Kòlo 3 - WƆŊ FƐ̀Ì EBÒ SÌÀŊ DAYÀA

¹ Wo Dayà naiŋ wa gè e fàaà dìì nyɛ̀iŋ wo Jisɛ̀ Kulaì koɓɛ̀ guùŋ, weètii jàaìŋ maŋ jiiŋ màŋ koɓɛ̀ manɛ̀ŋ maŋ yaà ko àìjɛnɛ̀ŋ maŋ, ko yèi wo Jisɛ̀ Kulaì jaa ke kpùà kanauŋ nɛɛ̀ŋ diɛŋ wɔŋ kùàŋ jìkà Dayàa lɛ̀.

² Gòngoìŋ wèè manɛ̀ŋ maŋ yaào màŋ, kɛɛ ɓɔ̀ è nɔ̀ŋ manɛ̀ŋ maŋ yaà è dììɛ diɛŋ màŋ è ɗuunyaŋ lɛɛ̀.

³ Nìŋ naŋ wa fɔ̀, kɛɛ wɔŋ nyiiŋ gèiŋ nɔɔ̀ŋ kòò wɔ̀ŋ yaà ko nyɛɛnɛŋ wo Jisɛ̀ Kulaì ko sùà koɓɛ̀ Dayài.

⁴ Wɔŋ nyiiŋ gèe kɛnɛiŋ nɔɔ̀ŋ nàŋ yaà wo Jisɛ̀ Kulaì, sèè wò folo wa nàwèè ɓɛìŋ ko fɛɛ̀feìŋ, kpeiŋ kɛ̀ nyɛ̀iŋ yèè wuŋ do nàŋ fòlò ko fɛɛ̀feìŋ, e kìlà nìŋ do nàŋ nɔ̀ŋ aŋ bàiŋbà e jòòwouŋ nɛ̀ sùà.

Wɔŋ nyiiŋ gɔuɔ̀ yaà wɔŋ nyiiŋ jɛiɔ̀

⁵ Nìŋ kuwa naŋ jìwà maŋ kpèè ɗuunyaŋ màŋ, maŋ yè maŋ yaà toomo maŋ kpùnaiŋ màŋ sùà, maŋ nyɛ̀nɛŋ mààŋ maŋ yɛ̀ɛ̀ hmɔŋtu naanààŋ yaà maŋ gòngo naanààŋ. Wo nyùnɔ̀ɔŋ naŋ nyɛ̀nɛ̀ŋ e wànàŋ e nɛ̀ŋ keekèè wɔ, è yaà nɔŋ mààŋ maŋ goò zòòlo.

⁶ Esàɓù maŋ keì mɛɛ̀ŋ, e wùàŋ Dayàa do nàŋ hnè anyùùŋ nyaŋ fòuŋ jɔ̀ɔ̀lɔ̀ dìì nyaŋ diɛŋ.

⁷ E tèèngà guùŋ bà nìŋ hewa nyìnìàŋ maŋ nyiiŋ gèeiŋ màŋ maŋ keì mààŋ mɛɛ̀ŋ sùà, nààŋ nìŋ hewa nyɛ̀nɛ̀ŋ maŋ kèì guùŋ bi lɛ̀.

⁸ Kɛɛ nìŋ kuwa naŋ gè maŋ keì mɛɛ̀ŋ kùàŋ sùà. Ɓɔ̀ nìŋ tuù àŋ dàwiiŋ nyàŋ sìwè, ɓɔ̀ nìŋ wùàŋ ànyùùŋ, yèè ɓɔ̀ nìŋ nyiniàŋ àŋ dàwi è hɔ̀ɛŋ. Ɓɔ̀ nìŋ woò ɓɛìŋ màŋ mìè ɓɛ̀ɛ̀pɔ̀ɔ naanààŋ è nyaàiŋ dè àŋ dàwiiŋ nyàŋ.

⁹ Hɔ̀àneìŋ tùùyà aŋ dàwiiŋ nyàŋ, esaɓù kɛ̀ nàŋ gè maŋ nyɛ̀nɛŋ gɔuiŋ màŋ kùàŋ sùà yaà maŋ kpèè miŋ màŋ.

¹⁰ Nyɛ̀iŋ nààŋ bà guùŋ gbiŋ mùŋ yaà naàŋ wo nyuùŋ jɛ̀ì. Yèè wo Dayà, wo nyùnɔ̀ɔŋ naum bànè wɔ, kòò wò yààùm naàŋ nyinie wèè maŋ kɛ̀ɛ̀nɛ̀ŋ ke kpèè siaŋ mààŋ ke yèɛ nauŋ teenè yɛ, yèè mùŋ douŋ nàŋ nyìmè tɛ̀ɛ̀.

¹¹ E tɛɛ gòòno fòo sèè pɛɛ naŋ nɔ̀ŋ anyùùŋ nyaŋ fè àŋ Juùù nyaŋ ɔ̀ɔ̀ àŋ Juùù nyuuŋ, ɔ̀ɔ̀ aiŋ jàà kpùa ɔ̀ɔ̀ naŋ nɔ̀ŋ anyuùŋ gò jàà kpùa, anyùùŋ maŋ fuɔŋ joo, anyùùŋ ɓie gò nyìmàŋ è kèè kò ɓài, aŋ ɗo, yèè anyùùŋ nyaŋ fè àŋ ɗo nyàŋ, kɛɛ wo Jisɛ̀ Kulaì nàŋ yaà e nɛ̀ɛŋ gbiŋ, e kìlà wo Jisɛ̀ Kulaì wò yaà e nɛ̀ɛŋ gbiŋ sùà.

¹² Nyɛ̀iŋ nàŋ yaà anyùùŋ nɛɛmaŋ nyàŋ. Wo Dayà mànàìŋ yèè wòiŋ tàeɗùù wèè naŋ nɔ̀ŋ anyunùuŋ. Weètii, nìŋ kuwa naŋ kùwìè ke nyowo, ke jiio sùà wèè naŋ nyɛ̀nɛ̀ŋ e keì sìàŋ, naŋ dèèyè nyɛ̀iŋ bi, naŋ kùwìè ɓɛ̀ɛ̀jàa yaà maŋ jii tɔumtɔ̀ùm.

¹³ Jàaìŋ aŋ dàwiiŋ nyàŋ kùàŋ dìì, e kìlà niŋ juuyà wo nyùùŋ gbiŋ hakɛ̀ sèè wò jààùm è nànàŋ. Nìŋ kuwa naŋ jùùyà aŋ dàwi hakɛ̀ màànààŋ nɔŋ wo Kanaà Jisɛ̀ Kulaì naiŋ jùùyè hakɛ̀ lɛ.

¹⁴ E mànaŋ kuwa e sɛmɛmaŋ e nìàŋ e keì ɗewe gbiŋ. Tiŋ nàŋ jaanàŋ manɛ̀ŋ maŋ gbiŋ koɓɛ̀ guùŋ kpaŋ.

¹⁵ Ke jii fàaà wo Jisɛ̀ Kulaì kiɛ̀ŋ lɛ nàŋ yaà wèè keiŋ yɛ̀mɛ̀ diɛŋ e nyaàiŋ dè e ɗèweɛ̀ nìŋ nyɛnɛ̀ŋ lɛ̀. E wèè esàɓù ke jii fàa yɛɛ̀ wo Dayà naiŋ nyààŋ koɓɛ̀ guùŋ ke kpùnàŋ guùŋ sùà, weètii kɛ̀ɛ̀nɛìŋ ke sɛ̀ gèe koɓɛ̀ Dayài.

¹⁶ Tɔ̀ ke miè gbìaàŋ e nyaàiŋ dè wo Jisɛ̀ Kulaì dià maŋ jiiŋ màŋ sùà. Kààaìŋ e kìlà niŋ kiɛ̀ŋ maŋ mìè gòo koɓɛ̀ aŋ dàwiiŋ nyàŋ e jiikɛ̀ɛ sùà. Dààaìŋ maŋ nùŋ, e nyaàiŋ dè wo Jisɛ̀ Kulaì, yèè maŋ nùŋ nɛɛmaŋ. Dààaìŋ wɔŋ nùŋ ke sɛ̀ gèe koɓɛ̀ Dayài maŋ jiiŋ màŋ sùà.

¹⁷ E nɛ̀ɛŋ gbiŋ nìŋ woà ɔ̀ɔ̀ nìŋ nyɛnɛŋ lɛ̀, e nɔ̀ŋ nyɛ̀nɛŋ niŋ e dèè Kanaà Jisɛ̀ Kulaì sùà, nààŋ nìŋ kiɛ̀ŋ ke sɛ̀ gèe koɓɛ̀ Dayài e saɓùuŋ nɛ̀ sùà lɛ.

Ko sìe titi muìŋ wɔŋ nyiiŋ jɛiɔ̀ sùà

¹⁸ Nyɛ̀iŋ nààŋ jɔ̀ùŋ nèè yɛ̀ɛ̀ nyaŋ, jɔ̀ɔ̀lɔìŋ aŋ faniŋ nyàŋ dìì. E tòmoɛ̀ lɛɛ̀ nìŋ kuwa naŋ nyɛ̀nɛ̀ŋ nààŋ nìŋ yaà anyùùŋ màŋjɛ̀wɛ̀ wo Kanaà Jisɛ̀ lɛ.

¹⁹ Nyɛ̀iŋ nààŋ felaa kùwìè jɔùŋ nyaŋ, mànaìŋ aŋ jawèiŋ nyàŋ, yèè ɓɔ̀ nìŋ kuwìà nyiŋ è siwè naanààŋ.

²⁰ Jɔ̀àkàiŋ jɔa nyàŋ, jɔ̀ɔ̀lɔìŋ anyuùŋ kòmaiŋ nyàŋ dìì e teenga gbiŋ, tɛɛ̀ nàŋ fɔɔyɛ̀ wo Dayà jii.

²¹ Nyɛ̀iŋ nààŋ nyuùŋ kòmaŋ nyàŋ, ɓɔ̀ nìŋ nyɛ̀nɛ̀ŋ àŋ jɔ̀àiŋ nyàŋ àŋ do kɛ̀ɛ̀nɛ̀ŋ màŋ jii fiìì è weèiŋ, sèè nìŋ nyɛnɛŋ yɛi, aŋ naàŋ nyɛ̀nɛ̀ŋ è keì è doiŋ fɔ̀ɔ̀yɛ̀ jii e kìlà aŋ naàŋ ɓɛìŋ nyɛ̀nɛ̀ŋ è keì kɛnɛ gbiŋ.

²² Nyɛ̀iŋ nààŋ ɗo nyàŋ, jɔ̀ɔ̀lɔìŋ aŋ kɛ̀ɛ̀nɛiŋ nyàŋ dìì e teenga gbiŋ. Ɓɔ̀ nìŋ nyɛ̀nɛ̀ŋ niŋ nɔŋ esaɓù kɛ̀ àŋ yààìŋ yɛɛmɛ ɔ̀ɔ̀ èsaɓù kɛ̀ nìŋ manaŋ aiŋ mànàŋ. Nyɛ̀nɛìŋ niŋ e tɔ̀ɔ̀nyaàŋ e yìwìà maŋ jiiŋ màŋ sùà esàɓù e ɓɛ̀ɛ̀jàa nìŋ kuwa wèè wo Kanaà lɛ.

²³ E tòmo gbiŋ nìŋ nyɛnɛŋ, nyɛ̀nɛìŋ niŋ maŋ jìì fàaiŋ màŋ sùà, e teenè mààŋ nìŋ yaà niìŋ nyinie wèè wo Kanaà Jisɛ̀ wuŋ bi, kɛɛ e fè wèè ànyùùŋ.

²⁴ Jàaìŋ jii kɛ̀ wo Kanaà Jisɛ̀ Kulaì doiŋ nàŋ kiɛ̀ŋ wèè e nɔ̀ŋ e jìwààjɛ̀wɛ̀ e yìwìà e yèɛ wò naŋ bànè hàa wèè anyunùuŋ nyàŋ lɛ sùà. Wo Jisɛ̀ nàŋ yaà wo Kɛ̀ɛ̀nɛŋ kɛnɛɔ̀ nìŋ jɔɔlɔ̀ dìì wɔ.

²⁵ Anyuùŋ nyɛ̀nɛ̀ŋ maŋ tùwo naanààŋ nyaŋ gbiŋ do nàŋ yɛ̀mɛ̀ e jìwààjɛ̀wɛ̀ wèè maŋ tùwo naanààŋ maŋ gbiŋ àŋ naŋ nyɛ̀nɛ̀ŋ maŋ, esaɓù kɛ̀ wo Dayà gbaì anyùùŋ gbiŋ e ɗèwè guùŋ nɛ sùà.