Hiɓu 13 - WƆŊ FƐ̀Ì EBÒ SÌÀŊ DAYÀA

E tòmoɛ̀ è nyɛnɛŋ e fɔ̀ɔ̀yɛ̀ Dayà jii lɛ̀

¹ Kɛ̀ɛ̀nɛìŋ e mànaŋ wèè aŋ dàwi, màànààŋ anyùùŋ màŋjɛ̀wɛ̀ Kanaà Jisɛ̀ kuwa aŋ nyɛ̀nɛ̀ŋ lɛ.

² Jàaìŋ aŋ nyùnèènyɛiŋ kùàŋ dìì maŋ gbooiŋ màŋ sùà. Anyùùŋ bà naŋ wa tɛɛ̀ nyɛ̀nɛ̀ŋ, yèè àŋ naŋ jàà aŋ màikà kùàŋ dìì, kɛɛ aŋ nyìmààŋ wa kɛ̀ àŋ màikà nyaŋ.

³ Jàaìŋ anyùùŋ Kanaà Jisɛ̀ nyaŋ jii aŋ yè nyaŋ yaà ko sààŋ nyìwì nyaŋ yèè niŋ kpuumàŋ nyiŋ, e teenè mààŋ maŋ kpùnàŋ nyɛ̀iŋ bi nàŋ yaà weè ko sààŋ nyìwì. Jàaìŋ anyùùŋ nyaŋ yaà kɔ̀ɔ̀yɛ̀ mɔ̀ɔ̀nɛŋ dìì nyaŋ jii yèè niŋ kpuumàŋ nyiŋ, e teenè mààŋ nyɛ̀iŋ bi nàŋ yaà weè kɔ̀ɔ̀yɛ̀ e mɔ̀ɔ̀nɛŋ dìì.

⁴ Kìɛìŋ ke yɛɛ̀ nɔ̀ɔŋ e ɓɛ̀ɛ̀jàa. Wo jɔɔnɔ̀ɔŋ yaà wo faniŋ nɔɔ̀ŋ kuwa aŋ kɛ̀ɛ̀nɛ̀ŋ ke jii tùlia e fèemàŋ wèè ke yɛɛ̀ nyiŋ nɛɛ̀ŋ e teenga gbiŋ, esaɓù kɛ̀ wo Dayà do nàŋ kìɛ̀ŋ e nyìnga koɓɛ̀ anyùùŋ nyaŋ gbiŋ yaà nyìnìè hmɔŋtu àŋ gè màaŋ nyàŋ.

⁵ Ɓɔ̀ nìŋ nɔ̀ŋ ànyuùŋ mànàŋ nɛɛnɛŋ zimgbe. Kɛ̀ɛ̀nɛìŋ ke jii fàa wèè e yèɛ nìŋ kuwa lɛ̀. Wo Dayà naŋ woò wààŋ, “Miŋ naàum wa nàwèè jòò, e kìlà miŋ naàum wa nàwèè gììyè kɛ̀ɛ.”

⁶ Tɔ̀ tɛɛ̀ kiɛ̀iŋ ke jii nyingè yèè niŋ nyɛ̀nɛ̀ŋ wùànàŋ wèè niŋ woò nààŋ, “Wo Kanaà nàŋ yaà wo nyuùŋ kpùùmaŋ miɔ̀ŋ. E jùù naàim nyɛ̀nɛ̀ŋ. Kiìŋ anyùùŋ naim ɓɛ̀nɛ̀ŋ nyìniaŋ?”

⁷ Ɓɔ̀ nìŋ nyɛɛnɛ̀ŋ è kèè àŋ sìèfeìŋ gɔuiŋ nyàŋ, aŋ yè nyaŋ naiŋ wa kàà ke mìè Dayà nyàŋ. Kɛ̀ɛ̀nɛìŋ ke jii jàa wèè e nyaàiŋ dè e ɗeweɛ̀ àŋ naŋ nyɛ̀nɛ̀ŋ maŋ nyiiŋ gèe nyiŋ màŋ sùà lɛ, yèè niŋ kamè ɗewe wèè niŋ kɛ̀ɛ̀nɛ̀ŋ hààwe màànààŋ àŋ kuwa wa lɛ̀.

⁸ Wo Jisɛ̀ Kulaì fè vɔɔnɔ̀ŋ julɔfɔ. Wuŋ nàŋ yaà wo Jìsɛ̀ gunɔ̀ɔŋ jɛ̀ɛ̀, nàaŋ ɗɔɔ yɛɛ̀, yèè julɔfɔ.

⁹ Ɓɔ̀ nìŋ nyimèè wèè ànyuùŋ joo àŋ doiŋ kàà màŋ keì joo, maŋ yè maŋ yà è gbà èɓìèmàŋjɛ̀wɛ̀ Èbò Siaàŋ. È yaà tɛ̀ɛ̀ wèè wo Dayà woiŋ kìɛ̀ŋ e gààŋ maŋ jiiŋ màŋ sùà e yìwìà e tɛ̀ɛ̀tɛ̀ɛ̀uŋ nɛ̀ sùà, kɛɛ e fè wèè naŋ nɔ̀ŋ kùwìè maŋ gbàŋ manɛ̀ŋ je. Yèè ngèè, manɛ̀ŋ je mɛɛ̀ŋ fè kai kpùùmàŋ ànyùùŋ nyaŋ jè mìŋ nyaŋ.

¹⁰ Aŋ sìèfèìŋ zòòlo nyàŋ zoolà ko sààŋ zòòlò aŋ Juùù nyaŋ, aŋ kuwà e gààaŋ wèè aŋ jè mànɛ̀ŋ jè saaà bà gbiŋ è yìwìà wɔ̀ŋ gbɛ̀gbɛ̀ zòòlo wiɔ̀ diɛŋ.

¹¹ Wo kànà sìèfèìŋ zòòlo gbeeɔ̀ koà maŋ sɛ̀ìŋ aŋ yìlì nyaŋ àŋ naŋ jìwè nyaŋ, ko Nɛ̀nɛ̀ŋ Nɛɛmaŋ Gbeeì wèè wo miŋ gììyà saaà wèè maŋ jùumù. Kɛɛ àŋ gè maŋ dìè yilì nyaŋ, aŋ miŋ kòà e jawaà ɓula aŋ miŋ sùàŋ.

¹² Wèè esaɓù lɛɛ̀, àŋ naŋ wa gè wo Jisɛ̀ ko jawa gbeeì, auŋ jìwà, wèè maŋ sɛnùuŋ màŋ nyɛ̀nɛ̀ŋ anyùùŋ nyaŋ aŋ nɔ̀ŋ nɛɛmaŋ sùà.

¹³ Weètii, kà wiìŋ ko nɛ̀ɛ̀uŋ niìŋ e jawaà ɓula wèè e nɔ̀iŋ aŋ bàuŋbà wèè e sàngèɛ àŋ nauŋ wa sìè lɛ.

¹⁴ E kuwàìŋ kò jawa gbee titi è ɗuunyaŋ lɛɛ̀, e yèɛ doo nàŋ nɔ̀ŋ wèè julɔfɔ. È yààìŋ yɛ̀ɛ̀mɛ̀ dòmaŋ wèè e jawa gbeeɛ̀ do nàŋ hnè lɛ.

¹⁵ E saaà gèe wilɛ̀ nɔ̀ŋ e tɛ̀nɛŋ koɓɛ̀ Dayài e teenga gbiŋ, e yìwìà e dèè Jisɛ̀ɛ sùà.

¹⁶ Ɓɔ̀ nìŋ nyɛɛnɛ̀ŋ wèè naŋ kpùùmàŋ kè gbòò Dayà zòòloɛ̀, tɛɛ̀ nàŋ yaà e saaà gèeɛ̀ fɔɔyɛ̀ Dayà jii lɛ̀.

¹⁷ Jɔ̀ɔ̀lɔìŋ anyuùŋ gbeegbèèiŋ nyàŋ dìì, e kìlà niŋ nyɛ̀nɛ̀ŋ e nɛ̀ɛŋ àŋ woàìŋ lɛ. Àŋ naiŋ jàà fɛ̀ɛ̀ diɛŋ e kèè Dayàa sùà, yèè àŋ kuwa aŋ kìɛ̀ŋ e jìwààjɛ̀wɛ̀ koɓɛ̀ Dayài wèè e tòmoɛ̀ àŋ naŋ nyɛ̀nɛ̀ŋ lɛ. Ɓɔ̀ nìŋ nyɛ̀nɛ̀ŋ màŋ jii nyiŋ màŋ do mɔɔnɛ̀ŋ sèè àŋ nɔ̀ŋ nyìnìè e tòmo nyiŋ nɛ̀, kɛɛ nyɛ̀nɛìŋ nyiŋ àŋ nɔ̀ŋ zɔlɔ̀ sùà. Sèè nìŋ go niŋ nyɛ̀nɛ̀ŋ, aŋ naàŋ ɓɛnɛ̀ŋ wèè aiŋ kpuumàŋ.

¹⁸ Zòòloìŋ weè wi e teenga gbiŋ. Èiŋ hààwè kɛ̀ è kùwàìŋ maŋ jii sengèì, esaɓù kɛ̀ è manaŋ eiŋ nyɛ̀nɛ̀ŋ e yèɛ yaà tɔ̀ɔ̀nyaàŋ lɛ e teenga gbiŋ.

¹⁹ Mìŋ yààìŋ pɔɔwɔ wèè naŋ zòòlò Dayà, wèè woim ɓɛìŋ tùàŋ ko nɛ̀ɛ̀iŋ niìŋ e teenga kpuu sùà.

E zòòlo dìàmaàŋ

^20-21 Tɔɔɓaa, wo Dayà naŋ gè wo Kana wiɔ̀ Jisɛ̀ e fàaà dìì. Wo Jisɛ̀ yaà mààŋ wo nyuùŋ tùnìàŋ ɓaawaa gbee, wo yèɔ naŋ wùɔ̀ŋ maŋ sɛ̀nùuŋ màŋ wèè wo banè e ɗààhìì e mìèsùàguùŋ wèè julɔfɔ e fèèmàŋ Dayà yaà anyunùuŋ nyàŋ. Tɔ̀ wo Dàyà jii fàaà kiɛ̀iŋ e tɛ̀ɛ̀tɛ̀ɛ̀ɛ gbiŋ nìŋ manaŋ lɛ̀, wèè kɛ̀ niŋ nyɛ̀nɛ̀ŋ e yèɛ wò manaŋ lɛ̀. Tɔ̀ esàɓù Jisɛ̀ Kulaìɛ nyɛ̀nɛ̀ŋ wo Dayà toomò wi sùà wèè e nyɛ̀nɛ̀iŋ e yèɛ fɔɔyɛ̀uŋ jii lɛ̀. Yèè tɔ̀ e jòòwo nɔ̀ŋ koɓɛ̀ Jisɛ̀ Kulaìi wèè julɔfɔ yèè julɔfɔ. Àmiinàŋ!

Maŋ miè dìàmaŋ màŋ

²² Mìŋ yààìŋ pɔɔwɔ nyɛ̀iŋ nààŋ wùìyaim nyàŋ, wèè naŋ kòmàŋ maŋ mìè gbìàŋ jii nyingè mɛɛ̀ŋ, esaɓù kɛ̀ wɔŋ fɛi sìngaim wɛɛ̀ŋ ko nɛ̀ɛ̀iŋ niìŋ, wɔŋ gò mùnlàŋ.

²³ Mìŋ manaŋ naŋ nyìmàŋ kɛ̀, àŋ gè wo wùìya wiɔ̀ Timetè ko sààŋ nyìwìi. Sèè wò hnàŋ kià e teengaà diɛŋ, yà wuuŋ tìyèe do nàŋ hnè sèè mìŋ nɔ̀ŋ hinie wèè kaiŋ jaamè.

²⁴ Mìŋ zuumàŋ anyuùŋ gbeegbèèiŋ nyàŋ yèè anyùùŋ nɛɛmaŋ nyàŋ gbiŋ. Anyùùŋ màŋjɛ̀wɛ̀ Kanaà ko Etelè, naiŋ tɔ̀ùŋ zùùmo.

²⁵ Mìŋ zoolà wèè wo Dayà wo nɔ̀ŋ tɛ̀ɛ̀ ko nɛ̀ɛ̀iŋ niìŋ.