Hiɓu 10 - WƆŊ FƐ̀Ì EBÒ SÌÀŊ DAYÀA

¹ Maŋ Sàwà maŋ wo Dayà naŋ wa kìɛ̀ŋ aŋ Juùù nyaŋ màŋ, màŋ yaà mààŋ wɔŋ mììmììŋ manɛ̀ŋ kɛnɛ màŋ do nàŋ hnè maŋ. Maŋ sàwà miiŋ nàŋ fè wa mànɛ̀ŋ kɛnɛ màŋ gbiŋ wò Dayà naŋ wa jɔ̀ɔ̀ e ɗààhiì wèè wo kiɛ̀ŋ maŋ. Àŋ gè maŋ saaà mɛɛ̀ŋ pɛɛpɛɛ ke ɗɔɔ gbiŋ yèè wɔŋ doa gbiŋ. Kpeiŋ, dièsɔa anyùùŋ nyaŋ hnàŋ koɓɛ̀ Dayài nyàŋ naŋ ɓɛ̀nɛ̀ŋ nɔ̀ŋ zɛ̀nɛŋ nyiŋ nààŋ àŋ kuwo maŋ sàwà maŋ naŋ tɔ̀ɔ̀ e ɗewe kiiɛ̀ àŋ gè maŋ saaà mɛɛ̀ŋ lɛ?

² Anyùùŋ nyaŋ zoolà Dayà nyaŋ, sèè aŋ weè nɔ̀ŋ zɛ̀nɛŋ nyiŋ e yìwìà maŋ jùumù nyiŋ màŋ sùà, aŋ naàŋ weè ɓɛìŋ kɛ̀ɛ̀nɛ̀ŋ gòngo kɛ̀ è keì naŋ nyiŋ jeè èsàɓù màŋ jùumù maŋ àŋ naŋ nyɛ̀nɛ̀ŋ maŋ, anyùùŋ naàŋ weè ɓɛìŋ kìɛ̀ŋ mànɛ̀ŋ saaà.

³ E tɔɔɓaaà nàŋ yaà kɛ̀, e saaà gèe wɔŋ doa gbiŋ, è nyɛnɛŋ anyùùŋ aŋ fè nyɛɛnɛ̀ŋ wèè màŋ jùumù nyiŋ màŋ.

⁴ E gbììŋ gbììŋ nɛ nàŋ yaà kɛ̀, maŋ sɛ̀ìŋ ɗolònɛ̀ŋ mààŋ wo dìi wowo ɔ̀ɔ̀ wo diì wowo fè gùà màŋ jùùmù nyùùŋ.

⁵ Weètii, nààŋ e teengaà naŋ wa gbɛ̀ɛ̀ wèè wo Jisɛ̀ Kulaì wo hnàŋ e ɗuunyaàŋ, wò naŋ wa wòò wo Dayà wààŋ, “Muŋ manàŋ wèè ànyùùŋ aŋ gè màŋ saaà ɔ̀ɔ̀ aum kìɛ̀ŋ mànɛ̀ŋ kìɛŋ, kɛɛ mùŋ naim nyɛ̀nɛ̀ŋ ka kɛ̀ɛ̀nɛ̀ŋ ke kpùnàŋ nyuùŋkpùuŋ.

⁶ Maŋ ɗolònɛ̀ŋ sùaŋ gììyà saaà wɔ̀ŋ gbɛ̀gbɛ̀ zòòloɔ̀ diɛŋ, ɔ̀ɔ̀ mànɛ̀ŋ saaà wèè maŋ gùà màŋ jùumù, nàŋ fòum fɔ̀ɔ̀yɛ̀ jii,

⁷ weètii mìŋ naŋ woò mìàŋ, ‘Oo Dayà, miàŋ wɛɛ̀, kà hnàŋ wèè ka nyɛ̀nɛ̀ŋ e yèɛ mùŋ manaŋ lɛ̀, màànààŋ nɔŋ è yaà sìnga niŋ e nyaàiŋ eim dè wɔŋ fɛ̀ì maŋ Sàwà Dayàa sùà lɛ.’ ”

⁸ Wo Jisɛ̀ Kulaì naŋ woò jiɛ̀ koɓɛ̀ Dayài wààŋ, “Muŋ manàŋ mànɛ̀ŋ saaà yaà mànɛ̀ŋ kìɛŋ ɔ̀ɔ̀ màŋ ɗolònɛ̀ŋ sùaŋ gììyà saaà wɔ̀ŋ gbɛ̀gbɛ̀ zòòloɔ̀ diɛŋ, wèè maŋ gùà màŋ jùumù.” Wò naŋ wa tɛɛ̀ woò jòòpɛɛ àŋ kuwa aŋ gììyà mànɛ̀ŋ mɛɛ̀ŋ gbiŋ saaà kòɓɛ̀ Dayài, nààŋ ke Sàwà Dayà naŋ kaà lɛ.

⁹ Kpeiŋ wo Jisɛ̀ naŋ wòò wo Dayà wààŋ, “Oo Dayà, miàŋ wɛɛ̀, kà hnàŋ wèè ka nyɛ̀nɛ̀ŋ e yèɛ mùŋ manaŋ lɛ̀.” Weètii wo Dayà naŋ jàà e kèè maŋ saaà gèe gɔu màŋ e ɓula, yèè wò naŋ nyɛ̀nɛ̀ŋ wo Jisɛ̀ Kulaì naŋ dè e ɓɛ̀ŋ maŋ saaà gèe bi.

¹⁰ Nààŋ wo Jisɛ̀ Kulaì naŋ nyɛ̀nɛ̀ŋ e yèɛ wo Dayà manaŋ wa wo nyɛ̀nɛ̀ŋ lɛ̀, yàwi nààŋ gbiŋ naiŋ nɔ̀ŋ anyùùŋ nɛɛmaŋ e yìwìà maŋ jùumù wi màŋ sùà, e teengaà wò naŋ gììyè ke kpùnauŋ nɛɛ̀ŋ saaà e sùà guùŋ kpò wèè anyùùŋ nyaŋ gbiŋ lɛ̀.

¹¹ Wo sìèfèìŋ zòòlo gbiŋ wo yèɔ yaà wo Juùù nyuuŋ wɔ, nyɛnɛŋ e tòmouŋ nɛ̀ ke ɗɔɔ gbiŋ, e kìlà wo fè manɛ̀ŋ kìɛŋ e saaà gèeo sùà e teenga zimgbe. Kɛɛ maŋ saaà gèe mɛɛ̀ŋ fè gùà màŋ jùùmù nyùùŋ gbiŋ.

¹² Wo Jisɛ̀ Kulaì naŋ wa kìɛ̀ŋ wuŋ bi e saaà gèeo sùà, e sàà gè ɗì guùŋ bi kuwa sɛmɛmaŋ, yèè è teenga gbiŋ è guo maŋ jùumù wi màŋ, e kìlà wò naŋ jɛ̀ì wɔŋ kùàŋ jìkà Dayàa wèè woo jèè jɛ̀i.

¹³ Kuŋ wò jaa naàŋ e jèèsùà wo Dayà nyɛ̀nɛ̀ŋ aŋ joouŋ nyàŋ aŋ nɔ̀ŋ nɛ̀ŋ dè maŋ gòlò diɛɔŋ.

¹⁴ E yìwìà è sàà gè ɗì gunùuŋ nɛ̀ wò naŋ gè lɛ, è naŋ gùò maŋ jùùmù anyùùŋ nyaŋ yèè àŋ nɔ̀ŋ anyùùŋ nɛɛmaŋ.

¹⁵ Wo Jìnàŋ Nɛɛmaàŋ naŋ wi kìɛ̀ŋ ke mìè seì. Wò naŋ wi woò jiɛ̀ wààŋ,

¹⁶ “Wo Kanaà Dayà naŋ woò wààŋ, ‘Tɛɛ̀ nàŋ yaà e ɗààhìì e mìèsùàguùŋ nɛ mìŋ do nàŋ banè weè nyiŋ lɛ maŋ ɗɔɔ màŋ yaà hinie màŋ sùà. Mìŋ do nàŋ sìè maŋ sàwàim màŋ maŋ jii nyiŋ màŋ sùà yèè ka miŋ sìngà maŋ gòngo nyiŋ màŋ sùà.’ ”

¹⁷ Wo Dayà naŋ ɓɛìŋ woò wààŋ, “Miŋ naàŋ wa nàwèè ɓɛìŋ jàà màŋ jùumù yaà màŋ kpèè naanààŋ nyiŋ màŋ jii julɔfɔ.”

¹⁸ E teengaà wo Dayà do nàŋ jùùyè anyùùŋ nyɛɛ̀ŋ hakɛ̀ lɛ, aŋ naàŋ wa nàwèè ɓɛìŋ fè mànɛ̀ŋ saaà wèè jùumù nyiŋ màŋ.

Hnàŋ wiìŋ e gbɛ̀ɛ̀iŋ wo Dayà fɔ̀ɔ̀

¹⁹ Nyɛ̀iŋ nààŋ wùìyaim nyàŋ, è yààìŋ naàŋ nyaàŋ gè diɛŋ wi wèè eiŋ jɔ̀à ko Nɛ̀nɛ̀ŋ Nɛɛmaŋ Gbeeì wèè Dayà, esàɓù maŋ sɛ̀ìŋ Jisɛ̀ Kulaì maŋ wò naŋ wùɔ̀ŋ dìì maŋ nààŋ àŋ nauŋ wa jìwè.

²⁰ Wò naŋ yìlè ke dòmaŋ jɛi ke yèɛ kɔ̀à koɓɛ̀ wɔŋ nyiiŋ gèe lɛ̀. Yèè ke dòmaŋ yɛɛ̀ kɔɔyɛ̀ wì wɔŋ dèè saaŋ yɛmgbɛ̀ɔ sùà. Wɔŋ dèè bi zà nàŋ yaà ke kpùnàŋ Jisɛ̀ Kulaìɛ kiŋ bi.

²¹ È kùwàìŋ wo sìèfèìŋ zòòlo gbee wo yèɔ sia kè sààŋ Dayàa feìŋ ko àìjɛnɛ̀ŋ wɔ.

²² Weètii, hnàŋ wiìŋ e gbɛ̀ɛ̀iŋ wo Dayà, maŋ jii tɔ̀ɔ̀nyaàŋ yaà ke jii tùlia gbee e yìwìà hààwe kɛnɛ sùà. È kùwàìŋ naàŋ maŋ jii zɛ̀nɛŋ, e kìlà maŋ fè ɓɛìŋ màŋ keì naanààŋ mɛɛ̀ŋ màŋjɛ̀wɛ, yèè maŋ kpùnaŋ wi màŋ nɔ̀ŋ gùa miŋ e wuiyè sengèì sùà.

²³ Kùwà wiìŋ koɓɛ̀ guùŋ kpaŋ wèè ke jii tùliaà è woàìŋ kɛ̀ kè yaà weè wilɛ̀, esaɓù kɛ̀ èiŋ ɓɛ̀nɛ̀ŋ kɛ̀ɛ̀nɛ̀ŋ e hààwe wo Dayà sùà wèè e ɗààhiìɛ wò naŋ banè lɛ ko nɛ̀ɛ̀ŋ wiì.

²⁴ Kɛ̀ɛ̀nɛ̀ŋ wiìŋ e gòngo wèè aŋ dàwi e kìlà e kpuumàiŋ e fèemàŋ, e tɔɔ̀iŋ mànaŋ yèè e nyɛ̀nɛ̀iŋ keì sìàŋ.

²⁵ E bɔ̀mɔ̀ŋ ɓɔ̀ wùìyà wi wèè eiŋ dèènè koɓɛ̀ guùŋ wèè zòòlo, màànààŋ aŋ bà nyiŋ yaà nyinie lɛ̀. Kùùnò wiìŋ kìɛ̀ŋ maŋ jii nyingè koɓɛ̀ aŋ dàwi wi nyàŋ, nààŋ ngèè nìŋ naŋ nyìmè kɛ̀ ke ɗɔɔɛ̀ wèè wo Kanaà wo hnàŋ lɛ, kè kùùnò gbɛ̀ɛ fɔ̀ɔ̀.

²⁶ E saaà gèe bà gbiŋ fè wèè e gùà màŋ jùumù wi màŋ, sèè è naiŋ ɗewè wèè eiŋ nɔ̀ŋ nyìnìè maŋ kèì jùumù keleiŋ, jòòpɛɛ èiŋ nyìmàŋ e tɔ̀ɔ̀nyaàŋ.

²⁷ Kɛɛ e yèɛ nɔŋ àŋ naŋ naàŋ ɓɛ̀nɛ̀ŋ nyɛ̀nɛŋ lɛ̀ nàŋ yaà, wèè aŋ nyɛ̀nɛ̀ŋ jùù e teengaà àŋ yaà fùlìè kitiɛ̀ wo Dayà do nàŋ heè lɛ, yèè e hmɔɔ̀ŋ kùwa gbeeɛ̀ do nàŋ sùɔ̀ŋ anyùùŋ nyaŋ naŋ gììyè wo Dayà maŋhɛɛ nyàŋ.

²⁸ Wo nyùnɔ̀ɔŋ gbiŋ naŋ gììyè maŋ Sàwà maŋ wo Dayà naŋ kìɛ̀ŋ wo Mòòze màŋ maŋhɛɛ wɔ̀, anyùùŋ gbèègbèè fuɔŋ nyàŋ naùŋ yɛ̀mɛ̀ kè nyowo, àŋ douŋ nàŋ jìwè, sèè anyùùŋ tìyèe ɔ̀ɔ̀ àŋ nie yɛi aŋ fòlà aŋ kìɛ̀ŋ ke mìè seì, e teengaà àŋ nauŋ gbaì lɛ.

²⁹ Kɛɛ ngèè è do nàŋ nɔ̀ŋ e keì nyìnga gbee koɓɛ̀ wo nyùnɔ̀ɔŋ do nàŋ gììyè wo Jɔ̀àfèlàà Dayàa maŋhɛɛ wɔ̀, yèè wo hìàŋ e ɓɛ̀ɛ̀pɔ̀ɔ koɓɛ̀ maŋ sɛ̀ìŋ e ɗààhìì e mìèsùàgùùŋ Dayàa naŋ nyɛ̀nɛ̀ŋ è naiŋ nɔ̀ŋ nɛɛmaŋ sùà lɛ. Yèè è do nàŋ nɔ̀ŋ e nɛ̀ŋ gò zɛ̀nɛ̀ŋ wèè wo nyùnɔ̀ɔŋ do nàŋ kìɛ̀ŋ ke mìè ɓɛ̀ɛ̀pɔ̀ɔ koɓɛ̀ wo Jìnàŋ Nɛɛmaàŋ, wo yèɔ tɔɔ̀ wì ke nyowo wɔ̀.

³⁰ Èiŋ nyìmàŋ kɛ̀ wo Dayà naŋ woò wààŋ wò do nàŋ kìɛ̀ŋ wo nyùùŋ wii e keì nyìnga, e kìlà wouŋ gììyè kpàŋ. Wɔŋ fɛ̀ì Dayàa naŋ woò wààŋ wo Kanaà do nàŋ gbàì anyunùuŋ nyàŋ.

³¹ È yaà e kèì jùù gbee wèè wo nyùùŋ wo sɔ̀à e gààŋ wo Dàyà nyiiŋ gèeɔ̀ dìì.

³² Ɓɔ̀ nìŋ nyɛɛnɛ̀ŋ wèè màŋ keì nyìnga màŋ nìŋ naŋ wa kɔ̀ɛ̀ɛ̀ sùà maŋ, e teenga jiɛ̀jiɛ̀ɛ nìŋ naŋ wa yɛ̀mɛ̀ e gbòlòùŋ Dayàa lɛ̀.

³³ E teenga bà sùà àŋ naiŋ wa wòò maŋ mìè ɓɛ̀ɛ̀pɔ̀ɔ, yèè àŋ naiŋ nyɛ̀nɛ̀ŋ naŋ kà e keì nyìnga dìì ko ɓài. Yèè e teenga bà sùà nìŋ naŋ wa banebànè wèè naŋ nɔ̀ŋ aŋ bà nyiŋ bà wèè e keì nyìngaà anyuùŋ joo yaà wa kɔ̀ɔ̀yɛ̀ dìì lɛ.

³⁴ Nìŋ kuwa wa ke nyowo, yèè nìŋ naŋ tuwò tɛ̀ɛ̀ koɓɛ̀ anyùùŋ nyaŋ yaà wa ko sààŋ nyìwì nyaŋ. Yèè àŋ naŋ wa nyimèè wèè anyùùŋ aŋ ɓèmè manɛ̀ŋ siwè nyiŋ màŋ gbiŋ esaɓù, nàŋ nyìmàŋ kɛ̀ nìŋ kuwa e nɛ̀ŋ kɛnɛ, e nɛ̀ŋ kɛnɛ e yèɛ do nàŋ nɔ̀ŋ wèè julɔfɔ lɛ̀.

³⁵ Kɛ̀ɛ̀nɛìŋ maŋ jii nyingè, esaɓù kɛ̀ màŋ doiŋ nàŋ hìɛ̀ŋ e jìwààjɛ̀wɛ̀ siaŋ gbee.

³⁶ Nìŋ kuwa nàŋ kɛ̀ɛ̀nɛ̀ŋ maŋ jii tɔumtɔ̀ùm, wèè kɛ̀ niŋ nyɛ̀nɛ̀ŋ e yèɛ wo Dayà manaŋ lɛ̀, yèè nìŋ do nàŋ yɛ̀mɛ̀ e nɛ̀ɛŋ wò naŋ jɔ̀ɔ̀ ɗààhiì wèè woiŋ kiɛ̀ŋ lɛ.

³⁷ Wɔŋ fɛ̀ì Dayàa naŋ woò wààŋ, “È jòò e teenga kpuu, wèè wo nyùnɔ̀ɔŋ yaà hinie wɔ̀ wo hnàŋ. Wo naàŋ dɔɔnɔ̀ŋ.

³⁸ Anyùùŋ tɔ̀ɔ̀nyaàŋ nyaŋ miàim Dayà naŋ jàà kùàŋ dìì nyaŋ, àŋ do nàŋ kùwìè e hààwe, e kìlà aŋ nɔ̀ŋ wɔŋ nyiiŋ gèeɔ̀ sùà. Kɛɛ sèè wo bà guùŋ gbiŋ wo fè e hààweɛ̀ wò kuwa lɛ̀ jɛwɛ, ke jii miɛ̀ŋ naàŋ fɔ̀ weè nyiŋ.”

³⁹ E fèìŋ mààŋ ànyùùŋ nyaŋ naŋ fè è hààwe nyiŋ nɛ̀ jɛwɛ yèè àŋ naŋ fɔ̀ nyaŋ. È doiŋ nàŋ jèè e hààwe maŋ nyiiŋ gèe wi màŋ sùà e jèèsùà wo Dayà wo wi joeyè .