Hiɓu 9 - WƆŊ FƐ̀Ì EBÒ SÌÀŊ DAYÀA

E ɗèwè Dayà zòòloɛ̀ e ɗuunyaàŋ yaà ko àìjɛnɛ̀ŋ

¹ E ɗààhìì mìèsùàguùŋ jiɛ̀jiɛ̀ɛ kuwa wa maŋ sàwà e nyaàiŋ dè e ɗèwè kìì zòòlo yaà koɓɛ̀i àŋ naŋ banè wèè zòòlò lɛ̀.

² Anyùùŋ naŋ wa nyɛ̀lɛ̀ ke vààyà Dayàa. Ko tàamàŋ jiɛ̀jiɛɛ̀i ke vààyàa dìì, kuŋ àŋ nyaaŋ wa ko Nɛ̀nɛ̀ŋ Nɛɛmaìŋ. Manɛ̀ŋ maŋ yaà wa koɓɛ̀ bi màŋ nàŋ yaà ke kuù sɛ̀ɛ̀ maŋ laumpò, yèè wɔ̀ŋ gbɛ̀gbɛ̀ɔ wɔŋ yèɔ àŋ jaa wa e gbɔ̀ù nɛɛmaàŋ diɛŋ e yèɛ àŋ kìɛ̀ŋ wo Dayà lɛ.

³ Wɔŋ dèè saaŋ yɛmgbɛ̀ɔ jɛ̀wɛ̀ ke vààyàa dìì, nàŋ yaà wa koɓɛ̀i àŋ nyaaŋ ko Nɛ̀nɛ̀ŋ Nɛɛmaŋ Gbeeì wèè Dayà.

⁴ Ko Nɛ̀nɛ̀ŋ Nɛɛmaŋ Gbeeì wèè Dayà, kuŋ wɔŋ gbɛ̀gbɛ̀ zòòloɔ̀ àŋ suunyàŋ kùùkɔ̀ɔ̀ dò siaàŋ diɛŋ, wɔŋ yèɔ àŋ naŋ ɓùwìè e gòoò diɛŋ wɔŋ jaa wa, e kpùlìà wɔŋ Kààŋ e Ɗààhìì e Mìèsùàgùùŋ Dayàa àŋ naŋ wa ɓùwìè gòoò wuŋ pɛɛ wɔ̀ŋ yaà. Manɛ̀ŋ ɗì taai nàŋ yaà wa wɔŋ kàaŋ bi sùà. E nɛ̀ŋ jiɛ̀jiɛ̀ɛ nàŋ yaà wa, e gòoò sàiŋ, e yèɛ naŋ wa dìè e gbɔ̀uɛ̀ àŋ nyaaŋ maanàŋ lɛ, e nɛ̀ŋ ɗì tìyèeɛ̀ naŋ yaà wa ke kùù kààìŋ Èlɔuɛ̀ŋ, ke yèɛ naŋ wa wùìyè maŋ tùwa ɓou yɛ̀, yèè e nɛ̀ŋ ɗì taaà wɔŋ kàaàŋ sùà nàŋ yaà wa, maŋ dùòfàà tìyèe màŋ maŋ Sàwà Dayà maŋ singia wa diɛŋ màŋ.

⁵ Manɛ̀ŋ gè nyiiŋ bà, àŋ kuwa maŋ gbaŋ jaa wa wɔŋ kàaàŋ diɛŋ, wèè aŋ tɔɔ̀ kɛ̀ wo Dayà kòò wò yaà fɛɛ̀feìŋ, e kìlà àŋ naŋ vùlɔ̀ŋ maŋ gbaŋ nyiŋ màŋ koɓɛ̀i wo Dayà juuyà maŋ jùumù hakɛ̀ lɛ. Kɛɛ tɛɛ̀ fè naàŋ è teengaà wèè eiŋ gɔ̀ì màŋ keì mɛɛ̀ŋ sùà janjai.

⁶ Nààŋ manɛ̀ŋ mɛɛ̀ŋ gbiŋ naŋ wa nɔ̀ŋ bànèbane e ɗewe lɛɛ̀ sùà, ke ɗɔɔ gbiŋ aŋ sìèfèìŋ zòòlo nyàŋ kɔ̀à wa àŋ jɔ̀à ko tàamàŋ jiɛ̀jiɛ̀i, ke vààyàa dìì, wèè aŋ nyɛ̀nɛ̀ŋ e tòmo nyiŋ nɛ̀.

⁷ Wo kànà sìèfèìŋ zòòlo gbeeɔ̀ nɔŋ nàŋ jɔ̀à wa wo hàì ko tàamàŋ dìà tìyèeì, ko Nɛ̀nɛ̀ŋ Nɛɛmaŋ Gbeeì wèè Dayà. Wò hewa nɔŋ tii nyɛ̀nɛ̀ŋ e sùà guùŋ kpò wɔŋ doaà sùà. E teenga gbiŋ wò nɔ̀ŋ wa kɔɔyɛ, sɔɔ̀ wo kòà màŋ sɛ̀ìŋ e ɗolònɛ̀ɛŋ àŋ naŋ gììyè saaà maŋ, wèè wo miŋ kiɛ̀ŋ e saaà gèeo sùà koɓɛ̀ Dayài, wèè maŋ jùumùuŋ màŋ yaà maŋ jùumù maŋ gbiŋ anyùùŋ nyaŋ naŋ nyɛ̀nɛ̀ŋ yèè aŋ gò miŋ jàà jii màŋ.

⁸ Wo Jìnàŋ Nɛɛmaàŋ kaà wì janjai e yìwìà e ɗeweɛ̀ lɛɛ̀ sùà kɛ̀, ko tààmàiŋ wèè ko Nɛ̀nɛ̀ŋ Nɛɛmaŋ Gbeeì wèè Dayà kòò kò nɔ̀ŋ weè yìle, e teengaà ke vààyàa kè yaà wa weè nɔŋ koɓɛ̀i àŋ zoolà lɛ.

⁹ Tɛɛ̀ gbiŋ è yaà wɔŋ miimiiŋ wèè e yèɛ yaà e sɛmɛmaŋ niŋ lɛ̀ e teenga lɛɛ̀ sùà nàaŋ. Tɛɛ̀ naŋ tɔɔ̀ kɛ̀ manɛ̀ŋ kìɛŋ màŋ yaà maŋ ɗolònɛ̀ŋ maŋ àŋ giiyà saaà maŋ koɓɛ̀ Dayài fè ɓɛ̀nɛ̀ŋ nyɛ̀nɛ̀ŋ kè jìì wò nyuùŋ zòòloɔ̀ ke zɛ̀nɛ̀ŋ.

¹⁰ Maŋ sàwà mɛɛ̀ŋ yaà nɔŋ wèè e kèè manɛ̀ŋ je yaà manɛ̀ŋ tìa, e kpùlìà maŋ langi màŋ e nyaàiŋ dè e ɗeweɛ̀ è guo yàwi bi lɛ̀, yaà maŋ langi e nyaàiŋ dè maŋ kpùnaŋ wi màŋ, e yèɛ yaà nɔŋ wèè e teenga kpuu e jèèsùà wo Dayà tɔ̀ɔ̀ e keì jɛ̀ì.

¹¹ Kɛɛ wo Jisɛ̀ Kulaì wò naàŋ hnàŋ tɛ wèè wo nɔ̀ŋ wo Kànà Sìèfèìŋ Zòòlo Gbeeɔ̀ wèè manɛ̀ŋ siaŋ maŋ yaà kià tɛ màŋ. Ke vààyàa wò zoolà dìì yɛ kuwa sɛmɛmaŋ e nìàŋ e nɛ̀ŋ gbiŋ e kìlà kè kuwa jii tùlia gbee. Maŋ kùàŋ nyuùŋkpùuŋ nàŋ gò nyiŋ nyɛ̀lɛ̀, e kìlà ke fè bà nyiŋ bà wèè è ɗuunyaŋ lɛɛ̀.

¹² Nààŋ wo Jisɛ̀ Kulaì naŋ jɔ̀ ko Nɛ̀nɛ̀ŋ Nɛɛmaŋ Gbeeì wèè Dayà e sùà guùŋ kpò yèè wèè anyùùŋ nyaŋ gbiŋ, wo gò wa kòà màŋ sɛ̀ìŋ àŋ diì wowo yaà àŋ dìi wowo wèè wo miŋ gììyà saaà. Wò naŋ wa gììyè maŋ sɛ̀ìŋ wuŋ bi màŋ saaà, yèè wò naŋ wi joeyè e yìwìà maŋ jùumù sùà wèè julɔfɔ.

¹³ Nààŋ e làngì maŋ Sàwà Mòòze màŋ naŋ tɔɔ̀ lɛ, anyùùŋ nyaŋ naŋ wa nɔ̀ŋ nyuùŋ gò zɛ̀nɛ̀ŋ nyaŋ, fè wa tɛ̀ɛ̀ wèè aŋ zòòlò Dayà. Kɛɛ wo Dayà do nyiŋ nàŋ nyɛ̀nɛ̀ŋ aŋ zɛ̀nɛ̀ŋ e kìlà aŋ nɔ̀ŋ anyùùŋ nɛɛmaŋ, sèè wò vaàì nyiìŋ wa nàwèè maŋ sɛ̀ìŋ aŋ diì wowo yaà maŋ sɛ̀ìŋ aŋ dìi wowo nyàŋ, e kìlà aŋ nyiŋ vààì e dùùm wo dìi jaweɔ̀ àŋ naŋ gììyè saaà yèè àŋ naŋ sùɔ̀ŋ wɔ.

¹⁴ Nààŋ tɛɛ̀ è yaà tɔɔɓaa lɛ̀, maŋ sɛ̀ìŋ Jisɛ̀ Kulaì maŋ kuwa ngèè e gaàŋ e nìàŋ miiŋ gbiŋ, nààŋ wò naŋ wa wùɔ̀ŋ maŋ sɛ̀ìŋ e teengaà àŋ nauŋ wa jìwè lɛ. E yìwìà esàɓù wo Jìnàŋ Nɛɛmaàŋ yaà wɔŋ nyiiŋ gèeɔ̀ sùà wèè julɔfɔ wɔ̀, wò naŋ kìɛ̀ŋ wuŋ bi wèè wo nɔ̀ŋ e nɛ̀ŋ kìɛŋ, e saaà gèe tùlìà jii sùà koɓɛ̀ Dayài. Maŋ sɛnùuŋ màŋ do nàŋ nyɛ̀nɛ̀ŋ maŋ jii wi màŋ maŋ zɛ̀nɛ̀ŋ e yìwìà maŋ langi foo sùà, wèè kɛ̀ è naiŋ ɓɛ̀nɛ̀ŋ zòòlò wo Dàyà nyiiŋ gèeɔ̀.

¹⁵ E wèè saɓù lɛɛ̀, wo Jisɛ̀ Kulaì nàŋ yaà wo nyùnɔ̀ɔŋ sià ke konaŋ fèemàaŋ, wo yèɔ naŋ bànè e ɗààhìì e mìèsùàguùŋ jɛ̀ì, wèè kɛ̀ aŋ yè nyaŋ wo Dayà naŋ nyààŋ nyaŋ aŋ yɛmɛ̀ e kpùùmàŋ wɔŋ nyiiŋ gèe gò jùà e yèɛ wo Dayà naŋ jɔ̀ɔ̀ ɗààhiì wèè wo kiɛ̀ŋ lɛ. Tɛɛ̀ ɓɛ̀nɛ̀ŋ kààiŋ esaɓù kɛ̀ wo Jisɛ̀ Kulaì naŋ fɔ̀, yèè tɛɛ̀ naŋ nyɛ̀nɛ̀ŋ anyùùŋ naŋ fòlò e keì dìì e yìwìà maŋ keì naanààŋ maŋ àŋ naŋ nyɛ̀nɛ̀ŋ maŋ, e teengaà e ɗààhìì mìèsùàguùŋ jiɛ̀jiɛ̀ɛ yaà wa toomo lɛ̀.

¹⁶ E ɗààhìì e mìèsùàguùŋ mààŋ tɛɛ̀, è yaà mààŋ wɔŋ fɛi mùŋ naŋ sìngè, wɔŋ yèɔ naŋ woò kɛ̀, ɓòò nàŋ do nàŋ kɛ̀ɛ̀nɛ̀ŋ maŋ nɛ̀ŋ èdàà wo nyùnɔ̀ɔŋ naŋ fɔ̀ wɔ.

¹⁷ E ɗààhìì e mìèsùàguùŋ mààŋ tɛɛ̀, fè kɛ̀ɛ̀nɛ̀ŋ gààŋ è teengaà wò nyùnɔ̀ɔŋ naŋ niŋ banè wò yaà wɔ̀ŋ nyiiŋ gèeɔ̀ sùà lɛ. E ɗààhiì bi kɛ̀ɛ̀nɛ̀ŋ gààŋ sèè wo nyùnɔ̀ɔŋ naŋ niŋ banè wɔ wò fà.

¹⁸ Esɓùɛ lii, e ɗààhìì mìèsùàguùŋ gɔuɛ̀ pɛɛ naŋ wa kɛ̀ɛ̀nɛ̀ŋ gààŋ nààŋ àŋ naŋ wa jìwè e ɗolònɛ̀ŋ e kìlà àŋ naŋ gììyè maŋ sɛ̀ìŋ e saaà.

¹⁹ Wo Mòòze naŋ wa wòò anyùùŋ nyaŋ gbiŋ e yèɛ gbiŋ wo Dayà naŋ wa woò wèè aŋ nyɛ̀nɛ̀ŋ nààŋ è yaà sìnga niŋ maŋ Sàwà Dayà maŋ sùà lɛ. Wò naŋ ɓèmè maŋ sɛ̀ìŋ aŋ dìi wowo yaà maŋ sɛ̀ìŋ aŋ diì wowo, wo miŋ kàànè e wùìyè, yèè wò naŋ ɓèmè wɔŋ deè wɛ̀ìŋ, wo wuŋ dìkìà ke kùù bà àŋ nyaaŋ hasò, yèè wò naŋ wuŋ hɔ̀ɔ̀ maŋ sɛìŋ kàànè wùìyèɛ sùà, yèè wò naŋ miŋ vààì wɔŋ fɛ̀ì maŋ Sàwà Dayàa, yaà anyùùŋ nyaŋ gbiŋ diɛŋ.

²⁰ Wo Mòòze naŋ wòò anyùùŋ nyaŋ wààŋ, “Mɛɛ̀ŋ nàŋ yaà maŋ sɛ̀ìŋ maŋ naŋ hèè e fèè e nɛ̀ŋ yìlia e ɗààhìì e mìèsùàgùùŋ Dayàa wààŋ niŋ jɔɔlɔ̀ dìì lɛ.”

²¹ E ɗèwè guùŋ bi sùà ɓɛìŋ nɔŋ, wo Mòòze naŋ wa ɓɛìŋ vààì maŋ sɛ̀ìŋ maŋ ke vààyà Dayàa dìì, yaà manɛ̀ŋ tòòmo màŋ gbiŋ diɛŋ e nyaàiŋ dè e tòmò Dayàa koɓɛ̀ bi.

²² Maŋ Sàwà Dayà maŋ naŋ woò wààŋ, sɔɔ̀ aŋ vààì manɛ̀ŋ maŋ gbiŋ maŋ sɛ̀ìŋ wèè maŋ nɔ̀ŋ zɛ̀nɛŋ miŋ, e kìlà wèè paŋ wo Dayà juuyà maŋ jùumù hakɛ̀, sɔɔ̀ aŋ dè maŋ sɛ̀ìŋ dìì.

E sàà Jisɛ̀ Kulaì lɛ gè wi maŋ jùumù sùà

²³ Manɛ̀ŋ miiŋ è naŋ yaà nɔŋ wòò kii miŋ màŋ, miiŋ nàŋ yaà e tɔ̀ɔ̀màŋsèì manɛ̀ŋ maŋ yaà ko àìjɛnɛ̀ŋ maŋ, weètii àŋ kuwa aŋ miŋ kààìŋ maŋ langi mɛɛ̀ŋ wèè maŋ nɔ̀ŋ zɛ̀nɛŋ miŋ. Kɛɛ sèè è nɔ̀ŋ wèè manɛ̀ŋ maŋ ko àìjɛnɛ̀ŋ, è yaà tɛ̀ɛ̀ wèè aŋ gè e saaà kɛnɛ wèè aŋ miŋ nyɛ̀nɛ̀ŋ maŋ zɛ̀nɛ̀ŋ.

²⁴ Wo Jisɛ̀ Kulaì gò wa jɔ̀à ko Nɛ̀nɛ̀ŋ Nɛɛmaìŋ àŋ nyuùŋkpùuŋ naŋ wa nyɛ̀lɛ̀ yɛ, ke yèɛ yaà wa wɔŋ mììmììŋ ke vààyà kɛnɛɛ̀ e yìwìà ko àìjɛnɛ̀ŋ. Wò naŋ wa kɔ̀ ko àìjɛnɛ̀ŋ kuŋ bi, ko yèi wò yaà naàŋ ko fɛ̀ɛ̀fèìŋ Dayài wèè wo wi kpuumàŋ.

²⁵ Nààŋ wo Kànà Sìèfèìŋ Zòòlo Gbeeɔ̀ wèè aŋ Juùù nyaŋ hewa jɔ̀à ko Nɛ̀nɛ̀ŋ Nɛɛmaìŋ Gbeeì wèè Dayà wɔŋ doa gbiŋ, sɔɔ̀ wo wa kòà maŋ sɛ̀ìŋ ɗolònɛ̀ŋ wɔŋ gɛ̀i jɔa sùà, wèè wo miŋ kìɛ̀ŋ koɓɛ̀ Dayài e saaà gèeo sùà. Kɛɛ wo Jisɛ̀ Kulaì gòo wa jɔ̀à wèè wo kìɛ̀ŋ wuŋ bi è teenga zimgbe e saaà gèe sùà,

²⁶ esaɓù kɛ̀ sèè wo wa weè kìɛ̀ŋ wuŋ bi e saaà gèeo sùà wɔŋ doa gbiŋ, wò hewa nàŋ kɔ̀ e mɔ̀ɔ̀nɛŋ zimgbe dìì e yìwìà e teengaà wo Dayà naŋ wa bànè ɗuunyaàŋ lɛ. Kɛɛ wò naŋ wa kìɛ̀ŋ wuŋ bi wèè wo fà e sùà guùŋ kpò e saaà gèeo sùà, e gbɛ̀ɛ̀ e tèèngà maŋ nyiiŋ gèe dìàmaŋ wi màŋ wèè anyùùŋ nyaŋ gbiŋ, wèè kɛ̀ wo nɔ̀ŋ e nɛ̀ŋ saàa do nàŋ gùò maŋ jùumù wi màŋ lɛ.

²⁷ Anyùùŋ nyaŋ gbiŋ do nàŋ fɔ̀ e sùà guùŋ kpò, eɓìèmàŋjɛ̀wɛ̀ tii wo Dayà do wi nàŋ gbaì wo wi hàà kiti diɛŋ.

²⁸ E ɗèwè guùŋ nɛ sùà wo Dayà naŋ wa kìɛ̀ŋ wo Jisɛ̀ Kulaì e sùà guùŋ kpò wèè wo nɔ̀ŋ e nɛ̀ŋ saaà, yèè wò naŋ fɔ̀ e sùà guùŋ kpò wèè wo gùà maŋ jùùmù anyuùŋ zimgbe. Kɛɛ sèè wò hnàŋ ɓɛìŋ, e naàŋ ɓɛìŋ nɔ̀ŋ wèè wo gùà màŋ jùumù. Wò do nàŋ hnè wèè wo jòèyè anyùùŋ nyaŋ gbiŋ yàaùŋ fulie nyàŋ.