Hiɓu 12 - WƆŊ FƐ̀Ì EBÒ SÌÀŊ DAYÀA

Wo Dayà nàŋ yaà wo Dèda wiɔ̀

¹ È kùwàìŋ ke gbòò aŋ seì zimgbe kè naŋ wi kiliè yɛ. Weètii, gèe wiìŋ maŋ keì maŋ gbiŋ kùàŋ sùà, maŋ yè maŋ do wi nàŋ kèèwè kùàŋ feìŋ, yèè maŋ jùumù maŋ do wi nàŋ deeyè maŋ. Ɗèwè wiìŋ wèè e kɛɛnɛ̀ìŋ maŋ kpèè siaŋ maŋ nyiiŋ gèe wi màŋ sùà.

² Jàà wiìŋ e fɛɛ̀ wilɛ̀ wo Jisɛ̀ diɛŋ, wo yèɔ è naiŋ tùlìè jii e hààwe wilɛ̀ sùà, e yìwìà ko tɔ̀ɔ̀tù e hààwe wilɛ̀ e hàì ko dìaì. Wò naŋ wa nyimèè wèè auŋ sìà sàngè, yèè auŋ kpùùnyàŋ wɔŋ vànèkpaaà diɛŋ. Kɛɛ esàɓù e zɔlɔ̀ɛ yàaùŋ wa fulie lɛ̀, wo gò wa gòngò è kèè ɓɛ̀ɛ̀pɔ̀ɔɛ̀ wèè auŋ kpùùnyàŋ wɔ̀ŋ vànèkpaaà diɛŋ. Yèè kòò wò jaa naàŋ wɔŋ kùàŋ jìka ke kpùà Kanaà Dayà kɔɔ.

³ Weètii jàaìŋ maŋ jiiŋ màŋ wo Jisɛ̀ maŋjɛ̀wɛ, wo yèɔ naŋ jàà maŋ mìè ɓɛ̀ɛ̀pɔ̀ɔ zimgbe kùàŋ dìì e yìwìà anyùùŋ maŋ jùumù sìwè. Tɛɛ̀ do nàŋ nyɛ̀nɛ̀ŋ e zɔ̀kpɔ̀ naàiŋ nɔ̀ŋ wèè naŋ fè è hààweiŋ nɛ̀ jɛwɛ.

⁴ E yìwìà maŋ keì nyìngaiŋ màŋ gbiŋ sùà wèè naŋ yɛ̀mɛ̀ nyɛ̀iŋ bi diɛŋ e nyaàiŋ dè anyùùŋ maŋ jùumù, nyɛ̀iŋ nààŋ bà guùŋ gbiŋ kòò nìŋ wùɔ̀ŋ màŋ sɛ̀ìŋ.

⁵ Kɛɛ nàŋ nyɛɛnɛ̀ŋ wèè maŋ mìè jii nyingè maŋ wo Dayà naiŋ wa kiɛ̀ŋ maŋ, nààŋ nìŋ yaà aŋ jɔ̀à ko nɛ̀ɛ̀uŋ niìŋ. Wò naŋ wa woò wààŋ, “Jɔ̀à miɔ̀ŋ, sèè wo Kanaà woum kìɛ̀ŋ e keì nyìngà wèè woum dè ke dòmaŋ siaŋ diɛŋ, e zɔ̀kpɔ̀ ɓɔ̀ è nɔ̀um yèè ɓɔ̀ mùŋ niingè niŋ fɛ̀ɛ̀.

⁶ Esaɓù kɛ̀ wo Kanaà dè anyùùŋ nyaŋ gbiŋ wò manaŋ nyàŋ ke dòmaŋ siaŋ diɛŋ, yèè wò kiɛ̀ŋ e nimilà koɓɛ̀ wo nyùnɔ̀ɔŋ gbiŋ wò naŋ jàà kùàŋ dìì wèè wo nɔ̀ŋ wo jɔ̀àuŋ wɔ̀.”

⁷ Nɔ̀iŋ maŋ jii tɔumtɔ̀ùm sùà sèè wo Dèdaà Dayà dèìŋ ke dòmaŋ siaŋ diɛŋ. E nimilàa nìŋ do nàŋ kɔ̀ dìì lɛ, è tɔɔ̀ kɛ̀ wo Dayà yààìŋ yɛi kààiŋ sùà ke kpèè yɛɛ̀ wèè niŋ nyìmàŋ kɛ̀ nìŋ yaà aŋ jɔ̀àuŋ. Wo jɔ̀à gbiŋ kòò wò yaào wo yèɔ wo dèdauŋ nɔɔ̀ŋ gò kìɛ̀ŋ è nimilà wɔ̀?

⁸ Wo Dayà nimilà aŋ jɔ̀àuŋ nyàŋ gbiŋ, yèè sèè wò goiŋ nimilà sèè nìŋ nyɛnɛŋ e keì naanààŋ, kɛ̀ tɔɔɓaa niŋ fè àŋ jɔ̀àuŋ.

⁹ Aŋ dèdà ɗuunyaŋ wi nyàŋ aŋ yè nyaŋ è naiŋ fòlò e kɔɔ sùà nyaŋ, nimilà wì sèè è nyɛnɛŋ e keì naanààŋ, yɛi nɔŋ è yaà è kiɛ̀ŋ nyiìŋ ɓɛ̀ɛ̀jàa. È yaà ngèè pɛɛ tɛ̀ɛ̀ wèè eiŋ jɔ̀ɔ̀lɔ̀ wo Dèdà àìjɛnɛ̀ŋ wiɔ̀ dìì, kɛ̀ èiŋ kùwìè wɔŋ nyiiŋ gèe.

¹⁰ Aŋ dèdà ɗuunyaŋ wi nyàŋ nimilà wì wèè e teenga kpuu, yèè àŋ nyɛ̀nɛ̀ŋ niìŋ wèè e yèɛ àŋ naŋ gongò kɛ̀ è yaà tɛ̀ɛ̀ lɛ. Kɛɛ wo Dayà nimilà wì wèè e tɛ̀ɛ̀tɛ̀ɛ̀ yàwi bi lɛ̀, esaɓù kɛ̀ wò manaŋ eiŋ nɔ̀ŋ anyùùŋ nɛɛmaŋ, màànààŋ wò yaà lɛ.

¹¹ Sèè àŋ nimilà wì, è kpɛ̀lɛ̀ wì yèè e wi nyɛ̀nɛ̀ŋ eiŋ nɔ̀ŋ ɗoomɛɛŋ wèè e teenga bà. Kɛɛ sèè eiŋ gbeè wèè eiŋ kà e nimilà dìì, è doiŋ nàŋ nyɛ̀nɛ̀ŋ e yèɛ yaà tɔ̀ɔ̀nyaàŋ lɛ e kìlà eiŋ nɔ̀ŋ ke jii fàa sùà.

E kàa yèè maŋ mìè gòo

^12-13 Jòòwoìŋ maŋ kuàŋ yɔ̀kpɔiŋ màŋ fùùŋ e kìlà niŋ kɛɛnɛ̀ŋ jii nyingè, yèè niŋ nyɛ̀nɛ̀ŋ maŋ gɛ̀ɛ̀nìiŋ màŋ jele kpàkpà maŋ kɛɛnɛ̀ŋ gààŋ wèè niŋ kaaìŋ tɛ̀ɛ̀ ke dòmaŋ jìlɛŋ diɛŋ. Kàaìŋ ke dòmaŋ jìlɛŋ diɛŋ e teenga gbiŋ, wèè kɛ̀ maŋ gòlò anyuùŋ kpɔ̀ɔ̀kpɔɔ nyàŋ maŋ jòèyà, yèè maŋ go nàŋ nɔ̀ŋ naanààŋ maŋ yɛi nìàŋ.

¹⁴ Kàmeìŋ ɗewe niŋ nyiniàŋ maŋ nyiiŋ gèeiŋ màŋ ke jii fàa sùà anyùùŋ nyaŋ gbiŋ e fèemàŋ, yèè niŋ nyiniàŋ maŋ nyiiŋ gèeiŋ màŋ nɛɛmaŋ sùà, esaɓù kɛ̀ wo nyùùŋ gbiŋ naàŋ yɛ̀mɛ̀ wò Kanaà sèè wò go niŋ nyɛ̀nɛ̀ŋ.

¹⁵ Yɛ̀mɛìŋ nyɛ̀iŋ bi diɛŋ, wèè niŋ go nàŋ fè e tɛ̀ɛ̀tɛ̀ɛ̀ Dayàa jɛwɛ. Ɓɔ̀ nìŋ dangè wò nyùùŋ gbiŋ wò do nɔ̀ŋ mààŋ e kùù gùlò kè kuù fiìì, yèè wo nyɛ̀nɛ̀ŋ anyuùŋ zimgbe aŋ nɔ̀ŋ è keì nyìnga sùà.

¹⁶ Wo nyùùŋ gbiŋ ɓɔ̀ wò gbìàŋ kùàŋ è kèè hmɔŋtu nyɛ̀nɛŋ sùà, ɔ̀ɔ̀ wo gbòà màŋ mìè ɓɛ̀ɛ̀pɔ̀ɔ kòɓɛ̀ Dayài, màànààŋ wo Isɔ̀ naŋ wa nyɛ̀nɛ̀ŋ lɛ, wo yèɔ naŋ wa mààŋ e tɔ̀ɔ̀nyààŋ ke ɗɔ̀ɔ̀ kòmauŋ nɛɛ̀ŋ wèè wɔŋ jakulo, jòòpɛɛ wuŋ nàŋ yaà wa wo jɔ̀àfelaa jiɛ̀jiɛ̀ɔ.

¹⁷ E teenga bà naŋ mààŋ, yèè wò naŋ nyɛ̀nɛ̀ŋ wànàŋ wèè e zòòlò dèdauŋ nɛ̀ kɛ̀ɛ̀ ko nɛ̀ɛ̀uŋ niìŋ. Kɛɛ wo gò wa yɛ̀mɛ̀ è ɗewe wèè wo niŋ ɓɛìŋ yɛmɛ̀, jòòpɛɛ wò naŋ wa pɔ̀wɔ̀ wo dèdauŋ nɔɔ̀ŋ yèè wò naŋ gòlò wèè e keì bi.

¹⁸ Niŋ fè mààŋ ànyùùŋ Ezɔ̀ɛ̀ nyaŋ, esaɓù kɛ̀ kòò nìŋ hnè koɓɛ̀ wɔŋ Tòò Sanàa, ko yèi e mhɔɔ̀ŋ kùwa gbee yaà wa lɛ̀, ke nyìwì gènaŋ yèè wɔŋ dùfòì,

¹⁹ yaà ebò e pòtanàŋ fùaŋ. Yèè nààŋ anyùùŋ Ezɔ̀ɛ̀ nyaŋ naŋ wa kòmò ke mìè Dayàa, àŋ naŋ pɔwɔ̀ nyààŋ ɓɔ̀ wò gbòà ɓɛìŋ,

²⁰ esaɓù kɛ̀ aŋ gò wa nyimèè wèè è nɛ̀ɛ̀ŋ wò Dayà naŋ wa woò lɛ. Wo Dayà naŋ wa woò wààŋ, “Sèè pɛɛ wo nyùùŋ ɔ̀ɔ̀ wo yilì kùùno wo gbùwà wɔŋ toò gbeeɔ̀ maŋ kùàŋ, hɔ̀wa nùuŋ le dùò wo fà.”

²¹ E nɛ̀ɛŋ naŋ wa kààìŋ wɔŋ Tòò Sanàa dìmɛ̀ lɛ, naŋ nyìnìè anyùùŋ nyaŋ jùù, yèè wo Mòòze naŋ woò wààŋ, “E jùùɛ yààìm , yèè è naŋ nyɛ̀nɛ̀ŋ e kɔɔ mɛ̀ jele kpàkpà.”

²² Kɛɛ nàŋ hnàŋ ko Jùlusɛ̀làm ko jè àìjɛnɛ̀iŋ, yèè koɓɛ̀ wɔŋ Toò gbeeɔ̀ àŋ nyaaŋ Zanyɔ̀ŋ. Kià nàŋ yaà ko jawa gbeeì wèè wo Dayàa kiɛ̀ŋ wɔŋ nyiiŋ gèeɔ̀ wɔ, ko yèi aŋ màikà taasùùŋ jika naŋ hnè wèè aŋ gè zɔlɔ̀.

²³ Nàŋ hnàŋ koɓɛ̀ ke gbòò anyuùŋ hààwè Dayà nyaŋ, aŋ jɔ̀à kòmaŋ jiɛ̀jiɛ̀ nyaŋ, aŋ yè nyaŋ maŋ deè nyiŋ màŋ yaà sìnga miŋ ko àìjɛnɛ̀ŋ. Nàŋ hnàŋ koɓɛ̀ Dayài, wo nyuùŋ hàà kitiɔ̀ wèè anyùùŋ nyaŋ gbiŋ, yèè aŋ jìnàŋ anyùùŋ tɔ̀ɔ̀nyaàŋ nyàŋ gbiŋ wo Dayà naŋ nyɛ̀nɛ̀ŋ àŋ naŋ zɛ̀nɛ̀ŋ nyaŋ.

²⁴ Nàŋ hnàŋ koɓɛ̀ Jisɛ̀i, wo yèɔ sia e fèèmàŋ e ɗààhìì e mìèsùàgùùŋ jɛ̀ì Dayàa ko nɛ̀ɛ̀ŋ wiì wɔ. Yèè maŋ sɛiŋ nùuŋ màŋ àŋ naŋ vaaì maŋ, naŋ jɔ̀ɔ̀ e ɗààhiì kɛnɛ ko nɛ̀ɛ̀ŋ wiì e nìàŋ maŋ sɛ̀ìŋ Eɓɛ̀ɛ̀ maŋ.

²⁵ Yɛ̀mɛìŋ nyɛ̀iŋ bi diɛŋ yèè ɓɔ̀ nìŋ gè màŋhɛɛ wèè naŋ kòmàŋ kè mìè wò nyùnɔ̀ɔŋ gboo wɔ̀. Anyùùŋ nyaŋ naŋ wa gè maŋhɛɛ wèè aŋ kùmìàŋ ke mìè gbòà nɛɛmaàŋ e dììɛ diɛŋ wɔŋ Tòò Sanàa dìmɛ̀ nyaŋ, aŋ gò wa dùàŋ. Nìŋ naŋ gongò kɛ̀ nàŋ ɓɛ̀nɛ̀ŋ dùaŋ, sèè nìŋ gè maŋhɛɛ wèè naŋ jɔ̀ɔ̀lɔ̀ ke mìè gbòà nyùnɔ̀ɔŋ dìì, wò yèɔ naŋ gbòò e yìwìà ko àìjɛnɛ̀ŋ wɔ?

²⁶ E teenga jiɛ̀jiɛ̀ɛ wo Dayà naŋ wa gbòò lɛ, ke mìèuŋ nɛɛ̀ŋ naŋ wa nyɛ̀nɛ̀ŋ e dììɛ gbiinè e teenga lii sùà. Kɛɛ wò naàŋ jɔ̀à e ɗààhiì wààŋ, “Mìŋ do nàŋ nyɛ̀nɛ̀ŋ e dììɛ gbiinè sùà guùŋ ɓɛìŋ, e kpùlìà ko àìjɛnɛ̀ŋ kuŋ pɛɛ.”

²⁷ Maŋ mìè maŋ wo Dayà naŋ gbòò nààŋ wò naŋ woò wààŋ, “E sùà guùŋ ɓɛìŋ,” màŋ naŋ tɔɔ̀ janjai kɛ̀ manɛ̀ŋ maŋ gbiŋ wo Dayà naŋ banè maŋ do wa nàwèè nàŋ gbiinè ke ɗɔ̀ɔ̀ guùŋ yèè maŋ yèwà ko jɛ̀i miŋ niìŋ. Kpeiŋ maŋ yè maŋ nàŋ naàŋ gbiinè maŋ, nàŋ doo nàŋ joo.

²⁸ Gè wiìŋ Dayà ke sɛ̀, wèè esaɓù kɛ̀ è naìŋ yɛ̀mɛ̀ e kana e yèɛ fè ɓɛ̀nɛ̀ŋ mɛ̀ɛ̀mɛɛŋ lɛ. Kɛ̀ɛ̀nɛ̀ŋ wiìŋ e jòòwo gbee yèè e zoolòiŋ Dayà e ɗewe kiiɛ̀ douŋ nàŋ fɔ̀ɔ̀yɛ̀ jii lɛ̀ e ɓɛ̀ɛ̀jàa sùà.

²⁹ Weètii, kùwa wiìŋ e ɗààhìì Dayàa kpaŋ, esaɓù kɛ̀, wò do wi nàŋ pɔɔpɔ̀ɔ̀, sèè è gouŋ haawè.