Hiɓu 1 - WƆŊ FƐ̀Ì EBÒ SÌÀŊ DAYÀA

Ke Mìè Dayàa e yìwìà wo Jɔ̀àfelaauŋ nɔɔ̀ŋ sùà

¹ E teenga gɔuɛ̀ sùà, wo Dayà naŋ wa gbòò koɓɛ̀ aŋ nèwàènèwe wi nyàŋ e yìwìà aŋ wɛ̀ijìuŋ nyàŋ sùà e teenga zimgbe yèè maŋ ɗewe kii zimgbe sùà,

² kɛɛ maŋ ɗɔɔ dìàmaŋ mɛɛ̀ŋ sùà, wò naŋ gbòò ko nɛ̀ɛ̀ŋ wiì e yìwìà wo Jɔ̀àfelaauŋ nɔɔ̀ŋ sùà. E saɓùuŋ nɛ̀ sùà wo Dayà naŋ wa bànè ko àìjɛnɛ̀ŋ yaà e ɗuunyaàŋ. Wuŋ wo Dayà naŋ tàeɗùù wèè wo nɔ̀ŋ wo nyuùŋ kɛ̀ɛ̀nɛ̀ŋ manɛ̀ŋ maŋ gbiŋ e teengaà e ɗuunyaàŋ juo wa nàwèè lɛ.

³ Wo Jɔ̀àfèlàà Dayàa nàŋ kuwa e gbolòùŋ nɛ gbiŋ wèè e jòòwò Dayàa, e kìlà wò yaà mààŋ e nɔ̀ŋ kìì Dayàa wuŋ bi. E yìwìà ke mìè gaàŋ gbeeuŋ nɛɛ̀ŋ, wò nyɛnɛŋ manɛ̀ŋ maŋ gbiŋ wo Dayà naŋ banè maŋ, jèè e nɔ̀ŋ kìì bàne miŋ nɛ̀ sùà. Nààŋ wo Jɔ̀àfelaaà naŋ nyɛ̀nɛ̀ŋ wo Dayà naŋ jùùyè anyuùŋ kpùuŋ nyàŋ hakɛ̀ wèè maŋ jùumù nyiŋ màŋ wèè aŋ zɛ̀nɛ̀ŋ, wò naŋ jɛ̀ì wɔŋ kùàŋ jìkà Dayàa, wo yèɔ kuwa e gaàŋ gbeeɛ̀ gbiŋ wɔ̀ ko àìjɛnɛ̀ŋ ko fùùiŋ.

E gààŋ gbèè wo Jɔ̀àfèlàà Dayàa

⁴ Wo Dayà naŋ dɛ̀ɛ̀kɛ̀ wo Jɔ̀àfelaauŋ nɔɔ̀ŋ e nìàŋ aŋ màikà nyaŋ gbiŋ, màànààŋ nɔŋ e dèèɛ wo Dayà nauŋ kiɛ̀ŋ lɛ è naŋ dɛɛ̀ e nìàŋ maŋ je nyiŋ dèè maŋ lɛ̀.

⁵ Èiŋ tii nyìmàŋ esaɓù kɛ̀, wo Dayà gò wa wòò wò màikàuŋ nɔɔ̀ŋ bà gbiŋ wààŋ, “Muàŋ nàŋ yaà wo Jɔ̀àfelaa miɔ̀ŋ, esaɓù kɛ̀ kà nàaŋ kìlà wo Dèda mɔɔ̀ŋ.” Wo Dayà gò wa wòò è kèè wò màikà bà gbiŋ wààŋ, “Mìŋ do nàŋ nɔ̀ŋ wo Dèdauŋ nɔɔ̀ŋ, e kìlà wò do nàŋ nɔ̀ŋ wo jɔ̀àfelaa miɔ̀ŋ.”

⁶ Kɛɛ wèè paŋ wo Dayà tùàŋ wa wo Jɔ̀àfelaa kòmaŋ jiɛjiɛɛ̀uŋ nɔɔ̀ŋ koɓɛ̀ anyùùŋ nyaŋ e ɗuunyaàŋ, wò naŋ woò wààŋ, “Aŋ màìkà Dayà nyaŋ gbiŋ kuwa auŋ zoolò.”

⁷ Kɛɛ wo Dayà naŋ wòò e kèè aŋ màikàuŋ nyàŋ wààŋ, “Wo Dayà naŋ nyɛ̀nɛ̀ŋ aŋ màikàim nyàŋ aŋ nɔ̀ŋ wɔŋ fòì, yèè wò naŋ nyɛ̀nɛ̀ŋ aŋ ɓɔìjɔ̀àim nyàŋ aŋ mììnè e hmɔɔ̀ŋ kùwa.”

⁸ Wo Dayà naŋ woò e nyaàiŋ dè wo Jɔ̀àfelaauŋ nɔɔ̀ŋ e ɗewe gbio sùà wààŋ, “Oo Dayà, e kana mɔ̀ɛ̀ do nàŋ nɔ̀ŋ wèè julɔfɔ yèè julɔfɔ! E teenga gbiŋ sèè mùŋ haà e kiti anyunùum nyàŋ diɛŋ, mùŋ nyɛ̀nɛ̀ŋ niìŋ e tɔ̀ɔ̀nyaàŋ sùà!

⁹ Mùŋ manaŋ wèè maŋ yɛ̀mɛ̀ anyùùŋ aŋ nyɛ̀nɛ̀ŋ e yèɛ yaà tɔ̀ɔ̀nyaàŋ lɛ, yèè mùŋ naŋ wùɔ̀ŋ wèè maŋ yɛ̀mɛ̀ anyùùŋ aŋ nyɛ̀nɛ̀ŋ maŋ kpèè naanààŋ. Esaɓùɛ lɛɛ̀ miàim wo Dayà mɔɔ̀ŋ wo yèɔ mùŋ zoolà wɔ naum tàeɗùù, e kìlà kàum kìɛ̀ŋ ɓɛ̀ɛ̀jàa e yèɛ do nyɛ̀nɛ̀ŋ e zɔlɔ̀ zimgbe eum nɔ̀ŋ e nìàŋ e yèɛ mìŋ naŋ kìɛ̀ŋ aŋ dàwium nyàŋ lɛ.”

¹⁰ Wɔŋ fɛ̀ì Dayàa naŋ ɓɛìŋ woò wààŋ, “Kanaà, muàŋ naŋ bànè e dììɛ e yìwìà ko tɔ̀ɔ̀tù ɗuunyaàŋ, e kìlà e tèèngà guùŋ bi maŋ kùàŋ muàŋ bi màŋ mùŋ naŋ toomò wèè maŋ nyɛ̀lɛ̀ ko àìjɛnɛ̀ŋ.

¹¹ Maŋ gbiŋ do nàŋ jɔɔnɔ̀ŋ, kɛɛ mùŋ doo nàŋ joo wèè julɔfɔ. Maŋ gbiŋ do nàŋ kɔlì mààŋ maŋ dèè.

¹² Mùŋ do miŋ nàŋ mɔlɔmɔ̀lɔ̀ mààŋ wɔŋ dèè, e kìlà mùŋ do miŋ nàŋ vɔɔnɔ̀ŋ mààŋ maŋ dèè. Kɛɛ mùŋ do nàŋ nɔ̀ŋ e ɗèwè guùŋ nɛ e teenga gbiŋ, e kìlà mùŋ do nàŋ nɔ̀ŋ wɔŋ nyiiŋ gèeɔ̀ sùà wèè julɔfɔ yèè julɔfɔ.”

¹³ Wo Dayà gò wa wòò wò màikàuŋ nɔɔ̀ŋ bà gbiŋ wààŋ, “Jɛ̀ì kià wɔŋ kùàŋ jìka miɔ̀ŋ e jèèsùà ka nyɛ̀nɛ̀ŋ aŋ jooum nyàŋ aŋ nɔ̀ŋ e nɛ̀ŋ dè maŋ gòlò diɛum.”

¹⁴ Kiìŋ nàŋ yaà aŋ màikà nyaŋ? Aŋ màikà nyaŋ yaà aŋ jinàŋ aŋ yè nyaŋ tomàŋ wèè Dayà, e kìlà wò tùɔ̀ŋ nyiìŋ wèè aŋ kpuumàŋ anyùùŋ nyaŋ wò manaŋ wo joeyè nyaŋ.