Hiɓu 3 - WƆŊ FƐ̀Ì EBÒ SÌÀŊ DAYÀA

Wo Jisɛ̀ kuwa sɛmɛmaŋ e nìàŋ wo Mòòze

¹ Nyɛ̀iŋ nààŋ nyuùŋ hààwe dàwium nyàŋ, wo Dayà naiŋ tàeɗùù wèè naŋ nɔ̀ŋ anyùùŋ nɛɛmauŋ. Weètii gòngoìŋ e kèè wo Jisɛ̀, wo yèɔ wo Dayà naŋ tàeɗùù wèè wo nɔ̀ŋ wo keela yèè wo Kànà Sìèfèìŋ Zòòlo Gbeeɔ̀ wèè e hààweɛ̀ è kuwàìŋ lɛ.

² Wo Jisɛ̀ yaà wo nyuùŋ tùlìà jii wèè wo nyɛ̀nɛ̀ŋ e yèɛ wo Dayà nauŋ woò wèè wo nyɛ̀nɛ̀ŋ lɛ, wo yèɔ nauŋ wa tàeɗùù wèè wo nyɛ̀nɛ̀ŋ e tòmouŋ nɛ̀ wɔ, màànààŋ nɔŋ wo Mòòze yaà wa wo nyuùŋ tùlìà jii wèè wo tomo wèè anyùùŋ Dayà nyaŋ lɛ̀.

³ Wo nyùnɔ̀ɔŋ nyɛlɛ ke saaŋ wɔ̀ yɛmɛ̀ e ɓɛ̀ɛ̀jàa e nìàŋ ke saaàŋ kiiŋ bi. Yɛi nɔŋ è yaà wo Jisɛ̀ kuwa wo yɛ̀mɛ̀ e ɓɛ̀ɛ̀jàa gbee e nìàŋ wo Mòòze.

⁴ Ke saaŋ gbiŋ mùŋ yɛmɛ̀, wo nyùùŋ bà naŋ nyiŋ nyɛ̀lɛ̀. Kɛɛ wo Dayà naŋ bànè manɛ̀ŋ maŋ gbiŋ.

⁵ Wo Mòòze yaà wo ɓɔ̀ìjɔ̀à tùlìà jii koɓɛ̀ anyùùŋ Dayà nyaŋ, yèè wò naŋ wa kìɛ̀ŋ ke mìè seì e nyaàiŋ dè e yèɛ wo Dayà do wa nàŋ woò wèè ko dòmànfeìŋ lɛ.

⁶ Kɛɛ wo Jisɛ̀ Kulaì wò yaà wo nyuùŋ tùlìà jii nààŋ wò yaà wo Jɔ̀àfelaaà wo yèɔ yɛmɛ̀ anyùùŋ Dayà nyaŋ diɛŋ. Yàwi nàŋ yaà anyùùŋ Dayà nyaŋ sèè è kɛɛnɛ̀ìŋ maŋ jii nyingè yaà jii tùlia wèè e yèɛ è yààìŋ yɛ̀ɛ̀mɛ̀ dòmaŋ lɛ̀.

E nyiiŋ gèe wèè anyùùŋ Dayà nyaŋ

⁷ Weètii, nààŋ wo Jìnàŋ Nɛɛmaàŋ naŋ woò lɛ, “Sèè nìŋ komo nàaŋ kè mìè Dayàa,

⁸ ɓɔ̀ nìŋ nyìngà màŋ jiiŋ màŋ, màànààŋ aŋ nèwàènèiŋ nyàŋ naŋ wa nyɛ̀nɛ̀ŋ e teengaà àŋ naŋ wa gììyè wo Dayà maŋhɛɛ lɛ̀, màànààŋ àŋ naŋ wa nyɛ̀nɛ̀ŋ e teengaà àŋ naŋ wa wɔ̀ɔ̀ wo Dayà ke fòùngà e diì wòaà sùà lɛ.

⁹ Wo Dayà naŋ woò wààŋ ke ɗɔɔ yii àŋ naim wa gbìɛ̀ŋ e wàa dìì, jòòpɛɛ àŋ naŋ wa yɛ̀mɛ̀ e nɛ̀ɛŋ mìŋ naŋ nyɛ̀nɛ̀ŋ wèè maŋ doa kpɛ̀ùŋ tìyèe lɛ̀.

¹⁰ Wo Dayà naŋ wa tùù anyùùŋ nyiiŋ sìwè yèè wò naŋ woò wààŋ, ‘Anyùùŋ nyɛɛ̀ŋ kòò àŋ tɔ̀ɔ̀ è ɓɛ̀ɛ̀jàa gbiŋ kò nɛ̀ɛ̀ŋ miìŋ màŋ jii nyiŋ màŋ sùà, e kìlà àŋ gè maŋhɛɛ maŋ nyiiŋ gèe nyiŋ màŋ sùà wèè aŋ nyɛ̀nɛ̀ŋ e yèɛ mìŋ manaŋ lɛ̀.’

¹¹ Wo Dayà naŋ wa tùù anyùùŋ nyaŋ sìwè yèè wò naŋ nyiŋ woò wààŋ, ‘Julɔfɔ niŋ naàŋ wa nàwèè hàì è dììɛ diɛŋ ko yèi mìŋ do nyiŋ nàŋ kìɛ̀ŋ e nyiiŋ gèe lɛ.’ ”

¹² Wùìyaim nyàŋ, yɛ̀mɛìŋ nyɛ̀iŋ bi diɛŋ! Ɓɔ̀ nìŋ nyimèè wèè è keì naanààŋ è do jɔ̀à màŋ jiiŋ màŋ sùà, wèè niŋ go nàŋ fè è hààweiŋ nɛ̀ jɛwɛ koɓɛ̀ wo Dàyà nyiiŋ gèeɔ̀.

¹³ Kɛɛ è yaà tɛ̀ɛ̀ wèè naŋ kìɛ̀ŋ àŋ dàwiiŋ nyàŋ maŋ jii nyingè ke ɗɔɔ gbiŋ, nààŋ nɔŋ ke mìè Dayàa “Nàaŋ” wɔŋ fɛ̀ì Dayàa sùà naŋ woò lɛ. Wo nyùùŋ bà gbiŋ e tɛɛiŋ ɓɔ̀ wò nyɛ̀nɛ̀ŋ kè jiiuŋ nɛɛ̀ŋ kè do nyìngà esàɓù maŋ jùumù maŋ wò do nàŋ nyɛ̀nɛ̀ŋ maŋ.

¹⁴ Yàwi nààŋ gbiŋ è yààìŋ aŋ dàwi koɓɛ̀ Jisɛ̀ Kulaìi. Weètii kùwà wiìŋ koɓɛ̀ guùŋ kpaŋ ke jii tùlia sùa e nyaàiŋ dè e hààwe wilɛ̀ è kùwàìŋ wa lɛ̀ e jeèsùà e haì ko dìa.

¹⁵ Wɔŋ fɛ̀ì Dayàa naŋ woò wààŋ, “Sèè nìŋ komo nàaŋ kè mìè Dayàa, ɓɔ̀ nìŋ nyìngà màŋ jiiŋ màŋ, màànààŋ aŋ nèwàènèiŋ nyàŋ naŋ wa nyɛ̀nɛ̀ŋ e teengaà àŋ naŋ wa gììyè wo Dayà maŋhɛɛ lɛ̀.”

¹⁶ Ɓòò nyiŋ nàŋ yaà anyùùŋ nyaŋ naŋ wa kòmò ke mìè gbòà Dayàa, yèè àŋ nauŋ gììyè maŋhɛɛ nyàŋ? Nyiŋ nàŋ yaà anyùùŋ guùŋ nyaŋ wo Mòòze naŋ wa sìèfeìŋ yèè wò naŋ nyiŋ gè ko Ijè nyaŋ.

¹⁷ Wo Dayà naŋ wa tuù wèè maŋ doa kpɛ̀ùŋ tìyèe wèè anyùùŋ nyaŋ naŋ wa nyɛ̀nɛ̀ŋ maŋ kèì jùumù yèè àŋ naŋ sɔ̀ɔ̀ aŋ fɔ̀ɔ̀yɛ̀ ke fòùngà e diì wòaà diɛŋ.

¹⁸ Wo Dayà naŋ wa woò wààŋ, “Julɔfɔ niŋ naàŋ wa nàwèè hàì è dììɛ diɛŋ ko yèi mìŋ do nyiŋ nàŋ kìɛ̀ŋ e nyiiŋ gèe lɛ.” Wo Dayà yaà wa wòò e kèè anyùùŋ nyaŋ nauŋ wa gììyè maŋhɛɛ nyàŋ.

¹⁹ Nààŋ wo Dayà naŋ wa ɓèmè e ɗààhiìuŋ nɛ̀, aŋ gò wa ɓɛ̀nɛ̀ŋ hàì kòɓɛ̀ è dììɛ esàɓù e hààwe gò kɛɛnɛ̀ŋ nyiŋ nɛ̀.