolò nyiŋ diɛŋ, kɛɛ nààŋ anyùùŋ màŋjɛ̀wɛ̀uŋ nyàŋ naŋ nyiŋ wa yɛmɛ, àŋ naŋ nyiŋ gbuuyè wèè aŋ hɔanè yɛi nyɛ̀nɛŋ.

¹⁶ Kɛɛ wo Jisɛ̀ naŋ wòò anyùùŋ màŋjɛ̀wɛ̀uŋ nyàŋ wààŋ, “Dàngeìŋ aŋ jɔ̀àkàiŋ jɔa nyàŋ aŋ hnàŋ ko nɛ̀ɛ̀ŋ miìŋ, ɓɔ̀ nìŋ kilià nyiŋ kùàŋ feìŋ, esaɓù kɛ̀ e Kànà Dayàa è yaà wèè anyùùŋ mààŋ nyɛɛ̀ŋ.

¹⁷ Mìŋ yààìŋ wòò sùà e tɔɔɓaaà kɛ̀, wo nyùnɔ̀ɔŋ gbiŋ gò jɔ̀ɔ̀lɔ̀ è Kànà Dayàa dìì mààŋ wò jɔ̀àkàiŋ wɔ̀, julɔfɔ wo fè nàwèè kà è kanauŋ nɛ̀ sùà.”

Wo nyuùŋ bàneɔ̀ yaà e Kànà Dayàa

¹⁸ Wo nyùùŋ gbèè aŋ Juùù nyaŋ bà naŋ dàwè wo Jisɛ̀ wààŋ, “Kààmɔɔŋ siaŋ, kiìŋ mìŋ naŋ ɓɛ̀nɛ̀ŋ nyɛ̀nɛŋ wèè ka kùwìè wɔŋ nyiiŋ gèe gò jùà?”

¹⁹ Wo Jisɛ̀ nauŋ woò wààŋ, “Wèè kiìŋ mùŋ naim nyààŋ wo nyuùŋ sìàŋ? Wo nyùùŋ gbiŋ siàŋ sɔɔ̀ nɔŋ wo Dayà wuŋ guùŋ.

²⁰ Màŋ nyìmàŋ maŋ Sàwà Dayà maŋ, ‘Ɓɔ̀ mùŋ nyɛ̀nɛ̀ŋ hmɔŋtu, ɓɔ̀ mùŋ jìwà nyùùŋ, ɓɔ̀ mùŋ wùà, ɓɔ̀ mùŋ jàà è kèì kàaɓì ànyùùŋ ɗì, jɔ̀ɔ̀lɔɔ̀ wo dèda mɔɔ̀ŋ yèè wo yèye mɔɔ̀ŋ dìì.’ ”

²¹ Wo felaaà naŋ fasàì wààŋ, “Kà wa kùwà maŋ sàwà mɛɛ̀ŋ gbiŋ e yìwìà e teengaà mìŋ yaà wa wo kɔmɔŋjɔa lɛ̀.”

²² Nààŋ wo Jisɛ̀ naŋ tɛɛ̀ kòmò, wò nauŋ woò wààŋ, “E kèì ɗì guùŋ naŋ ɓɛìŋ joo wèè maŋ nyɛ̀nɛ̀ŋ. Kɔ̀à mààŋ manɛ̀ŋ siwèum màŋ gbiŋ muŋ kiɛ̀ŋ e nɛɛnɛɛ̀ŋ anyuùŋ pɔ̀ɔ nyàŋ, kɛ̀ màŋ kɛ̀ɛ̀nɛ̀ŋ e sùlò ko àìjɛnɛ̀ŋ. Kpeiŋ muŋ hnàŋ muŋ dèim maŋjɛ̀wɛ.”

²³ Kɛɛ nààŋ wo felaaà naŋ wa tɛɛ̀ kòmò, wò naŋ nɔ̀ŋ ɗoomɛɛŋ, esaɓù kɛ̀ wò kuwa wa e bàne zimgbe.

²⁴ Wo Jisɛ̀ naŋ yɛ̀mɛ̀ wo felaaà nààŋ wò yaà wa kɔɔyɛ ɗoomɛɛŋ, yèè wò naŋ woò wààŋ, “Dièsɔa è do yɛi wa nàwèè nàŋ nyìngè wèè wo nyuùŋ bàneɔ̀ kà e Kànà Dayàa sùà!

²⁵ E gò nyìngà wèè wò ɗòsòo wo kɔ̀ɛ̀ɛ̀ e mìilì jewi sùà màànààŋ è naŋ nyìngè wèè wo nyuùŋ bàne wo kà è Kànà Dayàa sùà.”

²⁶ Anyùùŋ nyaŋ nauŋ kumiè nyaŋ naŋ dawè nyààŋ, “Kɛ̀ ɓòò kai, nàŋ do naàŋ nàŋ yɛ̀mɛ̀ e jòèye?”

²⁷ Wo Jisɛ̀ naŋ fasàì wààŋ, “E nɛ̀ɛŋ anyuùŋ kpùuŋ fè ɓɛ̀nɛ̀ŋ nyɛ̀nɛŋ lɛ̀, e gò nyìngà wèè wò Dayà.”

²⁸ Kpeiŋ wo Pììlɛ naŋ woò wààŋ, “Yɛ̀mɛ̀, èiŋ jòà maŋ gboo wi màŋ wèè eiŋ nɔ̀ŋ anyùùŋ màŋjɛ̀wɛ̀um.”

²⁹ Wo Jisɛ̀ naŋ fasàì wààŋ, “Hɛ̀ɛɛ̀ŋ, tɔɔɓaa tɔ̀ miŋ woòiŋ kɛ̀, anyùùŋ nyaŋ gbiŋ naŋ jòò maŋ gboo nyiŋ màŋ ɔ̀ɔ̀ aŋ jawè nyiŋ nyàŋ ɔ̀ɔ̀ aŋ wùìya nyiŋ nyàŋ, anyuùŋ kòmaŋ nyiŋ nyàŋ ɔ̀ɔ̀ aŋ jɔ̀à nyiŋ nyàŋ wèè esàɓù e Kànà Dayàa,

³⁰ àŋ do nàŋ yɛ̀mɛ̀ manɛ̀ŋ mɛɛ̀ŋ zimgbe miŋ e ɗuunyaŋ lɛɛ̀ sùà, e kìlà àŋ do nàŋ kɛ̀ɛ̀nɛ̀ŋ wɔŋ nyiiŋ gèe gò jùà e ɗuunyaŋ jɛiɛ̀ do nàŋ hnè lɛ sùà.”

Wo Jisɛ̀ naŋ ɓɛìŋ wòò e kèè e fàauŋ nɛ̀ e dìà taaà

³¹ Wo Jisɛ̀ naŋ mììnyɛ̀ŋ anyùùŋ màŋjɛ̀wɛ̀ zììyà jɛ̀wɛ̀ tìyèe nyàŋ e ɓula yèè wò naŋ nyiŋ woò wààŋ, “Kùmiaŋ nìim! È yààìŋ kɔ̀ɔ̀yɛ̀ ko Jùlusɛ̀làm ko yèi e yèɛ gbiŋ aŋ wɛ̀ijì nyaŋ naŋ wa sìngè lɛ e nyaàiŋ dè miàim wo Jɔ̀àfèlàà Nyuùŋ Kpùnɔɔ̀ŋ do nàŋ hɛɛnɛ̀ŋ.

³² Àŋ doim nàŋ kìlè koɓɛ̀ anyùùŋ nyaŋ fè àŋ Juùù nyaŋ, aŋ yè nyaŋ doim nàŋ hiilè, aim diɛ̀ŋ yèè aim tùlìà maŋ sɔlɔ.

³³ Àŋ doim nàŋ ɓùlò yèè aim jìwà. Sèè e gɔ̀ɛ̀ɛ̀ taai maaŋ, mìŋ do nàŋ yèwè e fàaà dìì wɔŋ nyiiŋ gèeo sùà.”

³⁴ Kɛɛ anyùùŋ màŋjɛ̀wɛ̀ nyaŋ go wa nyìmàŋ màŋ keì maŋ bà gbiŋ wò Jisɛ̀ yaà wa woo lɛ̀ tɛ̀ɛ̀. Aŋ fè wa ɓɛ̀nɛ̀ŋ nyìmàŋ è fàsai miŋ nɛ̀ esaɓù kɛ̀ màŋ yaà wa ko nyɛɛnɛŋ ko nɛ̀ɛ̀ŋ nyiŋ niìŋ.

Wo Jisɛ̀ naŋ sùngò wo nyuùŋ zììlè fɛ̀ɛ̀ hɔ̀mɔɔɔ̀ŋ

³⁵ Nààŋ wo Jisɛ̀ yaà wa hinie e gbɛ̀ɛ̀ ko Jɛlekò, wo felaa zììlè le fɛ̀ɛ̀ bà jaa wa ko dòmaàŋ kɔɔì ko hɔmɔɔŋ.

³⁶ Nààŋ wò naŋ wa kòmò ebò anyùùŋ nyaŋ àŋ yàa miinyɛŋ, wò naŋ dawè wààŋ, “Kiìŋ nàŋ yaà kaaiŋ?”

³⁷ Yèè anyùùŋ nyaŋ naŋ woò nyààŋ, “Wo Jisɛ̀ e yìwìà ko Naazɔ̀ɛ̀ nàŋ yaà màaŋ sùà.”

³⁸ Yèè wo felaaà naŋ kpààŋ sɛiŋ wààŋ, “Jisɛ̀! Jɔ̀àfèlàà Dèèweɔ̀, yɛ̀mɛ̀im ke nyowo hee!”

³⁹ Kɛɛ anyùùŋ nyaŋ yaà wa kààìŋ wo Jisɛ̀ feìŋ nyaŋ naŋ kpììnyɛ̀ŋ wo felaaà wèè wo kumiàŋ. Kɛɛ wo felaaà naŋ ngèè ɓɛìŋ kpààŋ sɛiŋ wààŋ, “Jɔ̀àfèlàà Dèèweɔ̀! Yɛ̀mɛ̀im ke nyowo hee!”

⁴⁰ Wo Jisɛ̀ naŋ sie yèè wò naŋ wòò anyùùŋ wèè aŋ hiàŋ wo felaaà ko nɛ̀ɛ̀uŋ niìŋ. Nààŋ wo felaaà naŋ hnè wò nauŋ gbɛ̀ɛ̀, wo Jisɛ̀ nauŋ dawè wààŋ,

⁴¹ “Kiìŋ mùŋ manaŋ kà nyɛ̀nɛ̀ŋ e weèum?” Wo felaaà naŋ fasàì wààŋ, “Kanaà, mìŋ manaŋ wèè ka ɓɛìŋ yɛ̀mɛ̀ dìì.”

⁴² Wo Jisɛ̀ nauŋ woò wààŋ, “Kɛ̀ yɛ̀mɛ̀ dìì. E hààwe mɔ̀ɛ̀ èum joeyè.”

⁴³ Ko fɛɛ̀feìŋ wo felaaà naŋ yɛ̀mɛ̀ dìì, yèè wò naŋ dè wo Jisɛ̀ maŋjɛ̀wɛ, wò yaà gììyè wo Dayà sɛ̀. Nààŋ anyùùŋ nyaŋ naŋ wa yɛ̀mɛ̀ e nɛ̀ɛŋ naŋ kaaìŋ lɛ, aŋ gbiŋ naŋ tɛ̀nɛ̀ŋ gè Dayà.