Gàla 5 - WƆŊ FƐ̀Ì EBÒ SÌÀŊ DAYÀA

Wo Jisɛ̀ Kulaì naŋ wi gèe e ɗo dìì

¹ Wo Jisɛ̀ Kulaì naŋ wi gèe e ɗo dìì! Tɛɛ̀ naŋ tɔɔ̀ kɛ̀, èiŋ kaì fòlà e ɗo dìì. Nààŋ wo Jisɛ̀ Kulaì naŋ wi bilɛ̀ŋ e yìwìà e ɗo dìì lɛ, jàà wiìŋ e bìlɛŋ bi kùàŋ dìì, yèè ɓɔ̀ è nɔ̀iŋ ɓɛìŋ è dìkia kè Sàwà àŋ ɗo dìì.

² Jàaìŋ maŋ nùŋ dìì! Miàim Pɔɔ̀, mìŋ yààìŋ wòò sùà kɛ̀ sèè nyɛiŋ bi naŋ nyimèè wèè aiŋ jàà kpùa, è do nàŋ tɔɔ̀ kɛ̀ wo Jisɛ̀ Kulaì fè è nɛ̀ŋ kɛnɛ bà gbiŋ kò nɛ̀ɛ̀iŋ niìŋ.

³ Mìŋ yààìŋ fè sùà e gòo lɛɛ̀, wo nyùnɔ̀ɔ̀ŋ naŋ nyimèè wèè auŋ jàà kpùà wɔ̀, sɔɔ̀ wo jɔ̀ɔ̀lɔ̀ ke Sàwàa gbiŋ dìì.

⁴ Nyɛ̀iŋ nyàŋ nìŋ kamàŋ ɗewe wèè naŋ nɔ̀ŋ anyùùŋ tɔ̀ɔ̀nyaàŋ koɓɛ̀ Dayài esaɓù kɛ̀ nìŋ naŋ nyɛ̀nɛ̀ŋ e yèɛ ke Sàwàa naŋ woò lɛ, nàŋ gòò nyiìŋ bi wo Jisɛ̀ Kulaì kɔɔ. Yèè niŋ fè ɓɛìŋ e tɛ̀ɛ̀tɛ̀ɛ̀ Dayàa dìì.

⁵ Ke jii tùliaà è kùwàìŋ lɛ̀ nàŋ yaà kɛ̀, wo Dayà do wi nàŋ jàà kùàŋ dìì wèè eiŋ nɔ̀ŋ anyùùŋ tɔ̀ɔ̀nyaàŋ, yèè tɛɛ̀ è yiwìà gààŋ Jìnàŋ Nɛɛmaàŋ, e wi toomò e yìwìà e hààwe wi lɛ sùà.

⁶ Sèè è naiŋ wèè nɔ̀ŋ anyùùŋ guùŋ wo Jisɛ̀ Kulaì sùà, e tɛɛ gòòno bà gbiŋ fè weè ɓɛ̀nɛ̀ŋ nɔ̀ŋ e fèèmàŋ anyuùŋ jàà kpùa, yaà anyuùŋ gò jàà kpùa nyàŋ. Kɛɛ e kɛnɛɛ̀ tɛɛ̀ gbiŋ sùà, e hààwe tòòmò sùà nàŋ nyɛnɛŋ wèè naŋ mànaŋ anyùùŋ joo.

⁷ Nìŋ yaà wa nyìnìè e yèɛ yaà tɛ̀ɛ̀ lɛ, kɛɛ ɓòò kai naiŋ wa kèèwè wɔŋ kùàŋ feìŋ yèè nìŋ nauŋ tùlìè jii wèè naŋ hɔ̀ànè e tɔ̀ɔ̀nyaàaŋ jɔ̀ɔ̀lɔ̀ dìì? Dièsɔa wo nyùùŋ bi naiŋ wa kìɛ̀ŋ ke jii nyìngè yɛɛ̀ wèè naŋ hɔ̀ànè e tɔ̀ɔ̀nyaàaŋ jɔ̀ɔ̀lɔ̀ dìì?

⁸ Tɔ̀ɔ̀nyaàŋ, wo Dayàa yèɔ naiŋ tàeɗùù wɔ, nààŋ gò wa nyɛ̀nɛ̀ŋ wèè naŋ kɛ̀ɛ̀nɛ̀ŋ è gòngo mààŋ tɛɛ̀.

⁹ Màànààŋ àŋ woà lɛ, “E sòi jùwìà gbɔ̀u jɔa tòloò nɔŋ nàŋ nyɛnɛŋ ke gbɔ̀uɛ̀ jòwà.”

¹⁰ Kɛɛ kòò mìŋ kùwa nɔŋ ke jii tùlìà e nyaàìŋ eiŋ dè. E nɔ̀ɔŋ wilɛ̀ aŋ bàwibà wo Kanaà Jisɛ̀ Kulaì sùà naim kìɛ̀ŋ ke jii tùliaà kɛ̀ niŋ naàŋ nyɛ̀nɛ̀ŋ è yèɛ wò nyùùŋ bà woàìŋ wèè naŋ nyɛ̀nɛ̀ŋ lɛ, yèè wo nyùnɔ̀ɔ̀ŋ gbiŋ naŋ gongò wèè wo nyɛ̀nɛ̀ŋ maŋ jiiŋ màŋ gɔ̀àgɔ̀à sùà wɔ, wo Dayà douŋ wa nàwèè nàŋ nimilà ke ɗɔ̀ɔ̀ e gbàiɛ̀ diɛŋ.

¹¹ Wùìyaim nyàŋ, sèè ka woò mìàŋ è yaà tɛ̀ɛ̀ wèè wo nyùùŋ nɔ̀ŋ kpùà jàa, kɛ̀ wèè kiìŋ mìŋ yaà maŋ keì nyìnga mɛɛ̀ŋ sùà? Sèè tii naŋ wèè ɓɛ̀nɛ̀ŋ nɔ̀ŋ e tɔ̀ɔ̀nyaàŋ, kɛ̀ ke miè gbìaàŋ e nyaàìŋ dè wɔŋ vànèkpàà Jisɛ̀ Kulaìɔ weè ɓɛìŋ ɓɛ̀nɛ̀ŋ nɔ̀ŋ e keì nyìnga.

¹² Mìŋ he weè nàŋ mɔ̀nɔ̀ŋ wèè anyùùŋ nyaŋ yaà gɔ̀àgɔ̀à maŋ jiiiŋ màŋ sùà nyaŋ, ɓɔ̀ àŋ jàà nɔŋ nyiŋ bi kpùa, kɛɛ anyùùŋ nyɛɛ̀ŋ aŋ nɛɛmùŋ nyiŋ bi e nìàŋ yɛi!

¹³ Wùìyaim nyaŋ, àŋ naiŋ wa tàeɗùù wèè naŋ nɔ̀ŋ e bìlɛiŋ e yìwìà e ɗo dìì. Ɓɔ̀ nìŋ toomò è bìlɛiŋ bi e nɔ̀ŋ kè kàfaì wèè naŋ nyɛ̀nɛ̀ŋ è yèɛ nìŋ manaŋ lɛ̀. Tòòmoìŋ niŋ e nɔ̀ŋ keì sìàŋ maŋ kpùnaiŋ màŋ sùà wèè naŋ kìɛ̀ŋ aŋ dàwi e mànaŋ.

¹⁴ Maŋ Sàwà maŋ gbiŋ màŋ yaà ke Sàwà guùŋ sùà. Ke Sàwà bi nàŋ yaà, “Manàŋ wo nyuùŋkpùuŋ dàwi mɔɔ̀ŋ màànààŋ mùŋ manaŋ muàŋ bi lɛ̀.”

¹⁵ Kɛɛ sèè naŋ nɔ̀ŋ sùmiaŋ sùà e fèemàŋ mààŋ aŋ yìlì ɓìè, sɔɔ̀ naŋ yɛ̀mɛ̀ nyɛiŋ bi diɛŋ, sèè è go yɛi nɔ̀ŋ, nìŋ do nàŋ pɔ̀ɔ̀pɔ̀ɔ̀ nyɛ̀iŋ bi.

Wo Jìnàŋ Nɛɛmaàŋ yèè e ɗèwè yàwi biɛ̀

¹⁶ E yèɛ mìŋ yaà woo lɛ̀ nàŋ yaà tɛɛ̀, tɔ̀ e gààŋ Jìnàŋ Nɛɛmaàŋ nɔ̀ŋ maŋ nyiiŋ gèeiŋ màŋ sùà, yèè ɓɔ̀ nìŋ jɔɔlɔ̀ è ɗèwè màŋ kèìŋ nyuùŋkpùuŋ màŋ dìì.

¹⁷ E yèɛ maŋ kèìŋ nyuùŋkpùuŋ màŋ manaŋ lɛ̀ tiŋ wo Jìnàŋ Nɛɛmaàŋ naŋ gììyè maŋhɛɛ, yèè e yèɛ wo Jìnàŋ Nɛɛmaàŋ manaŋ lɛ̀ tiŋ maŋ kèìŋ nyuùŋkpùuŋ màŋ naŋ gììyè maŋhɛɛ. Maŋ kèì ɗì tìyèe mɛɛ̀ŋ naŋ wùònò fèemàŋ, yèè màŋ keewàìŋ kùàŋ feìŋ wèè niŋ go nàŋ nyɛ̀nɛ̀ŋ è yèɛ nìŋ naŋ ɗewe wèè naŋ nyɛ̀nɛ̀ŋ lɛ.

¹⁸ Sèè e gààŋ Jìnàŋ Nɛɛmaàŋ nɔ̀ŋ maŋ nyiiŋ gèeiŋ màŋ sùà, kɛ̀ Sàwà maŋ wò Dayà naŋ fè wò Mòòze màŋ, maŋ kuwà ɓɛìŋ è gààŋ kò diɛiŋ.

¹⁹ E yèɛ maŋ kèìŋ nyuùŋkpùuŋ màŋ nyɛnɛŋ lɛ̀ è yaà janjai. Màŋ dè wo nyùùŋ ke dòmàŋ hmɔŋtu, maŋ gòngo naanààŋ, yèè maŋ kpèè sàngè maŋjɛ̀wɛ,

²⁰ aŋ dàyà joo yèè anyùùŋ sɛɛ̀ŋ zòòlo, è nyɛ̀nɛ̀ŋ anyùùŋ aŋ wùònò fèemàŋ e kìlà aŋ sòmàŋ, aŋ nɔ̀ŋ e koo, e wùàŋ, yèè aŋ nɔ̀ŋ e gòngò nyiŋ biɛ̀ sùà. E kìlà àŋ hiàŋ e fèemàŋ gòòno maŋ dèène yèè maŋ gbòò sùà.

²¹ Àŋ nɔ̀ŋ e koo, aŋ nɔ̀ŋ e dìè mùàŋ, àŋ koà e gbana maŋ gbòò sùà, e kìlà àŋ nyɛnɛŋ maŋ keì naanààŋ. Mìŋ naiŋ wa kìɛ̀ŋ ke mìè gòo, yèè mìŋ yààìŋ nyiìŋ ɓɛìŋ kìɛ̀ŋ sùà. Wo nyùnɔ̀ɔ̀ŋ gbiŋ naŋ nyɛ̀nɛ̀ŋ maŋ keì mɛɛ̀ŋ wɔ wo naàŋ wa nàwèè yɛ̀mɛ̀ è kpùùmaŋ è Kànà Dayàa sùà.

²² Wo Jìnàŋ Nɛɛmaàŋ kiɛ̀ŋ wì e mànaŋ, e zɔlɔ̀, ke jii fàa, ke jii tɔumtɔ̀ùm, e keì sìàŋ, e tɛ̀ɛ̀tɛ̀ɛ̀, e hààwe,

²³ e ɓɛ̀ɛ̀jàa, yèè wo nyuùŋ nyìmàŋ e ɗèwè wuŋ bi kùwa. Ke sàwà bà gbiŋ fè wèè ke gbòà naanààŋ è nyààìŋ dè màŋ keì mɛɛ̀ŋ.

²⁴ E kìlà esàɓù e nɔŋ wilɛ̀ wèè wo Jisɛ̀ Kulaì, è jìwà e ɗèwè yàwi biɛ̀ yèè e ɗèwè maŋ kèìŋ nyuùŋkpùuŋ màŋ.

²⁵ Wo Jìnàŋ Nɛɛmaàŋ naŋ wi kìɛ̀ŋ wɔŋ nyiiŋ gèe, yèè è kuwa wèè eiŋ dè wo Jìnàŋ Nɛɛmaàŋ maŋjɛ̀wɛ.

²⁶ Ɓɔ̀ è nɔ̀ìŋ ànyuùŋ ɓììne, ɔ̀ɔ̀ eiŋ nɔ̀ŋ gììyà sùà anyuùŋ joo e koo sèè è nɔ̀ìŋ wòò sùà wìàà è yààìŋ tɛ̀ɛ̀ e nyiŋ nìàŋ.