Gàla 3 - WƆŊ FƐ̀Ì EBÒ SÌÀŊ DAYÀA

E hààwe nɔŋ nàŋ yaà ke dòmàŋ tɔ̀ɔ̀nyaàaŋ

¹ Nyɛ̀iŋ nààŋ nyùùŋ Gàlatìà ɓàaɓàa nyɛɛ̀ŋ! Ɓòò naiŋ gbìɛ̀ŋ e nɛ̀ŋ dàà nyùùŋ? Nyɛ̀iŋ bi ko fɛ̀ɛ̀fèìŋ mìŋ naiŋ wòò e ɗeweɛ̀ àŋ naŋ wa jìwìè wo Jisɛ̀ Kulaì wɔŋ vànèkpaa diɛŋ lɛ̀!

² Wòò nìim e kèì ɗì guùŋ, nìŋ naŋ wa yɛ̀mɛ̀ wo Jìnàŋ Nɛɛmaàŋ esàɓù kɛ̀, nìŋ naŋ wa jɔ̀ɔ̀lɔ̀ ke Sàwàa dìì ɔ̀ɔ̀ nààŋ nìŋ naŋ wa kòmò e Ebò Siaàŋ yèè nìŋ naŋ niŋ haawè lɛ?

³ Diè nìŋ yaà yɛi e ɓàaɓàa le! Nìŋ naŋ wa tɔ̀ɔ̀tù e gààŋ Dayà diɛŋ, nìŋ manaŋ naàŋ wèè naŋ kpɛ̀ɛ̀yɛ̀ e yèɛ wo Jìnàŋ Nɛɛmaàŋ naŋ wa tɔɔtù lɛ e gààŋ maŋ kpùnàŋ nyɛ̀iŋ bi màŋ sùà?

⁴ Maŋ keì nyìnga màŋ gbiŋ nìŋ naŋ wa kɔ̀ dìì maŋ, naŋ wa nɔ̀ŋ wèè foo? Tɔɔɓaa maŋ fè wa è wèè foo!

⁵ Wo Dayà naiŋ kìɛ̀ŋ wo Jinàuŋ nɔɔ̀ŋ, yèè wò naŋ nyɛ̀nɛ̀ŋ maŋ kèè mèè e tɛɛiŋ esaɓù kɛ̀ nìŋ naŋ wa jɔ̀ɔ̀lɔ̀ ke Sàwàa dìì, ɔ̀ɔ̀ esaɓù kɛ̀ nìŋ naŋ wa kòmò e Ebò Siaàŋ yèè nìŋ naŋ niŋ haawè?

⁶ Wɔŋ fɛ̀ì Dayàa naŋ woò wààŋ, “Wo Eɓulɔhɛɛ̀ŋ naŋ wa hààwè Dayà, yèè wèè esaɓù lii wo Dayà nauŋ wa jàà kùàŋ dìì wèè wo nɔ̀ŋ wo nyùùŋ tɔ̀ɔ̀nyaàŋ.”

⁷ Nìŋ kuwa naŋ nyìmàŋ kɛ̀, aŋ jɔ̀à kɛnɛ nyàŋ wèè Eɓulɔhɛɛ̀ŋ, nàŋ yaà anyuùŋ kùwìè e hààwe nyàŋ.

⁸ Wɔŋ fɛ̀ì Dayàa woò kɛ̀, wo Dayà do naŋ jàà anyùùŋ nyaŋ fè àŋ Juùù nyaŋ kùàŋ dìì esàɓù e hààwè tɔ̀ɔ̀nyaàŋ nyiŋ nɛ̀. E kìlà wɔŋ fɛ̀ì Dayà naŋ wa wòò Ebò Siaàŋ wo Eɓulɔhɛɛ̀ŋ wààŋ, “E yìwìà esaɓù mɔ̀ɛ̀ sùà wo Dayà do nàŋ kpùùmò anyùùŋ nyaŋ gbiŋ.”

⁹ Wo Eɓulɔhɛɛ̀ŋ naŋ wa haawè, yèè wo Dayà nauŋ wa gbìɛ̀ŋ e zòòlo maŋjɛ̀wɛ. Wèètii, anyùùŋ nyaŋ gbiŋ naŋ haawè nyaŋ, wo Dayà do nyiŋ nàŋ gbìɛ̀ŋ e zòòlo maŋjɛ̀wɛ màànààŋ wò naŋ wa gbìɛ̀ŋ e zòòlo wo Eɓulɔhɛɛ̀ŋ maŋjɛ̀wɛ esàɓù e hààweuŋ nɛ̀ lɛ.

¹⁰ Anyùùŋ nyaŋ gbiŋ naŋ gongò kɛ̀ wo Dayà do nyiŋ nàŋ jàà kùàŋ dìì sèè àŋ jɔɔlɔ̀ maŋ Sàwà maŋ dìì nyaŋ, àŋ yaà e gbòònò Dayàa dìì. Wɔŋ fɛ̀ì Dayàa naŋ woò wààŋ, “Anyùùŋ nyaŋ gò jɔ̀ɔ̀lɔ̀ è nɛ̀ɛŋ gbiŋ yaà wòòiŋ kè Sàwà Dayàa sùà lɛ, e gbòòno yaà nyiìŋ maŋjɛ̀wɛ.”

¹¹ E yaà tɔ̀ɔ niŋ janjai kɛ̀, wo nyùùŋ gbiŋ fè ɓɛ̀nɛ̀ŋ nɔ̀ŋ wò nyùùŋ tɔ̀ɔ̀nyaàŋ kòɓɛ̀ Dayài sèè wò jɔɔlɔ̀ maŋ Sàwà maŋ dìì, esaɓù kɛ̀ wɔŋ fɛ̀ì Dayàa naŋ woò wààŋ, “Wo nyùnɔ̀ɔŋ nɔ̀ŋ wo nyùùŋ tɔ̀ɔ̀nyaàaŋ koɓɛ̀ Dayài e yìwìà e hààwe sùà wɔ, nàŋ kɛɛnɛ̀ŋ wɔŋ nyiiŋ gèe.”

¹² Ke Sàwàa kuwà è nɛ̀ŋ bà gbiŋ kè do nyìnìàŋ è kèè hààwe. Kɛɛ wɔŋ fɛ̀ì Dayàa naŋ woò wààŋ, “Sèè wo nyùùŋ gbiŋ mɔnɔŋ wèè wo nɔ̀ŋ wɔŋ nyiiŋ gèeɔ̀ sùà, wò kuwa wo nyɛ̀nɛ̀ŋ e nɛ̀ɛŋ gbiŋ maŋ Sàwà Dayà maŋ naŋ woò lɛ.”

¹³ Kɛɛ wo Jisɛ̀ Kulaì naŋ wi wa bilɛ̀ŋ e yìwìà e gbòònò ke Sàwàa dìì, nààŋ wò naŋ wa dè ebɛ̀ŋ wi wèè e gbòòno wilɛ̀ lɛ. Wɔŋ fɛ̀ì Dayàa naŋ woò wààŋ, “Wo nyùnɔ̀ɔŋ gbiŋ àŋ naŋ kpùùnyɛ̀ŋ wɔŋ vànèkpaaà diɛŋ wɔ̀, wò yaà e gbòònò Dayàa dìì.”

¹⁴ Wo Jisɛ̀ Kulaì naŋ wa tɛɛ̀ nyɛ̀nɛ̀ŋ wèè wo kiɛ̀ŋ e ɗààhìì kpùùmaàŋ wo Dayà naŋ ɓèmè Eɓulɔhɛɛ̀ŋ diɛŋ koɓɛ̀ anyùùŋ nyaŋ fè àŋ Juùù nyaŋ lɛ̀, esàɓù Jisɛ̀ Kulaìɛ sùà wèè e yìwìà e hààwe sùà kɛ̀ wo Dayà do wi nàŋ kìɛ̀ŋ wo Jìnàŋ Nɛɛmaàŋ wò naŋ wa ɓèmè e ɗààhiì wèè wo wi kiɛ̀ŋ wɔ.

Ke Sàwàa yèè e ɗààhiìɛ

¹⁵ Nyɛ̀iŋ nààŋ wùìyaim nyàŋ, mìŋ do naŋ tòòmò e tɔ̀ɔ̀màŋsèì kei maŋ kààŋ wɔŋ niìsìa màŋ gbiŋ wèè kaiŋ kpìnìàŋ e yèɛ yaà ke jii miɛ̀ŋ lɛ. E teengaà anyùùŋ tìyèe naŋ nyimèè wèè aŋ nyɛ̀nɛ̀ŋ e keì titi bà lɛ, wo nyùùŋ bà gbiŋ fè niŋ ɓɛìŋ ɓɛ̀nɛ̀ŋ gè dao ɔ̀ɔ̀ wo vɔ̀ɔ̀nɔ̀ŋ è mìèsùàguùŋ bi.

¹⁶ Kɛɛ yɛi nɔŋ è yaà e nyaàiŋ dè maŋ ɗààhiì maŋ wo Dayà naŋ wa ɓemè koɓɛ̀ Eɓulɔhɛɛ̀iŋ yaà wo jɔ̀ɛ̀ɛ̀jɔ̀ɛɛuŋ nɔɔ̀ŋ bà guùŋ lɛ. Maŋ ɗààhiì mɛɛ̀ŋ gò wa nɔ̀ŋ wèè àŋ jɔ̀ɛ̀ɛ̀jɔ̀ɛɛ zimgbe, kɛɛ màŋ yaà wa nɔŋ wèè wo nyùùŋ guùŋ, yèè wo nyùùŋ bi nàŋ yaà wo Jisɛ̀ Kulaì.

¹⁷ E yèɛ mìŋ yaà woo lɛ̀ nàŋ yaà kɛ̀, ke Sàwàa fè ɓɛ̀nɛ̀ŋ vɔ̀ɔ̀nɔŋ ɔ̀ɔ̀ ke gè ɗààhìì e mìèsùàgùùŋ Dayàa dao wò naŋ wa banè maŋ doa hɔ̀nɔ̀ɔ̀ tiinàŋ kpɛ̀ùŋ jɛ̀wɛ̀ zììyà (430), yèèngàà paŋ wò naŋ wa kìɛ̀ŋ ke Sàwàa lɛ̀.

¹⁸ Sèè e kìɛ̀ŋ Dayà e nɔŋ nɔ̀ŋ wèè ke Sàwàa jɔ̀ɔ̀lɔ̀ dìì, kɛ̀ e kìɛŋ lii fè ɓɛìŋ ɓɛ̀nɛ̀ŋ nɔ̀ŋ wèè è ɗààhiìuŋ nɛ̀. Kɛɛ e gbio sùà, esàɓù ɗààhiìɛ wo Dayà naŋ wa ɓeme lɛ, naŋ nyɛ̀nɛ̀ŋ wò naŋ wa kìɛ̀ŋ e tɛ̀ɛ̀tɛ̀ɛ̀ koɓɛ̀ Eɓulɔhɛɛ̀iŋ.

¹⁹ Kpeiŋ kɛ̀, kiìŋ nàŋ yaà wa esàɓù ke Sàwàa? Ke Sàwàa naŋ wa nɔ̀ŋ kìɛŋ nyiŋ wèè ke tɔɔ̀ kɛ̀ èiŋ nyɛ̀nɛ̀ŋ e jùumù. Kɛɛ kè do wa nɔŋ nàŋ jeè e jèèsùà wo jɔ̀ɛ̀jɔ̀ɛ̀ Eɓulɔhɛɛ̀ɔŋ wo hnàŋ, koɓɛ̀ wo yèɔ àŋ naŋ wa kìɛ̀ŋ e ɗààhiìɛ wɔ̀. Aŋ màìkà nyaŋ naŋ wa kìɛ̀ŋ ke Sàwàa wo Mòòze, wo yèɔ yaà wa e fèèmàŋ Dayà yaà anyuùŋ kpùuŋ nyàŋ e teenga lii sùà wɔ.

²⁰ Wo nyùùŋ gbiŋ fè wa è fèèmàŋ Dayà yaà wo Eɓulɔhɛɛ̀ŋ e teengaà wò naŋ ɓèmè e ɗààhiìɛ ko nɛ̀uŋ niìŋ lɛ. Wuŋ guùŋ nɔŋ naŋ niŋ wa nyɛ̀nɛ̀ŋ.

Esàɓù ke Sàwàa

²¹ Kɛɛ tii naŋ tɔɔ̀ ke Sàwàa naŋ gììyè e ɗààhìì Dayàa maŋhɛɛ? Kpele, ke gò niŋ gììyà màŋhɛɛ! Sèè ke sàwà bà gbiŋ ke weè nɔ̀ŋ wèè ke wi kìɛ̀ŋ wɔŋ nyiiŋ gèe, wo Dayà do wi weè nàŋ jàà kùàŋ dìì e tɔ̀ɔ̀nyaàŋ sùà, sèè è jɔɔlɔ̀ìŋ ke sàwà bi dìì.

²² Kɛɛ wɔŋ fɛ̀ì Dayàa naŋ woò wààŋ, anyuùŋ kpùuŋ nyàŋ gbiŋ àŋ yaà e gààŋ jùumù dìì. Yèè weètii, e ɗààhiìɛ wo Dayà naŋ wa ɓemè lɛ, è do nàŋ nɔ̀ŋ wèè anyùùŋ nyaŋ gbiŋ naŋ hààwè wo Jisɛ̀ Kulaì nyaŋ.

²³ Ke Sàwàa kè toomàŋ wì, yèè ke naŋ wi gbìɛ̀ŋ e gaàŋ nyiŋ nɛ̀ dì e jèèsùà e teengaà e hnàŋ, wèè sèè è naiŋ ɓɛ̀nɛ̀ŋ kɛ̀ɛ̀nɛ̀ŋ e hààwe.

²⁴ Tɔɔɓaa ngèè, ke Sàwàa hewa wèè nàŋ nɔ̀ŋ wo kààmɔɔŋ wiɔ̀ e jèèsùà wo Jisɛ̀ Kulaì wo hnàŋ. Kpeiŋ kɛ̀, è doiŋ weè nàŋ ɓɛ̀nɛ̀ŋ kɛ̀ɛ̀nɛ̀ŋ e hààwe, e kìlà wo Dayà wo wi jàà kùàŋ dìì e tɔ̀ɔ̀nyaàŋ sùà.

²⁵ Kɛɛ e teengaà wo nyùùŋ naŋ naàŋ gbèè e ɗèwè e hààwe kùwie lɛ̀, kɛ̀ esaɓù bà gbiŋ fè ɓɛìŋ wèè kè Sàwàa do nɔ̀ŋ wò kààmɔɔŋ weè wi.

²⁶ Nyɛiŋ nààŋ gbiŋ nìŋ yaà aŋ jɔ̀à Dayà, esàɓù e hààweɛ̀ niŋ kuwa wo Jisɛ̀ Kulaì sùà lɛ.

²⁷ E kìlà nààŋ àŋ naiŋ wa gùò e dèè Jisɛ̀ Kulaìɛ sùà, nìŋ naŋ nɔ̀ŋ mààŋ wo Jisɛ̀ Kulaì wuŋ bi ke kpèèuŋ nɛɛ̀ŋ sùà.

²⁸ E fèemàŋ gòòno bà gbiŋ fè e fèèmàŋ àŋ Juùù ɔ̀ɔ̀ anyùùŋ nyaŋ fè àŋ Juùù nyaŋ, àŋ ɗo ɔ̀ɔ̀ ànyùùŋ nyaŋ fè è ɗo dìì nyaŋ, àŋ felaa ɔ̀ɔ̀ àŋ jɔùŋ, nyɛ̀iŋ nààŋ gbiŋ nìŋ yaà anyùùŋ guùŋ e yìwìà e hààweiŋ nɛ̀ wo Jisɛ̀ Kulaì sùà.

²⁹ Sèè mùŋ nɔ̀ŋ wo Jisɛ̀ Kulaì sùà, kɛ̀ mùŋ yaà naàŋ wo bàumbà wèè ke kpòò Eɓulɔhɛɛ̀ŋ, yèè wo Dayà doum nàŋ kìɛ̀ŋ e yèɛ wo naŋ ɓèèmè e ɗààhiì diɛŋ lɛ̀.