Juù 1 - WƆŊ FƐ̀Ì EBÒ SÌÀŊ DAYÀA

¹ E yìwìà miàim Juù sìwè, nàŋ yaà sìngìè wɔŋ fɛi wɛɛ̀ŋ. Mìŋ yaà wo ɗo wèè Jisɛ̀ Kulaì, yèè yàwi Jìiiŋ è yaà aŋ wùìya Jisɛ̀ Kulaì sùà. Mìŋ yaà sìngìè koɓɛ̀ anyùùŋ nyaŋ gbiŋ wo Dayà, wo Dèdaà naŋ tàeɗùù yèè wò manaŋ nyàŋ, yèè àŋ yaà e gààŋ Jisɛ̀ Kulaìɛ dìì nyaŋ.

² Tɔ̀ wo Dayà kiɛ̀iŋ e kpùùmàŋ ke nyowo gbee, ke jii fàa, yèè e mànaŋ gò jùà jɛ̀wɛ̀.

Aŋ kààmɔɔŋ tòa nyàŋ

³ Nyɛiŋ nààŋ dàwi mànaim nyàŋ, tɔɔɓaa mìŋ yaà wa zoolo sɛmɛ e wànàŋ gbee sùà wèè ka sìngà ko nɛ̀ɛ̀iŋ niìŋ e nyaàiŋ dè e jòèyè nɛɛmaàŋ è naiŋ gòònò e fèemàŋ lɛ. Kɛɛ sɔɔ̀ ka sìngà kaiŋ dawè wèè naŋ dè e hààwe bi gòlò jɛwɛ e yèɛ wo Dayà naŋ kìɛ̀ŋ anyunùuŋ nyàŋ yèè e bà gbiŋ gò jòò jɛ̀wɛ̀ lɛ.

⁴ Anyuùŋ gò nyìmàŋ Dayà nyaŋ, aŋ bà nyiŋ àŋ kɔ̀ɛ̀ kùàŋ dìì àŋ wi sɛ̀ɛ̀ e tɛɛ ke gbùnu sùà e gòiŋ nyìmàŋ, aŋ yè nyaŋ yaà pɔ̀ɔ sùà ke miè gbìaàŋ nyaàiŋ dè e tɛ̀ɛ̀tɛ̀ɛ̀ Dayà wiɔ̀ nyaŋ, wèè kàìsa aŋ yɛmɛ̀ ke kàfaì wèè maŋ kpèè naanààŋ nyiŋ màŋ, aŋ yè nyaŋ naŋ gè wo Jisɛ̀ Kulaì wo kɛ̀ɛ̀nɛŋ yèè wo Kana wiɔ̀ kùàŋ dìì nyaŋ. E gɔuo sùà, wɔŋ fɛ̀ì Dayàa wa kpɛ̀ɛ̀yɛ̀ wòò e kèì e kitiɛ̀ wo Dayà naŋ nyiŋ hèè diɛŋ lɛ̀.

⁵ Jòòpɛɛ nàŋ nyìmàŋ tɛɛ̀ gbiŋ, kɛɛ, mìŋ manaŋ ka kɛ̀lɛ̀ɛ̀ maŋ jiiiŋ màŋ koɓɛ̀ e ɗeweɛ̀ wo Kanaà Dayà naŋ wa jòèyè anyùùŋ ko Ezɔ̀ɛ̀ nyaŋ e yìwìà e dìì fùɔ̀ŋ Ijèɛ diɛŋ lɛ̀, tii naŋ mààŋ, yèè wò naŋ pɔ̀ɔ̀pɔ̀ɔ̀ aŋ yè nyaŋ gò wa haawè nyaŋ.

⁶ Jàaìŋ e kèì aŋ màikà nyaŋ jii aŋ yè nyaŋ gò wa jɛ̀ì màŋ toomo nyiŋ màŋ wo Dayà naŋ nyiŋ wa jàà maŋ, kpeiŋ àŋ naŋ yèwè maŋ toomo nyiŋ màŋ yèè àŋ naŋ gììyè maŋ gbòò nyiiŋ bi màŋ kɛ̀ɛ. E wèètii wo Dayà naŋ nyiŋ wa dìkìè maŋ jɔ̀ɔɔ wèè fɔfɔ̀fɔ, ke nyiwì kpùɛ dìì ko yèi wo Dayà naŋ nyiŋ gbìɛ̀ŋ wèè aŋ fòlà ke ɗɔ̀ɔ̀ kiti hàaà lɛ, e kìlà wo Dayà do nyiŋ wa nàwèè nàŋ pɔ̀ɔ̀ɓɛ̀ɛ.

⁷ Jàaìŋ ko Sɔdɔ̀ùŋ yaà ko Gòmolà jii, yèè maŋ jawa gbɛ̀ɛ̀ kɔɔ miŋ màŋ. Anyùùŋ bi naŋ wa nyɛ̀nɛ̀ŋ mààŋ aŋ màikà nyaŋ naŋ wa nyɛ̀nɛ̀ŋ lɛ. Àŋ naŋ wa tòòmò maŋ kpùnaŋ nyiŋ màŋ wèè maŋ kèì nàànààŋ ke yɛ̀ɛ̀ hmɔtu kà tinàŋ gbiŋ nyìniaŋ. Àŋ naŋ kɔ̀ e nìmìlà kèì nyìngà e hmɔɔ̀ŋ kùwa dìì wèè nyiiŋ gèe gò jùà julɔfɔ, wèè e nɔ̀ŋ e gòo sengèì wèè anyùùŋ nyaŋ gbiŋ.

⁸ Anyùùŋ nyaŋ mìŋ yaà wòò kii nyiŋ nyàŋ, àŋ yaà mààŋ anyùùŋ gò maŋ gɔa nyàŋ pɔɔpɔ̀ɔ̀ maŋ kpùnàŋ nyiiŋ bi màŋ maŋ jùumù sùà nyaŋ. Àŋ giiyà e gààŋ tòòmò Dayàa maŋhɛɛ, yèè aŋ fè maŋ mìè ɓɛ̀ɛ̀pɔ̀ɔ koɓɛ̀ aŋ màikà nyaŋ ko àìjɛnɛ̀ŋ.

⁹ E teengaà wo Dɛwìɔ yaà wo kànà aŋ màikà nyaŋ wo Maikɔ̀ àŋ yaà wa kpàànè kpaane sùà nyààŋ e nyaàiŋ dè kɛ̀ ɓòò nàŋ ɓemàŋ e dìè wɛ̀ijìɔ Mòòzeɛ̀ wèè aŋ niŋ sìà lɛ, wo Maikɔ̀ gò wa nyìnìàŋ wò Dɛwìɔ è tɛɛmànaŋ wèè wouŋ wòò è keì naanààŋ, kɛɛ wò naŋ woò wààŋ, “Wo Kanaà Dayà nàŋ doum nàŋ hèè e kiti diɛ̀ŋ.”

¹⁰ Kɛɛ anyùùŋ nyɛɛ̀ŋ àŋ diɛ̀ŋ e nɛ̀ŋ gbiŋ e yèɛ fè nyiŋ dìkà jiikɛ̀ɛ lɛ̀, e kpùlìà manɛ̀ŋ maŋ àŋ kuwa jiikɛ̀ɛ weè miŋ màŋ, àŋ yaà mààŋ aŋ yìlì, yèè manɛ̀ŋ guùŋ miiŋ nàŋ jìwè nyiìŋ.

¹¹ Wo Dayà do nyiŋ nàŋ nimilà nyìnga, àŋ naŋ dè ke dòmaàŋ wo Kiìŋ naŋ wa ɓemè yɛ diɛŋ. Àŋ fɔ̀ɔ̀nɔ̀ŋ e wùànàŋ nɛɛnɛŋ àŋ gbìàŋ nyiŋ bi e keì ɓàaà wo kèèlà Dayàa Bàlaàŋ naŋ wa nyɛ̀nɛ̀ŋ lɛ sùà. Àŋ gangà màànààŋ wo Kolà naŋ wa gangà lɛ, yèè àŋ pɔɔpɔ̀ɔ̀ màànààŋ wò naŋ wa pɔɔpɔ̀ɔ̀ lɛ.

¹² Aŋ kààmɔɔŋ kùwìè maŋ kàà kii naanààŋ nyɛɛ̀ŋ àŋ yaà anyuùŋ naanààŋ e tɛɛiŋ, àŋ yaà mààŋ le zààmàŋ naŋ sɛ̀ɛ̀ e nɛ̀ŋjeɛ̀ nìŋ jiiyà koɓɛ̀ guùŋ nɛ sùà. Àŋ naŋ nɔŋ kpɛɛ̀ŋ wèè nyiŋ bi. Àŋ yaà mààŋ ko fuùŋ kùwaì wɔŋ dùfòì miinyàŋ, yèè maŋ gɔ̀à fè sɔ̀à lɛ. Àŋ yaà mààŋ maŋ kuù gò kòmàŋ e pɛɛ nɔ̀ŋ sɛ̀ɛ̀ dìì, maŋ yè maŋ àŋ naŋ fie yèè màŋ naŋ fɔ̀ kpɛlɛmɛɛŋ lɛ̀.

¹³ Maŋ kpèè sàngè nyiŋ màŋ tɔɔ̀ miŋ bi mààŋ e fɔ̀ù bɔ̀ìŋ juwo diɛŋ. Àŋ yaà mààŋ maŋ ɗu gò jɛ̀ì è dìì aŋ yè nyaŋ wo Dayà wa bànè ke nyiwì kpùɛ dìì ko hàa weè nyiŋ ko jàhamaŋ wèè julɔfɔ lɛ̀.

¹⁴ Wo Inɔ̀ nàŋ yaà maŋ kpoo sùònò suono dìà nɔɔnɔŋ le tìyèeɛ̀ e yìwìà wo Adamàŋ. Wuŋ naŋ wi wa wòò e kèì anyùùŋ nyɛɛ̀ŋ e gɔuo sùà wààŋ, “Wo Kanaà do nàŋ hnè yaà aŋ màìkà nɛɛmaŋ taasùùŋ jika zimgbe,

¹⁵ wèè wo hàà kiti anyùùŋ nyaŋ gbiŋ diɛŋ. Wò do nàŋ ngàìnɓù anyuùŋ gò nyìmàŋ Dayà nyaŋ gbiŋ wèè maŋ jùumù maŋ gbiŋ àŋ naŋ wa dè nyɛ̀nɛŋ màŋ e kpùlìà maŋ mìè gbòà ɓɛ̀ɛ̀pɔ̀ɔ naanààŋ maŋ kinɛiŋ àŋ naŋ wa dè gbòa maŋ nyiiŋ gè nyiŋ màŋ sùà maŋ e nyaàiŋ euŋ dè.”

¹⁶ Anyùùŋ nyɛɛ̀ŋ gboo naanààŋ wèè nyùùŋ yèè àŋ sie nyùùŋ jii, àŋ kuwa nɔŋ e gòngò nàànààŋ nyiŋ bi lɛ̀ maŋjɛ̀wɛ, àŋ kɛɛ maŋ nyòngà nyaàiŋ dè nyiŋ bi, àŋ nyaaŋ nyààŋ aŋ bà wèè kàìsa aŋ yɛmɛ̀ ke dòmàŋ e wùmaŋ nyiŋ.

Maŋ mìè gòo yèè manɛ̀ŋ wèè nyɛ̀nɛŋ

¹⁷ Kɛɛ nyɛ̀iŋ nààŋ dàwi mànaim nyàŋ, jàaìŋ maŋ keì maŋ aŋ kèèlà tàeɗùù Kana wiɔ̀ Jisɛ̀ Kulaì naiŋ wa woò e gɔuo sùà lɛ jii.

¹⁸ Àŋ naiŋ wa woò nyààŋ, “Sèè maŋ ɗɔɔ dìàmaaŋ màŋ gbɛɛ wa nàwèè, anyùùŋ bà do nàŋ fòlò aiŋ hiilè, anyùùŋ nyaŋ naŋ dè e ɗèwè Dayà gò nyìmàŋ nyiŋ bi lɛ̀ maŋjɛ̀wɛ nyàŋ.”

¹⁹ Ànyùùŋ nyɛɛ̀ŋ nàŋ hiàŋ e fèemàŋ gòòno, aŋ yè nyaŋ gongà kɛ̀ e kèì wɔŋ nyiiŋ wɛɛ̀ŋ nɔŋ ke fòolà yɛɛ̀ nàŋ kùwà nyiìŋ e gààŋ diɛŋ, yèè aŋ kuwà wò Jìnàŋ Dayàa màŋ jii nyiŋ màŋ sùà.

²⁰ Kɛɛ sèè è nɔ̀ŋ wèè nyɛ̀iŋ nààŋ dàwi mànaim nyàŋ, kùnoìŋ nɔŋ nyɛ̀nɛ̀ŋ nyɛ̀iŋ bi wèè niŋ nyìngà sùà wèè e hààwè nɛɛmaàŋ nìŋ kuwa lɛ̀. Zòòloìŋ e gààŋ Jìnàŋ Dayàa sùà,

²¹ yèè nyɛ̀iŋ bi niŋ nɔ̀ŋ e mànàŋ Dayàa sùà, niŋ fòlà wo Kana wiɔ̀ Jisɛ̀ Kulaì wo kiɛ̀iŋ wɔŋ nyiiŋ gèe gò jùà e yìwìà ke nyowouŋ nɛɛ̀ŋ sùà.

²² Anyùùŋ nyaŋ yaà e sikà sùà nyaŋ, yɛ̀mɛìŋ nyiŋ nyowo niŋ kpuumàŋ nyiŋ.

²³ Jòèyeìŋ nyùùŋ gbiŋ wo yèɔ manaŋ wo jòèyà wɔ màànààŋ nìŋ henàŋ zòkpò wo nyùùŋ bà e yìwìà e hmɔ̀ɔ̀ŋ sùà lɛ. E jùù kpùlìà ke nyowo nɔ̀ŋ jiiiŋ màŋ diɛŋ wèè wo nyùnɔ̀ɔŋ manaŋ ke nyowo wɔ̀. Kɛɛ wùaìŋ anyùùŋ nyaŋ naŋ kùwò ninaŋ esàɓù maŋ kpèè kùwà ninaŋ nyiŋ màŋ sùà nyaŋ, e pɛɛ nɔ̀ŋ maŋ dèè kɔɔ nyiŋ màŋ.

E zòòlo wèè tɛ̀nɛŋ

²⁴ Wo Dayà wuŋ guùŋ nɔŋ naum ɓɛ̀nɛ̀ŋ yɛ̀mɛ̀ diɛŋ wèè muŋ go nàŋ sɔ̀ɔ̀, e kìla woum nyɛ̀nɛ̀ŋ maŋ nɔ̀ŋ zɛ̀nɛum yèè e zɔlɔ̀ sùà e jòòwouŋ nɛ̀ fɛɛ̀feìŋ.

²⁵ Kìɛ̀ŋ wiìŋ e tɛ̀nɛŋ wo Dayà Nyuùŋ Jòèye wiɔ̀, esàɓù Jisɛ̀ Kulaì wo Kana wiɔ̀ sùà. Ko tɔ̀ɔ̀tù e ɗuunyaàŋ yèè nàaŋ yèè julɔfɔ è siaŋ maŋ jòòwò Dayà, mauŋ kìɛ̀ŋ e ɓɛ̀ɛ̀jàa, mauŋ tɛnɛ̀ŋ wèè e gaàuŋ nɛ̀ tɔɔɓaa. Àmiinàŋ.