Kòlo 4 - WƆŊ FƐ̀Ì EBÒ SÌÀŊ DAYÀA

¹ Nyɛ̀iŋ nààŋ nyuùŋ kɛ̀ɛ̀nɛ̀ŋ ɗo nyàŋ, nɔ̀iŋ e tɔ̀ɔ̀nyaàŋ sùà wèè e ɗewe kiiɛ̀ nìŋ kuwo aŋ ɗoiŋ nyàŋ lɛ. Kɛ̀ɛ̀nɛìŋ jii jàa kɛ̀ nyɛ̀iŋ pɛɛ nìŋ kuwa wo Kɛ̀ɛ̀nɛŋ ko àìjɛnɛ̀ŋ.

E gòo

² Zòòloiŋ e teenga gbiŋ, yèè niŋ yɛmɛ̀ nyɛiŋ bi diɛŋ e teengaà nìŋ nɔ̀ŋ zoolo lɛ̀, e kìlà niŋ kɛɛnɛ̀ŋ ke sɛ̀ gèe koɓɛ̀ Dayài.

³ E tèèngà guùŋ bi, zòòloìŋ weè wi yàwi pɛɛ, kɛ̀ wo Dayà do wi nàŋ kìɛ̀ŋ e ɗeweɛ̀ wèè eiŋ wòò ke miè gbìauŋ nɛɛ̀ŋ e nyaàiŋ dè ke gbùnuɛ̀ wo Kanaà Jisɛ̀ Kulaì sùà. E wèè esàɓù tɛɛ̀ zà mìŋ yaà naàŋ ko sààŋ nyìwì.

⁴ Kɔ̀nɛɛ̀ŋ, zòòloìŋ wèè miŋ woò ke miè gbìaàŋ ke nɔ̀ŋ janjai koɓɛ̀ anyùùŋ nyaŋ.

⁵ Tòòmoìŋ jiikɛ̀ɛ sùà e nyaàiŋ dè e ɗeweɛ̀ nìŋ tuwà koɓɛ̀ anyùùŋ nyaŋ kuwà hààwe nyàŋ. Tòòmoìŋ e teenga siaàŋ gbiŋ nìŋ kuwa lɛ̀ wèè niŋ kiɛ̀ŋ ke miè gbìaàŋ ko nɛ̀ɛ̀ŋ nyiŋ niìŋ.

⁶ Maŋ mìè gbòaiŋ màŋ maŋ ɓuuyè nyiŋ maŋ nùŋ e teenga gbiŋ e kìlà aŋ kɛɛnɛ̀ŋ mànaŋ weè miŋ yèè maŋ hiàŋ nyiŋ e keì sìàŋ. Yɛ̀mɛìŋ maŋ mìè gbòaiŋ màŋ diɛŋ e kìlà niŋ nɔ̀ŋ bànèbaneiŋ wèè naŋ fàsàì wo nyùùŋ tɛ̀ɛ̀ sèè wò dawàìŋ wɔŋ mààŋdàwè.

Maŋ mìè zùùmo dìàmaŋ màŋ

⁷ Wo wùìya mànaŋ wiɔ̀ Tachikɔ̀, wò yaà wo ɓɔìjɔ̀à tùlìà jii, e kìlà wò naŋ wi tòòmò maŋjɛ̀wɛ wèè eiŋ tomo wèè wo Kanaà wɔ, wò doiŋ nàŋ kìɛ̀ŋ ke miè gbìaàŋ e nyaàiŋ eim dè.

⁸ Mìŋ yàaùŋ tùàŋ sùà ko nɛ̀ɛ̀iŋ niìŋ wèè esaɓù lɛɛ̀, wèè woiŋ gbòà kɔɔ wèè naŋ kɛ̀ɛ̀nɛ̀ŋ maŋ jii nyingè yaà e zɔlɔ̀, e kìlà wò doiŋ nàŋ wòò e yèɛ yàa wì kaaiŋ lɛ̀.

⁹ Wo Onisimɔ̀ŋ, wo wùìya mànaŋ yèè wo nyuùŋ tùlìà jii wiɔ̀ bà guùŋ e yìwìà ke gboòiŋ nɛɛ̀ŋ sùà, yèè wo Tachikɔ̀ nàŋ yaà hìnìè ko nɛ̀ɛ̀iŋ niìŋ. Nyiŋ tìyèe doiŋ nàŋ wòò e nɛ̀ɛŋ gbiŋ yaà kià kaaiŋ lɛ̀.

¹⁰ Wo Àlètakɔ̀, wo yèɔ yàwi wuŋ yaà ko sààŋ nyìwìi wɔ̀, naiŋ tùɔ̀ŋ zùùmo. Wo Mài wuŋ pɛɛ, wo wùìyà Bànaŋɓàa, naiŋ tùɔ̀ŋ zùùmo. Yèè èiŋ woò tɛ wìàà, sèè wo Mài haì ko nɛ̀ɛ̀iŋ niìŋ nauŋ ɓeeè.

¹¹ Wo Jàasùà, wo yèɔ àŋ nyaaŋ wo Jɔtù wɔ, naiŋ tùɔ̀ŋ e zùùmo wuŋ pɛɛ. Aŋ fèlàà taai nyɛɛ̀ŋ, nàŋ yaà aŋ Juùù nyuuŋ kɛ̀ɛ̀nɛ̀ŋ hààwe nyàŋ nɔŋ è naiŋ tòòmò koɓɛ̀ guùŋ wèè e Kànà Dayàa, e kìlà àŋ naim kìɛ̀ŋ e kpùùmaŋ gbee.

¹² Wo Ɛpafilè wo wùìyà nyɛ̀iŋ biɔ̀ bà ke gboòiŋ nɛɛ̀ŋ sùà, wo yèɔ yaà wo ɓɔìjɔ̀à wèè wo Jisɛ̀ Kulaì wɔ, naiŋ tùɔ̀ŋ zùùmo wuŋ pɛɛ. Wò zoolà sɛmɛ e teenga gbiŋ e weèiŋ, wò yaà dààwè Dayà wèè naŋ kùwà e hààweiŋ nɛ̀ kpaŋ, mààŋ anyuùŋ kàmaiŋ e kìlà àŋ naŋ kaikpɔ nyimèè ke gbòò anyuùŋ hààwe nyàŋ sùà, e ɓɛ̀ɛ̀jàa gbee sùà koɓɛ̀ e yèɛ wo Dayà manaŋ lɛ̀.

¹³ Mìàŋ bi mìŋ yaà wo seì kɛ̀, kà yɛ̀mɛ̀ e tòmo nyìngaà wò naŋ nyɛ̀nɛ̀ŋ e weèiŋ, yèè wèè anyuùŋ hààwe nyàŋ ko Làòdisià yaà ko Hɛlapolì.

¹⁴ Aŋ wùìya wi nyàŋ, wo Luù, wo zòòlegòò mànaŋ wiɔ̀ yaà wo Dimà naiŋ tùɔ̀ŋ zùùmo.

¹⁵ Kɔ̀nɛɛ̀ŋ zùùmoìŋ anyuùŋ hààwe nyàŋ ko Làòdisià, yèè koɓɛ̀ wo nìeɔ̀ Nyanfà yaà ke gbòò anyuùŋ hààwe nyàŋ deenàŋ ko gboouŋ noo nyàŋ.

¹⁶ Sèè nìŋ kpɛɛyɛ̀ wɔŋ fɛi wɛɛ̀ŋ kpɛ̀nɛŋ, nyɛ̀nɛìŋ niŋ ɓɛìŋ e kpàŋ è kɔɔiŋ wèè niŋ kpɛ̀nɛ̀ŋ wuŋ koɓɛ̀ ke gbòò anyuùŋ hààwe nyàŋ ko Làòdisià. E tèèngà guùŋ bi, nìŋ kuwa naŋ kpɛ̀nɛ̀ŋ wɔŋ fɛiɔ̀ anyuùŋ hààwe nyàŋ e yìwìà ko Làòdisià doiŋ nàŋ tùɔ̀ŋ wɔŋ.

¹⁷ Wòoìŋ wo Àchipɔ̀ nààŋ, “Nyɛnɛ̀ŋ niŋ è kpàŋ è kɔɔum muŋ kpɛɛyɛ̀ e tòmoɛ̀ wo Kanaà naum wa kiɛ̀ŋ wèè maŋ nyɛ̀nɛ̀ŋ lɛ.”

¹⁸ Wɔŋ kùàŋ miàŋ biɔ̀ naŋ tɛɛ̀ sìngè. E zùùmo e yìwìà miàim Pɔɔ̀ sìwè. Ɓɔ̀ nìŋ nyɛɛnɛ̀ŋ kɛ̀ kòò mìŋ yaà nɔŋ maŋ jɔ̀ɔɔ ko sààŋ nyìwìi. Mìŋ zoolà wèè wo Dayà wo nɔ̀ŋ tɛ̀ɛ̀ ko nɛ̀ɛ̀iŋ niìŋ.