Jìiiŋ 1 - WƆŊ FƐ̀Ì EBÒ SÌÀŊ DAYÀA

¹ E yìwìà miàŋ Jìiiŋ sìwè, nàŋ yaà sìngìè wɔŋ fɛi wɛɛ̀ŋ. Mìŋ yaà wo ɓɔ̀ìjɔ̀à Dayàa yèè wo ɓɔ̀ìjɔ̀à Kanaà Jisɛ̀ Kulaìɔ. Mìŋ yaà sìngìè wɔŋ fɛi wɛɛ̀ŋ koɓɛ̀ anyùùŋ Dayà nyaŋ gbiŋ naŋ ɓààyè e ɗuunyaŋ lɛɛ̀ sùà nyaŋ. Mìŋ zuumàŋ nyɛ̀iŋ nààŋ gbiŋ.

Kiìŋ nàŋ yaà e hààwe yèè e jiikɛ̀ɛ

² Nyɛ̀iŋ nààŋ wùìyaim nyàŋ gèeìŋ e zɔlɔ̀ gbee sèè e wàà maŋ keì nyìnga kà tinàŋ gbiŋ fòlòìŋ feìŋ,

³ esaɓù nàŋ nyìmàŋ kɛ̀ sèè e hààweiŋ nɛ̀ kɔɛ̀ maŋ nɔnɔŋ tùaŋ dìì, è tɔɔ̀ kɛ̀ nàŋ mààŋ maŋ nɔnɔŋ tùaŋ mɛɛ̀ŋ sùà è jùà, e jìwàjɛ̀wɛ̀iŋ nɛ̀ nàŋ yaà e ɓɛ̀nɛiŋ nɛ̀ wèè naŋ kɔ̀à e hààweiŋ nɛ̀ feìŋ keleiŋ.

⁴ Nyɛ̀nɛìŋ niŋ e kpàŋ è kɔɔiŋ e gàaŋ niŋ kuwa e hààweiŋ nɛ̀ sùà lɛ e koàiŋ niŋ e haì ko dìaì niŋ fè sɔ̀à lɛ. Wèè kɛ̀ maŋ kpèèiŋ màŋ nɔ̀ŋ sengei e jùà jɛ̀wɛ̀ gbɛlɛiŋ e nɛ̀ŋ gbiŋ fè jòò jɛ̀wɛ̀. Weètii nyɛ̀iŋ gbiŋ ɓɔ̀ nìŋ soò màŋ kpèè siaŋ kɛ̀ɛ̀nɛŋ.

⁵ Sèè nyɛ̀iŋ nyɛɛ̀ŋ bà gbiŋ niŋ gò kùwìè è jiikɛ̀ɛ, wo dawè Dayà, wuŋ nàŋ kiɛ̀ŋ nyùùŋ kpùuŋ gbiŋ sengei e yìwìà ke jii fauŋ nɛɛ̀ŋ diɛŋ.

⁶ Kɛɛ wo nyùnɔ̀ɔŋ gbiŋ dawà wo Dayà wèè e nɛ̀ŋ wɔ, wo kuwiè e hààweɛ̀ yèè ɓɔ̀ wò sikà gbiŋ. Esaɓù kɛ̀ wo nyùnɔ̀ɔŋ gbiŋ naŋ dàwè Dayà e sìka sùà wɔ, wò yaà maàŋ e bɔ̀iŋ nɛ̀ wɔŋ juwoɔ̀. Sèè wɔŋ fòìɔ dè nɔŋ wɔŋ juwoɔ̀ ɓulanàŋ e bɔ̀iŋ nɛ̀ è jowo è deye.

^7-8 Sèè mùŋ nɔ̀ŋ wo nyùùŋ mààŋ wii, wo yèɔ kuwa ke jii muŋgò wɔ, e nɔ̀um ke jii kɛ̀ muŋ naàŋ yɛ̀mɛ̀ è nɛ̀ŋ gbiŋ wò Kanaà Dayà sìwè.

E gòo e nyaàiŋ dè anyuùŋ pɔ̀ɔ yèè anyuùŋ bàne

⁹ Aŋ wùìya kɛ̀ɛ̀nɛ̀ŋ hààwe wi nyàŋ naŋ pɔɔ̀ nyaŋ, aŋ gè zɔlɔ̀ esaɓù kɛ̀ wo Dayà do nyiŋ nàŋ joowò.

¹⁰ Yèè anyuùŋ hààwè Dayà nyaŋ naŋ banè nyaŋ aŋ gè zɔlɔ̀ sèè wo Dayà deeyà nyiìŋ, esaɓù kɛ̀ wo nyuùŋ bàneɔ̀ wò yaà mààŋ maŋ kuùfɛ̀ɛ̀, maŋ yè maŋ fè kòlà maŋ fà maŋ.

¹¹ Sèè e gɔɛɛ̀ folo e zùzùiŋ nɛ̀ fuuù e kuù wùìyèɛ, kɛ̀ maŋ kuùfɛ̀ɛ̀ miŋ màŋ tulo, kɛ̀ e siaŋ sìàŋ miŋ nɛ̀ hàì dìa. E ɗeweɛ̀ lɛɛ̀ è kaaìŋ koɓɛ̀ wo nyuùŋ bàneɔ̀. Wò do nàŋ jèè nyìnìè maŋ tòmouŋ màŋ wo fà wo miŋ jòà jɛ̀wɛ̀.

E nɛ̀ɛŋ nyɛnɛŋ wo nyùùŋ sɛ̀ɛ̀ maŋ jùumù sùà lɛ

¹² E zɔlɔ̀ yaà anyùùŋ nyaŋ jeeyà tɔ̀ɔ̀nyaàŋ sùà aŋ kɔ̀ɛ̀ e wàà e keì nyìnga dìì aŋ fè sɔ̀à nyaŋ. Sèè àŋ kɔɛ̀ e wàa bi dìì àŋ maaŋ, wo Dayà do nyiŋ nàŋ jàà kùàŋ dìì aŋ yɛ̀mɛ̀ e pààwà ke ɓɔ̀ɗì wɔŋ nyiiŋ gèe gò jùàa wò naŋ wa ɓèmè e ɗààhiì wèè wo fè anyùùŋ nyaŋ mànaùŋ nyaŋ.

¹³ Sèè eiŋ kà e wàa dìì wèè eiŋ nyɛ̀nɛ̀ŋ e keì naanààŋ, ɓɔ̀ è woò wìà, “Wò Dayà naŋ wi wɔ̀ɔ̀ wèè eiŋ nyɛ̀nɛ̀ŋ è keì naanààŋ lii.” Esaɓù kɛ̀ e keì naanààŋ fè tàwè wò Dayà kè jiiò sùà, yèè wuŋ bi fè nyɛ̀nɛ̀ŋ ke jìì nyùùŋ do tàwè sùà wèè wo nyɛ̀nɛ̀ŋ è keì naanààŋ.

¹⁴ Manɛ̀ŋ maŋ tawà wo nyùùŋ jii wèè wo sɛ̀ɛ̀ maŋ jùumù sùà maŋ nàŋ yaà maŋ kèì wànàŋ naanààŋ maŋ ke jiiuŋ nɛɛ̀ŋ sùà. Miiŋ nàŋ nyɛ̀nɛùŋ wo gbìàŋ kùàŋ maŋ keì naanààŋ nyɛ̀nɛŋ sùà.

¹⁵ Kpeiŋ sèè e wànàŋ maŋ keì naanààŋ jɔ̀à wo nyùùŋ ke jiio sùà, yèè wo nyùùŋ bi jàà maŋ keì bi kùàŋ dìì, wò do naŋ gbìɛ̀ŋ kùàŋ maŋ kèì jùumù nyɛ̀nɛŋ sùà. Sèè wo nyùùŋ wò jeeyà maŋ jùumù sùà, ko jee ɗìuŋ niìŋ wò dò naŋ fɔ̀.

¹⁶ Nyɛ̀iŋ nààŋ wùìyaim nyàŋ, ɓɔ̀ nìŋ dangè wò nyùùŋ doiŋ zuwò.

¹⁷ Manɛ̀ŋ siaŋ màŋ gbiŋ è kùwàìŋ maŋ, wo Dayà nàŋ kiɛ̀ŋ wì miìŋ. Wo Dayàa yèɔ naŋ bànè manɛ̀ŋ maŋ kiɛ̀ŋ e gbolòùŋ lɛ e yìwìà ke nyiliɛ̀, wuŋ nàŋ kiɛ̀ŋ wì manɛ̀ŋ siaŋ. Wo Dayà fè vɔɔnɔ̀ŋ, yèè wo fè wi jùùyà kè nyìwì sùà.

¹⁸ Wo Dayà wuŋ bi naŋ ɗewè wèè wo wi nyɛ̀nɛ̀ŋ eiŋ nɔ̀ŋ aŋ jɔ̀àuŋ e yìwìà ke mìè gbìàŋ tɔ̀ɔ̀nyaàuŋ nɛɛ̀ŋ sùà. Wò naŋ tɛɛ̀ nyɛ̀nɛ̀ŋ wèè kɛ̀ e nɔ̀iŋ e nɛ̀ŋ kɛnɛ jiɛ̀jiɛ̀ɛ manɛ̀ŋ bàneuŋ màŋ tɛɛ.

Ɓɔ̀ mùŋ kòmàŋ kè mìè Dayàa ke kuii dìà, kɛɛ nyɛnɛ̀ŋ e nɛ̀ɛŋ kè naŋ woò lɛ

¹⁹ Nyɛ̀iŋ nààŋ wùìya mànaim nyàŋ, nyìmaìŋ tɛɛ̀! Tɔ̀ wo nyùùŋ gbiŋ nɔ̀ŋ fiò wèè wo kòmàŋ maŋ kàìŋ, kɛɛ ɓɔ̀ wò gbòà fiò. Ɓɔ̀ wò tuù fiò.

²⁰ Esaɓù kɛ̀ anyùùŋ nyaŋ tuù fiò nyaŋ, fè nyɛ̀nɛ̀ŋ màŋ kèì tɔ̀ɔ̀nyaàaŋ maŋ wò Dayà manaŋ wèè aŋ nyɛ̀nɛ̀ŋ maŋ.

²¹ Weètii gèeìŋ maŋ nyɛ̀nɛŋ kùwà niŋ naŋ màŋ yaà maŋ kpèè naanààiŋ màŋ gbiŋ kùàŋ sùà maŋ yè maŋ anyùùŋ nyaŋ yaà nyinie màŋ. Yèè maŋ miè gbìaŋ màŋ wo Dayà naiŋ gbìɛ̀ŋ maŋ jiio sùà maŋ, jɔ̀ɔ̀lɔìŋ miŋ dìì yèè niŋ nyɛ̀nɛ̀ŋ e nɛ̀ɛŋ màŋ naŋ woò lɛ. Esaɓù kɛ̀ ke miè gbìaŋ yii kuwa gààŋ wèè ke jòèyè wɔŋ nyiiŋ mɔɔ̀ŋ.

²² Ɓɔ̀ nìŋ kòmaŋ nɔŋ kè miè gbìaàŋ nìŋ do kuii dìà, kɛɛ nyɛ̀nɛìŋ e nɛ̀ɛŋ ke miè gbìaàŋ naŋ woò lɛ.

²³ Wo nyùnɔ̀ɔŋ gbiŋ komo ke mìè gbìàŋ Dayàa yèè wo fè nyɛ̀nɛ̀ŋ è yèɛ kè naŋ woò lɛ, wò yaà mààŋ wo nyùnɔ̀ɔŋ yɛmɛ̀ wuŋ bi wɔŋ mɛ̀ɛ̀mɛ̀ɛ̀ŋ sùà yèè wo yɛ̀mɛ̀ wuŋ bi màànààŋ wò yaà lɛ.

²⁴ Sèè wo nyùùŋ bi yɛmɛ̀ nɔŋ wuŋ bi wɔŋ mɛ̀ɛ̀mɛ̀ɛ̀ɔŋ sùà, wò haà nɔŋ wɔŋ mɛ̀ɛ̀mɛ̀ɛ̀ɔŋ fa, wò nyɛ̀ɛ̀nɛ̀ŋ e ɗeweɛ̀ wò yaà lɛ.

²⁵ Kɛɛ wo nyùnɔ̀ɔŋ naŋ kpɛ̀nɛ̀ŋ ke miè gbìaŋ yɛɛ̀ tɛ̀ɛ̀ wɔ, yèè wo jèè nyìnìè e nɛ̀ɛŋ kè naŋ woò lɛ, wo Dayà do nàŋ kpùùmò wo nyùùŋ mààŋ wii. Yèè ke miè gbìaŋ yii nàŋ yaà, ke sàwà jìlɛɛ̀ŋ joeyà anyùùŋ lɛ.

²⁶ Sèè wo nyùùŋ gbiŋ naŋ goungò ke jiio sùà kɛ̀ wò yaà wo nyuùŋ zòòlò Dayà kɛɛ wo fè yɛ̀mɛ̀ màŋ mìè gbòauŋ màŋ diɛŋ, wò yaà nɔŋ zùwo sùà wuŋ bi yèè e Dayà zòòlouŋ nɛ̀ kàìŋ nɛ è yaà e foofòò niŋ.

²⁷ Wo Dayà wo Dèda wiɔ̀, wo nyùnɔ̀ɔŋ wò naŋ jàà kùàŋ dìì wèè wo nɔ̀ŋ wo nyuùŋ zòòlò tɔ̀ɔ̀nyaàŋ wɔ, yèè wò yaà zɛ̀nɛuŋ e tɔ̀mɛ fèeùŋ wɔ̀, mɛɛ̀ŋ nàŋ yaà maŋ keì maŋ wò kuwa wo nyɛ̀nɛ̀ŋ maŋ, wèè wo kìɛ̀ŋ e kpùùmaŋ koɓɛ̀ aŋ jɔ̀à è dàà nyaŋ yaà aŋ jɔ̀ùŋnèèdàà nyaŋ, e teengaà àŋ yaà e keì nyìnga nyiŋ nɛ̀ sùà lɛ, e kìlà wo yɛmɛ̀ wuŋ bi diɛŋ wèè wo go nàŋ nyɛ̀nɛ̀ŋ màŋ keì nàànààŋ ɗuunyaŋ màŋ.