Hiɓu 6 - WƆŊ FƐ̀Ì EBÒ SÌÀŊ DAYÀA

¹ Kàmè wiìŋ ɗewe e nɔ̀iŋ anyuùŋ kàmaiŋ, yèè e tɔɔtùiŋ gòngo wèè e nyɛ̀nɛ̀iŋ maŋ kèì nyɛ̀nɛ̀ŋ nyuùŋ kàmaiŋ. Kɛɛ ɓɔ̀ è nɔ̀ŋ màŋ keì jiɛ̀jiɛ̀ maŋ è naiŋ wa gbeè maŋ sùà e nyaàiŋ dè wò Jisɛ̀ Kulaì. Ɓɔ̀ è nɔ̀iŋ ɓɛìŋ wòo sùà è kèè kè kpèè jɛi tɔ̀ɔ̀tu wèè eiŋ fè maŋ tùwo naanààŋ wi màŋ jɛwɛ maŋ yè maŋ hiàŋ e fàa màŋ, e kìlà eiŋ ɗewè wèè eiŋ kɛ̀ɛ̀nɛ̀ŋ hààwe wo Dayà sùà.

² Ɓɔ̀ è kaàiŋ nɔŋ è ɗèwè ànyuùŋ gùa, yaà è làngì anyuùŋ gbùwà màŋ kùàŋ wèè eiŋ nyiŋ zòòlò diɛŋ. E kìlà, ɓɔ̀ è kaàiŋ ɓɛìŋ nɔŋ è kèè è tɔ̀ɔ̀nyaàaŋ kɛ̀, anyùùŋ nyaŋ do nàŋ yèwè e fàaà dìì wɔŋ nyiiŋ gèeo sùà. E kàa wilɛ̀ ɓɔ̀ è nɔ̀ŋ ɓɛìŋ nɔŋ wèè è ɗeweɛ̀ wo Dayà do nàŋ gbàì anyùùŋ lɛ, yèè e ɗeweɛ̀ e kitiuŋ nɛ̀ doo nàŋ jeè e kìlà wo nìmìlà anyùùŋ wèè julɔfɔ lɛ̀.

³ Kàwiìŋ ko feìŋ e kìlà e nɔ̀iŋ anyuùŋ kɛ̀ɛ̀nɛ̀ŋ hààwe kàmaiŋ, sèè wo Dayà gè wì nyààŋ diɛŋ.

⁴ Kɛɛ anyùùŋ nyaŋ naŋ fè wo Dayà jɛwɛ nyàŋ, aŋ fè ɓɛìŋ ɓɛ̀nɛ̀ŋ fè maŋ tùwo naanààŋ nyiŋ màŋ jɛwɛ wèè aŋ kìlà kòɓɛ̀ Dayài. Àŋ naŋ wa yɛ̀mɛ̀ e gbòlòùŋ Dayàa e tèèngà guùŋ, yèè aŋ naŋ yɛ̀mɛ̀ e nɛ̀ŋ kìɛ̀ŋ ko àìjɛnɛ̀ɛŋ, e kìlà àŋ naŋ nɔ̀ŋ aŋ bà nyiŋ bà e nyaàiŋ dè wo Jìnàŋ Nɛɛmaàŋ.

⁵ Àŋ nyìmàŋ maŋ jii nyiŋ màŋ sùà kɛ̀, e yèɛ wo Dayà naŋ woò lɛ è siaŋ, e kìlà àŋ nyìmàŋ e kèè e gàaàŋ e nyaàiŋ dè e teengaà, sèè wo Dayà tɔɔtù maŋ tòmò e gaàŋ gbeeuŋ nɛ̀ e ɗuunyaàŋ do nàŋ hnè lɛ diɛŋ.

⁶ Anyùùŋ nyaŋ naŋ fè wo Dayà jɛwɛ nyàŋ, aŋ fè ɓɛìŋ ɓɛ̀nɛ̀ŋ fè maŋ tùwo naanààŋ nyiŋ màŋ jɛwɛ wèè aŋ kìlà kòɓɛ̀ Dayài. E nɛ̀ɛŋ àŋ do nàŋ nɔ̀ɔ̀ŋ nyinie lɛ̀ nàŋ yaà e kèì guùŋ nɛ, màànààŋ nɔŋ àŋ naŋ wa kpùùnyɛ̀ŋ wo Jɔ̀àfèlàà Dayàa wɔŋ vànèkpaaà diɛŋ yèè àŋ nauŋ sìè sàngè ko ɓài.

⁷ E dììɛ siaŋ wèè anyuùŋ tòmò ɓù nyaŋ, sèè maŋ gɔ̀àà maŋ sɔɔ zimgbe wèè maŋ nyɛ̀nɛ̀ŋ manɛ̀ŋ wuiye màŋ bɔù tɛ̀ɛ̀. Wo Dayà kpuumàŋ ngèè e dìì mààŋ tii.

⁸ Kɛɛ sèè e dììɛ è nɔ̀ŋ e ɓìè maŋ dɛiŋ, kɛ̀ e fè è diì kɛnɛ. Wo Dayà ɓɛ̀nɛ̀ŋ gbòò e dìì mààŋ tii, yèè ko diemeì wo niŋ gbìàŋ e hmɔ̀ɔ̀ŋ e hèwà.

⁹ Jòòpɛɛ èiŋ yɛi wɛ̀i gbòà ko nɛ̀ɛ̀iŋ niìŋ nyɛ̀iŋ nààŋ wùìyaim nyàŋ, kɛɛ tɔɔɓaa èiŋ nyìmàŋ kɛ̀ kòò nìŋ yaà nyìnìè maŋ kèì jii tùlia kɛnɛ màŋ anyùùŋ nyɛnɛŋ sèè wo Dayà joeyà nyiìŋ.

¹⁰ Wo Dayà fè wò nyuùŋ gò nɔ̀ŋ tɔ̀ɔ̀nyaàŋ. Wo naàŋ nyɛɛnɛ̀ŋ wèè è tòmoɛ̀ mùŋ naŋ nyɛ̀nɛ̀ŋ yaà è mànaàŋ mùŋ naŋ tɔɔ̀ weèuŋ nɛ̀, e yìwìà kpùùmaàŋ mùŋ kiɛ̀ŋ yèè mùŋ yaà kìɛ̀ŋ sùà koɓɛ̀ anyùùŋ nɛɛmauŋ nyàŋ lɛ.

¹¹ È manaŋ e teenga gbiŋ, wèè nyɛ̀iŋ nààŋ bà guùŋ gbiŋ, maŋ nɔ̀ŋ e wùànàŋ gbee sùà, wèè kɛ̀ manɛ̀ŋ maŋ mùŋ yaà yɛ̀ɛ̀mɛ̀ dòmaŋ ke jii tùlia gbee sùà maŋ, maŋ hnàŋ.

¹² E manàŋ wèè naŋ nɔ̀ŋ ànyuùŋ jɛ̀kɛ, kɛɛ nɔ̀iŋ mààŋ aŋ yè nyaŋ kuwa hààwe e kìlà àŋ kuwa maŋ jii tɔumtɔ̀ùm e jèèsùà wo Dayà woiŋ kìɛ̀ŋ e yèɛ wò naŋ ɓèmè ɗààhiì wèè woiŋ kiɛ̀ŋ lɛ.

Wo Dayà nyɛnɛŋ e yèɛ wò woà lɛ

¹³ E teengaà wo Dayà naŋ wa jɔ̀ɔ̀ ɗààhiì wèè wo nyɛ̀nɛ̀ŋ e nɛ̀ŋ bà koɓɛ̀ Eɓulɔhɛɛ̀iŋ lɛ̀, wò naŋ wa gboonò e dèè wuŋ biɛ̀ diɛŋ, esaɓù kɛ̀ wo nyùùŋ gbiŋ gò dɛkɛ̀ wò do nìàŋ Dayà.

¹⁴ Wo Dayà naŋ wa wòò wo Eɓulɔhɛɛ̀ŋ wààŋ, “Kà jɔ̀àà ɗààhiì kɛ̀ mìŋ doum nàŋ kpuumò e kìlà mìŋ do nàŋ nyɛ̀nɛ̀ŋ ke kpoo mɔɛ̀ŋ ke gàŋ zimgbe.”

¹⁵ Wo Eɓulɔhɛɛ̀ŋ naŋ wa kùwò ke jiiuŋ nɛɛ̀ŋ, kpeiŋ wò naŋ wa yɛ̀mɛ̀ e nɛ̀ɛŋ wo Dayà naŋ jɔ̀ɔ̀ ɗààhiì kɛ̀ wò douŋ wa nàŋ kiɛ̀ŋ lɛ.

¹⁶ Sèè wo nyùùŋ bà mɔnɔŋ wèè wo bànè e keì sùà e fèèmàŋ wuŋ yaà wo nyùùŋ bà, wò gboonàŋ e dèè wo nyuùŋ nìauŋ diɛŋ.

¹⁷ Sèè wo Dayà mɔnɔŋ wa wèè wo tɔɔ̀ janjai kɛ̀ wò do nàŋ nyɛ̀nɛ̀ŋ e yèɛ wò naŋ jɔ̀ɔ̀ ɗààhiì wèè wo nyɛ̀nɛ̀ŋ lɛ, wo fè kìlà kè jiiuŋ nɛɛ̀ŋ, kɛɛ wò gboonàŋ e nyaàiŋ dè e ɗààhiì bi.

¹⁸ Manɛ̀ŋ ɗì tìyèe mɛɛ̀ŋ nàŋ yaào. Wo Dayà fè tòà, wo fè kìlà kè jiiuŋ nɛɛ̀ŋ julɔfɔ wèè e ɗààhiìɛ wò naŋ jɔ̀ɔ̀ e kìlà wò naŋ gbòònò diɛŋ lɛ̀. Yàwi nyàŋ naiŋ kɔ̀ ko nɛ̀ɛ̀uŋ niìŋ wèè wo wi joeyè nyaŋ, è doiŋ wɛ̀i nàŋ kɛ̀ɛ̀nɛ̀ŋ jii nyingè gbee wèè eiŋ kùwà kpaŋ koɓɛ̀ ke jii tùliaà yàwì ko feìŋ lɛ.

¹⁹ Ke jii tùlia yɛɛ̀ nyɛnɛŋ wɔŋ nyììŋ wiɔ̀ jɛi gìli e kìlà ke wi joeyè, yèè kè yaà mààŋ wɔŋ hààŋgàa jàà wɔŋ meeèɔ gìli lɛ̀. Ke jii tùliaà è kùwàìŋ yɛ nàŋ yaà wo Jisɛ̀, wo yèɔ kɔ̀à wo Dayà fɛɛ̀feìŋ, màànààŋ nɔŋ aŋ sìèfèìŋ zòòlò gbee nyàŋ maaŋ wɔŋ dèè saaŋ yɛmgbɛ̀ɔ jɛ̀wɛ̀ aŋ hàì ko zòòlò Nɛɛmaŋ Gbeeì ko Saaŋ Zòòlò Dayài.

²⁰ Wèè esaɓù wilɛ̀, wo Jisɛ̀ naŋ wi kɔ̀ ko feìŋ ko fɛ̀ɛ̀fèìŋ Dayà, yèè wuŋ nàŋ yaà wo kànà sìèfèìŋ zòòlo gbee wiɔ̀ wèè julɔfɔ, màànààŋ nɔŋ wo Mɛ̀kisiɗɛ̀ yaà lɛ.