Jìiiŋ 3 - WƆŊ FƐ̀Ì EBÒ SÌÀŊ DAYÀA

E tòmò kìì milèɛ

¹ Nyɛ̀iŋ nààŋ wùìyaim nyàŋ, nyɛ̀iŋ nààŋ zimgbeiŋ ɓɔ̀ nìŋ fɛ̀ɛ̀ wèè naŋ nɔ̀ŋ àŋ kààmɔɔŋ. Jàaìŋ jii kɛ̀ wo Dayà do wa nàwèè nàŋ gbàì yàwi nààŋ kààmɔ̀ɔ̀ŋ maŋ Sàwà Dayà nyaŋ e tɔ̀ɔ̀nyaàŋ nyìnga sùà e nìàŋ anyuùŋ gbànaŋ nyàŋ.

² Yàwi nààŋ gbiŋ è nyɛ̀nɛ̀ìŋ maŋ keì bàa zimgbe. Sèè wo nyùnɔ̀ɔŋ gò duonò è gbòauŋ nɛ̀ sùà wɔ, wo kuwà è tɔ̀mɛ yèè wò ɓɛ̀nɛ̀ŋ yɛ̀mɛ̀ ke kpùnauŋ nɛɛ̀ŋ gbiŋ diɛŋ.

³ Sèè è hɔ̀ɔ̀ìŋ wɔŋ kaì fàà kpuu wo sòo ko nyààŋ è naŋ wuŋ tùlìè jii wèè euŋ nyɛ̀nɛ̀ŋ wo wi kòmàŋ mìè le, kɛ̀ è ɓɛ̀nɛ̀ŋ nyɛ̀nɛŋ ke kpùnauŋ nɛɛ̀ŋ ke kà koɓɛ̀i gbiŋ è manaŋ lɛ̀.

⁴ Yɛ̀mɛìŋ maŋ meeè maŋ miiŋ pɛɛ, jòòpɛɛ màŋ naŋ dɛɛdɛ̀ɛ̀ yèè wɔŋ dùfòì gààŋ nàŋ kɔà miìŋ, kɛɛ e nɛ̀ɛŋ kpàà miìŋ e dì lɛ, è yaà nɔŋ e gbiì jɔ̀à wèè maŋ kà koɓɛ̀i gbiŋ wo nyuùŋ dùùnyaŋ miŋ nɔɔ̀ŋ manaŋ wèè maŋ ka lɛ̀.

⁵ Yɛi nɔŋ e milèɛ yaà, è naŋ tolòò maŋ nɛ̀ŋ kɔ̀ɔ̀ ke kpùnaàŋ e tɛɛ kɛɛ è kɛɛ maŋ nyòùngà maŋ keì gbeegbèè. Gòngoìŋ nɔŋ e ɗeweɛ̀ e hmɔɔ̀ŋ kpɛiŋ kpɛiŋ sie e ngòòlaà ɓie gbee e hmɔ̀ɔ̀ŋ lɛ!

⁶ E milèɛ è yaà mààŋ e hmɔ̀ɔ̀ŋ. È yaà e ɗuunyaŋ nyɛ̀nɛ̀ŋ kàaɓì, è jaa ko jɛ̀i niŋ niìŋ e kɔɔ wilɛ̀ sùà yèè è ɓaayà maŋ keì naanààŋ maŋ kpùnaŋ wi màŋ gbiŋ sùà. E sìà e ɗuunyaŋ nɔ̀ŋ wilɛ̀ e hmɔ̀ɔ̀ŋ e yèɛ hnàŋ ko nɛ̀ɛ̀iŋ niìŋ e yìwìà ko jàhamaŋ kuŋ bi lɛ̀.

⁷ Aŋ nyìlì maŋ sɔ̀ŋ tiinàŋ kà tinàŋ gbiŋ tèènè mààŋ aŋ wòì, aŋ nyilì maŋ kɔmɔŋ, aŋ yilì gɔ̀ɛ̀ɛ̀ dìì, e kpùlìà aŋ yìlì juwo nyàŋ, yàwi nààŋ nyuùŋkpùuŋ nyàŋ naŋ nyiŋ ɓɛ̀nɛ̀ŋ gɔ̀ɔ̀yɛ yèè è gɔ̀ɔ̀yɛ̀ manɛ̀ŋ gè nyiiŋ màŋ gbiŋ.

⁸ Kɛɛ wo nyuùŋkpùuŋ gbiŋ kòò wò ɓɛ̀nɛ̀ŋ wa wèè wo gbìàŋ è milèɛ è gɔ̀ɔ̀yɛ dìì. È yaà e keì naanààŋ dìa sùà wo nyùùŋ fè niŋ ɓɛ̀nɛ̀ŋ yɛ̀mɛ̀ diɛŋ, è naŋ dìè maŋ goò naanààŋ jìwà nyùùŋ.

⁹ Tiŋ è toomàìŋ eiŋ tɛ̀nɛ̀ŋ Kanaà wo Dèda wiɔ̀ Dayà, e kìlà eiŋ niŋ toomò eiŋ gbòò anyùùŋ, aŋ yè nyaŋ wo Dayà naŋ banè àŋ nauŋ teenè nyaŋ.

¹⁰ E yìwìà e mìlè guùŋ bi diɛŋ ko nyaàŋ wiì è tɛnɛ̀ìŋ e kìlà eiŋ gboonò. Nyɛ̀iŋ nààŋ wùìyaim nyàŋ, tɛɛ̀ ɓɔ̀ è nɔ̀ŋ yɛi!

¹¹ E wuiyè sengèì yaà e wùìyè maŋ hɛiŋ fè fòlà ko kòì guùŋ.

¹² Nyɛ̀iŋ nààŋ wùìyaim nyàŋ, ke feè kùù fè ɓɛ̀nɛ̀ŋ kòmàŋ ke ɔlè kòmàŋ, yèè gbɛ̀mɛ̀ɛ̀ŋ kuu fè kòmàŋ kè feè komaŋ. Ɗewe gbiŋ fè ɓɛìŋ wèè è wùìyè màŋ hɛiŋ e fè è wuiyè tìa.

E jiikɛ̀ɛ naŋ yèwè ko àìjɛnɛ̀ŋ lɛ

¹³ Ɓòò naŋ kɛ̀ɛ̀jii yèè wò jaa e keì jii e tɛɛiŋ? Tɔ̀ɔ̀ niŋ e yìwìà wɔŋ nyiiŋ gèe siaŋ mɔɔ̀ŋ sùà, yèè maŋ kpèè siaum màŋ mùŋ nyinìàŋ e jɔ̀ɔ̀lɔ dìì e yèɛ folo e jiikɛ̀ɛ sùà lɛ.

¹⁴ Kɛɛ sèè mùŋ nɔ̀ŋ wo nyuùŋ gè le koo, mùŋ naŋ kɛ̀ɛ̀fɛ̀ɛ̀, yèè mùŋ manaŋ e nɛ̀ɛŋ gbiŋ wèè muàŋ guùŋ kpò nɔŋ, ke jii mɔɛ̀ŋ sùà, ɓɔ̀ mùŋ kɛ̀ɛ̀ màŋ yòngà wèè è jiikɛ̀ɛum bi kɛ̀ màŋ sɛɛ̀ e jùumù sùà kòɓɛ̀ è tɔ̀ɔ̀nyaàaŋ.

¹⁵ E jiikɛ̀ɛ mààŋ tɛɛ̀ e fè è yèɛ yewe wò Dayà sìwè lɛ, e jè ke fòolàa e ɗuunyaŋ lɛɛ̀ tii, wo Jìnàŋ Dayàa fè niìŋ sùà e jè Sɛ̀tanàaŋ wuŋ bi tii.

¹⁶ Koɓɛ̀i anyuùŋ gè le koo, yèè anyuùŋ kɛ̀ɛ̀fɛ̀ɛ̀, yèè anyùùŋ nyaŋ manaŋ e nɛ̀ɛŋ gbiŋ wèè nyiŋ guùŋ kpò yaà lɛ, kuuŋ maŋ keì gɔ̀àgɔ̀à sùà yèè maŋ keì naanààŋ gɛ̀wɛɛ̀ gbiŋ màŋ yaà.

¹⁷ Kɛɛ e jiikɛ̀ɛɛ̀ yewe wo Dayà sìwè lɛ e jiɛ̀jiɛ̀ɛ nàŋ yaà, è yaà sengei yèè è manaŋ ke jii fàa, è kuwìà nyùùŋ le siwè sìàŋ, è kuwa mɔ̀ɔ̀nɔŋ, è naŋ dìè ke nyowo yèè è hiàŋ maŋ tùwo siaŋ sìàŋ, e fè nyangè yèè e gò gbɛ̀ɛ̀ è kàaɓì kɔɔ.

¹⁸ Yèè ke kuù kòmàaŋ anyuùŋ bànè keì sùà àŋ nyuɔŋ ke jii fàa sùà lɛ e komàŋ nyiŋ nɛ̀ nàŋ yaà e tɔ̀ɔ̀nyaàŋ.