Jɔ̀ɔŋ 10 - WƆŊ FƐ̀Ì EBÒ SÌÀŊ DAYÀA

Ke kàɓànè wo nyuùŋ tùnìàŋ aŋ ɓaawaa nyàŋ

¹ Wo Jisɛ̀ naŋ woò wààŋ, “Miŋ woòiŋ e tɔɔɓaaà kɛ̀ wo nyùnɔ̀ɔŋ gbiŋ wo gò jɔ̀ɔ̀yɛ̀ wɔ̀ŋ gɔ̀ɔ̀ɔŋ yɛmgbɛ̀ wèè wo kà kòɓɛ̀i àŋ ɓaawaa nyàŋ joà lɛ, kɛɛ wò naŋ jɔ̀ɔ̀yɛ̀ wɔŋ faà joo bà wɔ, wò yaà wo nyuùŋ wùa.

² Wo nyùnɔ̀ɔŋ kɔɛ̀ wɔŋ gbàngiɔ̀ yɛmgbɛ̀ wɔ nàŋ yaà wo nyuùŋ tùnìàŋ aŋ ɓaawaa nyàŋ wuŋ bi.

³ Wo nyùnɔ̀ɔŋ jaà wɔŋ gbàngiɔ̀ feìŋ wɔ, yilà wɔŋ gbàngiɔ̀ wèè wo nyuùŋ tùnìàŋ aŋ ɓaawaa nyàŋ wo jɔ̀à koɓɛ̀i aŋ ɓaawaa nyàŋ joà lɛ. Aŋ ɓaawaa nyàŋ nyìmàŋ ke mièuŋ nɛɛ̀ŋ tɛ̀ɛ̀. Wò nyaaŋ aŋ gbiŋ maŋ dèè guùŋ guùŋ yèè wò koà nyiìŋ wèè aŋ gbìlà maŋ tàta màŋ sùà.

⁴ Wò sià nyiìŋ ko feìŋ sèè wò fulià nyiìŋ ko jɔɔlèe, kɛ̀ aŋ gbiŋ àuŋ dè maŋjɛ̀wɛ, esaɓù kɛ̀ aŋ ɓaawaa nyàŋ nyìmàŋ ke meìuŋ nɛɛ̀ŋ tɛ̀ɛ̀.

⁵ Aŋ ɓaawaa nyàŋ fè dè wò nyùùnèènyɛiŋ màŋjɛ̀wɛ. Aŋ gbiŋ àŋ duɔŋ aŋ ka esaɓù kɛ̀ aŋ nyimààŋ kè mièuŋ nɛɛ̀ŋ.”

⁶ Wo Jisɛ̀ naŋ nyiŋ wa wòò ke kàɓanè yɛɛ̀, kɛɛ aŋ gò wa nyìmàŋ è yèɛ wò Jisɛ̀ naŋ wa fasàì lɛ.

Wo Jisɛ̀ nàŋ yaà wo nyuùŋ tùnìàŋ Ɓaawaa Siaàŋ

⁷ Yèè wo Jisɛ̀ naŋ nyiŋ ɓɛìŋ woò wààŋ, “Miŋ yààìŋ wòò e tɔɔɓaaà. Miàŋ nàŋ yaà wɔŋ gbàngiɔ̀ wèè koɓɛ̀i aŋ ɓaawaa nyàŋ joà lɛ.

⁸ Anyùùŋ nyaŋ gbiŋ naim wa hnè ko feìŋ nyaŋ àŋ yaà wa anyuùŋ wùa, yèè aŋ ɓaawaa nyàŋ gò wa kòmàŋ kè mìè wò bà guùŋ pɛɛ.

⁹ Miàŋ nàŋ yaà wɔŋ gbàngiɔ̀. Aŋ yè nyaŋ gbiŋ doim nàŋ kɔ̀ɛ̀ ko sùà aŋ jɔ̀à nyaŋ do nàŋ nɔ̀ŋ jòèye nyiŋ. Esaɓù mɛ̀ sùà àŋ do nàŋ hnè yèè aŋ ka aŋ mɛ̀ɛ̀ŋ maŋ tùwa ɓou wèè aŋ gbìlà.

¹⁰ Wo nyuùŋ wùaà wò hnàŋ nɔŋ wèè wo wùà, wo jìwà wo nyùùŋ, yèè wo pɔ̀ɔ̀pɔ̀ɔ̀ maŋ nɛ̀ŋ. Kɛɛ mìŋ naŋ hnè wèè kɛ̀ anyùùŋ nyaŋ gbiŋ aŋ kɛɛnɛ̀ŋ wɔŋ nyiiŋ gèe, yèè aŋ wɔŋ kɛɛnɛ̀ŋ e dìa suà wuŋ kpaŋ.

¹¹ “Miàŋ nàŋ yaà wo nyuùŋ tùnìàŋ aŋ ɓaawaa siaàŋ, yèè mìŋ naŋ nyimèè wèè ka kìɛ̀ŋ wɔŋ nyiiŋ miɔ̀ŋ wèè aŋ ɓaawaa nyàŋ.

¹² Aŋ ɓɔìjɔ̀à tòmo nyàŋ fè mààŋ wò nyuùŋ tùnìàŋ àŋ ɓaawaa nyàŋ. Sèè àŋ yɛmɛ̀ nɔŋ wo pɔ̀ɔ̀wɛ̀i wò nɔ̀ŋ hinie, àŋ dùàŋ àŋ jòà aŋ ɓaawaa nyàŋ. Kpeiŋ kɛ̀ wo pɔ̀ɔ̀wɛ̀iɔ̀ kùwà aŋ ɓaawaa nyàŋ kɛ̀ aŋ gbànaŋ nyàŋ àŋ ɓaayè.

¹³ Aŋ ɓɔìjɔ̀à tòmo nyàŋ duɔŋ aŋ nyiŋ jòà esaɓù kɛ̀ aŋ gò kpɛɛ̀ŋ weè aŋ ɓaawaa nyàŋ.

^14-15 Miàŋ nàŋ yaà wo nyuùŋ tùnìàŋ aŋ ɓaawaa siaàŋ. Kà nyìmàŋ aŋ ɓaawaaim nyàŋ, yèè àim nyìmàŋ. Màànààŋ nɔŋ wo Dèdaà naim nyìmè lɛ, miàŋ pɛɛ kà nyìmàŋ wo Dèdaà. Yèè kà nyimèè wèè ka kìɛ̀ŋ wɔŋ nyiiŋ miɔ̀ŋ wèè aŋ ɓaawaaim nyàŋ.

¹⁶ Kòò mìŋ kuwa aŋ ɓaawaa joo bà àŋ yè nyaŋ fè wɔ̀ŋ gɔ̀ɔ̀ŋ àŋ ɓaawaa nyɛɛ̀ŋ kò sùà nyaŋ. Mìŋ kuwa ka nyiŋ hìàŋ koɓɛ̀ guùŋ nyiŋ pɛɛ, yèè àŋ do nàŋ kòmò ke miè miɛ̀ŋ. Kpeiŋ àŋ do nàŋ nɔ̀ŋ ke gbòò maŋ ɗòlònɛ̀ŋ aŋ ɓààwàà guùŋ.

¹⁷ “Wo Dèdaà mànàìm esaɓù kɛ̀ mìŋ naŋ nyimèè wèè kauŋ kìɛ̀ŋ wɔŋ nyiiŋ miɔ̀ŋ e fàa sùà, wèè kɛ̀ ko dòmàŋfeìŋ woim wuŋ ɓɛìŋ kiɛ̀ŋ wèè ka nɔ̀ŋ wɔŋ nyiiŋ gèeo sùà.

¹⁸ Wo nyùùŋ gbiŋ wo naàim jìwè sɔɔ̀ ka nyimèè miàŋ bi wèè wo nyùùŋ woim jìwà. Yèè mìŋ kuwa e gààaŋ wèè ka ɓɛìŋ kɛ̀ɛ̀ wɔŋ geɔ̀ sùà, màànààŋ nɔŋ wo Dèda miɔ̀ŋ naim woò wèè ka nyɛ̀nɛ̀ŋ lɛ.”

¹⁹ Maŋ mìè gbòà Jisɛ̀ mɛɛ̀ŋ naŋ wa ɓɛìŋ nyɛ̀nɛ̀ŋ aŋ Juùù nyaŋ aŋ gòònò tɛɛ e fèemàŋ nyiŋ.

²⁰ Aŋ Juùù nyaŋ zimgbe nyiŋ naŋ wa woò nyààŋ, “Wo jinàŋ naanààŋ yàaùŋ maŋjɛ̀wɛ! Wò naŋ sààŋ ke gbòà! Wèè kiìŋ nìŋ kumìàŋ e nɛ̀ɛŋ wò yaà woo lɛ̀?”

²¹ Kɛɛ aŋ Juùù nyaŋ bà nyiŋ naŋ woò nyààŋ, “Dièsɔa wo nyùnɔ̀ɔŋ wo jinàŋ naanààŋ yaà maŋjɛ̀wɛ wɔ̀ naŋ ɓɛ̀nɛ̀ŋ wòò maŋ keì mààŋ mɛɛ̀ŋ? Wo nyùnɔ̀ɔŋ kuwa wo jinàŋ naanààŋ mààŋ wii wɔ̀ fè ɓɛ̀nɛ̀ŋ nyɛ̀nɛ̀ŋ wò nyuùŋ zììlè lè fɛ̀ɛ̀ɔ wo yɛ̀mɛ̀ dìì!”

Aŋ Juùù nyaŋ gò wa jàà wò Jisɛ̀ kùàŋ dìì

²² È yaà wa naàŋ e tèèngà ke vuù gbeeɛ̀, yèè e teenga bi sùà àŋ yaà wa kòasùà e zòòlò jii jàa feìŋ wèè e teengaà àŋ naŋ wa yìlè ke Sààŋ Zòòlò Dayàa wèè aŋ tɔ̀ɔ̀tù zòòlo ko Jùlusɛ̀làm.

²³ Ke ɗɔ̀ɔ̀ guùŋ wo Jisɛ̀ yaà wa kaaiŋ kaaiŋ ko jɔ̀ɔ̀lègbèè Saaŋ Zòòlò Dayài àŋ nyaaŋ ko Pìàzà Salemàiŋ lɛ.

²⁴ Aŋ Juùù nyaŋ bà nyiŋ nauŋ gbònò kɔɔ yèè àŋ nauŋ dawè nyààŋ, “Kiìŋ è teenga mùŋ do wi nàŋ gè e gòngo maŋ jii wi màŋ sùà? Wòò wi e tɔɔɓaaà sèè mààŋ muàŋ nàŋ yaà wo yèɔ wo Dayà naŋ tàeɗùù wèè wo joeyè e ɗuunyaàŋ wɔ, wo Kulaìɔ!”

²⁵ Wo Jisɛ̀ naŋ nyiŋ fasàì wààŋ, “Kàiŋ niŋ woò tɛ, kɛɛ niŋ gòim haawè. Maŋ keì maŋ mìŋ nyɛnɛŋ esàɓù e dèè wo Dèda miɔ̀ŋ sùà lɛ kiɛ̀ŋ ke mìè seì janyai kɛ̀ ɓòò mìŋ yaà.

²⁶ Kɛɛ nààŋ niŋ fè àŋ ɓaawaaim nyàŋ lɛ, niŋ gòim haawè.

²⁷ Aŋ ɓaawaaim nyàŋ nyìmàŋ ke miè miɛ̀ŋ, yèè kà nyiŋ nyìmàŋ yèè àŋ dèìm maŋjɛ̀wɛ.

²⁸ Yèè mìŋ do nyiŋ nàŋ kìɛ̀ŋ wɔŋ nyiiŋ gèe gò jùà, yèè kɛ̀ aŋ naàŋ wa nàwèè ɓɛìŋ fɔ̀. Wo nyùùŋ gbiŋ fèim nyiŋ ɓɛ̀nɛ̀ŋ gè kò sìwè.

²⁹ Wo Dèda miɔ̀ŋ wo yèɔ naim nyiŋ kiɛ̀ŋ wɔ, wò kuwa e sɛmɛmaŋ e nìàŋ e nɛ̀ŋ ɗewe gbiŋ, yèè wo nyùùŋ gbiŋ fè nyiŋ ɓɛ̀nɛ̀ŋ gè wò Dèdaà kò sìwè.

³⁰ Wo Dèdaà yèè miàŋ è yaà anyùùŋ guùŋ.”

³¹ Yèè aŋ Juùù nyaŋ naŋ ɓɛìŋ ɓèmè le dùò wèè aŋ hɔ̀wà wo Jisɛ̀.

³² Wo Jisɛ̀ naŋ nyiŋ woò wààŋ, “Kàiŋ tɔ̀ɔ̀ maŋ keì sìàŋ zimgbe maŋ yè maŋ wo Dèda miɔ̀ŋ naim tùɔ̀ŋ wèè ka nyɛ̀nɛ̀ŋ maŋ. Wèè esàɓù maŋ keì mɛɛ̀ŋ, kòò miŋ nìŋ manaŋ naim hɔ̀wà weè miŋ?”

³³ Aŋ Juùù nyaŋ naŋ fasàì nyààŋ, “E fòùm hɔ̀wa sùà wèè è keì sìàŋ gbiŋ è yèɛ mùŋ naŋ nyɛ̀nɛ̀ŋ lɛ. Kɛɛ è yààùm hɔ̀wa sùà esaɓù kɛ̀ mùŋ naŋ nyɛ̀nɛ̀ŋ e keì naanààŋ. Mùŋ yaà nɔŋ wo nyuùŋkpùuŋ, kɛɛ mùŋ naŋ ɓèmè muàŋ bi wèè maŋ nɔ̀ŋ wo Dayà.”

³⁴ Wo Jisɛ̀ naŋ nyiŋ woò wààŋ, “Maŋ mìè mɛɛ̀ŋ yaà sìnga miŋ wɔŋ fɛ̀ì maŋ Sàwàiŋ nɔɔ̀ŋ sùà kɛ̀, ‘Nìŋ yaà aŋ dayà.’

³⁵ Èiŋ nyìmàŋ kɛ̀ e yèɛ wɔŋ fɛ̀ì Dayàa naŋ woò lɛ è yaà e tɔ̀ɔ̀nyaàŋ wèè julɔfɔ. Yèè wo Dayà naŋ wa gbòò koɓɛ̀ anyùùŋ nyiiŋ yèè wò naŋ nyiŋ wa nyààŋ aŋ dayà.

³⁶ Wo Dèdaà wuŋ bi naim tàeɗùù yèè wò naim tùɔ̀ŋ koɓɛ̀ anyùùŋ nyaŋ e ɗuunyaàŋ. Kɛ̀ wèè kiìŋ nìŋ naŋ woò nààŋ mìŋ naŋ wòò maŋ mìè ɓɛ̀ɛ̀pɔ̀ɔ koɓɛ̀ Dayài esaɓù kɛ̀ mìŋ naŋ woò mìàŋ miàŋ nàŋ yaà wo Jɔ̀àfèlàà Dayàa?

³⁷ Kɛ̀ ɓɔ̀ nìŋ kɛɛnɛ̀im è hààwe sùà sèè mìŋ go nɔ̀ŋ nyìnìè e yèɛ wo Dèda miɔ̀ŋ manaŋ ka nyɛ̀nɛ̀ŋ lɛ.

³⁸ Kɛɛ sèè mìŋ nyɛnɛŋ e yèɛ wo Dèda miɔ̀ŋ nyɛnɛŋ lɛ̀, kɛ̀ kɛ̀ɛ̀nɛìŋ e hààwe esàɓù tii, sèè pɛɛ nìŋ goim haawè. Kpeiŋ nìŋ do nàŋ nyìmè kɛ̀ tɔɔɓaa wo Dèdaà yààìm ko sùà yèè mìŋ yàuŋ ko sùà.”

³⁹ E tèèngà guùŋ bi sùà ɓɛìŋ àŋ manaŋ wa auŋ kùwà, kɛɛ wò naŋ nyiŋ jɔ̀ɔ̀nɔ̀ŋ fɛ̀ɛ̀.

⁴⁰ Wo Jisɛ̀ naŋ ɓɛìŋ kɛ̀ɛ̀ e Wùìyè Jɔɔɗììŋ nɛ nìngè koɓɛ̀i wo Jɔ̀ɔŋ Gùà Nyùnɔ̀ɔŋ naŋ wa gùùyè anyùùŋ nyaŋ lɛ̀. Yèè nààŋ wo Jisɛ̀ yaà wa koɓɛ̀ bi,

⁴¹ anyuùŋ zimgbe naŋ wa kɔ̀ ko nɛ̀ɛ̀uŋ niìŋ. Anyùùŋ nyaŋ yaà wa woo nyààŋ, “Wo Jɔ̀ɔŋ gò wa nyɛ̀nɛ̀ŋ màŋ kèè mèè gbiŋ, kɛɛ e yèɛ wò naŋ wa woò lɛ e nyaàiŋ dè wo Jisɛ̀ e gbiŋ è yaà e tɔ̀ɔ̀nyaàŋ.”

⁴² Yèè anyuùŋ zimgbe nauŋ wa haawè.